Eksotus Nuarin-tas alupas 24.
Nuarin-tas alupas 24.
1 Et ahlaig vai Moses a Atua par aridjai an nedoon. 3 Era ika natimi eri amen igpa. 4 Et actaig natau a Moses, im noboatau et twelv. 6 Et ohan ja an tas etipup aien. 9 Et ehcohos natimi alupas u Atua. 14 Erau aminjinaig atimi a Eron im Hur. 15 Et aridjipan an nedoon a Moses, um amen eahki ira adiat et forte im nepig et forte.
1IS ika ehele Moses aien, Namu aridjipam ehele Ihova aiek, im Eron, im Netab, im Abaihu, im ilpu atimi alupas inyi sevente irai up Isreel; akumu atpuse itac acen aijaua um alaigaheni.
2Etmu apam ubutpotet ehele Ihova a Moses ache: ja erumu jim ham ubutpotet ara; erumu jim lep ahced yin natimi.
3Is apan a Moses um asuptecnaig ehele atimi intas asega u Ihova, im intas alep asega o un: eris ehratas natimi asega, um ika, Ecrupu ago nitai iji igki asega aijama is asaig a Ihova.
4Is aged intas asega u Ihova a Moses, um aiji an nuhihialeg, um actaig natau an neuhnise u nedoon, um aduwi inhat asjaaicnaig is twelv, is idivaig niji elcau is twelv u nup Isreel.
5Is abrai ilpu takuras irai up Isreel aien, mika eri ahlap ara irai iji itai ahlap er atnamud, um ahlap irai iji itai ahlap naaurinig vai Ihova, kurimatau marom.
6Is leh nahaijin ja a Moses, um ati irai ipjiitai; is lep ohaig nahaijin ja aien ijinies an natau.
7Is leh nitaasviitai aien is amen iran intas alep, um esvi an nuhup u atimi: eris um ika ara, Ecrupu ago nitai iji igki asega aijama is asaig a Ihova, um imiaiji.
8Is leh inja a Moses um ohaig ira atimi, um ika, Almoi inja vai intas etipup u Ihova is asaig ehelemia aien va nitai iji igki asega.
9Is aridjai a Moses, im Eron, im Netab, im Abaihu, im ilpu atimi alupas is sevente irai up Isreel:
10eris almoi Atua u nup Isreel ara: is amen ithan neduon nitai aiji iran, is idivaig nehledhat emilmat, um lep idivaig nohuun nohatag va naunau iran.
11Is eti atijai nikman irai ilpu atimi alupas u nup Isreel aien: eris lep almoi Atua ara, um hag um umwig.
12Is ika a Ihova ehele Moses, Namu aridjipam ehelek aiek an lolan nedoon, um amen: ekpu alupai euc inhat aged ainyak, kis aged intas iran ainyak, intas alep marom; va apu esege imi ra aiek.
13Is atidai a Moses, im lep Josua natimi atau imi yin: is aridjai a Moses an lolan nedoon u Atua.
14Is ika aien ehele ilpu atimi alupas, Akumu amen igcaki aijaua, um aitgaig napam unyimrau: erau lep amen ehelemia a Eron im Hur: el et merit vaig tah nitai tah natimi, etmu apan ehele rau aien.
15Is aridjai an nedoon a Moses, is lep ataluopni nedoon napat is ethi.
16Is amen natimi alupas u Ihova ijinies an nedoon Saine, is amen iran napat ira adiat is siks: ja is wat lahlah an nadiat sevend is ahlaig vai Moses aien an napat.
17Is idivaig incap esjilid natimi alupas u Ihova ijinies an lolan nedoon an nuhup u nup Isreel.
18Is apan an napat a Moses, um aridjai an lolan nedoon: is amen an lolan nedoon a Moses ira adiat is forte im nepig is forte.
Zvasarudzwa nguva ino
Eksotus Nuarin-tas alupas 24.: ABO
Sarudza vhesi
Sarudza zvinyorwa izvi
Yenzanisa
Pakurirana nevamwe
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
Aneityum Bible © Bible Society of the South Pacific, 2021
(Genesis to Esther - 1879 • Job to Malachi - 1878
• Matthew to Revelation - 1863)