Triqui, Copala

Ga̱a ne̱ catúj uún Jesús rá veꞌ tucuꞌyón nij síí israelitá stucua̱nj Moisés, ne̱ dan me se yáán ꞌo̱ snóꞌo nacoo̱ raꞌa rá veꞌ yoꞌ a. Ne̱ do̱j nij síí fariseo me se yáán nij soꞌ rá veꞌ yoꞌ, ne̱ tumé uxrá nij soꞌ man Jesús sese nahu̱un snóꞌo yoꞌ quiꞌya̱j Jesús ga̱a güii naránj rá nij yuvii̱ israelitá a. Da̱nj quiꞌyaj nij soꞌ cheꞌé rej cuta̱ꞌ nij soꞌ cacunꞌ xráá Jesús a. Ga̱a ne̱ cataj Jesús rihaan síí nacoo̱ raꞌa a:
―Na̱xuma̱a̱n so̱ꞌ canicu̱nꞌ ca̱yá so̱ꞌ scaꞌnúj núj á ―taj Jesús a.
Ga̱a ne̱ xnáꞌanj Jesús man nij síí fariseo yoꞌ a:
―No̱ xcúún níꞌ ra̱cuíj níꞌ man tuviꞌ níꞌ güii naránj rá níꞌ naꞌ, ase no̱ xcúún níꞌ quiꞌya̱j chiꞌi̱i̱ níꞌ man tuviꞌ níꞌ xa̱ꞌ. No̱ xcúún níꞌ ti̱nanii níꞌ man tuviꞌ níꞌ rihaan sayuun güii naránj rá naꞌ, ase ni̱ꞌyaj u̱u̱n níꞌ cavi̱ꞌ soꞌ xa̱ꞌ ―taj Jesús rihaan nij soꞌ a.
Tza̱j ne̱ dínj tuꞌva nij soꞌ a. Ga̱a ne̱ caꞌmaan rá Jesús, ne̱ niꞌya̱j soꞌ man nij síí fariseo yoꞌ a. ꞌO̱ se nanó ndoꞌo rá soꞌ cheꞌé se síí nichra̱j ndoꞌo nimán me nij soꞌ a. Ga̱a ne̱ cataj Jesús rihaan síí nacoo̱ raꞌa yoꞌ a:
―Tu̱cuá so̱ꞌ raꞌá so̱ꞌ á ―taj Jesús a.
Ne̱ tucuá soꞌ raꞌa soꞌ, ne̱ cunuu sa̱ꞌ raꞌa soꞌ na̱nj ado̱nj. Ga̱a nu̱ꞌ curiha̱nj nij síí fariseo yoꞌ, ne̱ cunuu chre̱ꞌ nij soꞌ ga̱ nij síí noco̱ꞌ man síí cuꞌna̱j Herodes, ne̱ nuchruj ra̱a̱ ta̱ranꞌ nij soꞌ da̱j ga̱a̱ quiꞌya̱j nij soꞌ ne̱ cavi̱ꞌ Jesús a.

Ga̱a ne̱ cavii Jesús ga̱ nij síí tucuꞌyón snana̱ soꞌ rej yoꞌ, ne̱ caꞌanj soꞌ tuꞌva na laguaná a. Ne̱ canocoꞌ ri̱i̱ uxrá yuvii̱ man soꞌ a. Dan me se síí ma̱n estadó Galilea do̱ꞌ, estadó Judea do̱ꞌ, chumanꞌ Jerusalén do̱ꞌ, estadó Idumea do̱ꞌ, rej rne̱j chráá cuꞌna̱j Jordán do̱ꞌ, nij chumanꞌ na̱j nu̱ꞌ anica̱j chumanꞌ Tiro do̱ꞌ, chumanꞌ Sidón do̱ꞌ, cuno nij soꞌ nana̱ da̱j quiꞌyaj Jesús cheꞌé nij síí ranꞌ, ne̱ cheꞌé dan caꞌnaꞌ ri̱i̱ uxrá nij soꞌ rihaan Jesús a. Ga̱a ne̱ cataj Jesús rihaan nij síí tucuꞌyón snana̱ soꞌ se vaa quiꞌya̱j chuvi̱i nij soꞌ ꞌo̱ rihoo chéé rihaan na catu̱u̱ soꞌ, ga̱a ne̱ se̱ gaa na̱nj curuꞌma̱an nij yuvii̱ man soꞌ, taj soꞌ a. ꞌO̱ se nahuun sa̱ꞌ uxrá yuvii̱, quiꞌyaj Jesús, ne̱ nda̱a síj, ga̱a ne̱ ta̱ranꞌ nij síí ranꞌ roꞌ, canocoꞌ uxrá nij soꞌ man Jesús cheꞌé rej caꞌve̱e cano̱ raꞌa nij soꞌ man soꞌ ga̱a ne̱ nahu̱un sa̱ꞌ nij soꞌ, rá nij soꞌ a. Ne̱ nij síí nu̱u̱ nana̱ chre̱e nimán roꞌ, ga̱a queneꞌen nij soꞌ man Jesús, ne̱ quinij ru̱j nij soꞌ tacóó Jesús, ne̱ cataj nij nana̱ chre̱e a:
―So̱ꞌ me Taꞌníí Yaꞌanj ya̱ ado̱nj ―taj nij soꞌ a.
Ga̱a ne̱ caꞌneꞌ ndoꞌo Jesús suun rihaan nij nana̱ chre̱e se vaa se̱ guun nata̱ꞌ nij soꞌ rihaan nij yuvii̱ cheꞌé soꞌ a.

Ga̱a ne̱ cavii Jesús rej tacaan, ne̱ canacúún soꞌ man nij síí me rá soꞌ caꞌna̱ꞌ rihaan soꞌ, ga̱a ne̱ cavii nij soꞌ, ne̱ cuchiꞌ nij soꞌ rihaan Jesús a. Ga̱a ne̱ cuneꞌ Jesús man chuvi̱j nij soꞌ se vaa cache̱e̱ nij soꞌ ga̱ soꞌ, ne̱ caꞌne̱j soꞌ man nij soꞌ caꞌmi̱i̱ natáj nij soꞌ rihaan nij yuvii̱ a. Ne̱ guun rá soꞌ nago̱ꞌ soꞌ suun uun chij raꞌa nij soꞌ cheꞌé rej caꞌve̱e nahu̱un sa̱ꞌ nij síí ranꞌ ne̱ quiri̱i̱ nij soꞌ man nij nana̱ chre̱e nimán nij yuvii̱ a. Dan me se cuneꞌ Jesús man síí cuꞌna̱j Simón, ne̱ tucuꞌnáj soꞌ Pedró man Simón a. Ne̱ cuneꞌ soꞌ man Jacobo taꞌníí síí cuꞌna̱j Zebedeo, ne̱ cuneꞌ soꞌ man tinúú Jacobo síí cuꞌna̱j Juan, ne̱ tucuꞌnáj soꞌ Boanerges man ro̱j soꞌ, ne̱ nana̱ Boanerges roꞌ, me raj cata̱a ase vaa taꞌníí tuꞌvii vaa ro̱j soꞌ a. Ne̱ cuneꞌ soꞌ man Andrés do̱ꞌ, Felipé do̱ꞌ, Bartolomé do̱ꞌ, Mateo do̱ꞌ, Tomás do̱ꞌ, Jacobo taꞌníí síí cuꞌna̱j Alfeo do̱ꞌ, Tadeo do̱ꞌ a. Ne̱ cuneꞌ soꞌ man ꞌó síí cuꞌna̱j Simón, ne̱ tuviꞌ nij síí me rá cunu̱ꞌ ga̱ gobiernó ma̱n Romá me soꞌ a. Ne̱ cuneꞌ Jesús man Judas Iscariote si̱j tacuachén man Jesús rihaan nij síí ta̱j riꞌyunj man Jesús a.

Ga̱a ne̱ catúj Jesús rá veꞌ aranꞌ soꞌ a. Ne̱ cunuu chre̱ꞌ ndoꞌo uún nij yuvii̱ rihaan soꞌ, ne̱ nda̱a ne ga̱a̱ yaꞌnúj rihaan Jesús ga̱ nij síí tucuꞌyón snana̱ soꞌ cha̱ nij soꞌ a. Ga̱a ne̱ cuchiꞌ nana̱ rihaan nij tuviꞌ Jesús da̱j ranꞌ soꞌ ꞌyaj nij yuvii̱, ne̱ cheꞌé dan caꞌanj nij tuviꞌ Jesús ta̱ꞌaa nij soꞌ man Jesús, cheꞌé se cataj nij soꞌ se vaa snúú Jesús a.
Ga̱a ne̱ nij síí naquiꞌyaj cu̱u stucua̱nj Moisés síí nanij chumanꞌ Jerusalén roꞌ, caꞌnaꞌ nij soꞌ ne̱ cataj nij soꞌ se vaa nana̱ chre̱e uun chij doj, síí cuꞌna̱j Beelzebú, nuû nimán Jesús a. Ne̱ cheꞌé dan guun nucua̱j Jesús quiri̱i̱ Jesús nana̱ chre̱e nimán yuvii̱, taj nij soꞌ a.
Ga̱a ne̱ canacúún Jesús man nij síí naquiꞌyaj cu̱u stucua̱nj Moisés, ne̱ nanó soꞌ do̱j cuentó rihaan nij soꞌ a:
―Asa̱ꞌ caꞌve̱e quiri̱i̱ Síí Chre̱e man maꞌa̱n tuviꞌ soꞌ nana̱ chre̱e nimán nij yuvii̱, rá nij soj ga̱. Neꞌen soj se vaa sese vaa ꞌo̱ yoꞌóó noco̱o, ne̱ sese xraꞌ taꞌa̱j nij síí uun chij rihaan yoꞌóó noco̱o yoꞌ, ne̱ vaa güii, ne̱ nu̱ꞌ yoꞌóó noco̱o yoꞌ quiri̱ꞌ nu̱ꞌ na̱nj ado̱nj. Ne̱ sese xraꞌ taꞌa̱j nij tucua̱ ꞌo̱ yuvii̱, ne̱ quiri̱ꞌ nu̱ꞌ nij tucua̱ nij soꞌ na̱nj ado̱nj. Cheꞌé dan me sese unuꞌ Síí Chre̱e ga̱ tuviꞌ maꞌa̱n soꞌ, ne̱ xraꞌ taꞌa̱j nij soꞌ, ne̱ se̱ caꞌvee veé dan gu̱un chij Síí Chre̱e sese navi̱j tuviꞌ soꞌ maꞌ. Ma̱an se quiri̱ꞌ nu̱ꞌ soꞌ na̱nj ado̱nj.
’Sese me rá ꞌo̱ soꞌ catu̱u̱ soꞌ rá veꞌ tucuá síí nucua̱j quiꞌya̱j itu̱u̱ soꞌ siꞌyaj síí nucua̱j yoꞌ, ne̱ asino nu̱míj soꞌ man síí nucua̱j yoꞌ, ga̱a ne̱ ca̱nica̱j soꞌ catzi̱j soꞌ tucuá síí nucua̱j yoꞌ ado̱nj.
’Cata̱j xnaꞌanj yá yá ꞌu̱nj rihaan soj cuano̱ se vaa nu̱ꞌ cacunꞌ tumé yuvii̱ do̱ꞌ, me maꞌa̱n nana̱ qui̱j caꞌmi̱i̱ yuvii̱ do̱ꞌ roꞌ, caꞌve̱e tinavi̱j Yaꞌanj cacunꞌ yoꞌ cheꞌé nij yuvii̱ a. Tza̱j ne̱ sese caꞌmi̱i̱ ꞌo̱ soꞌ ꞌo̱ nana̱ qui̱j cheꞌé Nimán Yaꞌanj, ne̱ daj chiha̱a̱ míj se̱ navij cacunꞌ yoꞌ xráá soꞌ a̱ maꞌ. Tana̱nj quita̱j cacunꞌ yoꞌ xráá soꞌ nu̱ꞌ cavii nu̱ꞌ caꞌanj na̱nj ado̱nj ―taj Jesús a.
Da̱nj cataj Jesús rihaan nij síí naquiꞌyaj cu̱u stucua̱nj Moisés, cheꞌé se a̱j cataj nij soꞌ se vaa nana̱ chre̱e nuû nimán soꞌ a.

Ga̱a ne̱ caꞌnaꞌ nii Jesús ga̱ nij tinúú Jesús, ne̱ nicunꞌ nij soꞌ xeꞌ rihaan veꞌ nu̱u̱ Jesús, ne̱ caꞌnéé nij soꞌ nana̱ rihaan Jesús se vaa cu̱riha̱nj soꞌ caꞌna̱ꞌ soꞌ rej nicu̱nꞌ nij soꞌ a. Ne̱ ya̱nj ndoꞌo yuvii̱ nu̱ꞌ anica̱j xꞌnúú Jesús, ne̱ cataj nii rihaan Jesús a:
―Nicu̱nꞌ nií so̱ꞌ ga̱ nij tinúú so̱ꞌ xeꞌ, ne̱ me rá nij soꞌ queneꞌe̱n nij soꞌ mán so̱ꞌ á.
Ga̱a ne̱ cataj Jesús rihaan nij soꞌ a:
―Me chana̱ me nií ꞌu̱nj, rá soj ga̱. Me síí me tinúú ꞌu̱nj, rá soj ga̱ ―taj Jesús a.
Ga̱a ne̱ niꞌya̱j Jesús man nij síí ya̱nj nu̱ꞌ anica̱j xꞌnúú soꞌ, ne̱ cataj soꞌ a:
―Ni̱ꞌyaj soj á. Ase vaa nií ꞌu̱nj do̱ꞌ, ase vaa tinúú ꞌu̱nj do̱ꞌ, vaa nij síí nihánj ado̱nj. Yuvii̱ ꞌo̱ uno rihaan Yaꞌanj roꞌ, ase vaa tinúú ꞌu̱nj do̱ꞌ, ase vaa raꞌvij ꞌu̱nj do̱ꞌ, ase vaa nií ꞌu̱nj do̱ꞌ, vaa nij soꞌ ado̱nj ―taj Jesús a.

Slušaj San Marcos 3