Yela 38
38
Bonyɛɡa wesoŋa
Kooro Devid yel
1N Naa Korowii,
bɛ ɡel he baah di
he pwaah mɛ,
bɛ ɡel he baah di kohona,
he tɛr n deŋne.
2He ta he hɛma yaɡ mɛ,
dɛ lɔ mɛ bil.
3He bandia ɡelɔ n bwara
ɛɛ nyɛɡ mɛ,
n wechɔɡa nomanta,
n bwadabii bwa ne weelaa.
4N wechɔɡa ɡwaa n nɛɛ
kohona,
a do kɛ bontɔɡa
maa wola won che.
5N wechɔɡa aa ɡela
n ɡɛn nomanta,
n ŋwɛra pɔɔh, dɛ do sɔɔh.
6N weweele ɡwaa n nɛ,
a ɡel maa won che,
dɛɛ wi tɔpebir bwa kɛŋɔ,
nɛn waa dɛ ɛ lwe ken.
7N nyaŋ dɛ nyaa mɛ,
dɛɛ wee mɛ,
n bokpeɡa tonɛ.
8N ɡwɛɡrɔ, n bwara bini
bwa sɔɔh,
suna dii ɡel mɛɛ pɛmɛ.
9N Naa Korowii, he ɡbabir
jemɛ n waa bwa
aa chɔ he sie,
he dɛ no n pɛma
maa dɛ pɛmɛ bwa.
10N bambile dɛ lɔ,
n bokpeɡa tonɛ, n sibie ɡe
aa na kɛrɛdɛ kpa.
11N daamanar ne n soma bwa
chwa mɛ n ŋwɛra wa,
hale n lolanar bwa
ɡe chwa mɛ.
12Nɛra baa dɛ nyin mɛ
dɛ́ kpo, haɡre mɛ bela,
nɛra baa dɛ nyin n chɔɡa
dɛ́ aah mɛ,
tɔpere bɛlbwaa baa vɔrɔwe
n vɔrɔwa, dɛ́ chɔɡ mɛ.
13N do kɛ nɛn o deŋne
aa wola waa no,
kɛŋɔ amumu maa wola
won bol wa.
14N do kɛ nɛn waa
wola waa no,
ba bol wa waa wola
won chaŋe la ken.
15Kɛ N Naa Korowii,
he nɛɛ mɛɛ hwɛɡɛ,
henee dɛ́ chaŋ mɛ.
16Bɛ ɡel n dɔma mam mɛ
n wenaale wa,
bɛ ɡel n chola ɛɛ ba silɛɛ.
17N dɛ ba chola,
wee n bwara aa dɛ wee mɛ
tɔpere bɛlbwa wa.
18N dɛ bol n wechɔɡa,
a ɡelɔ mɛɛ ɔmɛ kwara.
19N dɔma warɔ, dɛ do kpeɡri,
ba warɔ, dɛ hah mɛ pɛɛpɛɛ.
20Nɛra baa kpɔ wechɔɡa
dɛɛ bɔ wedɛɛɡa kem
cheɡɛ n nɛ, dɛkalkɛ n dɛ ɛ
waa aa toɡra.
21N Naa Korowii,
bɛ habɔɔ berɛ kpo mɛ,
Korowii maa dɛ tomɛ,
bɛ bojaŋ kaa ɡel mɛ.
22N Naa Korowii,
henee ɛ n Lɛɛ,
ba warane, dɛ́ ba cha mɛ.
Trenutno izabrano:
Yela 38: mzw
Istaknuto
Podeli
Uporedi
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.