लूका 3
3
बतिस्मो देबाळा यहून्ना को परचार
(मत्ती 3:1–12; मरकुस 1:1–8; यहून्ना 1:19–28)
1आ बात जणा की ह जद तिबिरियुस कैसर का राज-काज को पन्दरवो बरस हो, जद यहूदिआ को राजपाल पिन्तुस पीळातुस हो, अर गलिल को राजपाल हेरोद हो, अर बिको भाई फलिपूस इतूरिया अर तरखोमीतिस को, अर अबिलेन को राज-काज लिसानियास क तळै हो। 2बि टेम हन्ना अर केफा म्हायाजक हा, बा दिना म जकरयाह का छोरा यहून्नानै उजाड़ म परमेसर का समचार लाग्या। 3अर बो यरदन नदि अर बिकै आसपड़ोस की सगळी झघा म घूम-घूम परचार करतो हो क, “थारा पापऊँ तौबा कर पाणी को बतिस्मो लेल्यो जिऊँ परमेसर थारा पापनै माफ कर देसी। 4जंय्यां की यसाया परमेसर की खेबाळा का बचना हाळी पोथी म मंडर्यो ह क, ‘कोई उजाड़ म हेलो देवै ह, परबु ताँई गेलो बणाओ अर बिको गेलो सिदो-सपाट करो। 5सगळी घाट्या को भराव कर इकसार कर्यो जाणो, टेडा-मेडा गेला सिदा कर्या जाणा अर बेढंग का गेलानै ढंग का बणाया जाणा जरूरी ह। 6अर सगळा मिनख परमेसर का छुटकारा का कामनै देखसी।’” 7#मत्त 12:34; 23:33जत्ता बी यहून्ना क कनै पाणी को बतिस्मो लेबा आता बा सगळानै बो एकई बात बोलतो, “अरै सपोलो थानै, थार प पड़बाळी परमेसर की झाळऊँ बचबा ताँई कूण बता दिओ? 8#यह 8:33जणा इब थारा करमाऊँ ओ बेरो पड़णो चाए क थे पाप करबो छोड दिआ हो। अर अंय्यां मना जताओ की म्हें अब्राहम की ओलाद हां। क्युं क म जाणू हूँ अर थारूँ बी बोलुँ हूँ परमेसर आ भाठाऊँ बी अब्राहम ताँई ओलाद पैदा कर सकै ह। 9#मत्त 7:19इब कुहाड़ो दरखत की जड़्या प ह जखो बोजो चोखो फळ कोनी ल्यावै बिनै का'टर आग म बाळ दिओ ज्यासी।” 10जणा बा भीड़ बिऊँ बुजी, “म्हानै काँई करबो चाए?” 11बो बोल्यो, “जिकनै दो कुर्ता हीं बे बिकै सागै बाट ले जिकनै कोनी। अर जिकनै रोटी ह बो बी अंय्यांई करै।” 12#लूक 7:29चुंगी लेबाळा बी बिकन पाणी को बतिस्मो लेबा आया अर बिऊँ बुज्या, “म्हानै काँई करबो चाए म्हराज?” 13बो बानै ओडायो, “जत्तो थानै बताएड़ो ह बिऊँ बेत्ती मना लिज्यो।” 14सिपाईड़ा बी बिऊँ बुज्यो, “म्हें काँई करां?” बिको जुबाब ओ हो क, “थे पिसा ताँई मिनखानै मना डराज्यो बस थारी तनखा म राजी रेहज्यो अर कोई प झूठो दोस मना लगाज्यो।”
15इब मिनखा की आस बढबा लागी क मसी परगट होबाळो ह। अर बे सोचबा लागर्या हा क, “कदै ओई तो मसी कोनी ह?” 16जणा यहून्ना बा सगळाऊँ बोल्यो, “म तो थानै पाणी को बतिस्मो देर्यो हूँ पण जखो आबाळो ह बो बोळो सक्तिसाली ह म तो बिकाळा जूता का सळू खोलबा जोगोई कोनी। अर बो थानै लाय अर पबितर आत्मा को बतिस्मो देसी। 17अर बो छाजळो लेर त्यार ह जिऊँ बो ग्युंआ मऊँ डूण्डळी साप करसी, जिऊँ ग्युंनै तो आपकी ओबरी म धर देसी अर डूण्डळ्यानै बाळबा ताँई कदैई कोनी बुत्तबाळी लाय म गेर देसी।” 18अर बो मिनखानै ओर बोळी बाताऊँ समजार चोखो समचार सुणातो रिह्यो।
यहून्ना को काम खतम होबो
19 #
मत्त 14:3,4; मर 6:17,18 पण जद यहून्ना राजपाल हेरोदनै बिका भाईड़ा की लूगाई हेरोदिआसऊँ ब्या करबा अर बिका सूगला कामा क पेटै ओळमो दिओ। 20जणा हेरोद सऊँ बुरो काम ओ कर्यो की यहून्नानै काळ-कोठड़ी म गिरवा दिओ।
ईसु को बतिस्मो
(मत्ती 3:13–17; मरकुस 1:9–11)
21जद सगळा मिनख पाणी को बतिस्मो लेर्या हा, बाकै पाछै ईसु बी पाणी को बतिस्मो लिओ। अर जंय्यांई ईसु अरदास कर्यो बि टेम परमेसर अकासनै खोल दिओ। 22#मत्त 3:17; मर 1:11; लूक 9:35अर पबितर आत्मा कबूतर की काया को रूप लेर बिपै उतर्यो, जणा अकासऊँ हेलो आयो “तू मेरो लाडलो बेटो ह, म तेरूँ बोळो राजी हूँ।”
ईसु को कूणबो
(मत्ती 1:1–17)
23ईसु करीब तीस बरस को होयो हो जणा बो बचन की सीख देबो चालू कर्यो। ईसु मिनखा की नजर्या म युसूफ को बेटो हो#3:23 ईसु मिनखा की नजर्या म युसूफ को बेटो हो बि टेम का मिनखा की समज म ईसु युसूफ को छोरो समज्यो ज्यातो हो पण सचमई परमेसर क कानिऊँ पबितर आत्मा क जरिए बो मरीयम क पेट म पड़्यो बि टेम मरीयम कुंआरी ही। अर युसूफ एली को छोरो हो, 24एली जखो मत्तात की, मत्तात लेवी की, लेवी मलकी की, मलकी यन्ना की, यन्ना जखो युसूफ की, 25युसूफ जखो मत्तीया की, मत्तीया आमोस की, आमोस नहूम की नहूम असल्याह की, असल्याह नोगह की, 26नोगह जखो मात की, मात जखो मत्तीया की, मत्तीया जखो सिमी की, सिमी योसेख की, योसेख योदहा की, 27योदहा योनान की, योनान रेसा की, रेसा जरूबाबील की, जरूबाबील बरसतियेल की, बरसतियेल नेरी की, 28नेरी मलकी की, मलकी अद्दि की, अद्दि कोसाम की, कोसाम इलमोदाम की, इलमोदाम ऐर की, 29ऐर जखो यहोसू की, यहोसू एलीयाजर की, एलीयाजर योरीम की योरीम मत्तात की, मत्तात लेवी की, 30लेवी समोन की, समोन यहूदा की, यहूदा युसूफ की, युसूफ योनान की, योनान इल्याकीम की। 31इल्याकीम मलेआ की, मलेआ मिन्नाह की, मिन्नाह मत्तात की मत्तात नातान की, नातान दाऊद की, 32दाऊद यिसै की, यिसै ओबेद की, ओबेद बोआज की, बोआज सलमोन की, सलमोन नहसोन की, 33नहसोन अमिनादाब की, अमिनादाब ऐराम की, ऐराम हेजरोन की, हेजरोन फरिस की, फरिस यहूदा की 34यहूदा याकूब की, याकूब इसाक की, इसाक अब्राहम की अब्राहम तिरह की, तिरह नाहोर की, 35नाहोर जखो सरूग की, सरूग रऊ की, रऊ फिलीग की, फिलीग एबिर की, एबिर सिलह की, 36सिलह केनान की, केनान अरफछद की, अरफछद सेम की सेम नूह की, नूह लिमिक की, 37लिमिक मथूसिलह की, मथूसिलह हनोक की हनोक यिरिंद की, यिरिंद महलेल की, महलेल केनान की, 38केनान जखो एनोस की एनोस जखो सेत की, सेत जखो आदम की ओलाद ही, आदम जिनै परमेसर रच्यो।
Trenutno izabrano:
लूका 3: एस डब्लु वी
Istaknuto
Podeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
(c) 2010-2017, New Life Computer Institute. All rights reserved
