SALMOS 28
28
1X̱ana' Dios, žḻiža' Le'. Le' žape chi'ikzo' neda'.
Bze nag chi'a dan' cha' bi yenlo' chia' gaka' ka to benne' žoe'e ḻo yi' gabíl.
2Benle chi'a dan' žḻiža' Le',
na' ẕchis na'a ḻawo' Le' gan zo' latje la'y chio'.
3Bi wžía yi'o neda' tẕen ḻen benne' wen ḻaže' ka',
na' kege tẕen ḻen benne' ka' žóngake' da' ẕinnj.
Ẕnnágake' da' cháwe'do' ḻawgak ljéžgake' ka',
san da' bi nak chawe' yo'on yichj ḻáẕdo'gake'.
4Bde benne' ka' ḻo da' sáka'ḻe'egake' tḻebe kan nak da' béngake',
ka nakkze da' bi nak chawe' da' béngake'.
Bneẕjw benne' ka' tḻebe kan nak da' béngake', dan' yeyáḻa'gake'.
5Dan' bi wdápegake' ba la'ne da' ben X̱anžon', na' kege dan' bene' ḻen na'kze',
Ḻe' wžía yi'e benne' ka', na' wdíe' ḻégake' ḻo da' sáka'ḻe'egake'.
6¡Ga'n ẕen X̱anžo Dios,
Bennen' benle' chi'a katen' bḻiža'-ne'!
7X̱anžo na'kze ẕze choche' neda', na' žape chi'e neda'.
Bx̱en ḻaža'a Ḻe', na' gókḻene' neda'.
Che ḻen yebéḻe'ela', na' goḻkza', na' wká'n ẕenkza' Ḻe'.
8X̱anžon' ẕze chochkze' benne' chie' ka',
na' žape chi'ikze', na' žeslé' bennen' wžíe'.
9Beslá benne' chio' ka'. Ben chawe' da' nak chégake'.
Wdáp chi'i benne' ka', na' bze choch ḻégake' to chi'ize.
Zvasarudzwa nguva ino
SALMOS 28: zty
Sarudza vhesi
Pakurirana nevamwe
Yenzanisa
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© 2002, Wycliffe Bible Translators, Inc. All rights reserved.