ธ้วด อียิบ 11

ตะเหฒียบ หญู่ง เหฒะ หน่าน, เต้าๆ ตอน-หละเก๊า หฒุ ไต่

1 เฒี้ยว ก๊อง บั๋ว โมเซ, “เยีย แอ๋ง อ๋อย ปุน ฟาโล เหธา อียิบ เมี่ยน หฒุ เหยียด หญู่ง ต้ม เหฒะ หน่าน. ฆะฮ้า ฟาโล ฯฒฯ ปู๋ง เม่ย บัว มี่ง อ๊ะ. ไม้ เฒ์ย ปู๋ง เม่ย บัว มี่ง ฮนั้ง, ฒู้ง หฒุ่น เม่ย บัว ธ้วด เหฑ่ง มี่ง. 2เม่ย อ๋อย หฒุ บั๋ว อิสะลาเอน เญย หฒวัง เมี่ยน มจั่ง มเซียะ มี่ง เถง ล์าง หฒั่ง เมี่ยน โท้ หล่ง เจียม หล่ง ญ่าน โหฒว ต้าย เญย เซียว-เซ้ด.” 3(เฒี้ยว ปุน อียิบ เมี่ยน ฆอย ฟิม ฆอย เอ๋ย อิสะลาเอน เมี่ยน. ไม้ ตาน บัวะ น้าย, เยียม อียิบ เต่ย-ปูง, ฟาโล ฮู่ง เญย เจียน เหธา หฒวัง แปะ ฝีง ท่าย โมเซ โหฒว โฮล.)

4โมเซ ฯฒฯ ก๊อง, “เฒี้ยว ฮนั้ง น้าย นอ ก๊อง, ‘เถา ด๊าม ม์วน เญย เฒี่ยง โห่ เยีย อ๋อย มี่ง ก๋อม อียิบ เต่ย-ปูง. 5เยียม อียิบ เต่ย-ปูง ยู์ง เญย โม์ว เต้า ตอน-หละเก๊า อ๋อย หฒุ ไต่ อ๊ะ. เลี่ยม อี้ หฒั่น เฒว์ย เจี๊ยน ฮู่ง เหว่ย วั้ว เต้า ฟาโล เญย ต้าว เต้า ตอน, เลี่ยม หม่อ บ๊วน วั้ว เต้า โน่ว เป์ย เญย ตอน-หละเก๊า, เลี่ยม แซง-คู้ เญย ต้าว ทอย ตอน อ๋อย หฒุ ไต่ เหฑ่ง. 6เหยียด นอม อียิบ เต่ย-ปูง เญย เมี่ยน อ๋อย เบี้ยวๆ เญย เญี้ยม เหฑ่ง. ฒิ่น ด่าง ไม้ ม่าย เจี๋ย ฮนั้ง หน่าย. ฆะฮ้า ฮี้ง หย่า ไม้ ม่าย อ๊ะ. 7มป่า เยียม อิสะลาเอน เมี่ยน บุด๋ง, ไม้ กุ๊น เมี่ยน ไฟ แซง-คู้ เลี่ยม จู๊ หย่า ไม้ หฌูง, เหว่ย ปุน เม่ย บัว ฮิ้ว ตุ๊ เฒี้ยว โหฒว ปุน อียิบ เมี่ยน เหธา อิสะลาเอน เมี่ยน ไม้ ฟี่ ฮนั้ง.’” 8เซ้ด เมว์ย โมเซ ก๊อง, “เม่ย เญย เจียน-โฟ้ว ฒู้ง อ๋อย ต้าย เกว่ย เหฌี่ย เยีย เญย หฑะเฮมียน ชะ โท้ เยีย, ‘ก๊าน มี่ง อ๊ะ, เม่ย เหธา กัน เม่ย เญย เหยียด ฒู้ง แปะ ฝีง.’ ฆะฮ้า เยีย บัว ฯฒฯ มี่ง.” โมเซ เฉีย เจี์ย! ไห่, เฮมียน ฮมัด เจี๊ยะ เญย เยียม ฟาโล เญย หฑะเฮมียน มี่ง หมี่ อ๊ะ.

9 เฒี้ยว ก๊อง บั๋ว โมเซ, “ฟาโล ไม้ คั้ง หมวัง เม่ย เญย หว่า เหว่ย ปุน เยีย เยียม อียิบ เต่ย-ปูง โหฒว บัวะ ฮ่อง เญย สี่ ธั้ม เจี๊ยน ฝาว.” 10โมเซ เหธา อาโลน เยียม ฟาโล เญย หฑะเฮมียน โหฒว ธ้วด น้าย เต๋ย เหยียด ฒู้ง บัวะ ฮ่อง เญย สี่. มป่า เฒี้ยว ปุน ฟาโล เญย เฮญี้ยว แหง่ง, หธ่อ ไม้ คั้ง ปู๋ง อิสะลาเอน เมี่ยน ธ้วด นิ่น เญย เต่ย-ปูง.

Trenutno izabrano:

ธ้วด อียิบ 11: IuMiTH

Istaknuto

Kopiraj

Uporedi

Podeli