Korɛntitɔnŋ kiri (1) 9
9
Kirinŋ tɛ baara matɔnŋ ki wɔ kila ki fa ntiŋ wɔ baara ki
(Korɛntitɔnŋ kiri (2) 11.7–12; 12.13–15)
1Míŋ tindaŋ ni, míŋ ńʼyɛri wɔ kì wa? Míŋ Yesu wɔ cindaŋ i kì wa? Míŋ yibɛɛ Ŋuntiŋ Yesu ki ja kì wa? Ábɛɛ yɛrima kiri míŋ baara ma mwɔɔn ɔ Ŋuntiŋ ki wɔ cinŋ ki ru kì wa? 2Hali ǹʼbɛɛ ri ji míŋ ja-a Yesu wɔ cindaŋ i kì, ábɛɛ kɔniŋ kakan-i á i míŋ tɔ Yesu wɔ cindaŋ i, sabu ábɛɛ i taanmashɛ ɛ, nwɔ̀ i mɔ́ɔ́n Yesu wɔ cindanbi baara ma mwɔɔn ɔ Ŋuntiŋ ki tɛ.
3Nwɔ̀ri i baa-ra míŋ sun, míŋ a nini nupwulu tu : 4Ábɛɛ cirasun tu yibɛɛ kakan yi i nufinŋ fa mwunu ju kila yɔɔ baara ki ru kì wa? 5Miŋ tu cindaŋ pyɛ kiri fa Ŋuntiŋ ki pwaŋ kiri fa Pyɛɛri i ǹʼma-a ɲaan wɔ̀ tɛ, kí fa arɔɔ mari bilinatɔnŋ kiri i ta-ri mani kiri bataa ru, ábɛɛ cirasun tu yibɛɛ fa niŋ ma kɛɲɛ kì wa? 6Ábɛɛ cirasun tu míŋ fa Barinabasi bantenŋ kakan yi i baara ma-ni, yi i yɛri tɔnnafɛ-ri wa? 7Nkɛnŋ tiri-ra surudashibi ra ntiŋ i saaki ntiŋ i tu a yɛri wɔ nufinŋ ki tɛ? Nkɛnŋ jirinŋ ye-a tu ntiŋ ǹʼdaŋ ki nu-a kì? Nkɛnŋ nafulufinŋ ni mari-ra, tu ntiŋ yìrì nɔnɔ ki mwunu-na kì?
8Ŋì fa ji ábɛɛ cirasun tu míŋ ńʼwɔ wulu kari bi-a, ŋì i kɛɲɛ konanmini wɔ ɲakilila bantenŋ wu kì dɛ! Musa wɔ sariya sɛbɛ ki mìŋ tenŋ ki bi-a kì wa? 9Ǹʼsɛbɛ-i sariya sɛbɛ ki ru tu : « Naan wɔ̀ i bilaŋ ki bwɔ-a#9.9 Naan wɔ̀ i bilaŋ ki bwɔ-a : Naan kiri wuru kɔli-la wotoro ki ra shii sinaŋ i bo ǹʼnu. Niŋ wotoro ki i cɛɛn de de niŋ bilaŋ nakɔlimaan ki sun, ŋì i ciriki, fɔ ǹʼdaŋ ki i san ǹʼna., fa niŋ tɔnŋ ki kɔli kì. »#Sariya kiri 25.4. Ábɛɛ cirasun tu Kirinŋ naan ni sunmakwulupa-a kwumaŋ wa? 10Ŋì yibɛɛ konanmini ki wulu bi-a kì wa? Sɛli yɛ, niŋ bi-i yibɛɛ kiri bira, sabu ji kaantɔnŋ ki kakan-i ntiŋ i bili ǹʼna tu afinŋ a bilaŋ kila, bilanbwɔtɔnŋ ki i ǹʼtɔ tu afɔɔn lu bilaŋ ki ru sɛbɛ. 11A yibɛɛ ji ji sababu u ábɛɛ i Kirinŋ wɔ kafinŋ kiri kila, a yibɛɛ niŋ tɔnɔ ki bɛɛ mwu ábɛɛ wu, niŋ i yibɛɛ fɛɛnmaanna i ábɛɛ sun wa? 12A sɛli ji koŋ tɔri kiri gbɛ, kí i ábɛɛ gbɛfɛfinŋ ni kila, jii i yibɛɛ gbɛ, ŋì i fwuu nini sun. Nka yibɛɛ niŋ tɔri ma-a kì, yibɛɛ i yɛlinŋ ki fɔn kwuru pa-a yi ra, nwɔma yi fa bi tɔri tenŋ ma nwɔ̀ a Kirisa Wulujii ki ta ba jɛŋ kì.
13Ábɛɛ ǹʼtɔ tu koŋ wɔ̀ri baara ki ma-a Kirinfusinaŋ ki ru, tu nini arì tɔnnafɛ-a Kirinfusinaŋ ki ru finŋ kiri ra kì wa? Ábɛɛ ǹʼtɔ tu nwɔ̀ri i saraka ki wɔri-ra sarakawɔrɔmaŋ ki sun, tu nini wɔ lu niŋ sarakafinŋ wɔrimaan kiri ru kì wa?#Sariya kiri 18.1–3. 14Mìŋ ɲaan ki tɛ, Ŋuntiŋ ki tu nwɔ̀ri Wulujii ki sunjo baara ki ra, tu nini arì tɔnnafɛ ǹʼnu.#Luki 10.7.
15Nka míŋ cɛɛn niŋ finŋ kiri tɔri dantenŋ cɛfan kì. Hali míŋ ji yìrì wulu bi-a kwumaŋ, míŋ ǹʼtɛ ńʼtu koŋ i yìrì ma míŋ tɛ kì dɛ! Míŋ yɛri ragbɛ bi ki i ninwɔ̀, míŋ ǹʼtɛ koŋ i niŋ mwu san míŋ wu kì. Beŋ pari-i míŋ tɛ niŋ wu. 16Yɛri ragbɛ ŋuŋ míŋ gbɛ Wulujii ki bimaanna ki ra kì, sabu faan yɛ míŋ sun. A míŋ Wulujii ki sunjo kì, niŋ i bɔni míŋ sun.
17A ǹʼji wuru tu míŋ baara ka ɲaannashi-ri ńʼdintɛ bi ra, míŋ wuru-ra sali ceeli-li ǹʼnu. Nka baara ki biye-i míŋ gbɛsun, ǹʼma ki i faan a. 18Míŋ sali ki ǹʼdanwɔ? Niŋ i ciirudibi i, míŋ i ninwɔ̀ kila-a Wulujii ki sunjomaanna ki ru ǹʼgbansanŋ, niŋ fa míŋ wuru-ra so nafan wɔ̀ ceeli-i ńʼyɛri tɛ, ŋí i ńʼkaan niŋ tɛ.
19Hali míŋ ji koŋ tɔri tenŋ wɔ joŋ i kì, míŋ ńʼyɛri ji-i koŋ bataa wɔ joŋ i, nwɔma ŋí i koŋ mwɔɔnna kila. 20Míŋ ńʼyɛri ji-i Yawutu u, nwɔma ŋí i Yawutu kiri kila. Míŋ tiri-i ŋí i ǹʼkɛɲɛ sariya fɛ sɔɔtɔnŋ kiri wu, nwɔma ŋí i nini kila, míŋ dumiŋ sariya fɛ sɔɔtɔnŋ i kì. 21Nwɔ̀ri sariya ki tɔ-a kì, míŋ ńʼyɛri ji-i nini sali sariya tɔbali i, nwɔma ŋí i nini kila. Niŋ nʼji-a tu míŋ ńʼkaan Kirinŋ wɔ sariya ki tɛ wa? Aayi, míŋ i Kirisa wɔ sariya ki fɛ. 22Nwɔ̀ri faan ki kuru-i bilinabi ki ru, míŋ ńʼyɛri ji-i miŋ tu mɔ́ɔ́n bilinabi ki faan ki a ji kuru nini sali, nwɔma ŋí i kí kila. Niŋ ɲaan ki tɛ, míŋ ńʼyɛri ji-i finŋ bataa a koŋ bataa gbɛ, nwɔma ŋí i ǹʼbɛɛ ri mwu san arɔɔ bijɛ kiri wu ɲaan bataa tɛ. 23Míŋ bi bataa ma-a Wulujii ki bira, nwɔma ŋí i lu kila ǹʼtɔnɔ ki ra koŋ pyɛ kiri fan.
24Ábɛɛ ǹʼtɔ-a tu manjanbili tanmaŋ ki ru, tu konaŋ bataa bili-la, nka tu koŋ tenŋ jali ki kila-a kì wa? Á bili, nwɔma á i jali ki kila. 25Bili tantɔnŋ kiri bataa i arì yɛri pa-a bi kwuru mwɔɔnna kɛlina sun, nwɔma arì i niŋ jali lumɔrɔmɔrɔmaan ki kila, ninwɔ̀ ra kɔ. Nka yibɛɛ i yɔɔ bili ki tan-a, nwɔma yi i jali libali ki kila. 26Ninki i ncin-a míŋ i bili-li, ńʼɲaniŋ ki i ji ńʼwɔ bili ki rakɔmaŋ ki sun. Míŋ i miŋ tu gbɛŋuŋ keetɔnŋ, nwɔ̀ awɔ gbɛŋuŋ ki kee-ra mani tawɔ ru kì. 27Míŋ i ńʼfiri ki rusi-a, ŋí i ǹʼkulu ŋununfurubi wu, sabu míŋ kɛni-na tu Wulujii ki sunjomaan ki kɔɔtɛ koŋ pyɛ kiri tɛ, ńʼtu Kirinŋ fa na a kaan míŋ tɛ kì.
Zvasarudzwa nguva ino
Korɛntitɔnŋ kiri (1) 9: JOB
Sarudza vhesi
Sarudza zvinyorwa izvi
Yenzanisa
Pakurirana nevamwe
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© Wycliffe Bible Translators, Inc.