Ətefɨ̂aʼ 17
17
Ə fo ngəʼ sê Pɔ̂l yî ghɨ vəynghe ə Tèsàlonikà
1Pɔ̂l yî Silàs ə tə kwiə tɔynə̂ endaʼ ə Àmfipolìszè è Àpòlònyà ə pə̀ zaʼâ endaʼ ə Tèsàlonikàzè, elùʼ vɛ ə ndɛ àtsɨ̂ynte ə̀ghɨ ə Njûsə̀ tè nyi. 2Kè kə è tè nə̂ tsɛ̂ nâʼà pi ghayn kə è ndùə, Pɔ̂l ə ndùə ə ndɛ̂ atsɨ̀ynte. Ə mtuʼ me ndaʼam̀ m̀ta, è ve kâytə̀ ə̀ghɛ yî ghə̀ ghɨ mə ghe fɨ ə ŋwàʼlè ə̀ Fèzhə̀. 3È tè tsâ paynsə̂ ə̀ghɛ, tyə̂nə̀ əndayn, piə nə, vɛ ə kɨmne ndə̂m nyîə kyi se fe ngəʼ, se kwu se fɨnə zòmə̀, “Njisə̀s vɨ̂yn ə m wâmnə̀ sê ghàyn kûmə̀ vəyn, ə nyi vəyn vɛ ə chɔʼ ndə̂m.” 4Ghɨ Njûs yîghe ə zɨə ə pomə ə̀ghɛ ghɛ ə è tè pìə ə tsɨ̀yntə̀ ə Pɔ̂l ànɔ̂yn yî Silàs. Nâʼà ànɔ̂yn ə ghɨ endaʼ ə Nglêk kyîke ə ke tè ngɨmnə Zhə̀fè paʼsə̂ è zəyn e tɛ yîghe ə pɔŋɔ tsɨ̀yntə̀.
5Pîza ghɨ Njûs yîghe ə zhə̀tə̀ àghə̀ʼ kə ghɨ tsɨ̂yntè ə Pɔ̂l yî Silàs anɔ̂yn, ə zùŋtə̀ ànɔ̂yn ə mmɨ̂əmê pîəm kyîke, ke ə zhə̀tə̀ sè kwiə zɔ̂fə̀ tsɛ̂ endaʼ, ə ndùə kəmtə̂ ə̀cho se ndɛ ə Njesɨ̀ynə̀, nə ghənə kyiŋə Pɔ̂l yî Silàs se kyiə pə̀yn è ghənə ə ghɨghe əshi. 6Pîza ə pə̀ kə ghənə tàʼa fe Pɔ̂l yî Silàs ə kyîə Njasɨ̀yn è ghɨə pomə əmɔ̀ʼɔ̂ ə shìnə̀ pə̀ è ghənə ə ghɨ esaʼaghe əshi, pɨa pîə nə, “Ghɨ ghɨnə nyi nyî mə ghe ə nə̀ʼsè mbi èkɨ̂m, sè nyi mə ghe ə kwi pə̀ tayn fayn zôyn, 7Njasɨ̀yn ve njì ghənə ə ndə̀mə̀ ə və ndɛ. Nâʼà ghənə əkɨ̂m kwìə kəmə tèsaʼ tə fɔ̀yn èghaʼâ ə̀ ghasènìte pîə nə fɔ̀yn ə̀mɔ̀ʼɔ̂ fɨyn nyi ndò, zə vəynze e nyi Njisə̀s.” 8Zɨnə mə ə nə̀ nə nɔ̂yn əghɨ̀kè è ghɨə saʼaghe endaʼ ə nyi əfètə̂ àfɨm. 9Ghɨ saʼa nə ghɛ ə nə̀, Njasɨ̀yn yî ghɨpomə ghɛ ə ndàʼà èkɛ fu, ə ke zà nə ghənə ndo.
Ə fo ngəʼ sê Pɔ̂l yî ghɨ vəynghe ə Pelyà
10Tuʼve ə chîə, ghɨə poməghe ə njìə Pɔ̂l yî Silàs ə tomə nə ghənə tə ndu endaʼ ə Pelyàzè kûmə̀ ngəʼ nə zɨ̂yn. Ghənə ə ndùə fɨə fu ə ndùə njiə ə ndɛ̂ atsɨ̀ynte ə̀ ghɨ Njûsə̀. 11Ghɨ ghɛ ə ghe tè nyi fu tè nyi əghɨ, kɔ̂ŋɔ̀ se zɨtə eghɛ tsɛ̂ ə̀ghɨ ə Tèsàlonikà. Ghənə tè kɔ̂ŋɔ̀ nâʼà àchûŋ se zɨtə tom èchùŋ ə faŋa sè tɔŋɔ ə̀ghɛ ə Ŋwàʼlè ə̀ Fèzhə̀ kè tûʼmè m̀kɨ̂m kyiŋə se fe nə ghɛ ghɛ ə Pɔ̂l tè ndàʼa tè nyì səmɔʼ ə. 12Ghɨ etsɨə fu, è zəyn e tɛ è ndômnèghè, mə nyi ə̀ghɨ Nglêkghè ə pomə sê Njisə̀s. 13Pîza ə pə̀ kə ghɨə Njûsə̀ ə Tèsàlonikà zɨ nə Pɔ̂l ə ndàʼà tom ə̀ Fèzhə̀ ə Pelyà, ghənə ə pə̀ fu ə zhə̀tə̀ se chiyntə ə̀ghɨ nə ghənə ndwise nôzè. 14Kè sə ashìŋə̀ ghɨə poməghe ə tomə Pɔ̂l yî ghɨə mɔ̀ʼɔ nə ghənə tso ndu èndomve ə etipìə tsô èghaʼâ, pîza Silàs yî Timotì ə faŋa kə ə Pelyà. 15Ghɨ ghɛ ə yighə̀ Pɔ̂l tè ndò əmɔʼ ə tɔ̀ʼnə̀ è vəyn ə ndùə tânə̀ endaʼ ə Atènzè ə zà vəyn fu ə kɛsə pə̀ ə Pelyà è tom kə Pɔ̂l tom nə Silàs yî Timotì zaŋse pəyn kote Vəyn.
Pɔ̂l ə wàmnə̀ sê ghɨ Atènə̀
16Ə̀ tè nyi kə Pɔ̂l tè lɨmtə̂ Silàs yî Timotì ə Atèn, è tè nyîə nyi èfɨmsêzè kə è tè fe kê nə ndaʼ ətəynze tè nyi mə ə̀ lwiyn ke èfɨaʼsè. 17È və kyîə èkâtè əghɛze ə ndɛ̂ atsɨ̀ynte yî ghə̀ ghɨ Njûsə̀, è ghɨ Nglêk ghɛ ə tè fànə Zhə̀fè, è kɨsè ə telùʼ tezhɔynte tuʼmè m̀kɨ̂m yî ghə̀ ghɨ ghɛ ə è tè pə kwəynə̂ yî ghə̀ ghənə fu. 18Nɔ̂yn əghɨ̀ ə Epikulùskè è Sètoyìkè ə zhə̀tə̀ se saʼnê əghɛ yî ghə̀ Pɔ̂l. Yîghe e pfɨfə nə, “Wùə vɨ̀nə mɔ̀msə̀ se pì nə ghe, keva nâʼà èghɛ zhî zə?”
Yîghe ə pə̀ynsə̀ nə, “È mɔ̀msə̀ sə̂ wàmnə̀ eghɛ kûmə̀ m̀zhə̀ mə ghɨatumə̀m.” Ghənə tè wàmnə̀ nyî kûmə̀ nə Pɔ̂l tè ndàʼa tom èchùŋ kûmə̀ Njisə̀s è kɨsè zômə̀ ə Vəynze. 19Ghənə ə njìə Pɔ̂l, ə pə̀ è vəyn ə saʼ endaʼ zə shi zɛ ə tè tɔŋtə nə, Àlapangùs ə pìə sê vəyn nə, “Tsàyn sê ghàs nə kyì ezaʼlê efe zɨ̂nə ə ò zaʼlə sê ghɨ nyî tyə̀nə̀ nə ghe ə? 20Ò pìə ə̀ghɛ mɔʼɔ ndɔ̀ʼɔ ghàs tyəm zɨ, ghàs e kɔ̀ŋɔ̀ nə ò tsàyn paynsê ə̀ghɛ ətəynghe sê ghàs?” 21Ə̀ tè nyi za, ghɨ ə Atènə̀ è ghɨ atum ghɛ ə tè ndamə fu, tè nyîə kɔ̀ŋɔ̀ sə̂ tsɨs shîŋə̀ tekɨ̂m, tsâ, fɨnə zɨə ə̀ghɛ ə fe ghɛ ə ghe kwûʼ kyâyn kendô.
22Pɔ̂l ə ndwìə tyəmə̂ ə saʼ endaʼ nə zɛ əshi ə pìə sê ghɨ Atèn nə ghɛ nə, “M fe nə ghàyn ke ndô se kɔʼsê mzhə̀ fayn nâʼà àchûŋ, 23kûmə̀ nə kè kə m fe kwìə ka fayn endaʼ, ə fe tèluʼ tɛ ə ghàyn ngɨmnə zhə̀m mâynmè ətəyn, te tsɨ̂ə kə nyi, ə fe kəpî àlaŋ efo kyîke mə ə nyàʼ ətəyn nə, ‘Kɨnə nyi sê Zhə̀ fîfe, mə wùə keva fəynfe.’ Zhə̀ nə fɨ̂nə̀ ə ghàyn ngɨmnə nyî, keva Fəynfe, nyi Fezhə̀ fɛ m wamnə̀ sê ghàyn zôyn kûmə̀ Fəynfe. 24Ə Fezhə̀ fɛ ə Fe tè pom mbi è nâʼà pi àkè kɛ ə ke nyi ətəyn, nyi Pɛ̂pɛ və èkwùtwəyn è chike, mə È ndamə va m pfɨ̀ə mə ə pɛ è ghoghe. 25Kyiŋə kəpi va nə ghâsènì fo fɨa kyîke sə̂ fɨaʼà se Fəynfe, kə ə̀ se nyi Vəyn vɛ ə È fo ndamze, è zhwìsèkè, è nâʼàpî àkè sê nâʼà pî sê ndè. 26Zhə̀fè tè pom ke wùə èmɔ̀ʼ sə shi, nâʼà ghɨ ndaʼà tèkɨ̂m ə fɨə ke sê wùə nə vɨ̂yn èmɔ̀ʼ ə nə̀ nə ghənə ə ndamə tɔynə̂ kə tâŋ tə mbi tekɨ̂m. Fe ə tə fɨ̀aʼnè shîŋə̀ kɛ kə ghɨ nə ghɨ̂yn ndam ə chi, è luʼ tɛ kə ghənə nə ndamə ətəyn. 27Zhə̀fè tè nəyn nyî kə ghɨghe ə kyiŋə Vəyn, kə ə fɨ pəyn sê Vəyn ə fe Vəyn, pî kə È va sə aghaf sê nâʼà pîndè. 28Wùtɔfə vîvè tè pi nə:
‘Ghâsènì ndamə kûmə̀ Fèzhə̀, kwîə,
fɨyn nyi nâʼà pi àkè kɛ ə ghâsènì nyi kəynke.’
Ghɨtɔfə ghayn yîghe ə tə pi kepî nə:
‘Ghâsènì nyì kepî əghɔ Vəynghe.’
29E za nyi nə kə ghâsènì se nyi ə̀ghɔ Fezhə̀, ghâsènì kyi va sə̂ njiə nə Zhə̀fè nyi afɨa kə wùə tsɨsə ə kwàʼtə̀ kə ekyì akas kyîke, kɨ̀sə è tsof ə tə èchi. 30Zhə̀fè ə ndə̀m nə Fe vayn kàʼa Fe fo ngəʼ sê wùə ə mtuʼ mɛ ə wùə tè keva Vəyn, pîza sè kânə̀ nâʼà pi sê ndè nâʼà pi ghayn zôyn nə è kwiyne təmə ə vəynghe piə. 31Kûmə̀ nə Zhə̀fè tè nyi mə Fe ə ndə̀m tuʼ fɛ ə Fe tə saʼa ghɨghe əkɨ̂m ətəyn fà mbi, ke chichi. Fe tə nə, ə wùə vɛ ə è chɔʼ ndəm saʼ ghɨ nə ghɨyn sê vəyn. Fe tyə̀yn chwìə nə zɨnə̀ se nâʼà pîndè mə È ndwisə̀ wùə nə vɛ ekwu.”
32Ə tè nyi kə ghənə zɨ kə Pɔ̂l wàmnè ghɛze kûmə̀ èzômə̀, ghɨə mɔ̀ʼɔghe e sè chaʼa vəyn, pîza yîghe e pîə nə ghənə kɔ̀ŋɔ̀ ndò se zɨə kwəynsê ekyì ewàmnè nə zɛ mə. 33Pɔ̂l ə ndwìə ashìŋə̀ nə kɛ ə fɨə fumə atsɨ̀ynte. 34Ghɨ yîghe ə ndùə paʼsə̂ sê Pɔ̂l ə pomə tom zɛ ə è tè tsâ. Ghɨ nə ghɨ̂yn tè nyi Ndyɔ̀nishùs, mə za nyi wùə əfètə̂ ànɔ̀yn esaʼke, è wùzhɔyn vîvè, zə vəynze e nyi Ndàmalis è ghɨə mɔ̀ʼɔghe.
Trenutno izabrano:
Ətefɨ̂aʼ 17: bfm
Istaknuto
Podeli
Uporedi
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
©2022 CABTAL