Eksotus Nuarin-tas alupas 23.
Nuarin-tas alupas 23.
1 Intas alep vai hos tas im intas ahcil 3, 6. Vai neruvaig atoh. 4 Vai nedo aiheuc. 10 Vai yier atumop. 12 Vai nadiat atumop. 13 Vai nedo apat. 14 Vai nasjapicnaig et dri u atimi. 18 Vai inja irai itai im nagako u niji itai ahlap. 20 Et ika a Atua yi atau ira ra a Nagelo, uhpu asan tas acis yi alwai ra, el era atahaijeg intas o un ara.
1NAMU jim atupun intas ahcil aiek: um jim atau imi ilpu atimi auatatimi par asuptecnaig intas inig et eti atoh:
2um jim atau imi atimi et ahinag par ago nedo has; um jim atau imi atimi et ahinag, um asan tas ahcil, nau wit tas aiek vaig tah nitai:
3um jim atau imin tah nihkin natimi an nimiisjisitai o un.
4El et ehtet irai kurimatau u natimi tak atimi iram aiek, ka togke o un nahnag vaig, namu imiadumoij pan ehelen aiek.
5El et ecetai togke o un aiek et edemda vai euc aien nasjeuc vaig va nitai apos o un, jim udei yin, namu atau imi yin aiek.
6Etmu jim acalacal intas alep unyum aiek vai ilpu ihki atimi an nimiisjisitai ura.
7Namu amen itac acen aiek va nedo efaifa; um jim atgei ilpu atimi upene im ilpu atimi et atoh nedo ura: ekpu idim aru irai ilpu atimi auatatimi ainyak.
8Namu jim leh tah nitai tup ahtai aiek: et atapnes nesganimtai ilpu atimi arapakau nitai tup ahtai, um imiahnag intas alep u ilpu atimi upene.
9Namu jim ehcerucai nup urai taka uarin aiek: eka ato inliinmopoi nup urai taka uarin aijaua, akis idim atimi an taka uarin aijaua an pece Ijipt.
10Namu ahwai itai umam aiek irai yier inyi siks, um lep asjapicnaig nohwai itai iran:
11jam udei irai yier sevend, etmu asjeuc im ceigmeto; va erupu hegaig a ilpu ihki atimi ehelum: erupu lep caig nitai iji ig era udei ara niji itai eklim edo irai pece. Namu lep ago nedo inigki aiek vai nokoro vaine unyum, im nokoro oliv unyum.
12Namu ago nauritai unyum aiek ira adiat inyi siks, jam atumop an nadiat sevend: va etpu atumop kurimatau unyum, im togke unyum, um lep atumop a inhal u naheca atahig unyum, im nup urai taka uarin.
13Akumu aminjinaig nitai iji igki asega aijaua ek mun asaig ehelemia ainyak: um jim anvi nidai tah natmas, um jim tas vai ra.
14Uhmu eceseij asjapicnaig um hag vai nyak irai iji yier.
15Uhmu asjapicnaig um caig nareto et ti leven iran: namu caig nareto et ti leven iran aiek ira adiat inyi seven, et idivaig kis asaig ehelum ainyak, an nopan iyehki eris anvai an mohoc Ebib; as idim ahes Ijipt iran aiek: um jim apam tah an nuhup unyak um ti nitai o un:
16um asjapicnaig an nopan meto u itai, inhupnai an nauritai unyum, as ahwaig aiek an nobohtan: um asjapicnaig um hag an nopan asjapicnaig itai iran, an nilpun lidija, nau wit asjapicnaig nitai iji igki aiek as auritai vaig aiek an nobohtan.
17Erumu eceseij asjapicnaig an nuhup u Ihova Atua unyimia irai iji yier a ilpu atamaig asega unyimia.
18Namu jim ahlap an ja irai itai ahlap vai nyak yi tup ethi ache pan an nareto et amen leven iran; etmu jim amen nagako an nitai ahlap vai nyak um yetpan an nuhialeg.
19Uhmu imiapan an nimnim u Ihova Atua unyum inhupnai ohwai itai esjilid umam. Namu jim atho naklin nanin aiek an nidenided u risin.
20Ek idim abrai nagelo unyak ainyak mika yi uhup iram aien, par aminjinai euc an nefalaig, um imiapan euc an nuarin inig kis ago ainyak.
21Namu aktaktai yin aiek, um imiaiji intas o un, um jim auahas inliinmopon; etpu aru nedo has unyimia aien: et amen iran nidak.
22Ja el et imiaiji intas o un aiek, um ago nitai iji igki asega ek mun asaig ainyak; ekpu tak atimi ainyak irai ilpu atimi tak atimi iram, um amcel vai ra sji igki era amcel vai euc ara.
23Etpu apan a Nagelo unyak um uhup iram, um imiapan euc an pece u nup Emor, im nup u Hed, im nup u Piris, im nup u Kenan, im nup u Haivai, im nup u Jibus: ekpu idim auahas ra ainyak.
24Namu jim atpuse an nuhup u ilpu atmas ura aiek, um aheca ura, um jim ago nedo ura: namu auahas ra aiek, um ahtagrei niji atmasimai ura.
25Akumu aheca u Ihova Atua unyimia aijaua, etpu acis yi alwai nitai caig unyimia aien, im inwai unyimia; ekpu lep atipagki nemehe ehelemia ainyak.
26Inyi eti etjo inhal o un tah nitai, erupu ahad ara asega an pece unyum: ekpu lep ika ainyak yi ahinag nadiat iram.
27Ekpu ati nimtitai nyak ainyak an nuhup unyum, um auahas atimi asega napu apan ehele ra aiek, ekpu ika ainyak eri lep aha vai euc a ilpu atimi tak atimi iram asega.
28Ekpu abrai niji umehe ainyak mika eri uhup iram ara, um ahlo nup u Haivai, im nup u Kenan, im nup u Hed, an nuhup unyum.
29Inki eti ahlo ra ainyak an nuhup unyum irai yier inyi ethi; va yi jim amasacen inpece, um lep ahinag niji itai eklim edo irai pece aleg.
30Ekpu eklim ahlo ra ainyak an nuhup unyum, um imihum pan an nopan iyehki akupu ahinag aijaua, um ohuun inpece.
31Ekpu anvai nahaijin pece unyum ainyak, inyi ahes an Jap cap um yetpan an jap u nup u Filistia, etpu lep ahes an namasacen, um yetpan an nofowai: ekpu ikni nup uran pece an nikmam ainyak; namu ahlo ra aiek an nuhup unyum.
32Namu jim asan tas etipup ehele ra aiek, im lep ehele ilpu atmas ura.
33Erumu jim amen ara an pece unyum, va aki jim ago nedo has aijaua an nuhup unyak vai ra: el et aheca u ilpu atmas ura aiek, inyi itai oop euc nigki.
Zvasarudzwa nguva ino
Eksotus Nuarin-tas alupas 23.: ABO
Sarudza vhesi
Sarudza zvinyorwa izvi
Yenzanisa
Pakurirana nevamwe
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
Aneityum Bible © Bible Society of the South Pacific, 2021
(Genesis to Esther - 1879 • Job to Malachi - 1878
• Matthew to Revelation - 1863)