Tchikyꞌbꞌin 9
9
1Atzin tjweꞌyin angel xi toqꞌsin tchun, ex xi nkaꞌyiꞌn jun tzeꞌnku jun cheꞌw otaq tzaj tzꞌaq toj kyaꞌj, tuꞌn tkupin twutz txꞌotxꞌ. Xi qꞌoꞌn tal ja te, tuꞌn tjqetjo kynajbꞌil kyimnin aj ilqe, a jul te kawbꞌil, a nimxix t-xe. 2Tej tokx tjqoꞌnjo jul te kawbꞌil, bꞌeꞌx jatz nim sibꞌ toj, tzeꞌnku tsibꞌil jun jornin te txun nimxix wen. Ex ajo qꞌij ex xjaw, bꞌeꞌx ok juple kywutz tuꞌn. 3Ex tojjo sibꞌ, i etz txanin nchi lipin twutz txꞌotxꞌ. Ex ayetziꞌn txanin xi qꞌoꞌn kyoklin, tuꞌn kytxꞌaꞌn tzeꞌnqeku sichil iteꞌ twutz txꞌotxꞌ.#Ex. 10:14. 4Ex xi qꞌmaꞌn kye, tuꞌn mi txi kywaꞌn kꞌul twutz txꞌotxꞌ, exsin jniꞌ txaq tze, mixpe a txaq txꞌiꞌx, qalaꞌ noq tuꞌn kykyꞌixbꞌajtzxjal kyuꞌn, ayeꞌ a ntiꞌ kyechil tok tiꞌj kyplaj, qa te Diosqe.#Ez. 9:4; Tchi. 7:3. 5Mi xi qꞌoꞌn ambꞌil kye, tuꞌn tkubꞌ kybꞌyoꞌn xjal, qalaꞌ noq tuꞌn kykyꞌixbꞌajtz toj jweꞌ xjaw, quꞌn ajo tkyixkꞌojil ikyxjo tzeꞌnku tuꞌn tbꞌaj jun xjal tuꞌn jun sichil. 6Me kyojjo qꞌij anetziꞌn, okla kyjyaꞌxjal tuꞌn kykyim, me nlay chi kyim, quꞌn a kyimin k-elil laqꞌe kyiꞌj.#Job 3:21.
7Ayetziꞌn txanin ikytaqtzin chi kaꞌyin tzeꞌnku chej bꞌantnin kyten, tuꞌn kyxiꞌ toj qꞌoj.#Jl. 1:6; 2:4-5. Ex qꞌan kaꞌyin tibꞌaj kywiꞌ, ex ayetzin kywutz, nyakuj twutz jun xjal. 8Atzin kysmal ikytziꞌn tzeꞌnku tsmal kywiꞌqya; ex ayetzin kyste, tzeꞌnku kyste bꞌalun. 9Ex tiꞌj kykꞌuꞌj, attaq jun kutxbꞌilte nyakuj kxbꞌil. Ex tej kylipin, atzin tqꞌajqꞌojil kyxikyꞌ ikyxjo tzeꞌnku tqꞌajqꞌojil karwaj jkꞌuꞌn kyuꞌn chej, aj kyxiꞌ toj qꞌoj.#Jl. 2:4-5. 10Ex attaq kyje tzeꞌnku te sichil, a tukꞌa kytuchꞌbꞌil. Ex atzin kyje attaq kyipin tuꞌn kyꞌixbꞌajtzxjal kyuꞌn toj jweꞌ xjaw. 11Ex ayetziꞌn txanin attaq jun kynejil, a taqꞌnil tajaw il tibꞌaj jul te kawbꞌil: Abadón tbꞌi toj kyyol aj Judiy, ex toj kyyol aj Griego, Apolión, a Yuchꞌil n-ele toj qyol. 12O bꞌaj te tnejil ma nim bꞌisbꞌajil lo. Me atx kabꞌel naꞌm kybꞌaj.
13Atzin tqaqin angel xi toqꞌsin tchun, ex nbꞌiꞌy jun tqꞌajqꞌojil twiꞌ, a n-etztaq kyojjo kyaje kach, a iteꞌkxtaq twutzjo altar bꞌinchin tuꞌn qꞌanpwaq, a tokxtaq twutz Dios.#Ex. 40:26; Tchi. 8:3. 14Atziꞌn tqꞌajqꞌojil tqꞌma te tqaqin angel, a qꞌiꞌntaq tchun: Tzaqpiꞌnqetzjiy kyaje angel, ayeꞌ kꞌloꞌnqe tzma ttzi Nim Aꞌ Eufrates.
15Ikytziꞌn o chi tzaqpeteꞌ kyaje angel, tuꞌn tkubꞌ kybꞌyoꞌn toxin tnej xjal twutz txꞌotxꞌ. Aye angel anetziꞌn otaq bꞌant kyten tekuxixjo xim lo, ex tekuxixjo or lo. 16Ex ok nbꞌiꞌn kyajlal xoꞌl qꞌaqꞌ, a xiꞌ tibꞌaj chej: Attaq lajaj kꞌal millones.#9:16Lajaj kꞌal millones, 200 millones n-ele.
17Ikytziꞌn ok nkaꞌyinjiꞌy chej toj nwutzikyꞌa. Ex ayetaqtziꞌn nchi chejin kyibꞌaj, attaq kolbꞌil kykꞌuꞌj, kyaq kaꞌyin, ex txaꞌx, ex qꞌan. Ex ayetzin chej, attaq kywiꞌ tzeꞌnku te bꞌalun, ex toj kytzi n-etztaq qꞌaqꞌ, ex sibꞌ, ex tkꞌokꞌjil tzꞌeꞌnaq. 18Bꞌeꞌx i kyim toxin tnejxjal kyuꞌnjo oxe yajbꞌil, a i etz toj kytzijo chej. 19Quꞌn antza taꞌtaq kyipiꞌn chej toj kytzi, ex tiꞌj kyje. Quꞌn ikytaqtzin kaꞌyin kyje tzeꞌnqeku kan, at kywiꞌ tuꞌn kykyꞌixbꞌajtzxjal kyuꞌn.
20Me ayetzin txqantl xjal, ayeꞌ mix i kyime kyuꞌnjo yajbꞌil lo, mix ajtze tiꞌj kyanmin, tuꞌn tkyij kytzaqpiꞌn tkyaqiljo nbꞌanttaq kyuꞌn, a kꞌulbꞌil kywutzjo taqꞌnil tajaw il, ex kywutzjo twutzbꞌiyil bꞌinchin tuꞌn qꞌanpwaq ex saqpwaq, ex kxbꞌil, ex abꞌj, ex tze, a aye mibꞌin chi kaꞌyin, mibꞌin chi bꞌin, ex mibꞌin chi bꞌet.#Sal. 115:4-7; 135:15-17; Dan. 5:4. 21Ex mix kyij kytzaqpiꞌn tuꞌn kybꞌiyin, ex tuꞌn kytyuẍin, ex tuꞌn kykyꞌaꞌjin, ex tuꞌn kyelqꞌin.
Zvasarudzwa nguva ino
Tchikyꞌbꞌin 9: mamC
Sarudza vhesi
Sarudza zvinyorwa izvi
Yenzanisa
Pakurirana nevamwe
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© 2003, Wycliffe Bible Translators, Inc. All rights reserved.