रोमी 3
3
परमेश्वरौ विश्वासयोग्यता
1होट हो डेनाङ नाखुरीक यहूदीको मध्याङ सुयेर इट डेकी ह्योक्ले, “यहूदी छानार ही फाइदा छाना ट? ही खतना जाट्नाङ न हीर फाइदा ले ट?” 2हरेक किसिमै फाइदा ले। पट्ट डेनाङ पहिला कुरा च परमेश्वरै यहूदीकोलाक लहो पवित्र वचन सुम्पडीम याहा। 3तर होखुरीक मध्याङ कुडीक जना विश्वासयोग्य मालेनाङ र ही छाना ट? ही होखुरीक विश्वासयोग्य माछाना डेनाङ न परमेश्वरौ विश्वासयोग्यता रद्ध छान्ने ट? 4होङ्च माछान्ख्यो, पट्ट न भर्मी झूटो लेनाङ र परमेश्वर सत्य ले। धर्मशास्त्राङ होसकुङ बारेयाङ इट डेयार रीक्ङने,
“नाको लहो बोली वचनाङ ठिक ठहरीस्ले,
र न्याय छान्नाङ नाकै न जुले।”
5तर इडीक कान यहूदीकै दुष्ट काम जाट्च बाटै झन् परमेश्वरकी धार्मिक ले डेयार भर्मीकोलाक टान्हाक्ले डेनाङ, कान ही डेकी ह्योक्ले र? ही परमेश्वर कानखाटा मीरीस ख्योहार सजाय याहा डेनाङ अन्याय जाटा डेयार डेकी ह्योक्ले? कुडीक भर्मीकै याङ्च न विचार जाट्ले। 6होङ्च होइन, इडीक परमेश्वरै ठिकखाटा कानकी न्याय माजाट्ले डेनाङ, कुटजाट्न संसारुङ अरु भर्मीकोलाक न्याय जाट्की ह्योक्ले ट? 7सुयेर याङ्च तर्क जाट्की ह्योक्ले, “इडीक ङै जाट्च खराब कामै परमेश्वरौ सत्यताकी चम्कडीले र होसे लकीङ होसकुङ महिमा झन् बड्डीस्ले डेनाङ, हीजै ङाकी पापी डेयार दोष याखी?” 8अनि कुडीक भर्मीकै कानै इट डेया डेयार निन्दा जाट्ले, “कुडीक वास्टै कानै पाप जाटा, होडीक न सेछ छान्ने।” याङ्च भर्मीकोलाक परमेश्वरै सजाय याल्हे।
धर्मी सुर माले
9होटडेनाङ ही कान यहूदीको अरु भर्मीको डेनाङ असल ले ट? अवस्य माले। यहूदीको र अरु पट्ट न अन्यजातिको पापौ बसाङ ले डेयार पहिला न ङै डेम भ्यामने। 10धर्मशास्त्राङ इट डेयार रीक्ङने,
“धर्मी सुर माले, काट जना र माले,
11परमेश्वरकी बुझडीस्च सुर माले,
परमेश्वरकी पाच सुर माले।
12होखुरीक पट्टये लाम म्ह्याक्ङने,
अनि पट्ट न काम मालग्डीस्च छान्नने,
सेछ काम जाट्च काट जना र माले।”#भजनसंग्रह १४:१-३
13“होखुरीकुङ घोक्रो खुल्ला चिहान लकीङ राछ माजाप्म नाम्च ल्याक्च ले,
होखुरीकुङ लहो न मेलेटै ढाट्डीमने।”#भजनसंग्रह ५:९
“होखुरीकुङ बोली विषालु बुलौ विष ल्याक्च न ले।”#भजनसंग्रह १४०:३
14“होखुरीकुङ मेङ्गेरीङ सराप र खाच कुराको मट्टै छ्युक्ले।”#भजनसंग्रह १०:७
15“होखुरीक भर्मी साट्की छिटो ले।
16होखुरीक कुला-कुला नुङ्ले, होला-होला विनाश र दु:ख फैलडीले।
17अनि शान्तियो लाम होखुरीकै माचीन्डीमने।”#यशैया ५९:७-८
18“होखुरीक परमेश्वरकी आदर माजाट्ले।”#भजनसंग्रह ३६:१
19अब व्यवस्थै ही कुरा डेले होसे व्यवस्थौ अधीनाङ लेच भर्मीकोलाक डेच हो डेयार कानकी थाहा ले। होटबाटै सुयेर पाप माजाट्नने डेयार बहाना जाट्की माढीन्ले र संसारुङ पट्ट न भर्मीको परमेश्वरौ म्याहासाङ जवाफ याखी टोङ्खी पर्ले। 20व्यवस्था मन्डीयार सुर परमेश्वरौ म्याहासाङ धर्मी माठहरीस्ले हीजैडेनाङ व्यवस्थै च भर्मीये जाट्च पाप चीन्डीयाक्ले।
विश्वास लकीङ धर्मी ठहरीस्च कुरा
21तर अब व्यवस्था बिना न परमेश्वरै भर्मीकोलाक धर्मी ठहरीले डेच कुरा होसकै कानकी टान्हाक्ङने। इसे कुरा व्यवस्था र अगमवक्ताकुङ किताबाङ रीक्ङने। 22इटजाट्न येशू ख्रीष्टाङ विश्वास जाट्च पट्ट न भर्मीकोलाक परमेश्वरै धर्मी ठहरीले। हीजैडेनाङ होसकै सुकीर भेदभाव माजाट्ले। 23हीजैडेनाङ पट्ट न भर्मीये पाप जाट्नने, होटबाटै आदरौ योग्य परमेश्वर लकीङ लोस ले। 24तर परमेश्वरै अनुग्रह जाटार ख्रीष्ट लकीङ भर्मीकोलाक होटन धर्मी ठहरीले, हीजैडेनाङ ख्रीष्ट येशूये पट्टओ साटोवाङ लहे न सजाय भोग्डीयार पाप लकीङ भर्मीकोलाक छुटकारा याहा। 25हीजैडेनाङ काल्है डुप्की पर्च दण्ड लकीङ जोगडीकी परमेश्वरै ख्रीष्ट येशूकी बलिदानौ लागि बीर्न्हका। होसकुङ ह्यु काल्हौ लागि जोकाक्च हो डेम विश्वास जाट्च पट्टकै पाप लकीङ क्षमा डुप्ले। परमेश्वरै कानै जाट्च पहिलुङ पापौ सजाय माह्याले, इसे कुरा लकीङ होसको धर्मी ले डेच टान्हाक्ले। 26परमेश्वर लाहा न धर्मी ले र येशूमीटाक विश्वास डाचकोलाक होसकै धर्मी ठहरीले डेच कुरा प्रमाण याखीयो लागि होसकै चँहुङ समयाङ इसे काम जाटा।
27होटडेनाङ कानै हीयो बारेयाङ घमण्ड जाट्की? घमण्ड जाट्च च कुरा न माले। धर्म कर्मये भर्मीकी घमण्डी खास्ले। तर ख्रीष्टाङ विश्वास जाट्नाङ लहो धर्माङ घमण्ड जाट्च कुरा न माछान्ने। 28होटबाटै व्यवस्था मन्डीयार होइन, तर ख्रीष्टाङ विश्वास जाटार मट्टै परमेश्वरौ म्याहासाङ धर्मी ठहरीस्ले डेम कान विश्वास जाट्ले। 29ही परमेश्वर यहूदीकुङ मट्टै परमेश्वर हो र? ही होसको अन्यजातिकुङ परमेश्वर होइन र? साँच्ची न होसको पट्टकुङ न परमेश्वर हो। 30हीजैडेनाङ परमेश्वर काट मट्टै ले। होसकै खतना जाट्च यहूदी लेख्यो वा खतना माजाट्च अन्यजाति लेख्यो, पट्टकोलाक होखुरीकुङ विश्वास लकीङ न लहो म्याहासाङ धर्मी ठहरीले। 31ही कानुङ विश्वासै व्यवस्थाकी रद्द जाट्की? साँच्ची न होइन! बरु काल्हाको च व्यवस्थाकी साँचो रुपै टी मन्डीले।
Trenutno izabrano:
रोमी 3: EMGP
Istaknuto
Kopiraj
Uporedi
Podeli
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
© 2025 by Mother Tongue Translators Society and Wycliffe Bible Translators, Inc.