Ioane 4
4
Ia Iētū ma te wawine Tāmālia
1Mumuyu loa te longo ki te kau Pālitea, koa yika atu ki mua ia Iētū o Ioane i te wolo o tana pipi ko pāpetītō; 2wua atu oki e kiai ko Iētū nā pāpetītōngia, ko ana pipi lā. 3Kē iloa e te Atu te mea ia, maka loa iāna ia Iūtea, niko loa wakawōu ki Kalilea. 4Yaulā oki ka lā Tāmālia loa iāna kē wano ki ai.
5Eia, oko mai loa iāna ki te ōile i Tāmālia e lapangia kia Tīkala, ko pili wua ki te konga na tukua e Iākōpa ki tana tama kia Iōtēpa.#Kēnete 33:19; Iōtua 24:32 6Ko i kiai oki te vai o Iākōpa, ngaengaea loa ia Iētū mai tona tele ia, eia, nō loa iāna lā tawa o te vai ia, koa talivave ki te tūtonungā-lā.
7Kē yau te wawine Tāmālia ia ka utu yua, mea loa ia Iētū ki ai, “E yē maua mō ia koe e te aumai ni yua inu mō oku?” 8Na wō oki ana pipi oko popoa i te ōile ia.
9Mea mai ai te wawine Tāmālia ia kia ana, “E wea loa koe te Ngāti Iūta nā ka talikai mai ai kia aku, te wawine Tāmālia nei, kē yī ō yua?” Ko yē wakatika oki te Ngāti Iūta kē wakatai atu ki te kau Tāmālia.#4:9 Ko yē wakatika oki te Ngāti Iūta kē wakatai atu ki te kau Tāmālia: mēkole, Ko yē wakatikangia oki te Ngāti Iūta kē yoani yapinga ki te kau Tāmālia. #Ētela 4:1-5; Nēmia 4:1-2
10Pau atu oki ia Iētū ki te wawine ia, “Pī pē ke au iloa te mea aloa a te Atua ka aumai, ma ana oki e wakavale atu nei kē yī ona yua, ēnei pā koe na talikai taumua wua kia ana, na avatu wua iāna ni yua ola mō koe.”
11“E te vale tāne ia ē,” te mea atunga a te wawine ia, “kāe oki au ipu kē ūtu ai, e vai maolalo te mea nei. Ka aumai mai wea au yua ola nei? 12Ko wolo atu lā koe i tō mātou tupuna ia Iākōpa, te kovi na aumaia te vai nei kia mātou, nā inu ai oki iāna, peia ana tama ma ana manu tākatoa?”
13Pau atu oki ia Iētū, “Ko te kau e inu i nā yua nei, ka wiainua wakawōu lātou, 14yaulā te tangata ka inu i nā yua āku ka avatú, e yē wiainua wakawōu iāna. Ko aku yua oki ka avatu kia ana ia, ka lāua te vaipuna i loto ōna, ka puna wua peia te yua ola ia oko wua atu ki te ola kāe ngatanga.”
15Eia, mea atu ai te wawine ia kia ana, “E te vale tāne ia ē, koi aumai ake koe i te yua ia kia aku kē yē wiainua au wakawōu, kē yē mou yau ai au utu yua i kinei.”
16Wakaunga ai ia Iētū ia ana, mea loa, “Wano lā valoa mai tau tāne, niko mai ai koe.”
17Kā ai te mea mainga a te wawine ia, “Kāe aku tāne.”
Mea oki ia Iētū ki ai, “Ko tautonu wua au talatala nā, kāe au tāne. 18Yaulā e tokalima au tāne, ko te kovi oki e nō ai koe i te vāia nei e kiai i te tāne nāau. Ko tautonu wua tau meanga nā.”
19“E te vale tāne ia ē,” te mea mainga a te wawine ia, “ia koe pē e peloveta! 20Nā tautapa o mātou tūpuna i lunga o te maunga nei, yaulā ko mea kōtou te Ngāti Iūta ko te konga kaleka kē tautapa ai ko i Iēlūtalema.”
21Eia, talatala ai ia Iētū, mea loa, “Wakalongo mai koe, e te kovi wawine ia, ko yau te vāia ka tautapa ai kōtou i te Matua Yā, e kiai lā i lunga o te maunga nei, e kiai oki i Iēlūtalema. 22Ko yē a kōtou iloa e te kau Tāmālia ia, ia ana e tautapa ai kōtou nā, yaulā mātou ko tautapa i a mātou mea e iloá, nō tēlā na yau te ola ki te ao nei mai loto o te Ngāti Iūta. 23Yaulā ko yau te vāia, na oko mai oki ki kinei, e tautapa ai te kau e tautapa tiká i te Matua Yā i loto o te Vaelua ma te talatalatika, ko te tautapa tautonu oki teia e unati mai ai te Atua. 24E Vaelua te Atua, ko te kau oki e tautapa ia aná, kē tautapa lātou i loto o te Vaelua ma te talatalatika.”
25Mea loa te wawine ia, “Ko aku iloa ka yau te Metia, e lapangia oki ki te Kilitó.#4:25 te Metia: Ēleni, Christos, te wulinga o te ingoa Ēpela Mashiach; ko te wakamaepanga, “te tangata na wakayinua”. Kē oko mai iāna, ka wakamāepaepa mai iāna i te wī mea kia mātou.”
26Eia, tala atu ai ia Iētū kia ana, “Ko oku e talatala atu nei, ko ona teia.”
27I te vāia ia, oko mai oki ana pipi, kamuloa mīmīngutu wua i te onoono atunga ia Iētū e talatala ki te wawine ia. Yaulā kāe loa tangata na uwi atu, “E wea tau mea ko winangalo?” pēkole, “E wea koe e talatala ai ki te wawine nā?”
28Eia, maka ai te wawine ia i tana ava yua i kiai, niko loa ki te ōile, tala ki te wī tāngata, 29“Lōmamai kōtou, onoonowia ake te tāne na talā mai aku wī yanga pau nā waí. Auwā mō teia ko te Metia?” 30Wakayolo mai ai te wī tāngata o te ōile ia, alatai mai ki te konga ia Iētū́.
31I nā mō vā wua ia, naumate mai loa ana pipi ki ai, “E te Pūāpī ē, e yē taumaya ai koe?”
32Yaulā, talatala ai iāna, mea loa kia lātou, “E yī popoa āku ko taumaya ai, ko yē a kōtou iloa.”
33Eia, wakatau iliili wua ai ana pipi, mea lā, “E tayi mō tangata na yau aumai popoa ki ai?”
34“Ko aku popoa ia,” te meanga a Iētū, “kē wai au i nā manatunga āna na ungaina mai au nei ma te wakayawe i tana yanga. 35Pēnei kōtou ko manatu i te talatalá, ‘Koa toe wā māina ko takoto e tope ai nā kai.’ Yaulā ko tala atu au, wakayiyila ake o kōtou mata, kakalo ake ki nā konga tokikai i kilā́, kamuloa kikivi wua, ko kali kē topengia. 36Ko te tangata tope kai oki ko tūtakia iāna i te vāia nei, ko opoopo oki iāna i nā wua ia nō te ola e yē ngata, kē vēvēia wakatayi ai lāua, te tangata lūlū wua ma te tangata tope kai. 37Ko tika oki nā mō yikunga nei, ‘E tangata kē te mea na lūlūngia, e tangata kē te mea na topea.’ 38Na unga atu au ia kōtou kē tope i nā mea e kiai na yangaina e kōtou; ko te toe kau nā pau nā vave e te yanga, eia, lilo loa kia kōtou te kalu o a lātou yanga ia.”
Wolo te Tāmālia na nunumi kia Iētū
39E tokawolo te tangata Tāmālia o te ōile ia na nunumi kia Iētū, nō te tala a te wawine nā wakamamata ia, na mea oki, “Na tala mai loa ēna aku wī yanga pau nā waí.” 40Eia, i tā lātou lōmamainga kia Iētū́, umati loa lātou ki ai kē nōnō lātou, nō ai oki iāna i kiai e lua ayo. 41Nō nā talatala āna ia, tokawolo ai loa te kau na nunumi kia ana.
42Mea ai lātou ki te wawine ia, “E kiai wua nō au muna nā tala mai na nunumi ai mātou kia ana, yaulā na wakalongo tika o mātou talinga; na taka lelei oki ia mātou ko te tangata nei pē, ko ona te Wakaola o te ao nei.”
Na wakaolangia te tama a te tangata wolo
43I te paunga o lua ayo ia, maka loa iāna i te konga ia, nunua atu ai ki Kalilea. 44Na wai taumua wua te muna a Iētū, ko te peloveta oki, ko yē wakateniteningia iāna e tona wenua tangata.#Mātaiō 13:57; Māleko 6:4; Luka 4:24 45Kē oko atu lā iāna ki Kalilea, ālikingia loa iāna e te kakai o Kalilea. Na a lātou kitea oki te wī yanga āna nā wai i Iēlūtalema i te vāia o te Ōloa Paata, nā i kiai oki lātou.#Ioane 2:23
46Eia, niko wakawōu loa ia Iētū ki Kana i Kalilea, te konga na wakalilo ai iāna i nā yua wai uwainá. E tayi tangata wolo o te kavamani nā i kiai, ko tana tamatāne ko paloa mai i te maki i te ōile ko Kāpelenāuma.#Ioane 2:1-11 47I te wakalongonga a te tangata nei na oko mai ia Iētū mai Iūtea ki Kalilea, wano atu loa iāna ki ai, wakavale māmate ai kia ana kē yau ake wakaola i tana tama koa vave wua ka mate ia.
48Eia, mea atu ai ia Iētū kia lātou, “Ke a kōtou kitea loa nā wakailo mana ma nā yanga wakawotu, e lotokono ai kōtou?”
49Mea atu oki te tangata wolo ia, “E te Atu ē, yau koe kē wō tāua, kāe mate loa taku tama.”
50Pau atu oki ia Iētū, “Wano lā koe, ka ola tau tama.”
Eia, māngoto loa te tāne ia ki nā muna a Iētū ia, wano atu ai iāna. 51Ko yaele atu iāna i te ngutuala, welāvei mai loa ona tāvini ia ana ma te longo, na ola tana tama. 52Kē iliili atu iāna kia lātou i te vāia na yawea ai te maki o tana tama ia, tala oki lātou ki ai, “Na ngalo tona pīva i te ola tayi i te ayó.”
53Mayala ai te matua ia ko te ola lāi teia na talatala ai ia Iētū kia ana, “Ka ola tau tama.” Eia, nunumi ai loa iāna ma tona wale tangata tākatoa kia Iētū.
54Ko te lua tēnei o te wakailo wakawotu a Iētū na wai i Kalilea, i tana niko mainga mai Iūtea.
Zvasarudzwa nguva ino
Ioane 4: PKP
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© 2024, Wycliffe Bible Translators New Zealand Inc. in partnership with Te Wui Aliki o Pukapuka ma Nassau
Ioane 4
4
Ia Iētū ma te wawine Tāmālia
1Mumuyu loa te longo ki te kau Pālitea, koa yika atu ki mua ia Iētū o Ioane i te wolo o tana pipi ko pāpetītō; 2wua atu oki e kiai ko Iētū nā pāpetītōngia, ko ana pipi lā. 3Kē iloa e te Atu te mea ia, maka loa iāna ia Iūtea, niko loa wakawōu ki Kalilea. 4Yaulā oki ka lā Tāmālia loa iāna kē wano ki ai.
5Eia, oko mai loa iāna ki te ōile i Tāmālia e lapangia kia Tīkala, ko pili wua ki te konga na tukua e Iākōpa ki tana tama kia Iōtēpa.#Kēnete 33:19; Iōtua 24:32 6Ko i kiai oki te vai o Iākōpa, ngaengaea loa ia Iētū mai tona tele ia, eia, nō loa iāna lā tawa o te vai ia, koa talivave ki te tūtonungā-lā.
7Kē yau te wawine Tāmālia ia ka utu yua, mea loa ia Iētū ki ai, “E yē maua mō ia koe e te aumai ni yua inu mō oku?” 8Na wō oki ana pipi oko popoa i te ōile ia.
9Mea mai ai te wawine Tāmālia ia kia ana, “E wea loa koe te Ngāti Iūta nā ka talikai mai ai kia aku, te wawine Tāmālia nei, kē yī ō yua?” Ko yē wakatika oki te Ngāti Iūta kē wakatai atu ki te kau Tāmālia.#4:9 Ko yē wakatika oki te Ngāti Iūta kē wakatai atu ki te kau Tāmālia: mēkole, Ko yē wakatikangia oki te Ngāti Iūta kē yoani yapinga ki te kau Tāmālia. #Ētela 4:1-5; Nēmia 4:1-2
10Pau atu oki ia Iētū ki te wawine ia, “Pī pē ke au iloa te mea aloa a te Atua ka aumai, ma ana oki e wakavale atu nei kē yī ona yua, ēnei pā koe na talikai taumua wua kia ana, na avatu wua iāna ni yua ola mō koe.”
11“E te vale tāne ia ē,” te mea atunga a te wawine ia, “kāe oki au ipu kē ūtu ai, e vai maolalo te mea nei. Ka aumai mai wea au yua ola nei? 12Ko wolo atu lā koe i tō mātou tupuna ia Iākōpa, te kovi na aumaia te vai nei kia mātou, nā inu ai oki iāna, peia ana tama ma ana manu tākatoa?”
13Pau atu oki ia Iētū, “Ko te kau e inu i nā yua nei, ka wiainua wakawōu lātou, 14yaulā te tangata ka inu i nā yua āku ka avatú, e yē wiainua wakawōu iāna. Ko aku yua oki ka avatu kia ana ia, ka lāua te vaipuna i loto ōna, ka puna wua peia te yua ola ia oko wua atu ki te ola kāe ngatanga.”
15Eia, mea atu ai te wawine ia kia ana, “E te vale tāne ia ē, koi aumai ake koe i te yua ia kia aku kē yē wiainua au wakawōu, kē yē mou yau ai au utu yua i kinei.”
16Wakaunga ai ia Iētū ia ana, mea loa, “Wano lā valoa mai tau tāne, niko mai ai koe.”
17Kā ai te mea mainga a te wawine ia, “Kāe aku tāne.”
Mea oki ia Iētū ki ai, “Ko tautonu wua au talatala nā, kāe au tāne. 18Yaulā e tokalima au tāne, ko te kovi oki e nō ai koe i te vāia nei e kiai i te tāne nāau. Ko tautonu wua tau meanga nā.”
19“E te vale tāne ia ē,” te mea mainga a te wawine ia, “ia koe pē e peloveta! 20Nā tautapa o mātou tūpuna i lunga o te maunga nei, yaulā ko mea kōtou te Ngāti Iūta ko te konga kaleka kē tautapa ai ko i Iēlūtalema.”
21Eia, talatala ai ia Iētū, mea loa, “Wakalongo mai koe, e te kovi wawine ia, ko yau te vāia ka tautapa ai kōtou i te Matua Yā, e kiai lā i lunga o te maunga nei, e kiai oki i Iēlūtalema. 22Ko yē a kōtou iloa e te kau Tāmālia ia, ia ana e tautapa ai kōtou nā, yaulā mātou ko tautapa i a mātou mea e iloá, nō tēlā na yau te ola ki te ao nei mai loto o te Ngāti Iūta. 23Yaulā ko yau te vāia, na oko mai oki ki kinei, e tautapa ai te kau e tautapa tiká i te Matua Yā i loto o te Vaelua ma te talatalatika, ko te tautapa tautonu oki teia e unati mai ai te Atua. 24E Vaelua te Atua, ko te kau oki e tautapa ia aná, kē tautapa lātou i loto o te Vaelua ma te talatalatika.”
25Mea loa te wawine ia, “Ko aku iloa ka yau te Metia, e lapangia oki ki te Kilitó.#4:25 te Metia: Ēleni, Christos, te wulinga o te ingoa Ēpela Mashiach; ko te wakamaepanga, “te tangata na wakayinua”. Kē oko mai iāna, ka wakamāepaepa mai iāna i te wī mea kia mātou.”
26Eia, tala atu ai ia Iētū kia ana, “Ko oku e talatala atu nei, ko ona teia.”
27I te vāia ia, oko mai oki ana pipi, kamuloa mīmīngutu wua i te onoono atunga ia Iētū e talatala ki te wawine ia. Yaulā kāe loa tangata na uwi atu, “E wea tau mea ko winangalo?” pēkole, “E wea koe e talatala ai ki te wawine nā?”
28Eia, maka ai te wawine ia i tana ava yua i kiai, niko loa ki te ōile, tala ki te wī tāngata, 29“Lōmamai kōtou, onoonowia ake te tāne na talā mai aku wī yanga pau nā waí. Auwā mō teia ko te Metia?” 30Wakayolo mai ai te wī tāngata o te ōile ia, alatai mai ki te konga ia Iētū́.
31I nā mō vā wua ia, naumate mai loa ana pipi ki ai, “E te Pūāpī ē, e yē taumaya ai koe?”
32Yaulā, talatala ai iāna, mea loa kia lātou, “E yī popoa āku ko taumaya ai, ko yē a kōtou iloa.”
33Eia, wakatau iliili wua ai ana pipi, mea lā, “E tayi mō tangata na yau aumai popoa ki ai?”
34“Ko aku popoa ia,” te meanga a Iētū, “kē wai au i nā manatunga āna na ungaina mai au nei ma te wakayawe i tana yanga. 35Pēnei kōtou ko manatu i te talatalá, ‘Koa toe wā māina ko takoto e tope ai nā kai.’ Yaulā ko tala atu au, wakayiyila ake o kōtou mata, kakalo ake ki nā konga tokikai i kilā́, kamuloa kikivi wua, ko kali kē topengia. 36Ko te tangata tope kai oki ko tūtakia iāna i te vāia nei, ko opoopo oki iāna i nā wua ia nō te ola e yē ngata, kē vēvēia wakatayi ai lāua, te tangata lūlū wua ma te tangata tope kai. 37Ko tika oki nā mō yikunga nei, ‘E tangata kē te mea na lūlūngia, e tangata kē te mea na topea.’ 38Na unga atu au ia kōtou kē tope i nā mea e kiai na yangaina e kōtou; ko te toe kau nā pau nā vave e te yanga, eia, lilo loa kia kōtou te kalu o a lātou yanga ia.”
Wolo te Tāmālia na nunumi kia Iētū
39E tokawolo te tangata Tāmālia o te ōile ia na nunumi kia Iētū, nō te tala a te wawine nā wakamamata ia, na mea oki, “Na tala mai loa ēna aku wī yanga pau nā waí.” 40Eia, i tā lātou lōmamainga kia Iētū́, umati loa lātou ki ai kē nōnō lātou, nō ai oki iāna i kiai e lua ayo. 41Nō nā talatala āna ia, tokawolo ai loa te kau na nunumi kia ana.
42Mea ai lātou ki te wawine ia, “E kiai wua nō au muna nā tala mai na nunumi ai mātou kia ana, yaulā na wakalongo tika o mātou talinga; na taka lelei oki ia mātou ko te tangata nei pē, ko ona te Wakaola o te ao nei.”
Na wakaolangia te tama a te tangata wolo
43I te paunga o lua ayo ia, maka loa iāna i te konga ia, nunua atu ai ki Kalilea. 44Na wai taumua wua te muna a Iētū, ko te peloveta oki, ko yē wakateniteningia iāna e tona wenua tangata.#Mātaiō 13:57; Māleko 6:4; Luka 4:24 45Kē oko atu lā iāna ki Kalilea, ālikingia loa iāna e te kakai o Kalilea. Na a lātou kitea oki te wī yanga āna nā wai i Iēlūtalema i te vāia o te Ōloa Paata, nā i kiai oki lātou.#Ioane 2:23
46Eia, niko wakawōu loa ia Iētū ki Kana i Kalilea, te konga na wakalilo ai iāna i nā yua wai uwainá. E tayi tangata wolo o te kavamani nā i kiai, ko tana tamatāne ko paloa mai i te maki i te ōile ko Kāpelenāuma.#Ioane 2:1-11 47I te wakalongonga a te tangata nei na oko mai ia Iētū mai Iūtea ki Kalilea, wano atu loa iāna ki ai, wakavale māmate ai kia ana kē yau ake wakaola i tana tama koa vave wua ka mate ia.
48Eia, mea atu ai ia Iētū kia lātou, “Ke a kōtou kitea loa nā wakailo mana ma nā yanga wakawotu, e lotokono ai kōtou?”
49Mea atu oki te tangata wolo ia, “E te Atu ē, yau koe kē wō tāua, kāe mate loa taku tama.”
50Pau atu oki ia Iētū, “Wano lā koe, ka ola tau tama.”
Eia, māngoto loa te tāne ia ki nā muna a Iētū ia, wano atu ai iāna. 51Ko yaele atu iāna i te ngutuala, welāvei mai loa ona tāvini ia ana ma te longo, na ola tana tama. 52Kē iliili atu iāna kia lātou i te vāia na yawea ai te maki o tana tama ia, tala oki lātou ki ai, “Na ngalo tona pīva i te ola tayi i te ayó.”
53Mayala ai te matua ia ko te ola lāi teia na talatala ai ia Iētū kia ana, “Ka ola tau tama.” Eia, nunumi ai loa iāna ma tona wale tangata tākatoa kia Iētū.
54Ko te lua tēnei o te wakailo wakawotu a Iētū na wai i Kalilea, i tana niko mainga mai Iūtea.
Zvasarudzwa nguva ino
:
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© 2024, Wycliffe Bible Translators New Zealand Inc. in partnership with Te Wui Aliki o Pukapuka ma Nassau