San Lucas 24
24
Ri Jesús xk'astaj uwuch chikxo'l nk'aj kamnaq
(Mt 28:1-10; Mr 16:1-8; Jn 20:1-10)
1Echi' xuriq nab'e ij rech un semana, mas b'ajchi' xiyitzlij jun b'welt chik nk'aj ixqib' chla' jachi xmuq Jesús; xikk'am b'i nk'aj k'ok'laj taq kumb'al che kyijb'am chik. Soq iy'o nk'aj chik ixqib' xib'e kuk'. 2Echi' xiyo'pnik, ti xkilo tel chkan uchi' un jul jachi xmuq Jesús, walqtim chub'i un nim tz'lom ab'aj che kjom che tz'apb'al uchi' un jul. 3Nk'aj ixqib' xiyok b'i chpam un jul, rech kkitzkuj ucuerpo Qajaw Jesús, per xikriq taj. 4Ena mas xsach kk'u'x ruk' che jala x'antjik, kit'am t chik su kik'ano. Tik'ri k'ut xaq t'et xkilo, iy'o keb' achjab' itk'al pkitlok' che su ktil'an nk'aj kitz'yaq kikjom. 5Y como mas xkix'ej kib' nk'aj ixqib', ena xikchiqb'a kiplaj chuchlew. Ni keb' achjab' xikb'ij chke:
—¿Suche che xa chikxo'l kamnaq kitzkuj nachi che k'aslik? 6Nachi che kitzkuj, ot chik chi', xk'astaj uwuch chikxo'l nk'aj kamnaq. Chna'taj chiwe sutaq xub'ij kan chiwe echi' o na iwuk' jala Galilea. 7Re, jawa xub'ij kan chiwe: “Nmister che in nAchi nuK'jol Dios, kinjachtaj na pik'ab' mnaq che xa iyajmak rech knikrip chjuch jun cruz. Tik'ri k'ut, churox ij kk'astaj nwuch chikxo'l nk'aj kamnaq”, xche chiwe. —Jala xikb'ij keb' achjab' chke nk'aj ixqib'.
8Tik'ri xna'taj chke nk'aj ixqib' ri utzij Jesús che ub'im kan chke. 9Echi' xiyitzlij loq chla' jachi xmuq Jesús, xikb'ij chke ju'ljuj (11) apóstol runjel sutaq xkilo, rich'il sutaq xb'ix loq chke, y soq xikb'ij chke nk'aj chik mnaq iy'o chla' kuk'. 10Nk'aj ixqib' che xikb'ij un rsoni' chke nk'aj apóstol, jare i Mri'y kpi chpam un tinmit Magdala, rich'il il Wa'n, rich'il i Mri'y uchuch u Santiago, soq rich'il nk'aj chik ixqib' che kich'il loq. 11Per ni nk'aj apóstol xikkoj taj sutaq xikb'ij. Chikuch ke, peche xa ximxor kijlom nk'aj ixqib' pures che jala xikb'ij. 12Ena chanim xwa'laj u Lu', anim x'e chla' jachi xmuq Jesús, y echi' xka'y koq chpam un jul, xaw un k'ul xurilo che xpis ucuerpo Jesús chpam, per ni ucuerpo ot chik chpam. Ena xitzlij chirchoch, mas xumiyma' che jala x'antjik.
Ri Jesús xuk'ut rib' chikuch keb' rich'il chpam b'e k'e Emaús
(Mr 16:12-13)
13Mismo chpam jun ij, iy'o keb' rich'il Jesús kiyitjin che kb'e ib'enaq chpam jun kanton Emaús ub'i', che xa o'ljuj kilómetro (11)#24:13 Tyox Wuj kch'aw chrij oxk'al (60) estadio. uxo'l ruk' tinmit Jerusalén. 14Echi' kiyitjin che kb'e ib'enaq, kiyitjin che uch'ach'axik chikuch sutaq x'antaj chla' Jerusalén. 15Per echi' kiyitjinik kich'aw chikuch, ri Qajaw Jesús xaq t'et xqib' koq kuk', o chik chikxo'l, jnam kiyitjin che kb'e ib'enaq. 16Per ni ke xikch'ob' t uwuch Jesús; ya'tal taj chke che kikch'ob' uwuch, peche mow xa ch'uqtal kwuch. 17Ena xub'ij Jesús chke:
—¿Su kixtjin che uch'ach'axik ptaq b'e echi' ixpitnaq? ¿Suche che mas kixb'sonik? —xche chke.
18Ena o jun chke, Cleofás ub'i', xch'awik, xub'ij che Jesús:
—Kunjel jumpa mnaq, kit'am chik sutaq x'antaj chla' Jerusalén, chpam taq ij ri'. ¿Mere xaw lo at ataxnaq chla' che awit'am taj sutaq x'antjik? —xche che.
19Ena xuta Jesús chke, xub'ij:
—¿Sutaq x'antaj chla'? —xche chke.
Ni ke xikb'ij che:
—Jare sutaq xik'an che Jesús aj Nazaret che jare jun achi ajb'il utzij Dios. Re nim uchu'ab' che u'anik jumpa k'utb'al ku'ono, soq nim uchu'ab' utzij sutaq kub'ij, jala chjuch Dios soq jala chikuch kunjel mnaq. 20Per ni nk'aj ajk'mal b'e chke nk'aj rajchak Dios, rich'il nk'aj atb'altzij chqo'j ujaj Israel, xa xikjach pik'ab' nk'aj atb'altzij aj Roma rech xik'an atb'altzij pujlom, xikrip chjuch jun cruz rech xikkamsaj. 21Per ni qo'j, mas qakub'am qak'u'x chrij che jare Re kujuresaj qo'j ujaj Israel pik'ab' mnaq che iyajch'oj quk'. Per ni le' ot su qi'em chik, mal ya b'enaq chuxib' ij che, che xkamsxik. 22Soq iy'o nk'aj ixqib' chiqxo'l che mas xujkixb'ij. Ke b'ajchi' xib'e chla' chuchi' un jul jachi xmuq Jesús. 23Per xikriq t ucuerpo Jesús, ena xiyitzlij chik y xikb'ij che xkil kwuch nk'aj ángel. Ni nk'aj ángel xikb'ij chke che k'as Jesús. 24Ena o keb' uxib' chke nk'aj qich'il xib'e chla' jachi xmuq Jesús y xkilo che qtzij jala x'antjik peche xikb'ij nk'aj ixqib', per xkil t uwuch Jesús. —Jala xikb'ij keb' mnaq che Jesús.
25Ena xub'ij Jesús chke:
—Ix, peche mow xa ot ipinsar, kich'ob' taj su kikb'ij nk'aj ajb'il utzij Dios ujer. Xa mas ko iwanma', pures che kikoj taj runjel sutaq xikb'ij. 26¿Le xa iwit'am taj che nmister che nab'e kutij na k'ax ri Cristo,#24:26 Cristo kel kub'ij jun chaytajnaq rmal Dios. Un tzij Mesías xaq jnam kilwi. tik'ri kinmirsax u'ij? —Jala xub'ij Jesús chke.
27Tik'ri xumaj ub'ixik chke runjel jumpa tz'ib'tal chpam Tyox Wuj che kch'aw chrij Re. Xumaj loq chpam wuj xutz'ib'aj u Moisés, ast retal xujcha kan chpam wuj che xiktz'ib'aj kunjel jumpa nk'aj ajb'il utzij Dios ujer. 28Echi' xa nqaj chik ik'wi che un kanton jachi kib'e wi, xu'on Jesús che, che peche mas on ub'e ku'on che, y kitk'e' taj chikuch keb' rich'il. 29Per ni ke xikkoj kchu'ab' che ub'ixik che, che utz we kkanaj kan kuk'. Ena xikb'ij che:
—Chatkanaj kan quk', mal mas ma'tan chik, otchich ij, —xiche che.
Ena xok Jesús pja, xkanaj kan kuk'. 30Echi' jnam iku'l chu mixa, ri Jesús xuk'am qaj kaxlenwa y xutyoxij che Dios. Tik'ri xupiro, xuya chke. 31Tik'ri k'ut, peche mow xtortaj kwuch keb' rich'il y xikch'ob' uwuch Jesús, per xaq t'et xsach Jesús chikuch, xkil t chuwuch. 32Ena xikmaj ub'ixik chikuch, xikb'ij:
—¿Le xa xi'xow t k'ut qanma' rmal ki'ktem echi' xujuch'ab'ej ptaq b'e y kitjin che ub'ixik utzij Dios chqe, che tz'ib'tal chpam Tyox Wuj? —xiche chikuch.
33Ena mismo chanim xiwa'ljik, xiyitzlij chpam tinmit Jerusalén y xkirqa ju'ljuj (11) apóstol rich'il nk'aj chik kich'il; jnam kirqom kib' chla'. 34Ena kiyitjin che ub'ixik:
—Ruk' saqlaj tzij xk'astaj uwuch Qajaw Jesús chikxo'l nk'aj kamnaq, mal xuk'ut rib' chjuch u Simón, —xicha'.
35Tik'ri xikmaj ub'ixik keb' rich'il sutaq xb'ix chke ptaq b'e, soq xikb'ij su mow xik'ano ti xikch'ob' uwuch Jesús ti xupir kaxlenwa chikuch.
Ri Qajaw Jesús xuk'ut rib' chikuch nk'aj udiscípulo
(Mt 28:16-20; Mr 16:15-18; Jn 20:19-23; Hch 1:6-8)
36Echi' jala kiyitjin nk'aj discípulo che ub'ixik, xaq t'et ti kikkilo o chik Jesús chikxo'l, y xub'ij chke:
—Chikje b'a ri nimlaj utzil chixo'l, —xche chke.
37Per ni ke xikmiyma', xa mas xkix'ej kib', jare xikchomaj ke che xa jun xib'nel xkil uwuch.
38Ena xub'ij Jesús chke:
—¿Suche che xa kixok il chwe, xa kixmiymatik? ¿Suche che ku'on keb' ik'u'x chpam ikojb'al? 39Chiwlampe n'ab' rich'il wqan, jare in nJesús. Chnichpampe' rech kiwilo y kikojo che puro jare in, mal o nit'ijal y soq o nib'qil; per wet che xa jun xib'nel, re ot ut'ijal, soq ot ub'qil, —xche chke.
40Echi' jala xub'ij Jesús chke, xuk'ut u'ab' y xuk'ut rqan chikuch. 41Per ni ke, mja kikkojo we jare Jesús mal sachnaq kk'u'x rmal ki'ktem, peche kikkojo, peche kikkoj taj kik'an che, xaq kimiymatik. Ena xub'ij Jesús chke:
—¿Le o su o iwuk' rech kintijo? —xche chke.
42Ena xikya ch'qap b'lom kar che, rich'il ch'in u'al che' che mja kikyitz'o, o xkab' ruk'.#24:42 O nk'aj ujer taq wuj rech Tyox Wuj manuscrito kb'ix che, che tz'ib'tal taj rich'il ch'in u'al che' che mja kikyitz'o, o xkab' ruk' chpam. 43Ri Jesús xuk'amo su xikya che, xutij chikuch. 44Tik'ri xub'ij chke:
—Runjel sutaq x'an chwe, jarewa ximb'ij chiwe echi' xinkje iwuk'. Ximb'ij chiwe che nmister k'antaj na runjel sutaq tz'ib'tal chwij chpam Tyox Wuj che xutz'ib'aj u Moisés, soq tz'ib'tal chla' chpam wuj xiktz'ib'aj nk'aj ajb'il utzij Dios ujer, y soq jala chpam nk'aj chik wuj che Salmos kb'ix che. —Jala xub'ij Jesús chke.
45Tik'ri xumaj ub'ixik chke su kilwi runjel jumpa utzij Dios che tz'ib'tal kan chpam Tyox Wuj ujer, rech kikch'ob'o su kilwi. 46Jawa xub'ij chke:
—Tz'ib'tal kanoq che nmister kutij k'ax ri Cristo, xchay rmal Dios. Kkamsax na, tik'ri kk'astaj uwuch chikxo'l nk'aj kamnaq churox ij, kcha'. 47Soq tz'ib'tal kanoq che nmister kb'ix utzij Dios pub'i' ri Cristo chpam runjel jumpa tinmit o chi' chuchlew, nab'e kmajtaj loq ub'ixik jala chpam tinmit Jerusalén. Jare kb'ix chke mnaq che nmister kikk'ex kpinsar, kikya kan u'anik kmak, rech kikriq kuyb'al kmak ruk' Cristo, kche chke. 48Ix xiwilo sutaq x'an chwe, y nmister che kib'ij chik ix chke mnaq. 49¡Chitampe'! Kintaq nuloq Tyoxlaj Uxlab'xel iwuk' che ub'im chik nQaw che kuya na chiwe. Per chixkanaj kan chi' chpam tinmit Jerusalén, ast retal echi' kqaj uchu'ab' Dios iwuk' che kpi chkaj. —Jala xub'ij Jesús chke nk'aj udiscípulo.
Ri Jesús xk'am b'i chkaj
(Mr 16:19-20; Hch 1:9-11)
50Tik'ri' xiyel b'i chla'. Ri Jesús xyuk'am b'i nk'aj udiscípulo chla' chunqaj un kanton Betania; tik'ri xuyak u'ab' y xuta che Dios che kuya jun nimlaj utzil pkijlom. 51Jala kitjin che u'anik ti xaq ub'ik xel b'i chikxo'l, xk'am b'i chkaj. 52Nk'aj discípulo xkinmirsaj u'ij Jesús chla'. Tik'ri k'ut xiyitzlij Jerusalén mas kiki'ktik. 53Ke, runjel ij iy'o chpam nimlaj rchoch Dios, kiyitjinik kkinmirsaj u'ij Dios. Amén.#24:53 O nk'aj ujer taq wuj rech Tyox Wuj manuscrito kb'ix che, che tz'ib'tal taj Amén chpam un versículo ri'.
Zvasarudzwa nguva ino
San Lucas 24: qucSAS
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
El Nuevo Testamento
en K'iche' de San Andrés Sajcabajá
© 2024 Asociación Educativa y Cultural Maya (AECM)
en colaboración con SIL Global