Nyɛ̀nɛ̀ŋ 23
23
1Wo Pɔɔ̀ naŋ yɛ̀mɛ̀ anyùùŋ gbèègbèè aŋ Juùù nyaŋ dìiiŋ yèè wò naŋ woò wààŋ, “Wùìyaim nyàŋ, e gòngo mɛ̀ è yaà zɛ̀nɛŋ niŋ janjai e ɗeweɛ̀ mìŋ naŋ nyɛ̀nɛ̀ŋ wɔŋ nyiiŋ gèe siaŋ miɔ̀ŋ wo Dayà fɛɛ̀feìŋ lɛ e jèèsùà e hàì ke ɗɔɔ yɛɛ̀ nàaŋ.” 2Wo Kànà Sìèfèìŋ Zòòlo Gbeeɔ̀ Ananaayà naŋ wòò anyùùŋ nyaŋ sia wa wo Pɔɔ̀ kɔɔ nyàŋ kɛ̀ aŋ haà wo Pɔɔ̀ fɛ̀ɛ̀ nyààŋ. 3Wo Pɔɔ̀ naŋ kìlè wo yɛ̀mɛ̀ wo Ananaayà yèè wò nauŋ woò wààŋ, “Wo Dayà doum nàŋ hèèfɛ̀ɛ̀, muàum kpèmèè wolofua lɛɛ̀! Mùŋ jaa kià mùŋ yààìm gbài sùà nààŋ ke Sàwà Dayàa naŋ woò lɛ. Kɛɛ e tèèngà guùŋ bi sùà mùŋ naŋ nyɛ̀nɛ̀ŋ anyùùŋ aŋ pɔ̀ɔ̀ ke Sàwàa nààŋ mùŋ naŋ nyiŋ woò wèè aim hàà fɛ̀ɛ̀ nyààŋ.”
4Anyùùŋ nyaŋ sia wa wo Pɔɔ̀ kɔɔ nyàŋ nauŋ dawè nyààŋ, “Muŋ nyimààŋ kɛ̀ mùŋ yaà pɔ̀ɔ sùà wo Kànà Sìèfèìŋ Zòòlò Gbèè Dayàa ɓɛ̀ɛ?”
5Wo Pɔɔ̀ naŋ fasàì wààŋ, “Nyɛ̀iŋ nààŋ wùìyaim nyàŋ, miŋ nyimààŋ weè kɛ̀ wuŋ nàŋ yaà wò Kànà Sìèfèìŋ Zòòlo Gbeeɔ̀. Wɔŋ Fɛ̀ì Dayàa naŋ woò wààŋ, ‘Ɓɔ̀ mùŋ woò è keì naanààŋ kòɓɛ̀ wò sìèfèìŋ àŋ nyunùum nyàŋ.’ ”
6Nààŋ wo Pɔɔ̀ naŋ wa yɛmɛ̀ kɛ̀ ke gbòò anyùùŋ gbèègbèè aŋ Juùù nyaŋ naŋ wa dìè aŋ Sadusiì yèè aŋ Fɛlosiì, wò naŋ kpààŋ sɛiŋ wààŋ, “Nyɛ̀iŋ nààŋ wùìyaim nyàŋ, mìŋ yaà wo Fɛlosiì yèè wo jɔ̀à kòmàŋ wo Fɛlosiì. Mìŋ yaà kɔ̀ɔ̀yɛ̀ e gbài dìì esaɓù kɛ̀ mìŋ kuwa ke jii tùlia kɛ̀ anyuùŋ fàa nyàŋ do ɓɛìŋ nàŋ yèwè e fàaà dìì.”
7Wo Pɔɔ̀ naŋ wa nɔŋ tɛɛ̀ woò fa, e nyaàŋ tàaŋ sɛ̀ɛ̀ aŋ Sadusiì nyaŋ yèè aŋ Fɛlosiì nyaŋ e fèemàŋ. Yèè ke gbòò anyùùŋ gbèègbèè aŋ Juùù nyaŋ naŋ gòònò sùà. 8Aŋ Sadusiì nyaŋ gò haawè kɛ̀ ànyùùŋ do nàŋ yèwè e fàaà dìì wɔ̀ŋ nyiiŋ gèeo sùà sèè àŋ fà, e kìlà aŋ gò haawè kɛ̀ àŋ màikà ɔ̀ɔ̀ àŋ jinàŋ naanààŋ e hààwè aŋ jìnàŋ nyuùŋkpùuŋ àŋ yaà. Kɛɛ aŋ Fɛlosiì nyaŋ naŋ hààwè maŋ keì mɛɛ̀ŋ gbiŋ. 9Yèè maŋ mìè kpààŋ e nyaàŋ tàaŋ nyiŋ nɛ̀ naŋ dɛ̀kɛ̀ò sùà. Aŋ kààmɔ̀ɔ̀ŋ maŋ Sàwà Mòòze nyàŋ bà nyiŋ yaà wa aŋ Fɛlosiì. Ko diemeì, aŋ Fɛlosiì nyaŋ naŋ tuù yèè àŋ naŋ woò nyààŋ, “E gòiŋ yɛ̀mɛ̀ è keì naanààaŋ wò felaa wɛɛ̀ naŋ nyɛ̀nɛ̀ŋ lɛ. È wɛ̀i ɓɛ̀nɛ̀ŋ nɔ̀ɔŋ kɛ̀ wo jinàŋ ɔ̀ɔ̀ wo màikà naŋ gbòò ko nɛ̀ɛ̀uŋ niìŋ.”
10Àŋ naŋ dàà ke gùuŋ e nyaàŋ tàaŋ nyiŋ nɛ̀ sùà, yèè e jùù naŋ nyɛ̀nɛ̀ŋ wo kànà aŋ kààlòòɗùà nyaŋ kɛ̀ anyùùŋ nyaŋ ɓɛ̀nɛ̀ŋ jìwà wo Pɔɔ̀ e kìlà auŋ sɛ̀ɛ̀sɛ̀ɛ̀ maŋ fàà nyɛ̀ɛ̀nyɛ̀ɛ̀. Kpeiŋ wò naŋ tùɔ̀ŋ aŋ kààlòòɗùàuŋ nyaŋ wèè aŋ gè nyiŋ wo Pɔɔ̀ e tɛɛ maŋ dùaŋ dùaŋ aŋ koàuŋ ko gbòòkùàŋ aŋ kààlòòɗùà nyaŋ.
11Wɔŋ dùùm wiiŋ wo Kanaà Jisɛ̀ naŋ fòlò wo Pɔɔ̀ fɛɛ̀feìŋ yèè wò nauŋ woò wààŋ, “Kɛ̀ɛ̀nɛɛ̀ŋ ke jii nyingè! Màŋ kìɛ̀ŋ ke mìè seì mɔɛ̀ŋ e nyaàiŋ eim dè ko Jùlusɛ̀làm, yèè kìɛ̀ŋ ɓɛìŋ ke mìè seì bi ko Luùm.”
E ɗèweɛ̀ wèè aŋ jìwà Pɔɔ̀
12Maŋ nyiìŋ tɛ̀tɛ̀ wɔŋ niìsìaà bàa, aŋ Juùù nyaŋ naŋ deenè yèè àŋ naŋ ɗewè e gbòòno diɛŋ kɛ̀, aŋ naàŋ jènɛ̀ŋ ɔ̀ɔ̀ aŋ tìà e jèèsùà aŋ jìwà wo Pɔɔ̀. 13Anyùùŋ nyaŋ naŋ wa nyɛ̀nɛ̀ŋ e ɗèwe lɛɛ̀ nyaŋ naŋ wa nìè kpɛ̀ùŋ tìyèe. 14Aŋ bà nyiŋ naŋ kɔ̀ koɓɛ̀ aŋ kànà sìèfèìŋ zòòlo gbee nyàŋ yaà aŋ màmànkùmɛ̀ŋ fuɔŋ nyàŋ yèè àŋ naŋ nyiŋ woò nyààŋ, “Èiŋ jɔ̀àà ɗààhiì koɓɛ̀ Dayài kɛ̀ e naàiŋ jè è nɛ̀ŋje gbiŋ e jèèsùà eiŋ jìwà wo Pɔɔ̀. 15Weètii, muàŋ yèè anyùùŋ gbèègbèè fuɔŋ nyàŋ gbiŋ, kɔ̀àiŋ koɓɛ̀ wo kànà aŋ kààlòòɗùà nyaŋ niŋ nyɛ̀nɛ̀ŋ mààŋ nìŋ manaŋ naŋ ɓɛìŋ nyɛ̀nɛ̀ŋ maŋ nɔnɔŋ tùaŋ e nyaàiŋ dè maŋ keì maŋ àŋ naŋ gbùwò wo Pɔɔ̀ ɗì maŋ. Dàweìŋ wèè aŋ hiàuŋ ko fɛɛ̀fenìiŋ. Etèèŋgà guùŋ bi sùà, è douŋ nàŋ nɔ̀ŋ fulie wèè euŋ jìwà paŋgàà wò haìyòo.”
16Kɛɛ nààŋ wo jɔ̀àfèlàà wo jàà Pɔɔ̀ɔ naŋ nyìmè ke gbùnu nyiŋ nɛɛ̀ŋ, wò naŋ kɔ̀ ko gbòòkùàŋ aŋ kààlòòɗùà nyaŋ yèè wò naŋ niŋ gbàì wo Pɔɔ̀ jii. 17Wo Pɔɔ̀ naŋ nyààŋ wo nyùùŋ gbèè aŋ kààlòòɗùà nyaŋ bà guùŋ yèè wò nauŋ woò wààŋ, “Kòaà wo fooninge wɛɛ̀ koɓɛ̀ wo kànà aŋ kààlòòɗùà nyaŋ. Wò kuwa e keì bà wèè wouŋ gbàì jii.” 18Wo nyùùŋ gbèè aŋ kààlòòɗùàa naŋ kɔ̀ɔ̀ wo fooningeɔ̀ koɓɛ̀ wo kànà aŋ kààlòòɗùà nyaŋ yèè wò nauŋ woò wààŋ, “Wo nyùùŋ keìɔ àŋ nyaaŋ wo Pɔɔ̀ wɔ naim dawè wààŋ miŋ hiàŋ wo fooninge wɛɛ̀ ko nɛ̀ɛ̀ŋ muìŋ, esaɓù kɛ̀ wò kuwa e keì bà wèè woum gbàì jii.”
19Wo kànà aŋ kààlòòɗùà nyaŋ naŋ kùwò wo fooningeɔ̀ kùàŋ wò nauŋ kɔ̀ɔ̀ e ɓula, yèè wò nauŋ dawè wààŋ, “Kiìŋ mùŋ kuwa maim gbàì jii?”
20Wo fooningeɔ̀ naŋ wòò wo kànà aŋ kààlòòɗùà nyaŋ wààŋ, “Aŋ kpàkòò bà naŋ ɗewè wèè aum dawè wèè maŋ hìàŋ wo Pɔɔ̀ ko fɛ̀ɛ̀fèìŋ anyùùŋ gbèègbèè aŋ Juùù nyaŋ nàwèè. Àŋ do nàŋ nyɛ̀nɛ̀ŋ mààŋ àŋ manaŋ aŋ ɓɛìŋ nyɛ̀nɛ̀ŋ maŋ nɔnɔŋ tùaŋ e nyaàiŋ euŋ dè. 21Kɛɛ kɔ̀nɛɛ̀ŋ ɓɔ̀ mùŋ nyimèè nyiŋ. Aŋ kpàkòò nyaŋ nìàŋ kpɛ̀ùŋ tìyèe yèè àŋ do nàŋ gbùwò wo Pɔɔ̀ ke gùuŋ. Àŋ naŋ jɔ̀ɔ̀ ɗààhiì koɓɛ̀ Dayài kɛ̀ aŋ naàŋ jè è nɛ̀ŋ gbiŋ ɔ̀ɔ̀ aŋ tìà e jèèsùà aŋ jìwà wo Pɔɔ̀. Yèè nààŋ pɛɛ mìŋ gboo yaà lɛ kòò àŋ yààùm fulie wèè aŋ kòmàŋ kɛ̀ kiìŋ mùŋ naŋ ɗewè.”
22Wo kànà aŋ kààlòòɗùà nyaŋ naŋ wòò wo fooningeɔ̀ wààŋ, “Ɓɔ̀ mùŋ woò wò nyùùŋ gbiŋ kɛ̀ màim tɛɛ̀ woò.” Yèè wò naŋ dangè wo fooningeɔ̀ wò naŋ kɔ̀.
Àŋ tùàŋ wo Pɔɔ̀ koɓɛ̀ wo Kanaà Filɛ̀i
23Wo kànà aŋ kààlòòɗùà nyaŋ naŋ nyààŋ aŋ sìèfèìŋ aŋ kààlòòɗùàuŋ nyàŋ àŋ tìyèe yèè wò naŋ nyiŋ woò wààŋ, “Sèè wɔŋ dùmɔ̀ɔŋ gboo nɔɔnɔŋ le tiinàŋ wɔŋ dùùm wɛɛ̀ŋ, bànèbanè aŋ kààlòòɗùà hɔ̀nɔ̀ɔ̀ tìyèe yèè anyuùŋ dùùnyàŋ aŋ sòo kpɛ̀ùŋ taai jɛ̀wɛ̀ zììyà yaà anyuùŋ sùmìàŋ maŋ kpɛɛ aŋ hɔ̀nɔ̀ɔ̀ tìyèe wèè niŋ ka ko Sesèlià. 24Bànèbanè aŋ sòo wèè aŋ koà wo Pɔɔ̀, e kìlà nyɛnɛ̀ŋ esaɓù wo haì koɓɛ̀ wo Kanaà Filɛ̀ bòìbòì.” 25Wo kànà aŋ kààlòòɗùà nyaŋ naŋ nyiŋ sìngè wɔŋ fɛi.
26E mìè sùà fɛiɔ̀ naŋ woò wàà, “E zùùmo yaà ko nɛ̀ɛ̀ŋ muìŋ, Kanaà Filɛ̀. Wɔŋ fɛi wɛɛ̀ŋ yewe wo Kulɔdiɔ̀ Lasià sìwè yèè wɔ̀ŋ yaà hìnìè ko nɛ̀ɛ̀ŋ muìŋ. 27Aŋ Juùù nyaŋ bà nyiŋ naŋ kùwò wo felaa wɛɛ̀ yèè àŋ manaŋ weè auŋ jìwà. Kɛɛ nààŋ mìŋ naŋ kòmò kɛ̀ wò yaà wo Luùm nyuuŋ, mìŋ naŋ tùɔ̀ŋ aŋ kààlòòɗùà nyaŋ bà wèè auŋ joeyè. 28Mìŋ manaŋ wa ka nyìmàŋ e keì titiɛ̀ wò naŋ nyiŋ pɔɔ̀ɔ̀ lɛ, yèè mìŋ nauŋ kɔ̀ɔ̀ anyùùŋ gbèègbèè aŋ Juùù nyaŋ fɛɛ̀feìŋ. 29Mìŋ naŋ nyɛ̀nɛ̀ŋ maŋ nɔnɔŋ tùaŋ, kɛɛ miŋ gò yɛ̀mɛ̀ è keìɛ wò naŋ nyɛ̀nɛ̀ŋ lɛ wèè wo yɛ̀mɛ̀ fàa ɔ̀ɔ̀ wèè auŋ pɛɛ gbìàŋ kò sààŋ nyìwì. E keìɛ àŋ nauŋ gbùwò ɗì lɛ e nyaàiŋ naŋ dè maŋ sàwà nyiŋ màŋ. 30Nààŋ mìŋ naŋ kòmò kɛ̀ àŋ naŋ jàà ke gbùnu weèuŋ wèè auŋ jìwà, mìŋ nauŋ tùɔ̀ŋ ko nɛ̀ɛ̀ŋ muìŋ yèè mìŋ naŋ wòò aŋ sìèfeìŋ nyiŋ nyàŋ kɛ̀ aŋ hiàŋ maŋ keì maŋ àŋ nauŋ gbùwò ɗì maŋ ko nɛ̀ɛ̀ŋ muìŋ wèè maŋ niŋ yɛ̀mɛ̀ dììò sùà.”
31Aŋ kààlòòɗùà nyaŋ naŋ wa nyɛ̀nɛ̀ŋ e yèɛ wo kana nyiŋ nɔɔ̀ŋ naŋ nyiŋ woò wèè aŋ nyɛ̀nɛ̀ŋ lɛ, yèè wɔŋ dùùm guùŋ wiiŋ àŋ naŋ kɔ̀ɔ̀ wo Pɔɔ̀ ko jawa gbeeì àŋ nyaaŋ Aŋtipatì. 32Wɔŋ niìsìaà bàa aŋ kààlòòɗùà nyaŋ naŋ kààìŋ dìì nyaŋ naŋ kɛ̀ɛ̀ maŋjɛ̀wɛ ko gbòòkùàŋ aŋ kààlòòɗùà nyaŋ, yèè aŋ kààlòòɗùà nyaŋ jaa aŋ sòo nyàŋ diɛŋ nyàŋ naŋ kɔ̀ɔ̀ wo Pɔɔ̀ auŋ halèè. 33Nààŋ àŋ naŋ hàì ko Sesèlià, àŋ naŋ kìɛ̀ŋ wɔŋ fɛiɔ̀ koɓɛ̀ wo Kanaà Filɛ̀ yèè àŋ naŋ kìlè wo Pɔɔ̀ ko nɛ̀ɛ̀uŋ niìŋ. 34Wo kanaà naŋ kpɛ̀nɛ̀ŋ wɔŋ fɛiɔ̀, yèè wò naŋ dàwè wo Pɔɔ̀ kɛ̀ fuɔɔ̀ŋ kòò wuŋ wò yewe, yèè wo Pɔɔ̀ nauŋ woò wààŋ wò yewe ko Sèlesìà. 35Wo kanaà naŋ kpɛ̀nɛ̀ŋ wɔŋ fɛiɔ̀ yèè wò naŋ wòò Pɔɔ̀ wààŋ, “Mìŋ do nàŋ kùmìè e keìɛ mùŋ naŋ nyɛ̀nɛ̀ŋ lɛ sèè anyùùŋ nyaŋ hnàŋ nɔŋ wèè aim woò kɛ̀ kiìŋ mùŋ naŋ nyiŋ pɔɔ̀ɔ̀, kpeiŋ kɛ̀ kà gbàì e keì mɔ̀ɛ̀.” Nààŋ wo kanaà naŋ tɛɛ̀ woò, wò naŋ wòò anyunùuŋ nyàŋ wèè aŋ koà wo Pɔɔ̀ ko sààŋ gbèè kanaà, ke yèɛ wo Kanaà Hɛɛlɔ̀ wo Gbeeɔ̀ naŋ nyɛ̀lɛ̀ yɛ, wèè aŋ yɛmɛ̀uŋ diɛŋ.
Trenutno izabrano:
Nyɛ̀nɛ̀ŋ 23: WFESD
Istaknuto
Kopiraj
Uporedi
Podeli
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
Gola New Testament Translation and Literacy Project © Bible Society in Liberia, 2019.
Nyɛ̀nɛ̀ŋ 23
23
1Wo Pɔɔ̀ naŋ yɛ̀mɛ̀ anyùùŋ gbèègbèè aŋ Juùù nyaŋ dìiiŋ yèè wò naŋ woò wààŋ, “Wùìyaim nyàŋ, e gòngo mɛ̀ è yaà zɛ̀nɛŋ niŋ janjai e ɗeweɛ̀ mìŋ naŋ nyɛ̀nɛ̀ŋ wɔŋ nyiiŋ gèe siaŋ miɔ̀ŋ wo Dayà fɛɛ̀feìŋ lɛ e jèèsùà e hàì ke ɗɔɔ yɛɛ̀ nàaŋ.” 2Wo Kànà Sìèfèìŋ Zòòlo Gbeeɔ̀ Ananaayà naŋ wòò anyùùŋ nyaŋ sia wa wo Pɔɔ̀ kɔɔ nyàŋ kɛ̀ aŋ haà wo Pɔɔ̀ fɛ̀ɛ̀ nyààŋ. 3Wo Pɔɔ̀ naŋ kìlè wo yɛ̀mɛ̀ wo Ananaayà yèè wò nauŋ woò wààŋ, “Wo Dayà doum nàŋ hèèfɛ̀ɛ̀, muàum kpèmèè wolofua lɛɛ̀! Mùŋ jaa kià mùŋ yààìm gbài sùà nààŋ ke Sàwà Dayàa naŋ woò lɛ. Kɛɛ e tèèngà guùŋ bi sùà mùŋ naŋ nyɛ̀nɛ̀ŋ anyùùŋ aŋ pɔ̀ɔ̀ ke Sàwàa nààŋ mùŋ naŋ nyiŋ woò wèè aim hàà fɛ̀ɛ̀ nyààŋ.”
4Anyùùŋ nyaŋ sia wa wo Pɔɔ̀ kɔɔ nyàŋ nauŋ dawè nyààŋ, “Muŋ nyimààŋ kɛ̀ mùŋ yaà pɔ̀ɔ sùà wo Kànà Sìèfèìŋ Zòòlò Gbèè Dayàa ɓɛ̀ɛ?”
5Wo Pɔɔ̀ naŋ fasàì wààŋ, “Nyɛ̀iŋ nààŋ wùìyaim nyàŋ, miŋ nyimààŋ weè kɛ̀ wuŋ nàŋ yaà wò Kànà Sìèfèìŋ Zòòlo Gbeeɔ̀. Wɔŋ Fɛ̀ì Dayàa naŋ woò wààŋ, ‘Ɓɔ̀ mùŋ woò è keì naanààŋ kòɓɛ̀ wò sìèfèìŋ àŋ nyunùum nyàŋ.’ ”
6Nààŋ wo Pɔɔ̀ naŋ wa yɛmɛ̀ kɛ̀ ke gbòò anyùùŋ gbèègbèè aŋ Juùù nyaŋ naŋ wa dìè aŋ Sadusiì yèè aŋ Fɛlosiì, wò naŋ kpààŋ sɛiŋ wààŋ, “Nyɛ̀iŋ nààŋ wùìyaim nyàŋ, mìŋ yaà wo Fɛlosiì yèè wo jɔ̀à kòmàŋ wo Fɛlosiì. Mìŋ yaà kɔ̀ɔ̀yɛ̀ e gbài dìì esaɓù kɛ̀ mìŋ kuwa ke jii tùlia kɛ̀ anyuùŋ fàa nyàŋ do ɓɛìŋ nàŋ yèwè e fàaà dìì.”
7Wo Pɔɔ̀ naŋ wa nɔŋ tɛɛ̀ woò fa, e nyaàŋ tàaŋ sɛ̀ɛ̀ aŋ Sadusiì nyaŋ yèè aŋ Fɛlosiì nyaŋ e fèemàŋ. Yèè ke gbòò anyùùŋ gbèègbèè aŋ Juùù nyaŋ naŋ gòònò sùà. 8Aŋ Sadusiì nyaŋ gò haawè kɛ̀ ànyùùŋ do nàŋ yèwè e fàaà dìì wɔ̀ŋ nyiiŋ gèeo sùà sèè àŋ fà, e kìlà aŋ gò haawè kɛ̀ àŋ màikà ɔ̀ɔ̀ àŋ jinàŋ naanààŋ e hààwè aŋ jìnàŋ nyuùŋkpùuŋ àŋ yaà. Kɛɛ aŋ Fɛlosiì nyaŋ naŋ hààwè maŋ keì mɛɛ̀ŋ gbiŋ. 9Yèè maŋ mìè kpààŋ e nyaàŋ tàaŋ nyiŋ nɛ̀ naŋ dɛ̀kɛ̀ò sùà. Aŋ kààmɔ̀ɔ̀ŋ maŋ Sàwà Mòòze nyàŋ bà nyiŋ yaà wa aŋ Fɛlosiì. Ko diemeì, aŋ Fɛlosiì nyaŋ naŋ tuù yèè àŋ naŋ woò nyààŋ, “E gòiŋ yɛ̀mɛ̀ è keì naanààaŋ wò felaa wɛɛ̀ naŋ nyɛ̀nɛ̀ŋ lɛ. È wɛ̀i ɓɛ̀nɛ̀ŋ nɔ̀ɔŋ kɛ̀ wo jinàŋ ɔ̀ɔ̀ wo màikà naŋ gbòò ko nɛ̀ɛ̀uŋ niìŋ.”
10Àŋ naŋ dàà ke gùuŋ e nyaàŋ tàaŋ nyiŋ nɛ̀ sùà, yèè e jùù naŋ nyɛ̀nɛ̀ŋ wo kànà aŋ kààlòòɗùà nyaŋ kɛ̀ anyùùŋ nyaŋ ɓɛ̀nɛ̀ŋ jìwà wo Pɔɔ̀ e kìlà auŋ sɛ̀ɛ̀sɛ̀ɛ̀ maŋ fàà nyɛ̀ɛ̀nyɛ̀ɛ̀. Kpeiŋ wò naŋ tùɔ̀ŋ aŋ kààlòòɗùàuŋ nyaŋ wèè aŋ gè nyiŋ wo Pɔɔ̀ e tɛɛ maŋ dùaŋ dùaŋ aŋ koàuŋ ko gbòòkùàŋ aŋ kààlòòɗùà nyaŋ.
11Wɔŋ dùùm wiiŋ wo Kanaà Jisɛ̀ naŋ fòlò wo Pɔɔ̀ fɛɛ̀feìŋ yèè wò nauŋ woò wààŋ, “Kɛ̀ɛ̀nɛɛ̀ŋ ke jii nyingè! Màŋ kìɛ̀ŋ ke mìè seì mɔɛ̀ŋ e nyaàiŋ eim dè ko Jùlusɛ̀làm, yèè kìɛ̀ŋ ɓɛìŋ ke mìè seì bi ko Luùm.”
E ɗèweɛ̀ wèè aŋ jìwà Pɔɔ̀
12Maŋ nyiìŋ tɛ̀tɛ̀ wɔŋ niìsìaà bàa, aŋ Juùù nyaŋ naŋ deenè yèè àŋ naŋ ɗewè e gbòòno diɛŋ kɛ̀, aŋ naàŋ jènɛ̀ŋ ɔ̀ɔ̀ aŋ tìà e jèèsùà aŋ jìwà wo Pɔɔ̀. 13Anyùùŋ nyaŋ naŋ wa nyɛ̀nɛ̀ŋ e ɗèwe lɛɛ̀ nyaŋ naŋ wa nìè kpɛ̀ùŋ tìyèe. 14Aŋ bà nyiŋ naŋ kɔ̀ koɓɛ̀ aŋ kànà sìèfèìŋ zòòlo gbee nyàŋ yaà aŋ màmànkùmɛ̀ŋ fuɔŋ nyàŋ yèè àŋ naŋ nyiŋ woò nyààŋ, “Èiŋ jɔ̀àà ɗààhiì koɓɛ̀ Dayài kɛ̀ e naàiŋ jè è nɛ̀ŋje gbiŋ e jèèsùà eiŋ jìwà wo Pɔɔ̀. 15Weètii, muàŋ yèè anyùùŋ gbèègbèè fuɔŋ nyàŋ gbiŋ, kɔ̀àiŋ koɓɛ̀ wo kànà aŋ kààlòòɗùà nyaŋ niŋ nyɛ̀nɛ̀ŋ mààŋ nìŋ manaŋ naŋ ɓɛìŋ nyɛ̀nɛ̀ŋ maŋ nɔnɔŋ tùaŋ e nyaàiŋ dè maŋ keì maŋ àŋ naŋ gbùwò wo Pɔɔ̀ ɗì maŋ. Dàweìŋ wèè aŋ hiàuŋ ko fɛɛ̀fenìiŋ. Etèèŋgà guùŋ bi sùà, è douŋ nàŋ nɔ̀ŋ fulie wèè euŋ jìwà paŋgàà wò haìyòo.”
16Kɛɛ nààŋ wo jɔ̀àfèlàà wo jàà Pɔɔ̀ɔ naŋ nyìmè ke gbùnu nyiŋ nɛɛ̀ŋ, wò naŋ kɔ̀ ko gbòòkùàŋ aŋ kààlòòɗùà nyaŋ yèè wò naŋ niŋ gbàì wo Pɔɔ̀ jii. 17Wo Pɔɔ̀ naŋ nyààŋ wo nyùùŋ gbèè aŋ kààlòòɗùà nyaŋ bà guùŋ yèè wò nauŋ woò wààŋ, “Kòaà wo fooninge wɛɛ̀ koɓɛ̀ wo kànà aŋ kààlòòɗùà nyaŋ. Wò kuwa e keì bà wèè wouŋ gbàì jii.” 18Wo nyùùŋ gbèè aŋ kààlòòɗùàa naŋ kɔ̀ɔ̀ wo fooningeɔ̀ koɓɛ̀ wo kànà aŋ kààlòòɗùà nyaŋ yèè wò nauŋ woò wààŋ, “Wo nyùùŋ keìɔ àŋ nyaaŋ wo Pɔɔ̀ wɔ naim dawè wààŋ miŋ hiàŋ wo fooninge wɛɛ̀ ko nɛ̀ɛ̀ŋ muìŋ, esaɓù kɛ̀ wò kuwa e keì bà wèè woum gbàì jii.”
19Wo kànà aŋ kààlòòɗùà nyaŋ naŋ kùwò wo fooningeɔ̀ kùàŋ wò nauŋ kɔ̀ɔ̀ e ɓula, yèè wò nauŋ dawè wààŋ, “Kiìŋ mùŋ kuwa maim gbàì jii?”
20Wo fooningeɔ̀ naŋ wòò wo kànà aŋ kààlòòɗùà nyaŋ wààŋ, “Aŋ kpàkòò bà naŋ ɗewè wèè aum dawè wèè maŋ hìàŋ wo Pɔɔ̀ ko fɛ̀ɛ̀fèìŋ anyùùŋ gbèègbèè aŋ Juùù nyaŋ nàwèè. Àŋ do nàŋ nyɛ̀nɛ̀ŋ mààŋ àŋ manaŋ aŋ ɓɛìŋ nyɛ̀nɛ̀ŋ maŋ nɔnɔŋ tùaŋ e nyaàiŋ euŋ dè. 21Kɛɛ kɔ̀nɛɛ̀ŋ ɓɔ̀ mùŋ nyimèè nyiŋ. Aŋ kpàkòò nyaŋ nìàŋ kpɛ̀ùŋ tìyèe yèè àŋ do nàŋ gbùwò wo Pɔɔ̀ ke gùuŋ. Àŋ naŋ jɔ̀ɔ̀ ɗààhiì koɓɛ̀ Dayài kɛ̀ aŋ naàŋ jè è nɛ̀ŋ gbiŋ ɔ̀ɔ̀ aŋ tìà e jèèsùà aŋ jìwà wo Pɔɔ̀. Yèè nààŋ pɛɛ mìŋ gboo yaà lɛ kòò àŋ yààùm fulie wèè aŋ kòmàŋ kɛ̀ kiìŋ mùŋ naŋ ɗewè.”
22Wo kànà aŋ kààlòòɗùà nyaŋ naŋ wòò wo fooningeɔ̀ wààŋ, “Ɓɔ̀ mùŋ woò wò nyùùŋ gbiŋ kɛ̀ màim tɛɛ̀ woò.” Yèè wò naŋ dangè wo fooningeɔ̀ wò naŋ kɔ̀.
Àŋ tùàŋ wo Pɔɔ̀ koɓɛ̀ wo Kanaà Filɛ̀i
23Wo kànà aŋ kààlòòɗùà nyaŋ naŋ nyààŋ aŋ sìèfèìŋ aŋ kààlòòɗùàuŋ nyàŋ àŋ tìyèe yèè wò naŋ nyiŋ woò wààŋ, “Sèè wɔŋ dùmɔ̀ɔŋ gboo nɔɔnɔŋ le tiinàŋ wɔŋ dùùm wɛɛ̀ŋ, bànèbanè aŋ kààlòòɗùà hɔ̀nɔ̀ɔ̀ tìyèe yèè anyuùŋ dùùnyàŋ aŋ sòo kpɛ̀ùŋ taai jɛ̀wɛ̀ zììyà yaà anyuùŋ sùmìàŋ maŋ kpɛɛ aŋ hɔ̀nɔ̀ɔ̀ tìyèe wèè niŋ ka ko Sesèlià. 24Bànèbanè aŋ sòo wèè aŋ koà wo Pɔɔ̀, e kìlà nyɛnɛ̀ŋ esaɓù wo haì koɓɛ̀ wo Kanaà Filɛ̀ bòìbòì.” 25Wo kànà aŋ kààlòòɗùà nyaŋ naŋ nyiŋ sìngè wɔŋ fɛi.
26E mìè sùà fɛiɔ̀ naŋ woò wàà, “E zùùmo yaà ko nɛ̀ɛ̀ŋ muìŋ, Kanaà Filɛ̀. Wɔŋ fɛi wɛɛ̀ŋ yewe wo Kulɔdiɔ̀ Lasià sìwè yèè wɔ̀ŋ yaà hìnìè ko nɛ̀ɛ̀ŋ muìŋ. 27Aŋ Juùù nyaŋ bà nyiŋ naŋ kùwò wo felaa wɛɛ̀ yèè àŋ manaŋ weè auŋ jìwà. Kɛɛ nààŋ mìŋ naŋ kòmò kɛ̀ wò yaà wo Luùm nyuuŋ, mìŋ naŋ tùɔ̀ŋ aŋ kààlòòɗùà nyaŋ bà wèè auŋ joeyè. 28Mìŋ manaŋ wa ka nyìmàŋ e keì titiɛ̀ wò naŋ nyiŋ pɔɔ̀ɔ̀ lɛ, yèè mìŋ nauŋ kɔ̀ɔ̀ anyùùŋ gbèègbèè aŋ Juùù nyaŋ fɛɛ̀feìŋ. 29Mìŋ naŋ nyɛ̀nɛ̀ŋ maŋ nɔnɔŋ tùaŋ, kɛɛ miŋ gò yɛ̀mɛ̀ è keìɛ wò naŋ nyɛ̀nɛ̀ŋ lɛ wèè wo yɛ̀mɛ̀ fàa ɔ̀ɔ̀ wèè auŋ pɛɛ gbìàŋ kò sààŋ nyìwì. E keìɛ àŋ nauŋ gbùwò ɗì lɛ e nyaàiŋ naŋ dè maŋ sàwà nyiŋ màŋ. 30Nààŋ mìŋ naŋ kòmò kɛ̀ àŋ naŋ jàà ke gbùnu weèuŋ wèè auŋ jìwà, mìŋ nauŋ tùɔ̀ŋ ko nɛ̀ɛ̀ŋ muìŋ yèè mìŋ naŋ wòò aŋ sìèfeìŋ nyiŋ nyàŋ kɛ̀ aŋ hiàŋ maŋ keì maŋ àŋ nauŋ gbùwò ɗì maŋ ko nɛ̀ɛ̀ŋ muìŋ wèè maŋ niŋ yɛ̀mɛ̀ dììò sùà.”
31Aŋ kààlòòɗùà nyaŋ naŋ wa nyɛ̀nɛ̀ŋ e yèɛ wo kana nyiŋ nɔɔ̀ŋ naŋ nyiŋ woò wèè aŋ nyɛ̀nɛ̀ŋ lɛ, yèè wɔŋ dùùm guùŋ wiiŋ àŋ naŋ kɔ̀ɔ̀ wo Pɔɔ̀ ko jawa gbeeì àŋ nyaaŋ Aŋtipatì. 32Wɔŋ niìsìaà bàa aŋ kààlòòɗùà nyaŋ naŋ kààìŋ dìì nyaŋ naŋ kɛ̀ɛ̀ maŋjɛ̀wɛ ko gbòòkùàŋ aŋ kààlòòɗùà nyaŋ, yèè aŋ kààlòòɗùà nyaŋ jaa aŋ sòo nyàŋ diɛŋ nyàŋ naŋ kɔ̀ɔ̀ wo Pɔɔ̀ auŋ halèè. 33Nààŋ àŋ naŋ hàì ko Sesèlià, àŋ naŋ kìɛ̀ŋ wɔŋ fɛiɔ̀ koɓɛ̀ wo Kanaà Filɛ̀ yèè àŋ naŋ kìlè wo Pɔɔ̀ ko nɛ̀ɛ̀uŋ niìŋ. 34Wo kanaà naŋ kpɛ̀nɛ̀ŋ wɔŋ fɛiɔ̀, yèè wò naŋ dàwè wo Pɔɔ̀ kɛ̀ fuɔɔ̀ŋ kòò wuŋ wò yewe, yèè wo Pɔɔ̀ nauŋ woò wààŋ wò yewe ko Sèlesìà. 35Wo kanaà naŋ kpɛ̀nɛ̀ŋ wɔŋ fɛiɔ̀ yèè wò naŋ wòò Pɔɔ̀ wààŋ, “Mìŋ do nàŋ kùmìè e keìɛ mùŋ naŋ nyɛ̀nɛ̀ŋ lɛ sèè anyùùŋ nyaŋ hnàŋ nɔŋ wèè aim woò kɛ̀ kiìŋ mùŋ naŋ nyiŋ pɔɔ̀ɔ̀, kpeiŋ kɛ̀ kà gbàì e keì mɔ̀ɛ̀.” Nààŋ wo kanaà naŋ tɛɛ̀ woò, wò naŋ wòò anyunùuŋ nyàŋ wèè aŋ koà wo Pɔɔ̀ ko sààŋ gbèè kanaà, ke yèɛ wo Kanaà Hɛɛlɔ̀ wo Gbeeɔ̀ naŋ nyɛ̀lɛ̀ yɛ, wèè aŋ yɛmɛ̀uŋ diɛŋ.
Trenutno izabrano:
:
Istaknuto
Kopiraj
Uporedi
Podeli
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
Gola New Testament Translation and Literacy Project © Bible Society in Liberia, 2019.