لوقا 12
12
ثِيݣّْوْذِي زِي أَربِّـي
1ڒخدّْنِّي مُوْنن اَطَّاس ن ؤُڒُوْفَاث ن يِوذَان اَڒ وَامِي ذوْڒن عفّْسن خ وَايَاوْيَا. ئِبْذَا عِيْسَى يقَّار-اَسن إِ يمحْضَارن نّس: "حْضَام يخف نْوم زِي نِّفَاق ن ڒْحِزب ن يفَرِّيسِيْين يدْجَان اَم ونْتُوْن.#12.1 أَنْتُون نتَّا اَمْثُوْن. 2مَارَّا مِين يتْوَاسْنُوْفَّرن اَذ ينفْضح. مَارَّا مِين ينُوْفَّرن اَذ يتْوَاسّن. 3خ مَانَايَا، مَارَّا مِين ثقَّارم ذِي ثَادْجسْت اَذَاس تسْڒَان س ؤُزِيڒ. مَارَّا مِين ثقَّارم س ڒْحسّ غَار ذَاخڒ إِ يخَامّن، أَزَّايس تْعيَّاضن خ ثْزقَّا.
4أَذَاوم ينِيغ آي يمدُّوْكَاڒ ينُو: وَار تݣّْوْذم شَا زِي يِنِّي ينقّن دَّات وَاهَا وَار غَارْسن مِين غَا ݣّن كْتَار زِي مَانَاينِّي. 5لَّا، أَذَاوم ينِيغ وِي زِي غَا ثݣّْوْذم: ݣّْوْذث زِي ونِّي إِي غَا ينْغن دَّات نْوم منْبَعْد اَغَارس يِيڒِي جّْهذ بَاش اَذ يݣّ كْتَار، أَت ينْضَر ذِي جَهنَّمَا. وَاه، قَّارغ-اَوم: ونِّي ݣّْوْذم-ث. 6مَا وَار تْمنْزِين خمْسَا ن يزَاوْجِيون س ثْنَاين ن دُوْرُو؟ وَلَكِن أَربِّـي وَار يتتُّو ؤُڒَا ذ يجّن زَّايْسن. 7ؤُڒَا ذ يزُوْطَّان إِي غَارْوم خ وزدْجِيف نْوم يحْسب-يثن أَربِّـي مَارَّا. وَار تݣّْوْذم شَا. كنِّيو ثْسݣّْوَام كْتَار س وَاطَّاس خ يزَاوْجِيون.
8أَذَاوم ينِيغ: ونِّي زَّايِي غَا يشهْذن نش زَّاث إِ يِوْذَان، أَتَاف اَزَّايس شهْذغ نش مِّيس ن بْنَاذم زَّاث إِ لْمَلَائِكَاث ن أَربِّـي. 9ونِّي ذَايِي غَا ينْكَرن زَّاث إِ يِوْذَان، أَتَاف اَذ يتْوَانْكَر زَّاث إِ لْمَلَائِكَاث ن أَربِّـي. 10ونِّي غَا يِينِين شَان وَاوَاڒ وَار يحْڒِين خ مِّيس ن بْنَاذم اَتَاف اَخَاس يغْفَر. ونِّي غَا يِينِين شَان وَاوَاڒ وَار يحْڒِين خ أَرُّوْح يقدّْسن اَتَاف وَار خَاس يغفَّر شَا عمَّارْص.
11أَخْمِي كنِّيو غَا اَوِين غَار ثمْزِيذَاوِين ن أَيث-إِسْرَائِيل نِغ ذ لْحُكَّام ذ يمْخَازْنِيْين، بْڒَا مَا ٱذ تيْسِيم اَمْنُوْس ذِي ڒَعْقُوْڒَاث نْوم مِينْزِي غَا ثْدَافْعم خ يِيخف نْوم نِغ ذ مِين غَا ثِينِيم. 12مِينْزِي أَرُّوْح يقدّْسن اَذَاوم يُوْش مِين غَا ثِينِيم ذِي ثْسَعَّات نِّي."
ڒْمَعْنَا ن تَّاجَر نتَّا ذ اَفْغُوْڒ
13ينَّا-ٱس يجّن ن ورْيَاز زِي ڒْغَاشِي نِّي: "آ لْمُعَلِّم، إِن-اَس إِ وُوْمَا اَكِذِي يفْرق ڒْوَارْث."
14ينَّا-ٱس عِيْسَى: "آ بْنَاذم، وِي ذَايِي يݣِّين جَارَاوم ذ ڒْقَاضِي نِغ ذ ونِّي يفرْقن ڒْوَارْث؟" 15ينَّا-ٱسن: "حْضَام يخف نْوم، بعّْذث خ طّْمَع مِينْزِي ثُوْذَارْث ن بْنَاذم وَار تِيڒِي شَا س وَاطَّاس ن وَاݣْڒَا."
16ئِسِّيوڒ اَكِذْسن س يِجّن ن ڒْمَعْنَا ينَّا-ٱسن: "ئِجّن ن بْنَاذم ذ تَّاجَر ثَمُوْرْث نّس ثُوْرو-اَس اَطَّاس. 17ينَّا ذِي نّفْس نّس: وَار ؤُفِيغ بُو اَمْشَان مَانِي غَا خمّْڒغ ثَفدْجَاحْث-أَ، مِين غَا ݣّغ؟ 18ينَّا: أَذ هذْمغ يخزَّانن ينُو، أَذ بنِيغ ينّغْنِي ذ جْذِيذ ذ يمقّْرَانن خَاسن، أَذَايْسن خمّْڒغ مَارَّا ثَفدْجَاحْث ذ اَرْزق ينُو. 19أَذ ينِيغ إِ يِيخف ينُو: صَافِي، غَارِي اَطَّاس ن ڒْخِير إِي ذَايِي غَا يقِيدّن إِ وَاطَّاس ن يسݣّْوُسَا، أَذ قِّيمغ وَاهَا اَذ شّغ اَذ سْوغ اَذ فَرْحغ! 20وَلَكِن ينَّا-ٱس أَربِّـي: آي اَفْغُوْڒ! ؤُمِي ثْسوْجَاذذ مَانَايَا؟ ذِي دْجِيڒث-أَ ثَانِيتَا اَذ يتْوَافّغ بُوحْبڒ نّش. 21أَمنِّي إِي غَا يِيڒِي ونِّي يجمّْعن اَݣْڒَا إِ يِيخف نّس وَاهَا وَار يجمّع شَا إِ أَربِّـي."
وَار كسِّيم بُو س ومْنُوْس
22ينَّا-ٱسن عِيْسَى إِ يمحْضَارن نّس: "خ مَانَايَا اَذَاوم ينِيغ: وَار كسِّيم شَا س ومْنُوْس إِ ثُوْذَارْث نْوم عْلَاحْسَاب مِين غَا ثشّم نِغ ذ اَرُّوْض إِي غَا ثحْذَاجم إِ دَّات نْوم. 23مِينْزِي ثُوْذَارْث-أَ تْسݣّْوَا كْتَار زِي مَشَّا. دَّات-أَ تْسݣّْوَا كْتَار زݣ وَارُّوْض. 24خْزَارم غَار يبَاغرِيون. وَار زرّْعن، وَار مجَّارن. وَار غَارْسن ثِسْرَافِين ؤُڒَا ذ مَانِي غَا خزّْنن. ذ أَربِّـي إِي ذَاسن يتِيشّن اَذ شّن. كنِّيو، مَا وَار تْسݣّْوِيم شَا اَطَّاس س وَاطَّاس خ يِيجْضَاض؟ 25ؤُݣ يزمَّرن زَّايْوم أَذ يَرْنِي س ومْنُوْس نّس غِير ثْسَعَّات وَاهَا ذِي ڒْعُمُوْر نّس؟ 26مڒَا وَار ثْزمَّرم شَا ؤُڒَا إِ مِين يدْجَان ذ اَمزْيَان، مَايمِّي ثْكسِّيم اَمْنُوْس إِ شَا ن ڒْحَاجث نّغْنِي؟
27خْزَرث ذِي نْوَار ن ڒخْڒَا مَامّش يݣَّا، وَار يَربّڒ وَار يتْخيِّيض. قَّارغ-اَوم نش: ؤُڒَا ذ اَزدْجِيذ سُلِيمَان، مشْحَاڒ غَارس ذ اَݣْڒَا وَار يزمَّر شَا اَذ يَرض شَا ن وَارُّوْض يݣَّا اَم نْوَار-أَ وَانِيتَا. 28مڒَا أَربِّـي يتِيشّ اَرُّوْض زَعْمَا إِ اَرْبِيع ن ڒخْڒَا إِݣ يدْجَان نْهَارَا اَذ يحرق ثِيوشَّا ذݣ وفَارَّان، مَا وَار يتݣّ اَكِذْوم كنِّيو كْتار؟ ذَايْوم لإِيمَان نْوم ذ ؤُقْلِيل. 29وَار رزُّوْث شَا مِين غَا ثشّم نِغ ذ مِين غَا ثسْوم، وَار كسِّيث بُو س ومْنُوْس. 30مَارَّا مَانَايَا رزُّوْن-ث ڒݣْنُوْس ن دُّنشْت-أَ، كنِّيو بَابَاثْوم يسّن بلِّي تحْذَاجِيم ثِمسْڒَايِين-أَ. 31رزُّوث كنِّيو خ ڒْمُلْك ن أَربِّـي، سّنِّي ثِمسْڒَايِين-أَ اَذَاوم مَارْنِينْت. 32وَار تݣّْوْذم شَا آ ثْحِيمرْث ينُو ثَمزْيَانْت، يرْضَا بَابَاثْوم اَذَاوم يُوْش ڒْمُلْك نّس.
33زنْزث اَݣْڒَا نْوم، صدّْقم-ث. ݣّث ثِشمُّوْسِين ن تْمنْيَاث إِي وَار يفنِّين شَا نِثنْتِي ذ يجّن ن ڒْكنْز ذݣ وجنَّا وَار يقطِّين شَا. وَار يتْقَارِّيب شَا ذِنِّي وشفَّار، ثِكشَّاوِين وَار ث تتّنْت شَا. 34أَقَا مَانِي يدْجَا ڒْكنْز نْوم، ذِنِّي إِي غَا يِيڒِي وُوْڒ نْوم.
إِڒِيم ثوْجْذم خْمِي د غَا يذْوڒ سِيذِيثْنغ
35إِڒِيم ثوْجْذم ݣفّْضم، أَذ يڒِين ڒقْنَاذڒ نْوم شَعّْڒن. 36إِڒِيم ثْوجْذم اَم يوْذَان إِي تْرَاجَان سِيذِيثْسن اَذ د يذْوڒ زِي ڒْفَارْح، أَذ د يَاس اَذ يسْقرْقب اَذَاس رزْمن ذغْيَا. 37سَّعْذ ن يخدَّامن نِّي مڒَا يُوْسَا-د سِيذِيثْسن يُوْفِي-ثن عَاذ وَار طِّيصن شَا. أَقَا تسْڒَام ڒْحَقّ: أَذ يݣفّض سِيذِيثْسن اَثن يسْغِيم، أَذ يبْذَا يتْسخَّار خَاسن. 38مڒَا يُوْسَا-د يُوْفِي-ثن عَاذ وَار طِّيصن شَا وَاخَّا ذِي ڒْوسْط ن دْجِيڒث نِغ قْبڒ إِ ڒفْجَر، أَتَاف سَّعْذ ن يخدَّامن نِّي. 39ئِتْخصَّا-اَوم اَذ تسّْنم مَانَايَا: مْڒِي بَاب ن ثدَّارْث يسّن ثْسَعَّات إِي ذِي د غَا يَاس وشفَّار، إِڒِي وَار ث يتِيجِّي شَا اَذ د يَاذف ثَدَّارْث نّس. 40سْوجْذم يخف نْوم مِينْزِي مِّيس ن بْنَاذم اَذ د يَاس ذݣ يِجّن ن ثْسَعَّات وَار ث تْرِيجِيم شَا."
41ئِنْدق-د بُطْرُس ينَّا-ٱس: "آ سِيذِي، ڒْمَعْنَا-يَا مَا ثقَّارذ-ث غِير إِ نشِّين مَا إِ مَارَّا يوْذَان؟"
42يَارَّا خَاس سِيذِيثْنغ ينَّا-ٱس: "إِيوَا مِين يعْنَا ؤُوقَّاف نِّي يدْجَان ذ اَمِيغِيس ذَايس ڒَامَان؟ نتَّا ذ ونِّي إِݣ يتْكلَّاف سِيذس اَذَاسن يُوْش لْمَكْلَا إِ يخدَّامن نّس ذِي ڒْوقْث نِيشَان. 43سَّعْذ ن ؤُوقَّاف نِّي خْمِي د غَا يذْوڒ سِيذس اَث يَاف يخدّم. 44أَقَا تسْڒَام ڒْحَقّ: أَث يكلّف سِيذس خ مَارَّا اَݣْڒَا نّس. 45وَلَكِن اَوقَّاف نِّي مڒَا ينوَّا ذݣ يِيخف نّس يقَّار: سِيذِي يتْعطَّاڒ اَطَّاس وَار د يتِيس شَا، ثُمَّا اَذ يبْذَا يشَّاث يخدَّامن ذ ثْخدَّامِين يتتّ يسسّ اَقَاث اَك يسْكَايْرِيْين وَاهَا، 46أَتَاف اَذ د يَاس سِيذس ن ؤُوقَّاف نِّي ذݣ يِجّن ن نْهَار وَار ث ينوِّي شَا، ذݣ يِجّن ن ثْسَعَّات وَار ت يسِّين شَا. أَث يقسّ ذ يوزْوِيزن، أَث ينْضَر ذݣ ومْشَان نِّي ن يِنِّي إِي ذِي وَار يدْجِي شَا لإِيمَان.
47أَوقَّاف نِّي نتَّا يسّن مِين يرزُّو سِيذس وَلَكِن وَار يسوْجِيذ شَا إِ سِيذس وَار يتݣّ شَا مِين يرزُّو سِيذس، أَتَاف اَذ يتْوَاعَاقب اَطَّاس. 48ونِّي وَار يسِّينن شَا مِين يرزُّو سِيذس يتݣّ ثِمسْڒَايِين يسْذَاهْدْجن اَعْمُوْذ، أَتَاف اَذ يتْوَاعَقب ذْرُوْس وَاهَا. مَارَّا ونِّي ؤُمي يمُّوْش اَطَّاس، أَزَّايس رْزُوْن اَطَّاس. ونِّي إِݣ يتْوَاكلّْفن خ وَاطَّاس، أَزَّايس رْزُوْن اَطَّاس.
ئِوْذَان اَذ منْغن خ سَّبَاب ن سِيذِيثْنغ عِيْسَى
49ؤُسِيغ-د اَذ نْضَرغ يجّن ن ثْمسِّي يشمّْضن خ ثْمُوْرْث، أُو مشْحَاڒ تْمنِّيغ اَت اَفغ ڒخُّو ثْشعّڒ! 50ئِتْخصَّا-ٱيِي اَذ تْوَاعَدّْبغ، خيّْقغ اَطَّاس حتَّا اَڒ غَا عْذُوْغ مَانَاينِّي. 51مَا تْفكَّرم بلِّي ؤُسِيغ-د اَذ ݣّغ ڒهْنَا ذِي دُّنشْت-أَ؟ لَّا! أَذَاوم ينِيغ ؤُسِيغ-د اَذ ݣّغ اَمنْغِي. 52سَّا اَڒ ثْسَاونْت خمْسَا ن يِوْذَان اَذ منْغن اَك وَايَاوْيَا ذݣ يجّن ن ثدَّارْث: ثْڒَاثَا اَذ منْغن اَك ثْنَاين، ثْنَاين اَذ منْغن اَك ثْڒَاثَا. 53بَابَاس اَذ يمْنغ اَك مِّيس، مِّيس اَذ يمْنغ اَك بَابَاس. يمَّاس اَذ تمْنغ اَك يدْجِيس، يدْجِيس اَذ تمْنغ اَك يمَّاس. لَالَّا اَذ تمْنغ اَك ثسْڒِيث، ثَسْڒِيث اَذ تمْنغ اَك لَالَّاس."
لْعَلَامَاث ن زْمَان-أَ
54ينَّا-ٱسن عِيْسَى إِ ڒْغَاشِي نِّي: "مڒَا ثࢲْرِيم اَسيْنُو يݣَعّذ-د زِي ڒْغَرْب، ذغْيَا اَذ تِينِيم اَذ يِيڒِي ونْࢲَار. أُو ذ مَانَاينِّي إِي غَا يِيڒِين. 55مڒَا يصُوْض-د اَرِّيح زِي لْجَنُوب، أَذ تِينِيم اَذ يِيڒِي ڒحْمُو اَطَّاس. أُو ذ مَانَاينِّي إِي غَا يِيڒِين." 56ينَّا-ٱسن: "آ لْمُنَافِقِين! لْحَالَا ن وجنَّا ذ ثْمُوْرْث ثسّْنم اَثن تْشَرّْحم مَامش دْجَان. مَايمِّي وَار ثْزمَّرم شَا اَذ تْشَرّْحم لْحَالَا ن زْمَان-أَ إِي ذِي ندْجَا ڒخُّو؟"
مصْڒَاحث اَك يِوْذَان
57كنِّيو، مَايمِّي وَار تْميِّيزم شَا س يِيخف نْوم مِين يدْجَان ذ ڒْحَقّ؟ 58شُوْف، مڒَا يتْهم-يشك شَا حَدّ منْبَعْد ؤُوِين-اَش-د لْإِسْتِدْعَا حمَا اَكِذس ثْرَاحذ غَار لْمَحْكَامَا، عْذڒ اَكِذس ذغْيَا ذݣ وبْرِيذ بَاش وَار ش يسِيوِّيض شَا غَار ڒْقَاضِي، ڒْقَاضِي نِّي اَذ ئِأَمَر اَمْخَازْنِي، أمْخَازْنِي نِّي اَش ينْضَر ذِي ڒحْبس. 59نِّيغ-اَش: وَار سّنِّي د تفّْغذ شَا اَڒ غَا ثْخدْجْسذ فْرَانْك اَنݣَّارُو."
Zvasarudzwa nguva ino
لوقا 12: ريف
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda