Levítico 4
4
Huchakuna perdonasqa kananpaq sacrificio ofrendakunamanta
1Señor Diosmi Moisesta khaynata niran:
2—Israelpa miraynin runakunata khaynata nimuy: Sichus pipas mana cuentata qokuspa, noqa Señor Diospa contraypi huchallikunqa otaq kamachisqay leykunapi prohibisqaykunata ruwanqa chayqa, sacrificio ofrendakunatan ruwanan.
Sacerdotekunaq jefenpa huchankuna perdonasqa kananpaq sacrificio ofrendamanta
3Sichus *sacerdotekunapa jefen huchallirukuspa, llaqtata huchallichinqa chayqa, chay huchallikusqanmantan noqa Señor Diosman mana defectoyoq sano torillota ñak'aspa *sacrificio *ofrendata ofrecewanan, saynapi huchankuna perdonasqa kananpaq. 4Chay torillota apayukuspanmi, noqa Señor Dioswan tupana *tabernáculo templopa punkunman hamunan. Hinaspan noqa Señor Diospa ñawpaqniypi chay torillopa umanman makinta churayuspa ñak'anan. 5Hinaspan sacerdotekunapa jefenqa chay torillopa yawarninta huk chikanta apayukuspa, tabernáculo temploman apamunqa. 6Chaymantan chay sacerdotekunapa jefenqa dedonta chay yawarman challpuykuspa, noqa Señor Diospa ñawpaqniypi, tabernáculo templo ukhupi rakiq cortinapa ñawpaqninman qanchis kutikama ch'allanqa. 7Chaymantataqmi sacerdotekunapa jefenqa chay yawarta sumaq q'apaq incienso k'anana *altarpa waqrankunaman llusinqa. Chay altarqa kashan noqa Señor Dioswan tupana tabernáculo templopa ñawpaqnin lugarpin. Torillopa wakin yawarnintañataqmi sacrificio ofrenda animalkunata k'anananku altarpa tiyanan lugarman ch'aqchunqa. Chay altarqa kashan tabernáculo temploman haykuna lugarpin. 8Chaymantataqmi chay hucha perdonasqa kananpaq torillota ñak'aspa, llapallan wiranta orqonqa, ch'unchulninkunapi wirata, llapallan llika wirankunata, 9ishkaynin rurunninkunata, rurunninkunapa hawanpi wirata, lomonpi kaq wirata, higadonpa hawanpi kaq wiratapas. Chay wirataqa rurunninkunatawan kushkatan orqonqa. 10Tukuy chaykunatan sacerdotepa jefenqa noqa Señor Diosman sacrificio ofrendata presentawanqa, imaynatan noqawan hawkalla kawsanankupaq torillota ofrecewanku chay hinata. Tukuy chaykunataqa sacrificio ofrendata k'anana altarpin ofrecewanqa. 11Ichaqa chay torillopa qaranta, aychanta, umanta, chakinkunata, ch'unchulninkunata hinallataq phusnunkunatawanmi 12campamentomanta hawaman orqonqa. Hinaspan chay ñak'asqan torillota apanqa huk ch'uya lugarman. Chay lugarqa ushpa hich'ananku lugarmi. Chay lugarpin llant'apa hawanman churaspa k'ananqa.
Israelpa miraynin runakunapa huchanku perdonasqa kananpaq sacrificio ofrendamanta
13Sichus Israelpa llapallan miraynin runakuna mana cuentata qokuspa, noqa Señor Diospa kamachisqay leykunata mana kasukuspa, huchallikunqaku chayqa, llapallankun culpayoq kanqaku. 14Ichaqa chay huchallikusqankumanta cuentata qorukunqaku chayqa, llapallan runakunan huk torillota apamuspa, noqa Señor Diosman sacrificio ofrendata ofrecewanqaku. Chay ofrendataqa noqa Señor Dioswan tupana *tabernáculo templomanmi apamunanku. 15Hinaspan Israelpa mirayninmanta líder runakunaqa chay torillopa umanman makinkuta churaykuspanku, noqa Señor Diospa ñawpaqniypi ñak'ananku. 16Chaymantan sacerdotekunapa jefenqa chay torillopa yawarninta oqarispa, noqa Señor Dioswan tupana tabernáculo temploman apayunqa. 17Chaymantan chay sacerdotekunapa jefenqa dedonta chay yawarman challpuykuspa, noqa Señor Diospa ñawpaqniypi, tabernáculo templo ukhupi rakiq cortinapa ñawpaqninman qanchis kutikama ch'allanqa. 18Chaymantataqmi sacerdotekunapa jefenqa chay yawarta sumaq q'apaq incienso k'anana altarpa waqrankunaman llusinqa. Chay altarqa kashan noqa Señor Diospa ñawpaqniypin tabernáculo temploman haykuna lugarpi. Chay torillopa wakin yawarnintañataqmi sacrificio ofrenda animalkunata k'anananku altarpa tiyanan lugarman ch'aqchunqa. Chay altarqa kashan tabernáculo temploman haykuna lugarpin. 19Chaymantan chay torillopa llapallan wiranta orqospa, altar hawapi k'ananqa. 20Chay torillotan sacerdoteqa noqa Señor Diosman sacrificio ofrendata presentawanqa, imaynatan pay kikinpa huchan perdonasqa kananpaq primer kaq ofrecewasqan torillota ñak'aspa ofrecewan chay hinata. Saynapin paykunaqa huchankumanta perdonasqa kanqaku. 21Chaymantañataqmi sacerdotekunapa jefenqa chay torillopa aychanta campamentomanta hawaman orqonqa. Hinaspan k'ananqa chay huknin torillota hina. Kay sacrificio ofrendaqa Israelpa miraynin llapallan runakunapa huchankuna perdonasqa kananpaqmi.
Israelpa miraynin runakunata kamachiq liderkunapa huchan perdonasqa kananpaq ofrendamanta
22Sichus Israelpa miraynin runakunata kamachiq líder mana cuentata qokuspalla noqa Señor Diospa kamachisqay leykunata mana kasukuspa huchallikunqa chayqa, chay kamachikuq liderqa culpayoqmi kanqa. 23Ichaqa chay huchallikusqanmanta cuentata qokunqa chayqa, noqa Señor Diosman sacrificio ofrendata presentawanapaqmi huk orqo kapita apamunqa. Chay apamusqan kapiqa mana ima defectoyoq sanon kanan. 24Hinaspan chay kamachiq liderqa apamusqan animalpa umanman makinta churayunqa. Hinaspan noqa Señor Diospa ñawpaqniypi ñak'anqa, animalkunata ñak'ananku lugarpi. Chay sacrificio ofrendaqa hucha perdonasqa kananpaq ofrendan. 25Chaymantataqmi huknin kaq sacerdoteqa dedonta chay yawarman challpuyuspa, sacrificio k'anana altarpa waqrankunaman llusinqa. Wakin yawartañataqmi chay altarpa tiyanan lugarman ch'aqchunqa. 26Hinaspan chay animalpa llapallan wiranta altarpi k'ananqa, imaynatan noqa Señor Dioswan hawkalla kawsanankupaq ofrecewasqanku animalpa wiranta k'ananku chay hinata. Saynatan sacerdoteqa chay kamachiq líder runapa huchankuna perdonasqa kananpaq sacrificio ofrendata noqa Señor Diosman presentawanqa. Hinaqtinmi noqaqa huchanta perdonasaq.
Mayqen runapas huchallikuqtin perdonasqa kananpaq sacrificio ofrendamanta
27Sichus kaqmanta pi runapas mana cuentata qokuspalla noqa Señor Diospa kamachisqay leykunapa contranpi huchallikunqa chayqa, chay runaqa culpayoqmi kanqa. 28Ichaqa chay huchallikusqanmanta cuentata qokunqa chayqa, noqa Señor Diosman sacrificio ofrendata presentawanapaqmi huk china kapita apamunqa. Chay apamusqan kapiqa mana ima defectoyoq sanon kanan. 29Hinaspan chay huchallikuq runaqa apamusqan animalpa umanman makinta churayunqa. Hinaspan chay animaltaqa ñak'anqa noqa Señor Diosman k'anaspa presentawananku altarpa ladonpi. 30Chaymantataqmi huknin kaq sacerdote dedonta chay yawarman challpuykuspa, sacrificio k'anana altarpa waqrankunaman llusinqa. Wakin yawartañataqmi chay altarpa tiyanan lugarman ch'aqchunqa. 31Chaymantan chay animalpa llapallan wiranta orqonqa, imaynatan noqa Señor Dioswan hawkalla kawsanankupaq ofrecewasqanku animalpa wiranta orqonku chay hinata. Hinaspan chay wirata altarpi k'ananqa. Chay ofrendaqa noqa Señor Diospaqmi sumaq mishk'i q'aparishaq ofrenda. Saynatan sacerdoteqa chay runapa huchankuna perdonasqa kananpaq sacrificio ofrendata noqa Señor Diosman presentawanqa. Hinaqtinmi noqaqa chay huchallikuq runapa huchanta perdonasaq.
32Sichus chay huchallikuq runa huk ovejata apamunqa, huchankuna perdonasqa kananpaq chayqa, mana defectoyoq china ovejatan apamunan. 33Hinaspan chay runaqa apamusqan ovejapa umanman makinta churayunqa. Hinaspan chay animaltaqa ñak'anqa noqa Señor Diosman k'anaspa presentawananku altarpa ladonpi. 34Chaymantataqmi chay sacerdoteqa dedonta chay yawarman challpuykuspa, sacrificio k'anana altarpa waqrankunaman llusinqa. Wakin yawartañataqmi chay altarpa tiyanan lugarman ch'aqchunqa. 35Hinaspan chay animalpa llapallan wiranta orqonqa, imaynatan noqa Señor Dioswan hawkalla kawsanankupaq ofrecewasqanku animalpa wiranta orqonku chay hinata. Hinaspan sacrificio ofrenda presentawasqanku ofrendatawan kushkata chay wirata altarpi k'ananqa. Saynatan sacerdoteqa chay runapa huchankuna perdonasqa kananpaq sacrificio ofrendata noqa Señor Diosman presentawanqa. Hinaqtinmi noqaqa chay runapa huchanta perdonasaq.
Zvasarudzwa nguva ino
Levítico 4: QEAÑT
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
Antiguo Testamento Quechua del Este de Apurímac © Sociedad Bíblica Peruana, 2020.
Mosoq Testamento Quechua del Este de Apurímac © Publicado por © 2013 Wycliffe, Inc.
Publicado por © 2013 Liga Bíblica, Internacional