مرقس 6
6
تَازّْڒن خ سِيذِيثْنغ عِيْسَى زݣ وبِيلَاج نّس
1يفّغ سّنِّي عِيْسَى يذْوڒ غَار ثْمُوْرْث نّس، ذْفَارن-ث يمحْضَارن نّس. 2نْهَار ن سّبْث ن لْعِبَادَا، ئِبْذَا يسڒْمَاذ ذِي ثمْزِيذَا نِّي. مَارَّا يِنِّي ذَاس يتْسْڒَان قِّيمن تْعجّْبن ذَايس نَّان: "مَانِي يُوْفَا مَانَايَا؟ مِين ثعْنَا ڒفْهَامث-أَ إِي ذَاس يمُّوْشن؟ مَامّش يݣَّا لْمُعْجِيزَاث-أَ إِݣ يوقْعن خ يفَاسّن نّس؟ 3مَا وَار يدْجِي شَا وَانِيتَا ذ اَنجَّار مِّيس ن مَرْيَم ؤُمَاس ن يَعْقُوْب ذ يُوْسِيس ذ يَهُوْذَا ذ سِمْعَان، سُوْيْثْمَاس اَقَاثنْت ذَانِيتَا اَكِذْنغ؟" خ مَانَاينِّي وَار ث قْبِيڒن شَا.
4ينَّا-ٱسن عِيْسَى: "نَّبي محْتَارم مَانِي مَا، وَلَكِن ذݣ وبِيلَاج نّس ذ ڒحْبَاب نّس ذ ثدَّارث نّس لَّا!" 5وَار يزمَّر شَا اَذ يݣّ ذِنِّي لْمُعْجِيزَا، غِير يحَاذَا ذْرُوْس ن يمهْڒَاش س يفَاسّن نّس يسْݣنْفَا-ثن. 6يتْعجّب ڒَاحقَّاش لإِيمَان نْسن ذ وقْلِيل. سّنِّي يݣُّوْر يسڒْمَاذ زِي دْشَار غَار دْشَار إِي ث يُوْذْسن ذِنِّي.
سِيذِيثْنغ عِيْسَى يسّكّ اَرُّسُل اَذ حدّْثن
7ئِڒَاغَا-د عِيْسَى خ ثنْعَاش ن اَرُّسُل يسّكّ-يثن ثْنَاين ثْنَاين، يُوْشَا-اَسن سُّلْطَا اَذ حكْمن خ جْنُوْن يعفَّانن. 8يوصَّا-ثن ينَّا-ٱسن: "وَار كِذْوم تَاوِيم وَالُو ذݣ وبْرِيذ، أَوِيم اَكِذْوم غِير اَعكَّاز. وَار كِذْوم تَاوِيم نِي اَغْرُوْم نِي اَقْرَاب نِي نّحَّاس ذݣ وحزَّام نْوم. 9ݣّث ثِسِيڒَا، وَار تݣّم شَا ثْنَاين ن يتْشَامِّيرن." 10ينَّا-ٱسن: "مَانِي مَا ثُوْذْفم غَار شَان ثدَّارْث، قِّيمم ذِنِّي اَڒ غَا ثُوْيُوْرم سّنِّي. 11مڒَا وَار كنِّيو قْبِيڒن شَا ذِي شَان ومْشَان نِغ وَار خْسن شَا اَغَارْوم صنّْطن، فّْغم سّنِّي مسْحث ثَعجَّاشْت زݣ يضَارن نْوم اَم شَا ن شْهَاذث خَاسن."
12كَّرن نِثْنِي رُوْحن تْحدَّاثن إِ يِوْذَان حمَا اَذ تُوْبن. 13سُوْفْغن اَطَّاس ن جْنُوْن، ذهْنن إِ وَاطَّاس ن يمهْڒَاش س زّشْت سْݣنْفَان-ثن.
ڒْموْث ن سِيذْنَا يَحْيَى
14أَزدْجِيذ هِيرُوْدُس يَارَّا-د ڒخْبَار خ مِين يتݣّ عِيْسَى مِينْزِي يسم نّس يذْوڒ مَعْرُوْف اَطَّاس. ذِنِّي شَان يِوْذَان قَّارن قَا وَانِيتَا يعْنِي ذ يَحْيَى نِّي، ئِتْوَاسكَّر-د نتَّا زِي ڒْموْث! س مَانَايَا إِي غَارس جّْهذ إِي زِي يتݣّ لْمُعْجِيزَاث-أَ.
15ئِجّن يقَّار لَّا قَا وَانِيتَا ذ نَّبِي نِّي إِلْيَاس.
ئِجّن يقَّار لَّا قَا وَانِيتَا ذ يجّن ن نَّبِي اَمشْنَاو يجّن زِي لْأَنْبِيَا نِّي يقْذِيمن.
16أَزدْجِيذ هِيرُوْدُس وَامِي يسْڒَا مَانَايَا، ينَّا قَا وَانِيتَا ذ يَحْيَى نِّي ؤُمِي قسّغ اَزدْجِيف، أَقَا يتْوَاسكَّر-د زِي ڒْموْث!
17-18 قْبڒ إِ مَانَايَا، أَزدْجِيذ-أَ هِيرُوْدُس يمْڒش اَك يِجّن ن ثمْغَارْث قَّارن-أَس هِيرُوْدِيَا. هِيرُوْدُس نتَّا ذ اَڒْوس ن هِيرُوْدِيَا. تُوْغَا نتَّاث قْبڒ ذ ثَمْغَارْث ن فِيلِيـپَّـاس. ئِسّكّ هِيرُوْدُس اَذ طّْفن يَحْيَى وَامِي تُوْغَا ذَاس يقَّار: حْرَام شك اَذ تَاوِيذ ثَمْغَارْث ن وُوْمَاش. ئِحبّس-يث ذِي ڒحْبس. 19هِيرُوْدِيَا ثنْضَر ذَايس ثِيطَّاوِين ثْرزُّو اَث تْنغ وَلَكِن وَار ثْزمَّر. 20مَايمِّي؟ ڒَاحقَّاش هِيرُوْدُس يتݣّْوذ زِي يَحْيَى. ئِسّن بلِّي نتَّا ذ يجّن ن ورْيَاز يدْجَا نِيشَان، ذ اَمْقدّس. ئِحمَّا-ث هِيرُوْدُس، ئِتعْجِيب-اَس خْمِي يتْحدَّاث وَلَكِن يتْغِيمَا يسْتْعجِّيب ذَايس اَطَّاس.
21ثُوْسَا-يَاس-د لْفُرْصَا إ هِيرُوْدِيَا وَامِي يݣَّا وزدْجِيذ هِيرُوْدُس ڒْعِيد لْمِيلَاد إِي يِخف نّس يݣَّا اَمنْسِي إِ يمقّْرَانن نّس ذ اَرُّوْيَاس ن ڒْعَسْكَار ذ يمقّْرَانن ن ثْمُوْرْث ن لْجَلِيل. 22ثُوْذف-د يدْجِيس ن هِيرُوْدِيَا ثشْضح، ئِعْجب-اَس ڒْحَاڒ إِ وزدْجِيذ ذ ينوْجِيْون نّس. ينَّا-ٱس وزدْجِيذ إِ ثْحنْجِيرْث نِّي: "تَّار-اَيِي مِين ثخْسذ، أَذَام ث ؤُشغ." 23ئِجُّوْدْج-اَس ينَّا-ٱس: "مِين ذَايِي غَا ثتَّارذ اَذَام ث ؤُشغ، وَاخَّا اَزْين ن لْممْلَكَا ينُو."
24ثفّغ ثنَّا-ٱس إِ يمَّاس: "مِين ذَاس غَا تَّارغ؟"
ثنَّا-ٱس يمَّاس: "رزُّوْغ اَزدْجِيف ن يَحْيَى."
25ڒخْدّنِّي ثذْوڒ ذغْيَا غَار ؤُزدْجِيذ، ثتَّار زَّايس ثنَّا-ٱس: "ڒخُّو خْسغ اَذَايِي ثُوْشذ ذَا اَزدْجِيف ن يَحْيَى خ سِّنِّيث!" 26ئِخيّق وزدْجِيذ اَطَّاس وَلَكِن يݣَّا-اَس اَرَّاي ڒَاحقَّاش يجُّودْج-اَس زَّاث إِ ينوْجِيْون نّس. 27ڒخْدّنِّي اَزدْجِيذ يسّكّ يج وعسَّاس غَار ڒحْبس، يُوْمَر-يث حمَا اَذ د يَاوِي اَزدْجِيف ن يَحْيَى. ئِرُوْح وعسَّاس نِّي يقسّ اَزدْجِيف ن يَحْيَى ذِي ڒحْبس. 28يُوْوِي-ث-يذ خ سِّنِّيث، يُوْشَا-اَس-ث إِ ثْحنْجِيرْث نِّي، ثَحنْجِيرْث نِّي ثُوْشَا-اَس-ث إِ يمَّاس. 29وَامِي سْڒِين يمحْضَارن ن يَحْيَى مَانَايَا، ؤُسِين-د يْسِين دَّات نّس ݣِّين-ت ذݣ ونْضڒ.
سِيذِيثْنغ عِيْسَى يسشّ خمْسَاڒَاف ن يرْيَازن
30مُوْنن اَرُّسُل اَك عِيْسَى عَاوْذن-اَس خ مَارَّا مِين ݣِّين ذ مَارَّا مِين سڒْمَاذن. 31أَطَّاس ن يِوْذَان تَاسن-د تْرَاحن. عِيْسَى ذ يمحْضَارن نّس وَار ؤُفِين ڒْوقْث وَاخَّا اَذ شّن. خ مَانَايَا ينَّا-ٱسن: "أَرَاحم-د وَاحذْوم غَار يجّن ن ومْشَان يخْڒَا اَذ تْريّْحم شْوَايت." 32رُوْحن وَاحذْسن ذِي ثْغَرَّابُوت غَار يجّن ن ومْشَان يخْڒَا. 33ࢲْرِين-ثن اَطَّاس ن يِوْذَان وَامِي ݣُّوْرن. عقْڒن-ثن فّْغن ذغْيَا زِي مَارَّا يبِيلَاجن نِّي تَازّْڒن مَارَّا ذِنِّي خ يضَارن، ئِزْوَارن-اَسن غَار ومْشَان نِّي. 34وَامِي د يضْرَا عِيْسَى زِي ثْغَرَّابُوت يُوْفَا ذِنِّي ڒْغَاشِي نِّي، قّْسن-اَس مِينْزِي ݣِّين اَمشْنَاو يحُورِّيْين وَار غَارْسن شَا ؤُو ثن غَا يَروْسن. ئِبْذَا يسڒْمَاذ-اَسن اَطَّاس ن ثْمسْڒَايِين.
35وَامِي يعْذُو ڒْحَاڒ، قَارّْبن غَارس يمحْضَارن نّس نَّان-اَس: "ڒْوقْث ثعْذُو، أَمْشَان-أَ ذ ڒخْڒَا وَاهَا. 36سكّ يوْذَان-أَ غَار ڒدْشُوْرَاث ذ ثُوْذْرِين يُوْذْسن بَاش اَذ د سْغن مِين غَا شّن."
37يَارَّا خَاسن عِيْسَى ينَّا-ٱسن: "ؤُشم-اَسن كنِّيو مِين غَا شّن."
نَّان-اَس: "مَا اَ نْرَاح نشِّين أَ د نْسغ اَغْرُوْم س مِيَّاتَاين ن ثْپيَّاسِين ن نُّقَارْث، أَذَاسن ث نُوْش اَذ شّن؟"
38ينَّا-ٱسن: "شْحَاڒ غَارْوم ن وغْرُوم؟ رُوْحث اَذ تخْزَرم."
رُوْحن ؤُفِين شْحَاڒ نَّان-اَس: "غَارْنغ خمْسَا ن ثْخبَّازِين ذ ثْنَاين ن يسڒْمَان."
39ئِكَّر عِيْسَى يُوْمَر-يثن حمَا اَثن سْغِيمن مَارَّا ذ لْفِرْقَاث خ اَرْبِيع اَزِيْزَا. 40ڒخْدّنِّي قِّيمن ذ لْفِرْقَاث خمْسِين خمْسِين، مِيَّا مِيَّا. 41ئِيْسِي خمْسَا نِّي ن ثْخبَّازِين ذ ثْنَاين نِّي ن يسڒْمَان ييْسِي ثِيطَّاوِين نّس غَار وجنَّا أُوشَا يشكَّر أَربِّـي. يرْزَا اَغْرُوْم نِّي يُوْشَا-اَسن-ث إِ يمحْضَارن نّس اَك ثْنَاين ن يسڒْمَان نِّي حمَا اَثن فرْقن خ يِوْذَان نِّي مَارَّا. 42شِّين جِّيوْنن مَارَّا. 43ڒخْدّنِّي يْسِين ثنْعَاش ن ثقْرَابِين عمَّرنْت س وغْرُوْم يشطّن اَك يسڒْمَان. 44لْعَدَد ن يِنِّي يشِّين اَغْرُوْم نِّي نِثْنِي خمْسَاڒَاف ن يرْيَازن.
سِيذِيثْنغ عِيْسَى يݣُّوْر خ ڒمْوَاج ن ڒبحَار
45ڒخْدّنِّي عِيْسَى يسْني يمحْضَارن نّس ذِي ثْغَرَّابُوت بَاش اَذ زْوَان غَار وجمَّاض-ين ن ڒبْحَر غَار وبِيلَاج ن بَيْت صَيْدَا، نتَّا يتمْسَافَاض خ ڒْغَاشِي. 46وَامِي خَاسن يمْسَافَاض، نتَّا يرُوْح غَار وذْرَار اَذ يࢲَّادْج. 47غَار ثْمدِّيث ثَغَرَّابُوت اَقَات ذِي ڒْوسْط ن ڒبْحَر، نتَّا اَقَاث ذِي ڒْبَرّ وَاحْذس. 48يࢲْرِي-ثن تْقدَّافن، تْعدَّابن مِينْزِي اَرِّيح يتْصُوْض-د زِي جِّهث نّغْنِي. عْڒَاين يقَارّب-د ڒفْجَر، ئِرُوْح عِيْسَى غَار يمحْضَارن نّس يݣُّوْر خ يضَارن خ وَامَان ن ڒبْحَر يخس اَثن يعْذُو. 49وَامِي ث ؤُفِين يݣُوْر خ يضَارن خ وَامَان ن ربْحَار، تْغِير-اَسن ذ ڒخْيَاڒ بْذَان سْنكَّرن ثْغُويِّيث. 50مَارَّا ࢲْرِين-ث ݣّْوْذن. وَلَكِن ذغْيَا ينَّا-ٱسن: "أَهْنَام! أَقَا ذ نش، وَار تݣّْوْذم شَا!" 51ئِنْيَا اَكِذْسن ذِي ثْغَرَّابُوت، يرْسَا اَرِّيح. تْعجّْبن اَطَّاس ذِي نّفْس نْسن 52مِيزِي تُوْغَا وَار فْهِيمن شَا لْمُعْجِيزَا نِّي ن وغْرُوْم، ؤُڒَاون نْسن تْوَاقْسْحن.
سِيذِيثْنغ عِيْسَى يسْݣنْفَا اَطَّاس ن يِوْذَان ذِي جْوَايه ن ݣَنِيسَارَت
53ئِࢲْوَا عِيْسَى ذ يمحْضَارن نّس ڒبْحَر، ؤُوْضن غَار ثْمُوْرْث ن ݣَنِيسَارَت قّْنن ذِنِّي ثَغَرَّابُوت. 54وَامِي ضْرِين زِي ثْغَرَّابُوت، ڒخْدّنِّي اَيثْبَاب ن ثْمُوْرْث نِّي عقْڒن عِيْسَى. 55تَازّْڒن-د زِي ثَمُوْرْث نِّي مَارَّا، بْذَان تَاوِين-د يمهْڒَاش خ ثَاسُّوْث غَار مَانِي سْڒِين يقِّيم نتَّا. 56مَانِي مَا يُوْذف غَار يبِيلَاجن نِغ غَار ثْندَّام نِغ غَار ڒْكَامْپَاوَاث، ئِوْذَان سْرُوْسَان يمهْڒَاش ذِي ڒسْوَاق. تتَّارن-اَس اَثن يجّ اَذ حَاذَان غِير طَّارْف ن وَارُّوض نّس. صَافِي مَارَّا يِنِّي ث يحَاذَان ݣنْفَان.
Zvasarudzwa nguva ino
مرقس 6: ريف
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda