Eksotus Nuarin-tas alupas 19.
Nuarin-tas alupas 19.
1 Era yetpam. Saine natimi. 3 Intas alep u Atua ahes an nedoon irai Moses ehele atimi. 8 Et asaig ehele Atua a Moses intas inig era asaig natimi. 10 Era amatata natimi va nadiat dirt. 12 Et itap par ubli nedoon. 16 Et ehcohos a Atua an nedoon ja er imtitaig alupas vaig.
1ERIS ahes Ijipt a nup Isreel, um atga ura, ja is wat ti pan itac inmohoc is eseij, eris yetpan an namasacen Saine ara an nadiat iyehki.
2Eris ahes Refitim ara, um atga ura, um yetpan an namasacen Saine, um atumop an namasacen; eris atumop a nup Isreel ubutpotet pan u nedoon.
3Is aridjai a Moses ehele Atua; is ahlaig vai yin a Ihova an lolan nedoon, um ika, Namu tas aiek ehele ilpu mapoi Jekob, um asuptecnaig ehele nup Isreel, um ika,
4Akis almoi nedo unyak aijaua vai nup Ijipt, kis apos caua ainyak et idivaig ijinies irai ehpai meijcop alupas, um imiapam caua ehelek.
5El eka imiaiji intas unyak aijaua, um apos intas etipup unyak, akupu ilpu halav cap unyak aijaua, um esjilid ira atimi asega: ek idim ohuun nobohtan asega ainyak:
6akupu ilpu atimi ahlap unyak aijaua, im ilpu atimi upene unyak. Namu asaig ehele nup Isreel aiek intas iji igki.
7Is apan a Moses, um asjapicnaig ilpu atimi alupas, um asuptecnaig an nuhup ura intas iji igki asega is asaig ehelen a Ihova.
8Eris ehratas natimi asega, um ika, Ecrupu ago nedo asega inig aijama is asaig a Ihova. Is lep imiapan intas o atimi ehele Ihova a Moses.
9Is ika a Ihova, ehele Moses, Ekpu idim ham ehelum ainyak an napat epig, va erupu atahaijeg natimi, eku wit tas ehelum ainyak, um imiisjis ninveijec intas unyum irai iji mesese. Is asuptecnaig intas o atimi ehele Ihova a Moses.
10Is ika a Ihova ehele Moses, Namu apan ehele atimi aiek, um ago itap ra inpig im imraig, erumu lep yiri apelumai ura ara,
11um yecrei ra vaig vid: ekpu asuolse ainyak Ihova an nedoon Saine vid an nuhup u atimi asega.
12Namu ikni itai asjaaicnaig aiek, um arehed an nedoon va atimi, um ika, Akumu aktaktai aijaua, um jim aridjipam an nedoon, um jim ubli nahaijin: uhmu idim auahas yin et ubli aien:
13el et ubli an nikman tah, uhmu idim asji yin irai hat, ka ahcai yin; inyi eti umoh aien, kit nitai eklim edo irai pece, ka natimi: uhu wit ahlai intoho um itu, erumu ham ara an nedoon.
14Is ahes an lolan nedoon a Moses um asuolse ehele atimi, um ago itap atimi; eris lep yiri apelumai ura ara.
15Is lep ika aien ehele atimi, Akumu yecrei caua aijaua vaig vid: um jim amen ehele ehgamia.
16Is wat ti apan itac nadiat is eseij um lahlah an nuhialeg, is atciteuc inmunuka, um lep eteuc nauwainapit, im napat epig ijinies an nedoon, im lep nohran toho ijinies acen; eris eucjeucjeucaij natimi asega an nuarin amen ura.
17Is imiapan itac atimi a Moses an nuarin amen ura par aubilid Atua; eris aiji ara an neuhnise u nedoon.
18Is ataluopni nedoon Saine nadran cap, is idim asuolse iran a Ihova an cap: is aridjai nadran cap is idivaig nadrai suata, is amaamai alupas nedoon asega.
19Eris ahlai intoho is itu, um ijinies acen, ja is tas a Moses, is lep tas ehelen a Atua an nohran.
20Is asuolse an lolan nedoon Saine a Ihova, ijinies an lolan nedoon marom: is ika a Ihova ehele Moses yi aridjai ijinies an lolan nedoon aien; is aridjai a Moses.
21Is ika a Ihova ehele Moses, Namu asuolse aiek um acaiji atimi, va eri jim imiisjis ara um algaunyi pam ehelek Ihova par almoi, um emesmas natimi inyi ahinag ira ra.
22Erumu lep ago adicinadicin ra a ilpu atimi ahlap era apan ubutpotet ehele Ihova ara, vai ki jim auahas ra ainyak Ihova.
23Is ika a Moses ehele Ihova, Et ehka va atimi naridjipam vaig an lolan nedoon Saine: as asaig ehelema aiek, eri ikni itai asjaaicnaig an nedoon um arehed, mika yi itap.
24Is ika ehelen a Ihova, Atga unyum aiek, um asuolse, ja par lep aridjipam aiek im Eron: ja erumu jim imiisjis a ilpu atimi ahlap im tup atimi, um algaunyi nirahed, um aridjipam ehelek Ihova, vai ki jim auahas ra ainyak.
25Is asuolse a Moses ehele atimi, um tas ehele ra.
Zvasarudzwa nguva ino
Eksotus Nuarin-tas alupas 19.: ABO
Sarudza vhesi
Sarudza zvinyorwa izvi
Yenzanisa
Pakurirana nevamwe
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
Aneityum Bible © Bible Society of the South Pacific, 2021
(Genesis to Esther - 1879 • Job to Malachi - 1878
• Matthew to Revelation - 1863)