Mavaanga 18
18
Pahuli hu Koliito
1Humbisa a maana, Pahuli amati hu Atenesi na ayeni hu Koliito. 2Huuna, nde abwani na Muyudaayo mumosi nga nduhi Akilasi. Muyudaayo mo wunuuwu, musi musyenge a Ponte. Mu bilumbu mo biina, nde amati hu tsi a Italiya na mukadi a nde Pilisile. Nde hamati huuna, mu tooni ati Koloode, pfumu a Looma, avoli kesili ti Bayudaayo boosi, baafwana upala mu Looma. Pahuli ayeni huli Akilasi na Pilisile. 3Nde hapfuutini na bo, bu bo boosi baaba tsalu mosi. Nde atsahili huli bo, na bo baakasala itwadi. Isalu hya bo aba utuunga hu manzo ma ngooto. 4Pasi ilumbu hya saba, mu nzo lisambulu yi Bayudaayo, Pahuli akalongese mu usaha ukiingula matsimi ma Bayudaayo na Bangeleke. 5Ka bu Silaasi na Timoteho baamati hu itaanzi hya Masedonya, Pahuli asinzisalila taangu a nde, mu ubaalongese mambu ma Nzambi. Nde akasilasa huli Bayudaayo, ti Yisu ni Masiya. 6Ka bu Bayudaayo baabisi ma nde, na bu baatuhi nde, Pahuli akubili mufundu bikutu bya nde, na aleeli bo: «Tso benu lidimbili, mbele ya benu mwakulu. Me a ukolo mapfuumba mu maana ve. Ka bunuubu, me tsa nzyene huli ba bavele Bayudaayo.»
7Pahuli amati ŋa mbuha mo yiina, na nde ayeni hu nzo a bahala limosi nga nduhi Titiyusi Yusetuusi. Bahala mo liinili akasambila Nzambi, na nzo a nde aba yabaambana na yi lisambulu yi Bayudaayo. 8Buuna Kilisiposi, mutumi a nzo lisambulu yi Bayudaayo, asiidi hiitu mu Pfumu na ikuta hya nde hyoosi. Bisu Koliito ka ba banzuhisini ba baakayuha mambu ma Pahuli, baasiidi hiitu mu Pfumu Yisu, na baayaki tondihili. 9Ilumbu imosi ŋa butsuhu, Pfumu amonihili na Pahuli na aleeli nde: «A haba na boomo, baayambila, a hadibuha munywa. 10Ka me ndi itwadi na we. Muutu utwala ukaanga we, na uvangila we lilibi ve. Mu tooni ati, me ndi na baatu ba banzuhisini mu musyenge mo wunuuwu.» 11Na Pahuli akwilili hu Koliito ilima imosi na batsungi basamunu, mu ubaalongese baatu mambu ma Nzambi.
Pahuli bali mu utsundasa ŋa busu bwa pfumu a tsi Ngaliyoni
12Mu taangu yi Ngaliyoni haba mutumi itaanzi hya Akayi, Bayudaayo ba baabelili Pahuli, baayuhisini mu itwadi mu ukaanga nde. Na baabiti nde hu nzo a tsundusu. 13Huuna, bo baakesi nde ti: «Muutu mo wunuuwu, li mu ukiingula matsimi ma baatu, mu ukunda Nzambi bu hwasobono na mikele.» 14Bu Pahuli hakibaandiha uyambila, Ngaliyoni aleeli huli Bayudaayo: «Benu Bayudaayo! Tso muutu mo wunuuwu avanga lilibi, buuve aduba muutu, kini me kiinzuha benu mu isuusi we bu hwafwana. 15Ka umono ti ndulu mu usobosono hu minywa mu mikuma, mu manduhi, buuve mu tooni mikele mya benu mwakulu, maana matali benu. Me mbisi uba nzonzi a maana.» 16Humbisa, nde abingi bo mu nzo a tsundusu. 17Buuna, bo boosi baakangi Sositeni, mukuutu a nzo lisambulu yi Bayudaayo. Bo baarambi nde kuba, ŋa busu bwa nzo a tsundusu. Ka Ngaliyoni a hanyongi tso hole ve.
Pahuli miifutaha hu musyenge a Antyokya mu tsi a Siriya
18Ŋa mbisa a dyaambu mo lina, Pahuli abwevyoso taangu yi yayelemene hu musyenge a Koliito. Nde alanisi baana ba ngu, mana nde ayene hu tsi a Siriya itwadi na Pilisile na Akilasi. Titswene Pahuli atumi ukuula mutswe, mu tooni ati nde asiidi nzuhisini huli Nzambi. Nde akoti likuumbi hu ngulu makuumbi ya Sankeli, mu uyene hu tsi a Siriya. 19Bu bo baayato hu musyenge a Efeso, Pahuli asiisi bambaahi ba nde baa mudyenge, Pilisile na Akilasi. Ni huuna, nde hakoti mu nzo lisambulu yi Bayudaayo, mu umoho na Bayudaayo. 20Bo baavondi nde mu uvyoso mwa bilumbu na bo. Ka nde abisi. 21Pahuli asiisi bo na aleeli: «Me tsa nzapfutaha huli benu, tso Nzambi tondi.»
Nde akoti likuumbi la nzali, na asiisi musyenge a Efeso. 22Bu Pahuli hamati hu musyenge a Efeso, nde ayasutaha hu ngulu yi makuumbi mu baatsikama yi musyenge a Sezare. Nde akumisi hu musyenge a Yeruselemi mu uyava libundu suuhi. Titswene nde ayeni hu musyenge a Antyokya. 23Mwana a taangu hole, nde asiisi musyenge a Antyokya mu uyene hu bitaanzi bya Ngalatiya na Filizi, mu ubaahwadisa imiinu hi bayihi boosi.
Pahuli ayafutaha hu misyenge mya Efeso na Koliito
24Muyudaayo mumosi ayidi hu musyenge a Efeso, nduhi a nde Apoloosi, wu baabuti hu Alekizandi. Nde aba muutu wu ubaatoyo bubwe, na nga buyedi wu akangama mu Mabasonehe ma Ngidi. 25Nde aba ayiha misamu mi mya tala nzila a Pfumu. Bu haba ka na lehemene mu livupu, nde akayabisa na akalongese bu hwafwana, Musamu wu Mubwe wu atala Yisu. Ka nde aba ayaba ndulu tondihili yi Yowani hakalongese baatu. 26Nde abaandihi utoyo mu tsiki, mu nzo lisambulu yi Bayudaayo. Bu Pilisile na Akilasi baamani uyuha nde, bo baabiti nde hu nzo a bo, na bo baabinduli nde nzila a Nzambi we bu hwafwana. 27Bu nde haba na tadi yi uyene hu itaanzi hya Akayi, baana ba ngu baahwadisi nde. Bo baasonihi muhanda huli bayihi ba huuna, mu uyaka nde bubwe. Bu nde hatoodi hu Akayi, nde abeedi na tsoongo mu ba baasiidi hiitu mu bubwe bwa Nzambi. 28Ka mu mifudi myosi, nde akatungalala Bayudaayo ŋa kuungi la baatu boosi, na nde akamweese mu Mabasonehe ma Ngidi, ti Yisu ni Masiya.
Zvasarudzwa nguva ino
Mavaanga 18: TSA
Sarudza vhesi
Sarudza zvinyorwa izvi
Yenzanisa
Pakurirana nevamwe
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© (Active), Wycliffe Bible Translators, Inc. All rights reserved.