Génesis 3
3
Adán, Éva ore chó Dupade iroquéode gai nanique uje ore tagu garengué pore adie
1Ugai u uje aringácachoquípise nanique ome dojode cuchiso ore jnese uje Pangarádejnai Dupade pésu ore nanique. Enga ugai tuté chise chequé bajaque nanique enga catecã́ri enga chojninga:
–¿Jec ũré ga Dupade chãraque poridie udire jnese iji dejnai tuté ujetiga acho udire adie?–
2Mu chequé chajnai enga chojninga:
–Úngare. Dupade juéga arĩ́e ujetiga yajo adie jnese iji jutícabia. 3Gusu chojmára uje charángome yoque iji dajutícabia gatócoro ujetiga ca yajo uaté adie iji gatócoro jogoto. Dupade chingome yoque ujetiga ca yajo, jé aja ujetiga ca yisagopo te rĩ. Chamáñaje ujetiga yajo jeoga yisago enga yitogoi ome jne.–
4Mu ugai chajnai enga chojninga:
–Que u gotique Dupade uruode. A ca atoyoi jne ujetiga acho garengué pore adie udire.–
5Ugai qué catecã́ri chequé bajé enga chojninga:
–Dupade chiraja arĩ́e ujetiga acho guejnai gatócoro jogoto pore adie enga jé u ujetiga arajáyo cucha gajnaréngone, cucha arégode ore iji ñane enga a oyópise Dupade jne.–
6Jecute chequé chajire poria adie enga e pota iji dáyipie. Enga e potapo rĩ ujetiga chiraja cuchade ome to. Enga jé doi enga chisa a uaté enga e tagu to. Enga e chisi ome dabai enga e chṹraja. Enga abai tagu a tuaté to nanique. 7Uje ore tagu poria uaté a tuaté enga jé u uje quene ore chiraja uje choquíbi ore. Enga cho ujetiga quene oráyipiedie chuchẽre dabáyode enga ore chajire dejode. Enga jé u uje ore chuga poridie acarane aja ñane uje poria tuaté i tu 'higuéra' nanique, enga jé u uje ore chaco dabáyode nanique.
8Uje guedé e chaca enga emi e di ga jnani, chequé ore chudute Pangarádejnai Dupade guichai uje chicáji ore yui. Mu ore todo ga ore chayome enga ore pógu re iji poridie uéchade ujetiga ca Dupade chimo ore. 9Mu Pangarádejnai Dupade tibidi jnani enga chojninga:
–¿Agúsoi rique a?–
10Mu jnani chajnai enga chojninga:
–Yudute barichai que uje bacáji bajutícabia yui enga yitodópisa. Chamáñaje choquíbi yu gu. Jecute yipógu yu ome ua.–
11Enga Dupade catecã́ri enga chojninga:
–¿Gosi chingome uaque a uje choquíbi uaque? ¿E acho yarengué pore adie que a?–
12Mu jnani chajnai ga chojninga:
–Berané chequé uje basi ome yu diríca, uje chiese yátajató tu diríca, uaté u uje chṹraja yu. Jecute yagu to ome uaté.–
13Jé u uje Pangarádejnai Dupade catecã́ri chequé uaté to enga chojninga:
–¿Gotique gu a uje bã́raja babai que?–
Mu chequé chajnai Dupade uruode enga chojninga:
–Ugai u que uje chãra yu ga yagu barengué pore adie to.–
14Jé u uje Dupade cho darúja ugai nanique enga chojninga:
–Gajnarenguipise badode. Jecute a yo yurúja cuchisode jnese gu ua jne. Mu cuchiyi tupúsu ua jne. Jé iji de a arajũre bajei tiji jnumi jne, enga baboti a u jnumi jne. 15A yipésu jne enga chequé, uhua uacamajo ñane. Jé cho uaté ape disi ejórique, bape disi ejórique, a ore cho damajo ome ñane to jne. A chise dínique to jne ujetiga uaté ape disi ejórique chĩro batoi ome dajadia te jne. Jé basa ga a agu uaté ape disi ejoi guídogoróraque to jne.–
16Enga Dupade cho darúja chequé to nanique enga chojninga:
–A yipésu ua jne enga urõsopise bacadie achamitígo ome ua jne jeta babode basíji ua. A urõso bacárigui achamitígo jne mu a jecucha ga amóji babai gari jne uje a bajéode u gu. Enga a jecucha babai gajneque jne ujetiga pangarate ome ua ujetiga sué babai jne.–
17Enga Dupade chopo darúja jnani to nanique rĩ enga chojninga:
–E yo yurúja ua gu uje bangári bacoté enga bagu yarengué pore adie to ome bacoté uaté. Mu que gusu ua mu yo yurúja jnumi to gu ua enga a parique erámi gu ua jne. Jé iji de enga be enga asa bejode jne enga a uajate basatígo cucha jne ome ua ujetiga apota agu cuchárique. A asa bejode jne jé aja batoringárique eruénique jne. 18A amo jne uje cucha catáguedie, ojnatígo ore sué iji erámi údode jnese gu ua jne uje yo yurúja ua. A quene arajáyo to jne ujetiga acho cuchade uñane iji erámi uje que acho to nanique iji taningai.–
19Dupade chojningápome jnani te rĩ:
–A amo jne uje a bo bajuñame ua jne uje basa bejode ome babosode, enga gajnetui doi guesi tiji bedodie. Enga a isoca basocai tuté jne jé aja batoringárique jne, ujetiga acápoji jnumi te rĩ. Chamáñaje jnupe ua ica uje quene yipésu ua ica, ga e baqui tupo jnumi jne rĩ.–
20Enga jé u uje jnani pésu dacoté i enga i tu Éva ome uté nanique, uje i uté qui tu gu pucuecaringuei. Chiraja gu uje a erámi unirisórone ore eca iji jnumi jnese gu uaté, enga a ore cho daté iji uaté jnese jne. 21Enga Pangarádejnai Dupade doi nanique enga chujé cuchisode nanique jeta pésu jnani, chequé ore iguidérigui iji udore aode nanique. 22Dupade chojninga:
–Jnani e cho yoque, uje chiraja cucha gajnaréngone, cucha omone ore iji ñane. Gajnareque jeta uté doi enga tagu poria uña adie, uje gosi tagu uaté adie enga eca gosi iji deréjnane jnese.–
23Jecute Pangarádejnai Dupade doi jnani tuté enga chijócãre ore iji dajutícabia uaté uje déji puniri Edén nanique. Enga chojninga:
–Be ga asa bejode iji barani casica jnupe.–
24Uje Dupade e tṍra ore aja guesi iji dajutícabia enga doi nanique enga chicha darógode gaté unirísoño aja dajutícabia uaté yui iji guedé garani yui. Enga asṍreraque déji to uje pioguipise enga chibote erámi to ga chãraque poria yui ujetiga ca ayorérique chisápo to nanique rĩ. Uje poria uaté adie gajnei tu pucuecaringué eyúgojmai nanique gu.
Currently Selected:
Génesis 3: Ayore
Highlight
Share
Copy
Want to have your highlights saved across all your devices? Sign up or sign in
© 2021 Ethnos360