रोमि 15
15
बोमिको ख्याल
1केलाइता जाइ खान्धुरता बोल्याका हिन्हाहि, कमजोर हिकालाइहेङ साघाइलि गोयाङ। कालाउ केलाइ ताइमिङहेङ खिनिङ लेङचापालि माभोकाइने। कालाउ वाको बुङ ख्याल पाइने। 2केलाइ झाराङ ताइको साअ् भेरपाकोहेङ भालाइ रो खान्धुरता बोल्यातेङ हानाको दोअ्तेङ वासेहेङ लेङचापालि गोइखे। 3हाइदोनु ख्रिस्ट बुङ ताइमिहेङ लेङचापाका काम मापाहि। धरमकिताबता इस्का लेखिका हि, “नासेहेङ निन्दा पाकालाइ कासेहेङ बुङ निन्दा पाहि।”#ले ६९:९ 4धरमकिताबता लेखिका गोताङ काथा केलाइहेङ धिरपालिको भाअ्सिङ लेखिका हिघाखे। कालाउ धरमकिताबको पिका सहेका रो हाउसासो केलाइ आस निङलि द्वाको।
5सहेका रो हाउसा परमेस्वरसो लोखे। इसु ख्रिस्ट भोकाभाइपा नेलाइ एअ्मि भेनेङदोफा मिलितेङ हिलि परमेस्वर मदत प्याको दोअ्तेङ का पारथाना पाखा। 6एसापा केलाइ एलोङदोङ मनको जेङतेङ एलोङदोङ गालाता केलाइको प्रभु इसु ख्रिस्टको आबा परमेस्वरहेङ बाखिन्लि द्वाको।
7इदोइभाअ्सिङ परमेस्वरको पारतापकोभाअ्सिङ ख्रिस्ट नेलाइहेङ र्हुहि। एन्साङपातेङ परमेस्वरको पारतापकोभाअ्सिङ नेलाइ बुङ एअ्मि भेनेङहेङ र्हुसु। 8हाइदोनु का नेलाइहेङ दोअ्खा, परमेस्वर केलाइको आजुखालगेलाइहेङ पिका केरागेलाइ वा पोङघापाखे दोअ्तेङ तिङपालि ख्रिस्ट दुनियाता यहुदिगेलाइको कामत्या जेङतेङ लोहि। 9कालाउ बोजात्यागेलाइ वाको दायाको भाअ्सिङ परमेस्वरको पारताप पाको। धरमकिताबता इस्का लेखिका हिः
“इदोइभाअ्सिङ का बोजात्यागेलाइको माझाता नासेहेङ बाखिनाङका,
कालाउ नाङकोङ मिङता का बाखिन्काको ले लेकाङका।”#२ सामुएल २२:५०; ले १८:४९
10आरोङ इस्का लेखिका हिः
“नेलाइ बोजात्याको द्याङगेलाइ,
परमेस्वरको साल्का द्याङगेलाइदोफाङ लेङचासु।”#न्याम ३२:४३
11आरोङ इस्का बुङ लेखिका हि:
“नेलाइ बोजात्याको द्याङगेलाइ, प्रभुहेङ बाखिन्सु,
झाराङ द्याङगेलाइ वासेहेङदोङ बाखिनाको।”#ले ११७:१
12आरोङ परमेस्वर पाहासो धुइका यासाइया बुङ ख्रिस्टको बारेता एसा दोअ्का हि:
“इसाइको चान राजा दाउदको खालता एअ्मि ल्वावा
रो वा बोजात्यागेलाइहेङ राज पावा।
कालाउ एम्बालाइ वाता आस ताअ्तावा।”#यासाइया ११:१०
13आस पिका परमेस्वरता नेलाइ खान्धुर पाका हिसुन्हा। वादोङ नेलाइहेङ बेराजा रो सान्तिहोइ पोङघापाप्याको। एन्साङपातेङ पुनित हाङसाको सरबङहोइ नेलाइको आस बार्हेतेङ हानाको।
पावल बोजात्यागेलाइको चाकर
14काङको दादाओने बाइओनेगेलाइ, का गिखा, नेलाइ रेम्का काथागेलाइसो पोङघाका हिसुन्हा। कालाउ नेलाइ आकिलहोइ पोङघाका हिनाङ एअ्मि भेनेङहेङ हाउसा पिलि दोका जेङका हिसुन्हा। 15कालाउ परमेस्वर कासेहेङ पिका निगाहासो नेलाइहेङ फोम पापालिको भाअ्सिङ इदोइ काथागेलाइ आट पातेङ लेखिदोङखा। 16का बोजात्यागेलाइहेङ परमेस्वरको बारेता रेम्काबानाल पारचार पातेङ ख्रिस्ट इसुको चाकर पाखा। एसापा धामि दान चार्हाइकाभाइपाङ का बुङ एम्बालाइहेङ परमेस्वरहेङ मोन्दाताका दानको रुपता चार्हाइलि द्वाङका। हाइदोनु पुनित हाङसा नेलाइहेङ पुनित द्याङगेलाइ बान्हाइका हि।
17इदोइभाअ्सिङ का इङको काथागेलाइता तुजुक पाखा, जेदोङ का परमेस्वरको भाअ्सिङ ख्रिस्ट इसुता पाघा। 18हाइदोनु बचन रो कामहोइ बोजात्यागेलाइहेङ हुकुम मानिका बान्हाइलि ख्रिस्ट कासो जेदोङ पाका हि, इङकोमाकोसिङ का हिदिङ बिसाइता धुइलि आट मापाखा। 19कालाउ इदोइ काम चिन्होगेलाइ रो भारभुसाइका कामगेलाइको सरबङहोइ रो पुनित हाङसाको सरबङहोइ का पाका हिघा। एसापा का यरुसलेमसो इल्लुरिकन मुलुक थिकापाङ ख्रिस्टको रेम्काबानाल पारचार पाका हिघा। 20बोमिको थालेका जगता साअ् बान्हाइकाभाइपाङ का बोमिको पारचार पाका थामेता पारचार पालि माभोखा। कालाउ ख्रिस्टको मिङ मामाहिङका रो बोमिको पारचार मापाका थामेता खिनिङ रेम्काबानाल पारचार पालि का भोखा। 21एसापा धरमकिताबता इस्का लेखिका हिः
“वाको बारेता जाइहेङ हेअ्लाउ दोअ्का मान्थु,
एम्बालाइ वासेहेङ तिनावा।
कालाउ वाको बारेता जाइ हेअ्लाउ हिङका मान्थुघाहि एम्बालाइ बुङ बुझ्यावा।”#यासाइया ५२:१५
पावलको रोम हानिका इछा
22इदोइभाअ्सिङ नावानावा थामेता पारचार पालिगोइनाङ का नेलाइकोता लोलि भ्याइकाङ मान्थुघाघा।#रोमि १:१३ 23कालाउ एला इदोइ माउजागेलाइता का पारचारको काम दोपालिदोका हिघा। कालाउ हेन्जाङ बाअ्सारसो नेलाइहेङ दुसुलि हेन्जाङ इछा पातेङ हिघाखा। 24का इङकोङ दामा जेङतेङ स्पेन हानिलाउ नेलाइहेङ दुसुतेङ आधे पहर नेलाइदोफा हिलि इछा पाका हिघा। कालाउ इङको पहर का नेलाइसो स्पेन मुलुकथिकापा हानिलि मदत बुङ निनाङका वाला दोअ्तेङ आस बुङ पाका हिघा। 25कालाउ का इदोइ खेपचाहिँ परमेस्वरको पुनित जनगेलाइहेङ पाइसा पिपुलि यरुसलेमभारि हानिदोङखा।#१ कोरिन्थि १६:१-४ 26हाइदोनु आखाइया रो माकेडोनियाता हिका मन्डलिगेलाइ यरुसलेमता हिका परमेस्वरको गरिब पुनित द्याङगेलाइहेङ टाका पिगिल्लि भोका हि। 27कालाउ इदोइ दान एम्बालाइ लेङचातेङ ताइमिङ जोम्पाका हिघाखे। जातिङकोङ इङको गरिबगेलाइहेङ साघाइलि रेम्काङ काथा। हाइदोनु यहुदि खान्धुरिगेलाइसो दोङ बो द्याङगेलाइ पुनित हाङसाको पिका सहसाम्पा निङका हिघाखे। कालाउ एन्साङपातेङ बोजात्यागेलाइ बुङ ताइमिदोफा हिका काथागेलाइ पितेङ यहुदि खान्धुरिगेलाइहेङ साघाइलि गोयाङ।#१ कोरिन्थि ९:११ 28इदोइभाअ्सिङ एम्बालाइहेङ पिगिल्का पाइसा जिमा पितेङ का स्पेन हानाङका। कालाउ इङकोङ पहर नेलाइकोता बुङ ल्वाङका। 29जेलाउ का नेलाइकोता ल्वाङका कालाउ इसु ख्रिस्टको पिका सहसाम्पासो पोङघातेङ ल्वाङका।
30दादाओने बाइओनेगेलाइ, काङको भाअ्सिङ परमेस्वरहेङ पारथाना पातेङ कासेहेङ काङको कामता साघाइसु। कालाउ केलाइको प्रभु इसु ख्रिस्टको मिङता रो पुनित हाङसाको पिका मायासो का नेलाइहेङ पारथाना पाखा। 31यहुदियाता हिका खान्धुर मापाकालाइसो कासेहेङ जोगाइलिको भाअ्सिङ यरुसलेमता हिका काङको काम ख्रिस्टको पुनित जनगेलाइहेङ मोन्दाताका ज्याको दोअ्तेङ बुङ पारथाना पापिसु। 32परमेस्वरको इछा जेङनु का लेङचातेङ नेलाइकोता ल्वाङका रो नेलाइदोफाङ सङगति पातेङ हाउसेलि द्वाङका। 33कालाउ सान्ति पिका परमेस्वर नेलाइ झाराङदोफा ह्याको। आमेन।
Zvasarudzwa nguva ino
रोमि 15: DHIM
Sarudza vhesi
Sarudza zvinyorwa izvi
Yenzanisa
Pakurirana nevamwe
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© 2025 by Nepal Bible Society and Wycliffe Bible Translators, Inc.