Popularni biblijski stihovi iz YOSUA 1

Podeli

A nshi yeny shilekuruma va ntakusu kutire nrima nkaari! Kulasheereyaa nta isavaa, mashika Nndumi Iruva, Iruva wafo mmbo akee neewe ando koose kusheenda.”

Kyitabu ekyi kya uvavaso mmbo kukuloshaa kyeeri kyoose, na marero a vayo kuve mwiia-soongya kio na nsanyiny, kutane shaasa kikee kireiye, llyo shia yafo ishevaa ya iviiri, kuvikyo mbora deny.

Va nkaari nnu kuve ntakusu. Lola nnu kutani shaasa nsero wakwa Mose alekuvavasya. Kulaevekye mbai taari yei ao yei-fo, llyo kushevikyoo mbora findony fyafo fyoose.

Nkushekaafo nndu moose ashiidimaa ikukikisa yoo mbee yafo kyeeri kyoose, kya mu wafo-fo, na shaasa shekee na Mose shansongoya, niindo nshekaa neeweda, shilakuraa nta ikwaanguya.

“Tira nrima nkaari neeva ntakusu, mashika ni yewe kushefitaa vandu yeva urukeny yelo shilevikkya vakuu vany kyaasa sheelyi mmbo nshevaniingaa.

Wo ando uvayo lwany luvaryaa mmbo shamuniinga uruka elo, shaasa shilevia Mose.

“Mose ulya ishinga lyakwa ekau amfwa, kyasia, iboony vandu yeva woose muruuke mura va Yordan, urukeny yelo shikeeniinga vana va Israeli.

Naasany Mose we ishinga lya Nndumi Iruva eekifwa, Nndumi Iruva kavia Yosua mwana wa Nuni, ulya ekee mweekyi va Mose

Minyanu ya uruka lwany ni indi, taari ya sinde ni kasa koomu taari ya ndoo ni mafumbu a Lebanoni, taari ya ngama ni mura ulya nniini Efrati na iira uruka loose lwa Vahiti kundekooya yeeve lya Meditarenia taari ya nkwaany.

Nndu moose yeto araa nalasora efyo fyoose kuluvavasyaa, nawaawa. Lyo va ntakusu kutire na nrima nkaari, kyo kyeni mmbo kifye!”

“Endeny efo mmbeny, muvye vandu vadeesye shoonga, mashika kukamiira mikonu iraru nsi mmbo lukillyaa Yordan naambo lundetira uruka elu Nndumi Iruva waany aleluniinga luve lweru.”