Luke 21
21
1နောက်လောင်နော့် စောင့်ယေရှုလ အောင်းရောင်းရာဂျေရုဆလင် မေမွန်းစောင့်အူရာဗိမာန်တော်န ကွန်းချမ်းသာလေ ခနောဝ်ပွန်းအလှူခမ်ဟောန့် မနော်လေ လှူငွန်းဟင်းနာ့ ဟောန်ကော်ဝိုက်။ 2ခနောဝ်ပွန်းအလှူခမ် အောင်းမယ်ဟန့်မရောင်းကျဉ်းကော်နိမ် ဆောင်(ဝ်)ငွန်းဆောင်(န်)ဖတ်န ဟောန်ကော်ဝိုက်။ 3မေနယ့်လော့် မွန်းစောင့်လ အောင်းတပဲ့မွန်းစောင့်လေ "အောင်းမဆူ ကောတနယ့်ဝါပေါဝါလော့်၊ မယ်ဟန့်မရောင်းကျဉ်းဟိုင့်လ နောင်ကွန်းမန်းတီလေမကား ဆာဝိုက်။ 4ကွန်းလေန အောင်းမနော်စနီးဆွန်းမလိုဆီ အောင်းပိုနဲဟော် စမ်လှူဟော။ တော်နယ့် မယ်ဟန့်အောင်းမရောင်းကျဉ်းဟိုင့်လ အောင်းရောင်းရာမွန်းတောင်းလုန် လှူကော်"ဆီ ဝါကော်ဝိုက်။ 5နောက်လောင်နော့် ကောင့်ဟဉ်အောင်းခင်းဝိုက် ရာဗိမာန်တော်လေန ထူးခြားဆီ ပစ္စည်းအောင်းလှူဝိုက်လေကော့် အိုက်ဆန်း"ဆီ ကွန်းကမ်ဖောင်န ချီးမွမ်းဟင်းကော်ဝိုက်။ မေနယ့်လော့် စောင့်ယေရှုလ 6"အောင်းမဆူနယ့်ဟောန်တောင်းလုန်န တပျတ်ကော့်။ ကောင့်ဟဉ်ကောင့်နိမ်ကိုးသကော့် အောင်းတရောင်းကော့်မစော်။ တောင်းလုန် အောင်းဖြတ်တနယ့်ခမ် အချီန်တထီန်မားကော့်"ဆီ ဝါကော်ဝိုက်။ 7မေနယ့်လော့် တပဲ့လေန အောင်းစောင့်ယေရှု "ဆရာ၊ အောင်းထိုင့်လေန မေနော်တပေးမား၊ အောင်းထိုင့်လေ တပေးမားဝါလပဲ တွဲနိမိတ်အောင်းထောဆီ တဟုပဲ့"ဆီ ထန်(မ်)ပေါက်ကော်ဝိုက်။ 8မွန်းစောင့်လ "မဆူလေ အောင်းပွန်လှည့်စား ဟပေါမနယ့်ခမ် ဟေအလေးဟင်း။ ကွန်းလေန ယောင်ဆောင်နောင်ကောဆီ ကောလစောင့်ကယ်မေရှိယ၊ အောင်းကောဝါဝိုက် အချီန်ကောင့်(ဝ်)မားကော်"ဆီ တဝါဟင်းနော့်။ တော်နယ် ခလောင်မနော် ပီစောင်း(မ်)ဟင်းကော်။ 9မဆူလေန သတင်းအောင်းတွုတ်စစ်လေ၊ သတင်းအောင်းတော်လှန်လေ ဟောင်ပေါနယ့်ဟဉ်း ပီကိုးဟင်း။ အောင်းထိုင့်လေန အချီန်ကမ္ဘာမိုမထီန်ခွေတ် တပေးမားအောင်းတိုင်းဝိုက်"ဆီ ဝါကော်ဝိုက်။ 10နယ့်ရောင့်(ဝ်) စောင့်ယေရှုလ ကွန်းလေမျိုးနိမ်တောင်းမျိုးနိမ် မှိန်းနိမ်တောင်းမှိန်းနိမ် တပေးစစ်ဟင်းနော့်။ 11နေရာတောင်းလုန် အဉ်းလုန်လေ တပေးမား ခေါင်ကျဉ်းခေါင်ဝါလေ တကာမား၊ အောင်းပေးအနာရောဂါလေ တနယ့်ကြုံ။ ခနေဖကော့် နိမိတ်အောင်းခနီးနီးကိုးလုန် တပေါ်မား။ 12တော်နယ် မေအောင်းအနယ့်လေမပေးခွေတ် ကွန်းလေန အောင်းမဆူဝမ့်ဆီ တနိစတ်ဟင်းအွန်။ ရာခနောဝ်စလပ် အောင်းစမဆူလေန အောင်းပွန်ဆောင်(ဝ်)ခနောဝ်ထောင်လေ တနယ့်ခမ်။ အောင်းပွန်ဟောင့်(ဝ်)အပြစ်လေ တနယ့်ခမ်ဟင်း။ ကောပ့်မဆူစောင်း(မ်)ခလောင်ကောညော့ ရာခနာ့စောင့်ခွန်ဟော်ခမ်း တောင်း ရာခနာ့အာဏာပိုင်လေ အောင်းဆွဲတလားလေ တနယ့်ခမ်ဟင်း။ 13နောင်နယ့်ညော့ မဆူလေန သတင်းအောင်းနီး ဟပေါနယ့်လောင်(ဝ်) တပေးအခွင့်နီးမား။ 14တော်နယ်ကော့် အောင်းမဆူတောင်းမဆူ နောင်နူးတနယ့်ဝါပေါက် တနယ့်တန့်ပေါက်ဝါလ ပီကိုးဟင်း။ 15ဟေဟောင်းဆီဝါလ ကွန်းမနီးလေ ဟပေါမပဲ့၊အောင်းမဆူဖစ် ဟပေါပြားမနွိုက် အောင်းမဆူ ဉာဏ်လေ၊ ပညာလေ၊ အားလေ ကောတဟောင့်(ဝ်)အီ့။ 16ပေါ်မယ်မဆူ၊ ပီအိုက်နောင့်စိုင်းမဆူ၊ ပီနောင့်မဆူ၊တကော့်မဆူလေန သစ္စာတဖောက်အောင်းမဆူ။ ရာခနောဝ်မဆူလ မောင်းဖောင် ကော့ပ်ကောတောင်း အောင်းအောင်း(ဝ်)သိုင်းတနယ့်ခမ်။ 17ကွန်းတောင်းလုန်န မဆူစောင်း(မ်)ခလောင်ကောညော့ တစောန်းဟင်းအောင်းမဆူ။ 18တော်နယ် ခေါင်ဟိုမဆူ ဆိန့်နိမ်အင်ကိုးကော့် အောင်းတပျတ်မစော်။ 19ခနေကော အောင်းမဆူဝိုက် အောင်းယွန်(မ်)နဲဟော် တော်ပေါမြဲ ကမ်းဝိုက်ဟင်း။ 20"ရာမှိန်းဂျေရုဆလင်ဟောန့် အောင်းစစ်သားလေဝိုင်းဝိုက် ဟောင်ပေါနဲ့ဟောန် မှိန်းဟောန့်တတပျတ်ကော့်ဝါလ မဆူတဟုဟင်းနော့်။ 21အချီန်ဟိုင့်ပေါထီန်မား အောင်းရောင်းရာမှိန်းယုဒလ ကွန်းလေ ပိုင်ခွန့်နေနွဲဟင်း။ ကွန်းအူခနောဝ်မှိန်းလေ ပိုင်အောက်ခနောက်မှိန်းဟင်း။ တော်နယ်ကော့် ပေါအူခနောက်မှိန်းလော့် ပီခေါင့်(ဝ်)ပေါက်ကော်။ 22ဟေဟောင်းဝါလ ဝမ်းဟောန့်လ နောင်ခနောဝ်လိကျမ်း နောင်တင့်(မ်)ဝိုက်ညော့ စောင့်ဖလားန အောင်းမှိန်းဟောန့် တပေးဝမ်းအောင်းဟောင့်(ဝ်)အပြစ်ဝိုက်။ 23မေနယ့်လော့် ကော့်ယဉ်းအောင်းပါးတောင့်တောင်း မယ်စောင့်လအောင်လေ တောင်းဒုက္ခလုန်တောင်း တနယ့်ကြုံ။ ခနေကမ္ဘာဟိုင့် ဆင်းရဲဒုက္ခလေတထီန်မားဆီ အောင်းစောင့်ဖလားခထားလေ တထီန်မားခနေကွန်းလေကော့်။ 24ဆီမေခနောဝ်ကွန်းဟောန့်လေန အောင်းကမ်ဖောင် အောင်းစစ်သားလေအောင်း(ဝ်)သိုင်း တနယ့်ခမ်ဝိုက်။ အောင်းကျန်အောင်းကွန်းကမ်ဖောင်ပေါလော့် စဟေခပွန်ဆီ ရာမှိန်းတန်းတီပွန့် အောင်းပွန်ဝမ့်တနယ့်ခမ်ဝိုက်။ ကွန်းမှိန်းပွန်လေ အောင်းဂျေရုဆလင်လ ဆီဉ်းဆီ ကာခေတ်မနော်မမို မှိန်းဂျေရုဆလင်လ အောင်းပွန်ပဲ့ကျဉ်း တနယ့်ခမ်ဝိုက်။" 25"နောက်လောင်နော့် ဝမ်း၊ နိမ်းတောင်းဂြိုလ်နက္ခတ်တာရာလေန အောင်းနိမိတ်လက္ခဏာလေ တပြားဝိုက်။ ကမ္ဘာတောင်းဟွေဟွေလ ကောပ့်လှိုင်းပင်လယ်၊ သမုဒ္ဒရာလေညော့ ကွန်းလေန တနယ့်ဟေနောင်နူးဝါလ ဟပေါမဟုပွန့် တနီးကိုးဟင်း။ 26နောက်လောင်တပေးအဟောင်းဝါလ တွေးထဆီ ကွန်းလေန နီးကိုးဟင်းဆီ အားတငယ်ဟင်းဝိုက်။ ရာတောင့်ဖ နောဝ်းလေန နေရာမနော်အူကောင်(ဝ်)မရောင်းကော့်ဆီ ရှုပ်ကော်ဝိုက်။ 27မေနယ့်လော့် လူ့သားတော်လ အောင်းချီ့ဖ ချီဆီ တန်ခိုးတော်အနန္တတောင်း၊ ဂုဏ်တော်အနန္တတောင်း အောင်းကြွမားလ မဆူတနယ့်ဟောန်ကောင်(ဝ်)ကော့်ဝိုက်။ 28ကောပ်နယ့်ညော့ နိမိတ်လက္ခဏာအောင်းဆိုးဟိုင့်လေ စဆီဟောင်ပေါပေးမားလော့် စောင့်ဖလားလ အောင်းစမဆူ ဆီမေဝဋ်သံသရာအောင်းဆင်းရဲန တဟလောက်ကော်ညော့ စိန်ဆီ အောင်းဟိုမဆူ ဟင်ခွန့်ခနေဟင်းကော်"ဆီ ဝါကော်ဝိုက်။ 29နယ့်ရောင့်(ဝ်) မွန်းစောင့်လ အောင်းစမနော် ပွန်ပုဒ်နိမ် လောင်(ဝ်)ပြားကော်ဝိုက်။ "တိန့်ဖနေတောင်း အောင်းတိန့်မိုင့်တန်းတီလေ တွဲကော်နူ။ 30ဖေမိုက်အောင်လေ ဟောင်ပေါအောက်မား ထီန်အချီန်နွေကော်ဝါလ စနီးလောင်(ဝ်)မလိုဆီ မဆူကိုယ်တိုင် အောင်းမွန်းတောင်းမွန်း ဟုဟင်း။" 31နောင်နယ့်ညော့ အောင်းကောဝါမား အောင်းထိုင့်လေန မဆူဟောင်ပေါနယ့်ဟောန်လော့် ခနေကမ္ဘာဟိုင့် သာသနာတော်စောင့်ဖလားလေ တထီန်မားဝါလ ဟေအလေးဟင်း။ 32ကောတနယ့်ဝါ အောင်းစော်လေပေါလော့် မေအချီန်နောင်နယ့်မထီန်ခွေတ် အမျိုးကွန်းအဆတ်ရောင်းလေန တနယ့်သိုင်းဟင်းမစော်။ 33တောင့်ဖတောင်းနောင်နဉ်းလ ထာဝရမတည်မြဲမေကော့် ခွမ်းကောလေန ထာဝရတမြဲဝိုက်။ 34နယ့်ရောင့်(ဝ်) "ကျဉ်းကော်၊ ဆို့ကော်၊ နယ့်ပူအောင်းဘဝတောင်းဆီ အချီန်မဆူလေ ဟပေါမမို တောင်းဆတိတောင်းအူဟင်း။ နောင်နယ့်ဆီ အချီန်ပေါမို အောင်းစမဆူ တပေးရုတိုးနိမ်ကော့်ဝိုက်။ 35ဟေဟောင်းပေါဝါလော့် ဝမ်းဟောန့်န ရာကွန်းအူခနေကမ္ဘာဟိုင့်လေတောင်းလုန် တထီန်မားကော့်။ 36မေဝမ်းဟောန့်န ဆီမေရာဟောန့် လောက်(ဝ်)ဆီ ခနာ့လူ့သားတော် ဟပေါနယ့်စိန် ဟေအလေးဆီ ရောန်းဆုဟင်း"ဆီ စောင့်ယေရှုလ ဟဟေအလေးဆီ ဝါကော်ဝိုက်။ 37နောက်လောင်နော့် မွန်းစောင့်လ ရာဗိမာန်တော်ဟောန့် ကန်းဝမ်းလေပေါလော့် တလားတော်လေ ဟောကော်ဝိုက်။ ကမ်းခမ်ပေါဝါလော့် ကွာအူခနေနွဲသံလွင်ဝိုက်။ 38ကွန်းတောင်းလုန်ကော့် ကမ်းနော်စောင့်(ဝ်)စောင့်(ဝ်) လုဆီ ရာဗိမာန်တော်န ကွာထောင်(မ်)တလားစောင့်ယေရှုဟင်းဝိုက်။
Zvasarudzwa nguva ino
Luke 21: ttpv-rv
Sarudza vhesi
Pakurirana nevamwe
Yenzanisa
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
This translation of the TaiLaing Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.