रोमी 2
2
परमेश्वरौ न्याय
1ए भर्मीको, नाखुरीक सु लेनाङ र ङा निर्दोष ले डेयार बहाना माजाट्नी, हीजैडेनाङ नाखुरीक अरुकी कुसे कुराङ दोष लैडीले, होला न लाहाकी र दोषी ठहरीले, हीजैडेनाङ नाखुरीक र होसे न काम जाट्ले। 2परमेश्वरै याङ्च काम जाट्च भर्मीकोलाक ठिक न्याय जाट्ले डेच कुरा कानकी थाहा ले। 3ए भर्मीको, नाखुरीकै याङ्च काम जाट्च भर्मीकोलाक दोष लैडीले र लाहा र होसे न काम जाट्ले डेनाङ ही नाखुरीक परमेश्वरौ न्याय लकीङ भीस्ले डेम आर्मीट्ले? 4की होसकुङ प्रेमकी तुच्छ आर्मीट्ले? होसकै च दया र धैर्यखाटा लेन्ने र नाखुरीकुङ पापी हृदय होसको पट्टी ल्हेटाक्च मीमन जाट्ले डेच कुरा ही नाखुरीककी थाहा माले? 5तर नाखुरीक लहो हृदयकी कठोर खासार पाप लकीङ ल्हेस्की मापा। होटबाटै नाखुरीकै क्रोधौ दिनाङ बाड्को दण्ड डुप्ले, कुसे दिनाङ परमेश्वर न्याय जाट्की राल्हे। 6हीजैडेनाङ परमेश्वरै पट्ट न भर्मीकोलाक होखुरीकै जाट्च काम अनुसार इनाम याल्हे। 7कुडीक जना भलाइ जाट्च कामाङ लग्डीस्न ङुवार महिमा, आदर र सेन र मासीच जीवन पाले। परमेश्वरै होखुरीककी सेन र मासीच जीवन याल्हे। 8तर लाहाकी मट्टै प्रेम जाट्च, सत्य कुराकी मामन्डीच र मास्च काम जाट्च भर्मीकोलाक परमेश्वरै बीह्रीमसेच दण्ड याल्हे। 9मास्च काम जाट्च पट्ट न भर्मीको मीटाक सङ्कष्ट र आपत आइलग्डीस्ले, पहिला यहूदीको मीटाक र होटै न्हुइङ अन्यजातिको मीटाक राल्हे। 10तर परमेश्वरै सेछ काम जाट्च पट्ट न भर्मीकोलाक पहिला यहूदीकोलाक र होस न्हुइङ अन्यजातिकोलाक र महिमा, आदर, शान्ति याल्हे। 11हीजैडेनाङ परमेश्वरै सुकीर पक्षपात माजाट्ले।
12परमेश्वरौ व्यवस्था बिना सु-सुये पाप जाटा, होखुरीक व्यवस्था बिना न नाश छान्ने। व्यवस्था वार्छकै पाप जाटा डेनाङ होखुरीक र व्यवस्था लकीङ न दोषी ठहरीस्ले। 13हीजैडेनाङ व्यवस्था सेयार मट्टै भर्मी परमेश्वरौ म्याहासाङ धर्मी माठहरीस्ले, तर व्यवस्था मन्डीयार मट्टै भर्मी परमेश्वरौ म्याहासाङ धर्मी ठहरीस्ले। 14हीजैडेनाङ अन्यजातिकै व्यवस्था थाहा माढीन्नाङ र स्वभावै व्यवस्था अनुसारुङ काम जाट्ले डेनाङ, होखुरीकै जाट्की छान्च र माछान्च कुराको भाक्की ह्योक्ले डेच टान्हाक्ले। 15होखुरीकुङ हृदयाङ व्यवस्थौ कुराको ले डेयार लहो चालचलनै टान्हाक्ले। होट छान्चबाटै होखुरीकुङ विवेकै कुडीक बेला होखुरीककी दोष याल्हे र कुडीक बेला ठिक काम जाट्च समर्थन जनडीले। 16हीजैडेनाङ होसनीक ङै प्रचार जाट्च सेछ समाचार अनुसार परमेश्वरै येशू ख्रीष्ट लकीङ भर्मीकुङ हृदय भित्री आर्च्युक्ङ डाच कुराकुङ न्याय जाट्ले।
यहूदीको र व्यवस्था
17तर नाखुरीक लाहाकी यहूदी हो डेले र व्यवस्थाङ भर पर्ले। परमेश्वरकी चीन्डीले डेयार घमण्ड जाट्ले। 18परमेश्वरै कान लकीङ ही इच्छा जाट्ले, कानकी थाहा ले डेयार धाक याल्हे। नाखुरीक व्यवस्था लकीङ न पाहार बा-बाड्सो कुरा जाट्ले। 19मीमनुङ अन्धाकोलाक डोरीकी ह्योक्ले डेयार धाक याल्हे। नाखुरीक छुम्ठाङ लाम माडाङ्चकुङ लागि लाहाकी ज्योति हो डेम आर्मीट्ले। 20र मूर्ख भर्मीकोलाक ठिक कुरा पाहाक्की ह्योक्ले डेले। माह्वार्छकोलाक पाहाक्च कान न हो डेले अनि परमेश्वरौ व्यवस्था कानखाटा लेचबाटै वार्खी पर्च पट्ट न कुरा कानकी न थाहा ले डेयार दाबी र जाट्ले। 21होट छान्चबाटै अरुकी शिक्षा याछ नाखुरीक लाहा चहिँ हीजै पालन माजाट्ले ट? अरुकी चहिँ खुस्की माछान्ने डेयार प्रचार जाट्ले तर लाहा चहिँ हीजै खुस्ले ट? 22नाको लाहा न अरुकी व्यभिचार जाट्की माछान्ने डेयार डेले तर लाहा चहिँ हीजै व्यभिचार जाट्ले? मूर्ति पूजा झीर्न सेच काम हो डेयार नाखुरीक अरुकी पाहाक्च भर्मीको, हीजै लाहा न मन्दिर खुस्ले? 23परमेश्वरै याछ व्यवस्था कान वार्ल्हे डेयार घमण्ड जाट्ले, तर व्यवस्था मामन्डीयार परमेश्वरौ हीजै बेइज्जत जाट्ले? 24होटबाटै धर्मशास्त्राङ नाखुरीकुङ बारेयाङ इट डेयार रीक्ङने, “नाखुरीक यहूदीकै जाट्नाङ अन्यजातिकुङ मीघ्याङ परमेश्वरौ बेइज्जत छान्नने।”#यशैया ५२:५
25इडीक नाकै व्यवस्था मन्डीले डेनाङ खतना जाट्च सेम्हन छान्ने, तर व्यवस्था उलङ्घन जाट्ले डेनाङ च खतना माजाट्च भर्मी ल्याक्च न छान्ने। 26इडीक खतना माजाट्च भर्मीकै व्यवस्था पालना जाट्ले डेनाङ ही होखुरीक परमेश्वरौ म्याहासाङ खतना छान्च लेखा न माछाना र? 27खतना माजाट्च अन्यजातिकै व्यवस्था मन्डीले डेनाङ, होखुरीकै न नाखुरीककी दोषी ठहरीले। हीजैडेनाङ नाखुरीक खतना जाट्च यहूदीकोखाटा रीक्च व्यवस्था लेनाङ र अझै नाखुरीक पाप जाट्ले। 28हीजैडेनाङ भर्मीकोलाक टान्हाक्कीयो लागि मट्टै यहूदी नियम मन्डीच भर्मी साँचो यहूदी होइन। होटजाट्न न शरीराङ जाट्च खतना र साँचो खतना होइन। 29तर साँचो यहूदी होसे हो, सु भित्री मीमन लकीङ न यहूदी छान्ने। साँचो खतना जाट्च कुरा रीक्च नियम मन्डीच कुरा मट्टै होइन, तर पवित्र आत्मै हृदय बदलिच कुरा हो। याङ्च भर्मीकुङ प्रशंसा भर्मीको लकीङ होइन, तर परमेश्वर लकीङ छान्ने।
Trenutno izabrano:
रोमी 2: EMGP
Istaknuto
Kopiraj
Uporedi
Podeli
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
© 2025 by Mother Tongue Translators Society and Wycliffe Bible Translators, Inc.