മർക്കോശ് 5
5
ഏശു ഇച്ചരാതിയില് നെന്റ് ഒരത്തന കാപ്പാത്തന്റാൻ
മത്തായ് 8:28–34; ലൂക്കോശ് 8:26–39
1ഏശുവും ശിശിയൻമാരും കശത്ത്ന്റ അക്കരയൊള്ള കെരശെന്നിയ നാട്ടീല് എത്തിയാര്. 2ഏശു വെഞ്ചിയില് നെന്റ് എറങ്ങിയപ്പൻ നൊള്ളിമുടിയില് നെന്റ് പൂതം പിടിച്ച ഒരത്തൻ അവന്റ കിട്ട വന്താൻ; അവന്ക്ക് പൂതം പിടിച്ചിര്ന്ന്ത്. 3നൊള്ളിമുടിയിലാണും അവൻ കുടിയിരന്നത്; ഒരത്തന്ക്കും അവന്റ കെയ്യ്നിയം കാല്നിയം കെട്ടി ഇട്‌വാൻ നോക്കണ്ടാഞ്ഞ്ത്; ചങ്കല കൊണ്ട് പോലും കെട്ടി ഇട്‌വാൻ നോക്കണ്ടാഞ്ഞ്ത്. 4ഒരിന്ന വട്ടം ആള്കള് അവന ചങ്കല കൊണ്ട് കെട്ടി ഇട്ടാര്; ഇന്റാലും അവൻ കെയ്യ്ന്റയും കാല്ന്റ്‌യും ചങ്കല പെടത്തിയാൻ; അവന പിടിച്ച് നെർത്ത്‌വാൻ ഒരത്തന്ക്കും ശക്ക്തിയില്ലാഞ്ഞ്ത്. 5രായും പൊള്തും അവൻ നൊള്ളിമുടീന്റയം മലയിന്റയം മീത നടന്നാൻ; അവൻ ആറ്ത്ത് കെല്ല്ട്ട് ഇടിച്ച് തേകത്ത് വെരത്തം ആക്കിയാൻ. 6ഏശുവ്ന അവൻ തൂരനെന്റ് കണ്ടാൻ; അവൻ ഓടി വന്ത് ഏശുവ്ന്റ കാലീല് വീന്ന് കുമ്പ്ട്ടാൻ. 7-8അവൻ വെലീശെന്നയോട വിളിച്ച് പേശീത് ഏണയിന്റെ, “വെലീവനാഞ്ഞ തെയ്‌വത്ത്ന്റ കയ്യാ, എക്കും നിക്കും തമ്മ്ളി എന്തൻ ചേവ? എന്ന ചിക്കയെട്ക്കേറ്.” പൂതമേ ഈ മന്ശ്‌ന വിട്ട്പോ ഇന്റ് ഏശു മുന്തിയേ പേശീത്കൊണ്ടാണും ഈണ അവൻ പേശീത്. 9നിന്റ പേര് എന്തൻ ഇന്റ് ഏശു അവനോട കേട്ടാൻ? എന്റ പേര് ലെകിയോൻ ഇന്റാണും; എന്തനിന്റെ എങ്ങ പല ഇച്ചരാതികള് ആണും ഇന്റ് ഇച്ചരാതി തിരിച്ച് പേശിയാൻ. 10അവന്റ തേകത്തീലൊള്ള ഇച്ചരാതികള് അവങ്ങള ആ താവീല് നെന്റും പേശിവിടേറ്ത് ഇന്റ് പിന്നയം പിന്നയം ഏശുവോട കെഞ്ചിപ്പേശിയാര്. 11ഒര വെലിയ പെന്റിപ്പട അവട മലയീന്റ തെര്‌വീതിയില് തിന്റ് നെപ്പാഞ്ഞ്ത്. 12ഇച്ചരാതികള് ഏശുവോട എങ്ങള അയ്യ പെന്റിക്കൂട്ടത്ത്ക്ക് പേശിവിടണം ഇന്റ് കെഞ്ചിപ്പേശിയാര്. 13ഏശു അവങ്ങള പേശിവിട്ടാൻ പൂതങ്ങള് പെന്റികളീല് ഏറീത്; അപ്പിനിക്കി പെന്റികള് പടപടയാഞ്ഞ് മലവാരം തിന്ന ഓടി തണ്ണിക്കശത്ത്ക്ക് പച്ചിവീന്ന് മുങ്ങി ചത്ത്ത്. ഏറക്കോറ റണ്ടായിരത്തോളം പെന്റികള് ഒണ്ടാഞ്ഞ്ത്. 14പെന്റികള തീറ്റന്റ ആള്കള് ഓടിപ്പിയ്യ് പട്ടണത്തീലും കുടികളിലും ഒള്ള ഒക്കളോടയും പേശിയാര്; എന്തൻ പെറ്റീതിന്റ് കാണ്‌വാനിക്കി ആള്കള് അവടക്കി വന്താര്. 15കൊള്ള ആള്കള് ഏശുവ്ന്റ കിട്ട വന്താര്. പൂതങ്ങള് പിടിച്ചവൻ ചട്ടയും വേട്ടിയും ഇട്ട് പോതത്തോട ഇര്ക്കന്റത് അവങ്ങ കണ്ടാര്; അവങ്ങ ഇത് കണ്ട് പേടിച്ചാര്. 16പൂതം പിടിച്ചവന്ക്കും പെന്റികള്ക്കും എന്തൻ പെറ്റീതിന്റ് കണ്ട്നെന്റ ആള്കള് അവട വന്ത്കൂടിയ ആള്കളോട പേശിയാര്. 17അപ്പിനിക്കി ആ നാട്ടീല് ഒള്ള ആള്കള് ഏശുവോട എങ്ങള താവീനെന്റ് പോണമിന്റ് കെഞ്ചി പേശിയാര്. 18ഏശു വെഞ്ചിയില് ഏറിപ്പോവാൻ പാത്താൻ; പൂതങ്ങള് വിട്ട് പിയ്യവൻ ഏശുവോട; എന്നയും കൂട്ടി എട്ത്ത് പോണം ഇന്റ് കെഞ്ചിപ്പേശിയാൻ. 19അപ്പിനിക്കി ഏശു അവന അത്ക്ക് ശമ്മ്തിച്ച്‌ല; ഏശു പേശിയാൻ, “നിയ്യ് വീട്ടീല് പിയ്യ് നിന്റ വീട്ടീല് ഒള്ള ആള്കള കൂട്ടത്ത് ഇര്ന്ന് കർത്താവ് നിക്ക് ചെയ്ഞ്ഞ് തന്തതൊക്ക അവങ്ങളോട പേശണം. കർത്താവ് നിന്നോട ഇട്ടം കാട്ടിയിത് ഇന്റും അവങ്ങളോട പേശണം.” 20അവൻ പിയ്യ് തെക്കപ്പൊലി#5:20 തെക്കപ്പൊലി പത്ത് പട്ടണങ്ങള് കൂടിയ ഒര താവ് താവീലൊള്ള ആള്കളോട ഏശു അവന്ക്ക് ചെയ്ഞ്ഞത് ഒക്ക പേശിയാൻ; അത് കേട്ട് ഒക്കളം അത്‌ശകപ്പെട്ടാര്.
ഏശു ചത്ത്പിയ്യ പിള്ളയിന ഉശ്റ്‌വെര്ത്തി എളപ്പന്റാൻ
മത്തായ് 9:18–26; ലൂക്കോശ് 8:40–56
21ഏശു വെഞ്ചിയില് ഏറി അക്കര എത്തിയാൻ; അവട കടല്ന്റ കിട്ട ഒരിന്നാള്കള് ഏശുവ്ന്റ ചിറ്റും വന്ത്കൂടിയാര്. 22എകൂതപള്ളിയില ഒര മൂപ്പൻ അവട വന്താൻ, ആയിറോശ് ഇന്റാണും അവന്റ പേര്; ഏശുവ്ന കണ്ടപ്പൻ അവൻ അവന്റ മൊകത്ത് വന്ത് കാല്‌ക്ക് വീന്നാൻ. 23അവൻ ഏശുവോട കെഞ്ചിക്കേട്ടാൻ, എന്റ കുഞ്ചിപ്പിള്ളക്കി ഉശ്റ് പോവാൻ കെടക്കന്റ് നിങ്ങ വന്ത് അവള തൊടണം ഇന്റെ അവ്ള് ചീക്ക് മാറി ശൊകമാകും. 24ഏശു ആയിറോശ്‌ന്റ പിറ്റ പിയ്യാൻ. ശമ്ത്തി ആള്കള് അവന്റ പിറ്റ പിയ്യാര്; അവങ്ങ ഏശുവ്ന നെശ്ക്കിവിട്ട് പിയ്യാര്. 25അക്കൂട്ടറ കൂട്ടത്ത് പന്തറണ്ട് വെര്ശമാഞ്ഞ് എലത്തപ്പോക്ക് ചീക്ക് ഒള്ള ഒര്ത്തി ഒണ്ടാഞ്ഞ്ത്. 26കൊള്ള മെര്ന്ത്കാറ് അവ്ള്ക്ക് മെര്ന്ത് കൊടത്താര്; ആണ കൊള്ള ശൊത്ത്ശൊകന്തറം വളിയാക്കിക്കളഞ്ഞ്‌ത്; ഇന്റാലും ഒര പലമം അവ്ള്ക്ക് ഒണ്ടാഞ്ഞ്‌ല; അവ്ള്ക്ക് ചീക്ക് കൂടിക്കൂടി വന്ത്ത്. 27അവ്ള് ഏശുവ്നപ്പെറ്റി കേട്ടത്; ആണ അവ്ള് ആള്കള നെട്‌വീതിന്ന ഏശുവ്ന്റ പിറ്റ പിയ്യ് അവന്റ ഉട്പൊടവയില് പിടിച്ച്ത്. 28എക്ക് അവന്റ ഉട്പൊടവീല് പിടിച്ചെ എലത്തപ്പോക്ക് ചീക്ക് മാറ്മിന്റ് അവ്ള് നെനച്ച്ത്. 29അവ്ള് അവന്റ ഉട്പൊടവയില് പിടിച്ചപ്പൻ അവള എലത്തപ്പോക്ക് നെന്റത്; പിടിയിന്റ് അവ്ള്ക്ക് ചീക്ക് മാറീതിന്റ് അവള തേകത്ത് നെന്റ് തിക്കൊണ്ടാഞ്ഞ്ത്. 30ഏശുവ്ന്റ തേകത്ത് നെന്റ് ശക്ക്തി പൊറത്തിക്കി പീത് ഇന്റ് ഏശുവ്ക്ക് തിക്കൊണ്ടാഞ്ഞപ്പൻ അവൻ തില്‌മ്പി നെന്റ് കേട്ടാൻ, അവൻ തില്‌മ്പി നെന്റ് എന്റ ഉട്പൊടവയില് പിടിച്ച്ത് ഏവൻ? ഇന്റ് കേട്ടാൻ. 31ആള്കള് നിന്ന നെശക്കന്റത് നീ കാണന്റ ഇന്റാലും ഏവനാണും എന്ന പിടിച്ച്ത് ഇന്റ് നീ കേക്കന്റ? ഇന്റ് ശിശിയൻമാര് ഏശുവോട പേശിയാര്. 32ഇന്റെ ഏശു അവന പിടിച്ച ആള കാണ്‌വാനിക്കി ചിറ്റും പാത്താൻ. 33അവ്ള്ക്ക് ചീക്ക് മാറീത് ഇന്റ് അവ്ള്ക്ക് തിക്കൊണ്ടാഞ്ഞ്, ഏശുവ്ന്റ മൊകത്ത് വന്ത് അവന്റ കാലീല് വീന്ന്ത്; അവ്ള് പേടിച്ച് നെട്ങ്ങീത് നടന്നതൊക്ക അവ്ള് ഏശുവോട പേശീത്. 34ഏശു അവളോട പേശിയാര്, “പിള്ളേ, നിയ്യ് നമ്പീത് കൊണ്ട് നിക്ക് ശൊകം കിട്ടീത്; നിമ്മ്തിയോട പോ ഇന്നി ഈ ചീക്ക് നിക്ക് കട്ടപ്പാട് വെര്ത്ത്ത്ത്ല.” 35-36ഏശു ഈണ പേശി ഇര്ന്നപ്പൻ എകൂതപള്ളിയില മൂപ്പനാഞ്ഞ ആയിറോശ്‌ന്റ വീട്ടീല് നെന്റ് ചെല ആള്കള് അവട വന്ത്, “നിന്റ പിള്ളക്കി ഉശ്റ് പീത് ഇന്നി ഏമാന കട്ടപ്പടത്ത്ന്റത് എന്തന്ക്ക്?” ഇന്റ് പേശിയാര്. അവങ്ങ പേശീത് പാക്കാണ്ടി ഏശു ആയിറോശോട, “പേടിക്കണ്ട, നിയ്യ് നമ്പിയേ മതി” ഇന്റ് പേശിയാൻ. 37അവന്റ പിറ്റ പോവാനിക്കി ഒരത്തനയം അവൻ വിട്ട്‌ല; പത്ത്റോശ്, ശാക്കോവ് അവന്റ തമ്പി ഓകന്നാൻ അക്കൂട്ടറ മാട്ട്ക്കും കൂട്ടി എട്ത്ത് പിയ്യാൻ. 38അവൻ എകൂതപള്ളിയില മൂപ്പന്റ വീട്ടീല് എത്തിയിപ്പൻ, അവട ശമ്ത്തി ആള്കള് ആറ്ത്ത് വിട്ട ശെന്ന ഒണ്ടാക്കന്റത് അവൻ കണ്ടാൻ. 39ഏശു വീട്ട്ന്റ ഉള്ള്ക്ക് ഏറി അവങ്ങളോട പേശിയാൻ, “നിങ്ങ എന്തന്ക്ക് കേന്ന് ശെന്നയെടക്കന്റത്? കുഞ്ചിക്കി ഉശ്റ് പീല അവ്ള് ഒറങ്ങന്റതാണും.” 40ഇന്റെ ഇത് കേട്ടപ്പൻ ഒക്കളം ഏശുവ്ന നാണംകെട്ത്തി ചിരിച്ചാര്; ഏശു ഒക്കളോടയം വീട് വിട്ട് വെളിക്കി പോവാൻ പേശിയാര്, പിന്ന ഏശു കുഞ്ചി കെടക്കന്റ മുറിക്കി ഏറിയാൻ; കുഞ്ചീന്റ അപ്പനയം അമ്മീനയം അവന്റ മൂന്റ് ശിശിയൻമാരയം#5:40 മൂന്റ് ശിശിയൻമാരയം ഓകന്നാൻ, പത്ത്റോശ്, ശാക്കോവ് മാട്ട്ക്കും അവൻ മുറിക്കി ഉള്ള്ക്ക് അവന്റ കൂട്ടത്ത് എട്ത്ത് പിയ്യൊള്ള്. 41ആണ അവൻ പിള്ളയിന്റ കെയിക്കി പിടിച്ച് പേശിയാൻ “തലീതാ കൂമി” കുഞ്ചിപ്പിള്ളേ എള്മ്പി നെല്ല് ഇന്റാണും അത്‌ന്റ പൊറ്ള്. 42പിടിയിന്റ് പിള്ള എള്മ്പി നടന്ന്ത്; അവ്ള്ക്ക് പന്തറണ്ട് വയശാഞ്ഞ്ത്; ഇത് കണ്ട് അമ്മയം അപ്പനം അത്‌ശകപ്പെട്ടാര്. 43ഈ ശേതി ഒരത്തനോടയും പേശേറ്തിന്റ് ഏശു കുഞ്ചീന്റ അമ്മയോടയം അപ്പനോടയം പേശിയാൻ പിന്ന കുഞ്ചിക്കി ശാപ്പാട് കൊടപ്പാൻ അവൻ അവങ്ങളോട പേശിയാൻ.
Trenutno izabrano:
മർക്കോശ് 5: മുതുവാൻ
Istaknuto
Podeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
© New Life Literature
