Solid Joys ShqipShembull

Fuqia depërtuese e Fjalës

Sepse fjala e Perëndisë është e gjallë dhe vepruese, më e mprehtë se çdo shpatë me dy tehe dhe depërton deri në ndarjen e shpirtit dhe të frymës, të nyjave dhe të palcave, dhe është në gjendje të gjykojë mendimet dhe dëshirat e zemrës. (Hebrenjve 4:12)

Fjala e Perëndisë është shpresa jonë e vetme. Lajmi i mirë i premtimeve të Perëndisë dhe paralajmërimet e gjykimit të Tij janë mjaft të mprehta, mjaft të gjalla dhe mjaft vepruese sa për të depërtuar deri në thellësitë e zemrës dhe për të më treguar se gënjeshtrat e mëkatit janë me të vërtetë gënjeshtra.

Aborti nuk do të krijojë një të ardhme të mrekullueshme për mua. As tradhtia, as të veshurit në mënyrë provokuese, as hedhja tej e pastërtisë time seksuale, as të qëndruarit në heshtje ndaj pandershmërisë në punë, as divorci dhe as hakmarrja. Ajo që më shpëton nga ky mashtrim, është fjala e Perëndisë.

Fjala e premtimit të Perëndisë është si të hapësh një dritare të madhe, nga e cila hyn drita e shndritshme e diellit të mëngjesit mbi kacabunjtë e mëkatit, të cilat shtiren si kënaqësi përmbushëse në zemrat tona. Perëndia të ka dhënë lajmin e Tij të mirë, premtimet e Tij, fjalën e Tij për të të mbrojtur nga mashtrimet e forta të mëkatit që përpiqen të ta ngurtësojnë zemrën dhe ta joshin atë për t’u larguar nga Perëndia dhe ta çojnë në shkatërrim.

Merr zemër në betejën tënde për të besuar. Për shkak se fjala e Perëndisë është e gjallë dhe vepruese, dhe më e mprehtë se çdo shpatë me dy tehe, ajo do të depërtojë më thellë se çdo mashtrim i mëkatit ka depërtuar ndonjëherë, dhe do të na zbulojë atë që është vërtet e vlefshme, në të cilën ia vlen vërtet të besosh dhe që ia vlen ta duash.