Mavaanga 23
23
1Pahuli asungimini pfuundu Bayudaayo, na aleeli: «Baana baa ngu, me miitsalila Nzambi te ilumbu hya lolo, hwavele munyongo tso hoole.» 2Mukuutu bangaanga ba Nzambi Ananya, atumi ba baaba ŋa pedu a Pahuli, mu utete nde mu munywa. 3Na Pahuli aleeli: «Nzambi sa asyembe we, we wa vilu-vilu! We li ŋa mu utsundasa me we bu huli mikele. Ka we miituma batete me hwavele uduukala mikele». 4Ba baaba ŋa pedu a Pahuli baleeli nde: «We miituha mukuutu bangaanga ba Nzambi!» 5Pahuli afutili: «Me a hakanzaba ve, baana ba ngu ti nde mukuutu bangaanga ba Nzambi ali. Mu tooni ati Mabasonehe mali mu ulongese bu: “We lilibi uleele mu mukuutu ibaandu hya we ve#Pal 22.27!”»
6Pahuli aba ayaba ti pfuundu mo yiina aba kabu limosi li Basaduki, na lina li Bafarisi. Ni mu buuna, nde hafulihi ŋa busu bwa bo: «Bana baa ngu, me Mufarisi ndi, na me mwaana Bafarisi. Mu tooni a hiitu hya me mu tsuuhili a babaakwa, bali mu utsundasa me.» 7Pahuli amana buuna uleele, kele yabwidi ŋa hati li Bafarisi na Basaduki, na buraandu bwakoti ŋa hati li mukungi. 8Kele yabwidi mu tooni ati, bo mwakulu Basaduki, baakaleele ti a yili ve, tso bapofi, tso mavupu. Ka uto ti Bafarisi, bali mu usiila hiitu mu mina myosi. 9Baakasinzafulaha. Milongisi mi Mikele, baa mu kabu li Bafarisi baatelimisi paha yinene na uleele: «Bisu a limoni dyaambu tso limosi lilibi mu bahala mo linili ve. Na yaabi? Peleve livupu, tso pofi mumosi yamonehele na nde?»
10Paha yarangili, na mukuutu balwani abati boomo ti baatu mobaniba a bayatsaaka Pahuli. Ni mu buuna, nde hatumi masadaadu mu ukulamana hu tsina hu kuungi laaba, mana bo bamaasa Pahuli ŋa hati la bo, mu uyafutala nde hu bula bu masadaadu. 11Butsuhu bu bwaduukili, Pfumu ayamonehele na Pahuli na aleeli: «Hwada! Mu tooni ati we miitiila me imbangi huni, hu Yeruselemi. Ni buuna, we afwana ka uta me imbangi hu musyenge a Looma.»
Pfuundu Bayudaayo mu uvangila Pahuli bubi
12Humbisa hu busi bwakiidi, kabu li Bayudaayo laakuti pfuundu mu uduba Pahuli. Bo baateeli mvwanga mu bo mwakulu mu uveledya na uvelenywa, tso bo a badubi Pahuli ve. 13Ba baakuti pfuundu mo yiina, baaba baa labuha maku mana ma baatu. 14Bo baayamono bakuutu ba bangaanga ba Nzambi, na bakuutu ba Bayudaayo, na baayaleele bo: «Bisu limiiteele mvwanga mu bisu mwakulu, mu uveledya na uvelenwya, natee bu lu uduba Pahuli. 15Buuna, benu mu itwadi na pfuundu bakuutu ba Bayudaayo, vondwaani mukuutu balwani abehele benu Pahuli. Salilaani buyedi bu uleele ti, benu litondi utsikaha musamu a nde bubwe-bubwe. Hu tsyelo a bisu, bisu laamiivangama mu uduba nde, tswamina nde mu uyato huni.»
16Ka mwaana a kedi a Pahuli mumosi, ayuhi pfuundu mo yiina. Nde ayeni hu bula bu masadaadu, akoti, na ayayelese Pahuli. 17Buuna Pahuli ateeli mumosi mu bakuutu ba masadaadu. Nde aleeli nde: «Bita mufudu mbahala mo wunuuwu, huli mukuutu balwani. Mu tooni ati, nde na dyaambu li uyabisa nde.» 18Mukuutu masadaadu abiti nde huli mukuutu balwani na aleeli: «Ikondaayi Pahuli miteele me na milembesene me mu ubehele we mufudu mbahala mo wunuuwu. Nde na dyaambu li uyabisa we.»
19Mukuutu balwani avoli mufudu mbahala mu hoho, na ayeni na nde ŋa muvanga. Nde afuuli nde: «Ki dyaambu we li na lo mu uyabisa me?» 20Mupfudu-mbahala afutili: «Bakuutu ba Bayudaayo baamiiyuhasana, mu uvondo we mu ubita Pahuli ngwali, ŋa busu bwa pfuundu bakuutu ba bo. Bo bamiiveloho ti, pfuundu yoosi yitondi utsikaha dyaambu la nde bubwe-bubwe. 21Ka a hayuha ma bo! Mu tooni ati, litangu li lavyoho maku mana (40) ma baatu ba ŋa hati la bo, baamiiswemenene nde. Bo baamiiteele mvwanga mu bo mwakulu mu uveledya na uvelenywa, tso bo a badubi Pahuli ve. Bo baamiivangama, ka ndulu mvutu a we bali mu ukeele.» 22Mukuutu aleeli huli mwaana a kedi a Pahuli, mu uveleyabisa pasi muutu ma nde hayatoosele nde. Titswene, nde aviidi nde muswa mu ufutaha.
Pahuli bamiitsindaha hu musyenge a Sezare
23Titswene mukuutu balwani ateeli boole mu bakuutu ba masadaadu. Nde aviidi bo tumili: «Tsonzehaani makama moole (200) ma masadaadu, maku tsambu (70) ma ba baayaba unama babuuru, na makama moole (200) ma banga makongo. Vangamaani mu uyene hu musyenge a Sezare, tsitsaha moyi, mu ngunga yi matatu humbisa a busi uyila. 24Vangimasaani ka babuuru mu ubita Pahuli na utoose nde huli Mutumi Felikisi, mbenze ve, muhahusunu ve.»
25Ni mu buuna, mukuutu balwani mo usonehe muhanda mo wunuuwu:
26«Mutumi Felikisi nga mifwende, yaka mabwehe ma mamati huli me Koloode Lisyasi, mukuutu balwani. 27Bayudaayo beedi baakaanga muutu wu me miitsindaha we wunuwu, na ukana uduba nde. Bu me anzuha ti nde musi Looma, mu mawasa, me anzyene na masadaadu ma me, mu uyayobolo nde. 28Bu me atsaha uyaba tooni yi Bayudaayo baakese nde, me ambita nde ŋa busu bwa pfuundu bakuutu ba Bayudaayo. 29Me amono ti, bo bali mu ukese nde, mu tooni a mamali mu utala mikele mya bo. Ka a huli na dyaambu lilibi li nde havanga, li lutwala ubita nde mu kondaayi buuve hu lipfu ve. 30Bu baayayibusa me, ti Bayudaayo aba baamiikutala nde pfuundu mu uduba nde, mawasa-mawasa, me ataasa mu utsindaha we nde. Na me andeele huli ba bali mu utsuta nde, mu uyakese nde ŋa busu bu lituma la we.»
31Masadaadu makuhisi we bu baatumi mo. Bo baavoli Pahuli na baabiti nde butsuhu-butsuhu, hu musyenge a Antipati. 32Ilumbu hi hyakaduuka, masadaadu ma maakayene na nde mu miilu, maafutihi hu bula bwa mo. Na baasiisi babaaba na babuuru, mu uhwada mu mudyenge na Pahuli. 33Bu baatoodi hu musyenge a Sezare, bo baaviidi muhanda mo huli mutumi, na baamweesi nde Pahuli. 34Mutumi ataanga muhanda mowuna, nde afuuli Pahuli, mu ki itaanzi nde hamata. Bu nde hayaabi ti Pahuli aba musi Silisiya, 35nde aleeli nde: «Me tsa pfuula we byuhu ŋa ba baayakese we bu uyato.» Na nde atumi mu ususa nde hutso ibaanga hya Eloode.
Zvasarudzwa nguva ino
Mavaanga 23: TSA
Sarudza vhesi
Sarudza zvinyorwa izvi
Yenzanisa
Pakurirana nevamwe
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© (Active), Wycliffe Bible Translators, Inc. All rights reserved.