मत्ति 21
21
येसु येरुसलेमतिगा राजाल लेहका दान्तोर
(मर ११:१-११; लूका १९:२८-४०; युह १२:१२-१९)
1येसु अनि ओनोर चेला लोकुरक येरुसलेमता हेरे जयतुन मटा हेरे बेतफगेता नाटेना हेरे वातुरक असके येसु इवुर चेलालोरकुन इदाम इन्जुन लोहतुर, 2“मुनेटा नाटेनिगा हन्ट। अगा अवतपा उन्दि दोहता गदि अनि अदेना संग गदिता पिलाल मिकुन पुटार। अवेहकुन लेहच नावा हेरे तराट। 3मिकुन बोरे बाताले इन्दानुर ते प्रबुन अवेहना जरुरि मन्ता इन्जोर इन्ट; असके ओर सान्डेय अवेन लोहनुर” इन्जोर इतुर।
4“सियोनना पेडिन इन्ट,
‘हुळा, नियोर राजाल नम्र आस गदिना पोरो मन्जे गदिना पिला पोरो उदस
निया हेरे वायिला आतोर इन्जोर इन्ट#जक ९:९’ ”
5इदाम परमेस्वरना पोल्लो वेहवालना द्वारा इन्ज मतोर ओद पोल्लो पुरा आयि इन्जोर इदाम आतु।
6येसुना चेला लोकुरक हन्जुन, येसु ओरकुन आग्या हितोर अदामे कितुरक। 7अनि गदि अनि अदेना पिलातुन तचुन अवेहना पोरो आपुनांग सन्दरांग तारतुरक, अनि येसु गदि पिलाता पोरो उदितुर। 8असके पकाय लोकुरक आपुनांग दुपटांग हरितिगा तारतुरक, अनि दुसरो लोकुरक जयतुन मराता कोहक कदियस हरितिगा तारताप इरतुरक। 9ओना मुने-मुने हन्दुरक अनि परके-परके वान्दुरक सबोय लोकुरक जोर-जोरदे इन्दुरक,
“दावुदनोर मरिन होशाना#२१:९ होशाना मन्जे माकुन पिसहा ,
प्रबुना पोरोयते वान्तोर ओर धन्य मन्तोर
अनि सबोयता ऊचो स्वरगता जागातिगा उदितोर परमेस्वरिन होशाना#भज ११८:२५-२६।”
10ओर येरुसलेमतिगा हतुर असके सबोय सहेर गजबजेमातु, अनि “येर बोर आन्दुर?” इन्जोर लोकुरक इन्दिला लागतुरक। 11लोकुरा भीळ, “येर गलील प्रदेशतोर नासरत नाटेनोर परमेस्वरना पोल्लो वेहवाल येसु आन्दुर” इन्जोर इतुरक।
येसु येरुसलेम मन्दिरता मोमवालोरकुन पसिहान्तोर
(मर ११:१५-१९; लूका १९:४५-४८; युह २:१३-२२)
12येसु येरुसलेम मन्डिलितिगा हन्जुन मन्दिरतिगा डबुंगना लेन-देन किन्दुरक ओर सबोय लोकुरकुन बाहरो पसिहसितुर, अनि सोनो चान्दिता लेन-देन केवालोरा टेबलिनुंग अनि परेवा मोमवालोरा कुरसिनुंग मुळहिचितुर, 13“ ‘नावा लोन प्रार्थनाता लोन इन्दानुर’, मति निमाट ते अदेन ‘कलेरला पान्जा बनेहकिन्तोरिट’ ” इदाम कोटता मन्ता इन्जोर ओर ओरकुन इतुर#यश ५६:७; यिर ७:११। 14असके अन्दराह अनि लंगळाह मन्दिरतिगा ओना हेरे वातुरक, अनि येसु ओरकुन सुदरे कितुर। 15मति मुक्य याजक अनि मूसाना नियमतुन करिहवालोरक येसु किस मतोर ओद अत्भुत चमत्कारतुन अनि “दावुदनोर मरिन होशाना” इदाम मन्दिरता डुवारतिगा इन्दाना बालकिन हुळसुन ओरक होंग आतुरक। 16अनि ओरक येसुन पुच्चेमातुरक, “येरक बाताल इन्दिला आतोर निमा केन्जान्तोन#भज ८:२?” येसु ओरकुन इदाम उत्तर हितुर, “इंगो केन्जान्तोना
‘बालक अनि पाल उन्वालोर तानिहा बालकना टोडिताल निमा पकाय स्तुति कियाना तयारि कितोन’
इन्जोर बाताल पवित्र पुस्तकतिगा निमाट वाचे केविट” इन्जोर। 17असके येसु ओरकुन तासिस येरुसलेमता बाहरो बेथानिय्या नाटेनिगा हन्जुन नरका अगाय मतोर।
कायांग हादो ओद अन्जीर मरा
(मर ११:१२-१४; मर ११:२०-२४)
18वियान बेरा येसु येरुसलेम सहेरतिगा मलस हन्दानपा ओन करवस्तु। 19हरिता ओदा उन्दि अन्जीर मरा हुळस ओर ओद मराता हेरे हतुर, अनि आकिंग शिवाय अगा ओन बाराय हुळोर इन्जोर ओद मरातुन, “नेटाल नियागा असा कायांग बसकेय हादोंग आयनुंग” इन्जोर इतुर। असके अन्जीरता मरा सान्डेय वतितु। 20इद हुळसुन चेला लोकुरकुन आश्चरय आतुरक अनि ओरक, “इद अन्जीर मरा इचोन सान्डेय बदाम वतितु?” इन्जोर इतुरक। 21येसु ओरकुन, “निमाट शंका केविट विस्वास मन्ता ते इद अन्जीर मरातुन नना कितोना ओदे निमाट वने कियापरान्तोरिट। इचोने आयो मति इद मटातुन इगाडाल पसियस समुद्रदिगा हन्ज मुळन्दा इदाम इन्किट ते अदाम आयार इन्जोर नना मिकुन खरोय इन्तोना#मत्ति १७:२०; १ कुरि १३:२ । 22अनि निमाट प्रार्थनातिगा विस्वासते बाराय तलकिकिट ते ओद सबोय मिकुन पुटार” इन्जोर उत्तर हितुर।
यहुदि मुक्याल लोकुरक येसुना अदिकारतिगा शंका किन्तोरक
(मर ११:२७-३३; लूका २०:१-८)
23येसु येरुसलेम मन्दिरतिगा हन्जुन उपदेश हियाला आस मन्दुर असके मुक्याल याजक अनि यहुदि अदिकारिलोरक ओना हेरे वास, “निमा इद बुतो बोना अदिकारते किन्तोन? अनि निकुन इद अदिकार बोर हितोर?” इन्जोर ओन पुच्चेमातुरक। 24येसु ओरकुन उत्तर हितुर, “नना वने मिकुन उन्दि पोल्लो पुच्चेमान्तोना, ओद नाकुन वेहकिट ते इद बुतो बोद अदिकारते किन्तोना इन्जोर नना वने मिकुन वेहका। 25बपतिस्मा हियाना अदिकार परमेस्वर या मानेय युहन्नान हितुर?” असके ओरक वरोन दुसरोनासंग वळकिला लागतुरक; “परमेस्वर हितुर इदाम माक इन्काट ते ‘पजा निमाट ओना विस्वास बाक्या केवि आतिट?’ ओर माकुन पुच्चेमायनुर। 26अनि मानेय हितुर इन्काट ते माकुन भीळता वरे मन्ता, बाक्याकि ओरक सबोयलोर युहन्नान परमेस्वरना पोल्लो वेहवाल इदाम मानेमान्तोर” इन्जोर इन्तोरक। 27आकरिते ओरक येसुन, “माक पुनोम” इन्जोर उत्तर हितुरक। येसु वने ओरकुन, “इव बुतोंग बोद अदिकारते किन्तोना इन्जोर नना वने वेहोन” इदाम उत्तर हितुर।
इवुर मरकना पिटो
28येसु असा उन्दि पिटो वेहतुर, “निमाट बाताल विचार किन्तोरिट? वरोर मानेयतुन इवुर मरक मतोरक, ओर हजोर मरिना हेरे हन्जुन ‘हे नोना, नेन्ड अंगुरता बगिचातिगा बुतो किम’ इन्जोर इतुर। 29‘नना हनोन’ इन्जोर ओर उत्तर हितुर, मति पजा पस्तेमास ओर बगिचातिगा हतुर। 30पजा बाबो दुसरो मरिना हेरे हन्जुन इदामे इतुर ते ‘इंगो नना दान्तोना’ इन्जोर ओर उत्तर हितुर। मति ओर हनोर आतुर। 31येर इवुरासनिगाडाल बोर बाबोना इच्चा पुरा कितुर?” “हजोर मरि” इन्जोर ओरक इतुरक। येसु ओरकुन “टाक्स येतवाल अनि व्यभिचारि आसक मिया मुने परमेस्वरना राज्यतिगा दान्तोरक इन्जोर नना मिकुन खरोय इन्तोना। 32बाक्याकि बपतिस्मा हेवाल युहन्नाल मिकुन परमेस्वरना खरोय हरि तोहिलाय वातुर मति निमाट ओना विस्वास केवि आतिट, मति टाक्स येतवालोर अनि व्यभिचारि आसक ओना विस्वास कितुंग, अनि निमाट इद हुळतिट ते वने पजा पस्तेमायविट अनि ओना विस्वास केवि आतिट#लूका ३:१२; ७:२९-३० ।”
दुष्ट कास्तकारकना पिटो
(मर १२:१-१२; लूका २०:९-१९)
33येसु असा उन्दि पिटो वेहतुर, “असा उन्दि पिटो केन्जाट, वरोर लोनमालकाल मतोर, ओर अंगुरता बगिचा लावे कितुर, बगिचाता नालुंगास बासा वेटाळ बनेहकितुर, अगा अंगुरता जोमा बनेकियाना चक्कि गुमिया कातिस इरतुर अनि उन्दि केतुल वने बनेहकितुर, अनि कास्तकारकुन अदेना बुतोता ठेका हिस ओर दुसरो देशतिगा हतुर#यश ५:१-२। 34अनि अंगुरक पन्डाना बेरा हेरे वात असके ओर आपुनोर नोकर लोकुरकुन आपुना हिसा येतान साटि कास्तकारकना हेरे लोहतुर। 35मति कास्तकारक ओनोर नोकरकुन पयस बोने हाहतुरक, अनि वरोन हव्कतुरक, अनि दुसरोन कलदे हितुरक। 36पजा ओर मुनेटाल असा पकाय नोकर लोकुरकुन लोहतुर, अनि कास्तकारक लोकुरक ओरकुन वने अदामे कितुरक। 37आकरिते ओरक नावोर मरिना आदर कियानुरक इन्जोर ओर इतुर अनि ओर आपुनोर मरिन ओरा हेरे लोहतुर। 38मति कास्तकारक ओनोर मरिन हुळस, ‘येर ते वारिस आन्दुर, वाट, येन हव्कस वाटिट, पजा इद अंगुरता बगिचा माकुनेय आयार’ इदाम वरोन दुसरोन वळकिला लागतुरक। 39असके ओरक ओनोर मरिन पयतुरक अनि अंगुरता बगिचाता बाहरो पसिहिस हव्कस वाटतुरक। 40इन्जोर अंगुरता बगिचातोर मालकाल वायनुर असके ओरक कास्तकारकनासंग बाताल कियानुर?” 41ओरक येसुन इतुरक, “ओर ओरक खराब लोकुरकुन खराब रितिते नाश किस अंगुर कोयाना सिजनते अंगुरता बगिचाता ठेका दुसरो कास्तकारकुन हियानुर, ओरक अंगुर पन्डतपा ओना हिसा हियानुर।” 42येसु ओरकुन इतुर,
“ ‘लोन बनेहकेवालोर मिस्रीलोकुरक खराब मन्ता इन्जोर हरचिस मतोर अदे कलदुन पायवाता मुक्या कल आत,
इद प्रबुनिकेडाल आत अनि मावा नजरते अत्भुत मन्ता#भज ११८:२२-२३’
इदाम बाताल निमाट बसकेय पवित्र पुस्तकतिगा वाचे केविट बहे? 43इन्जोर परमेस्वरना राज्य मियाकेडाल येतानुर अनि ओद परमेस्वरना राज्यता अनुसार ताकवाल लोकुरकुन हियानुर इन्जोर नना मिकुन इन्तोना। 44अनि बोर-आयि अद कलपोरो अरानुर ओर तुकळेंग-तुकळेंग आयनुर अनि कल ओना पोरो अरार अनि ओर पेचकांग आयनुर” इन्जोर इतुर।
45ओना पिटोतुन मुक्याल याजक लोकुरक अनि परीसि लोकुरक केन्जुन येसु आपुना बारेते इन्तोर इन्जोर समजेमातुरक। 46अनि ओरक येसुन पयाना इच्चा कितुरक, मति लोकुरा भीळ ओन परमेस्वरना पोल्लो वेहवाल समजेमान्दुरक इन्जोर ओरक वरियतुरक।
Zvasarudzwa nguva ino
मत्ति 21: fmu
Sarudza vhesi
Pakurirana nevamwe
Yenzanisa
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© (Active) Wycliffe Bible Translators, Inc. All rights reserved.