LUKAS 6
6
Itun Ratnan Aco Luk Inan Mudeng
(Mat 12.1–8; Mrk 2.23–28)
1 #
Bad 23.25
Kareb Aco luk inan Mudeng idi Yésus nenalan lemaba lati'-lati', idi anak-anak sekola'Neh pana' nengalap runguh padé, idi nengugut ineh idi nekuman. 2Iamo' kebala tuda'-tuda' burur lun Parisi, “Ngudehké muyuh nganau' luk bibpeng kareb Aco luk inan Mudeng?”
3 #
1 Sem 21.1–6
Kebala Yésus nedeh, “Naké muyuh nemaca' luk inau' Daud kareb ieh melau idi amung lun denganneh pana'? 4#Uk 24.9 Ieh numak bang ruma' Allah, idi nengalap ruti luk biré kuan Allah. Idi ieh nekuman, idi nemaré nelun denganneh teh, luk bibpeng na miak kenen, iamo' luk miak kenen lun imam mo'?”
5Idi Yésus nepebala nedeh, “Anak-Lemulun ineh Tuhan pa luun Aco luk inan Mudeng ineh.”
Seburur Lun Luk Naté Ticu' Selipa
(Mat 12.9–14; Mrk 3.1–6)
6Idi kareb Aco luk inan Mudeng luk baken, Yésus numak bang ruma' sembayang idi nemada'; idi déi' inan selemulun luk naté ticu'neh pa tinueh. 7Idi guru-guru Ukum idi lun Parisi pana' nenier kudeng Ieh ngedo' lemulun ineh bang Aco luk inan Mudeng, pad ideh miak kali' dalan ngadu' Neneh. 8Iamo' Ieh sebuleng nekali' terawédeh, idi Ieh nepebala kuan lemulun luk naté ticu' ineh, “Mudur iko idi tuped pa atun.” Idi ieh nudur idi netuped déi'. 9Idi kebala Yésus nedeh, “Ui ngitun nemuyuh: Maya' ukum tau, anunké luk miak ruen bang Aco luk inan Mudeng? Ngedengan kian ngurat? Ngulun kian ngaté?” 10Idi Yésus nenier amung-amungdeh, kebalaNeh, “Natang ticu'mu!” Idi ieh nenganau' kudeng ineh, idi ticu'neh nedo'.
11Idi amungdeh ineh pelaba gateh. Idi ideh nepegayam arangdeh sebuleng, ratnan anun luk miak ruendeh kuan Yésus.
Yésus Mili' Pulu' Dueh Anak Sekola'Neh
(Mat 10.1–4; Mrk 3.13–19)
12Kareb ineh teh Yésus neremuat iné' luun pegkung sikal sembayang; idi kedangan-kedangan ineh Ieh sembayang inan Allah. 13Kareb aco pangeh macang Ieh nenawar anak-anak sekola'Neh, idi Ieh nemili' rat arangdeh pulu' dueh burur, luk titenNeh rasul-rasul, 14ieh ineh Simun luk titenNeh Pétrus idi kinanakneh Andrias; Yakub, Yahya, Pilipus, Bartolomius, 15Matius, Tomas, Yakub Alpius, Simun, lun Selot,#6.15 Selot, ieh ineh aceh pati luk sikul metueh ratnan imet Rum. 16Yudas Yakub, idi Yudas Iskariot luk mangun ku lemulun luk masui Neneh.
Yésus Mada' Idi Ngedo' Lemulun Luk Mét
(Mat 4.23–25)
17Yésus netemurun maya' nedeh, idi Ieh netuped su luk meraked, dengan tuda'-tuda' ula' anak sekola'Neh. Idi lun mula' nacing rat Yudia, Yerusalim, idi rat tangeb abpa' rayeh luk muneng ku Sur idi Sidon. Ideh nacing sikal ninger bala Yésus pad ideh uen ngedo' ratnan étdeh. 18Idi lemulun luk sinuet ada' pana' dino'Neh. 19Amung lemulun pian ngakem Neneh, ngaceku inan lalud luk neremuat rat Neneh, pad amungdeh nedo' inau'Neh.
Awang Idi Susa'
(Mat 5.1–12)
20Yésus nenier anak-anak sekola'Neh idi nepebala,
“Samal kuan muyuh luk masi';
ngaceku muyuh luk kuan Imet Allah.
21“Samal kuan muyuh luk melau nekini;
ngaceku muyuh miak uen ngebor.
“Samal kuan muyuh luk nangi' nekini;
ngaceku muyuh miak meriruh.
22 #
1 Pét 4.14
“Samal kuan muyuh kareb lemulun megateh nemuyuh, idi ngatad nemuyuh rat arangdeh, idi ngedat nemuyuh idi ngesala' nemuyuh, ngaceku ratnan Anak-Lemulun. 23#2 In 36.16; Kek 7.52 Do' muyuh mawang niat idi sikau'-sikau' ku awang niat muyuh kareb aco ineh; ngaceku rayeh tabpar muyuh déi' surga. Ngaceku kudeng ineh teh luk inau' tepundeh.
24“Iamo' mesusa' kuan muyuh luk lun do' nekini;
ngaceku muyuh do' udeng bang tana' ini!
25“Mesusa' kuan muyuh luk mebor nekini;
ngaceku muyuh melau muci!
“Mesusa' kuan muyuh luk meriruh nekini;
ngaceku muyuh temido idi nangi' muci!
26“Mesusa' kuan muyuh kareb muyuh buren amung-amung lemulun, ngaceku kudeng ineh teh luk inau' tepundeh kuan nabi-nabi luk mebalih.”
Mawa Inan Bunu'
(Mat 5.38–48; 7.12a)
27“Iamo' Ui pebala kuan muyuh ini luk ninger balaKu: Mawa inan bunu' muyuh, idi nganau' luk do' kuan amung lemulun luk megateh nemuyuh, 28mutuh peruan kuan lemulun luk ngediman nemuyuh, idi sembayang kuan lemulun luk ngedat nemuyuh. 29Kudeng lemulun mepag pingitmu selipa, maré teh kuanneh pingitmu selipa. Idi lemulun luk sikal ngalap kuyu'mu, aleg ngibpeng neneh ngalap kuyu' boyormu teh. 30Maré kuan anid-anid lemulun luk mutuh namu; idi kudeng lemulun ngalap anun-anun luk rat namu pana', aleg mutuh lemubed teh. 31#Mat 7.12 Idi mepad kudeng muyuh sikal ruen lun baken kuan muyuh, do' muyuh nganau' kudeng ineh kuandeh teh.
32“Kudeng muyuh mawa inan lemulun luk mawa nemuyuh, anunké tabpar muyuh? Lun mesala' pana' mawa kuan lemulun luk mawa nedeh! 33Kudeng muyuh nganau' luk do' kuan lemulun luk nganau' luk do' kuan muyuh mo', anunké tabpar muyuh teh? Lun mesala' pana' nganau' kudeng ineh teh. 34Kudeng muyuh maré luk kebiten lemulun, merapet miak ngalap lemubed rat neneh, anunké tabpar muyuh teh? Lun mesala' pana' maré luk kebiten kuan lun mesala', merapet miak ngalap lemubed mepad kinula'neh. 35Na! Do' muyuh mawa inan bunu' muyuh idi nganau' luk do' kuandeh, idi maré luk kebiten dengan na merapet miak ngalap lemubed. Idi muyuh miak ngalap tabpar luk rayeh, pad muyuh mangun ku anak-anak Allah luk Meluun Dita'. Ngaceku Ieh mawa kuan lemulun na maré ubur idi luk dat pana'. 36Do' muyuh méi' nelun mepad kudeng Taman muyuh pana' méi nemuyuh.
Ratnan Ngesala' Nelun
(Mat 7.1–5)
37“Aleg muyuh ngesala' nelun, pad muyuh na miak uen Allah ngesala; idi aleg ngukum seburur lemulun, pad muyuh na miak kumin Allah; do' muyuh maré do', pad Allah maré do' nemuyuh. 38Do' muyuh maré kuan lun baken, idi muyuh miak inan Allah maré teh, maya' aceh uad luk matu. Muyuh ngalap luk uen netel, idi uen ngat-ngat pad macing mela, idi luk barén bang paladmu. Ngaceku dengan uad luk muyuh nguad, miak uen nguad kuan muyuh teh.”
39 #
Mat 15.14
Idi Yésus nemada' kuandeh aceh luk pinginud teh, kebalaNeh, “Miakké lun mebuser nguyut lun mebuser? Naké didueh ineh mebpeh bang lubang? 40#Mat 10.24–25; Yah 13.16; 15.20 Seburur anak sekola' na meluun rayeh ratnan guruneh; iamo' anid-anid anak sekola' luk pangeh petap sibada' ineh miak mangun mepad kudeng guruneh teh.
41“Ngudehké iko nier mumuk kayuh luk bang mateh kinanakmu ineh, iamo' na kali' mu batang luk bang matehmu sebuleng? 42Kudeng apehké iko miak mala kuan kinanakmu ineh, ‘O kinanak, nima' negku ngeruat mumuk kayuh rat bang matehmu,’ ngaceku iko na nier batang luk bang matehmu sebuleng? O lun luk siayu, ngeruat batang rat bang matehmu sebuleng atun, idi muci iko miak nier megala' pad miak ngeruat mumuk kayuh luk bang mateh kinanakmu ineh.”
Aceh Lawa Kayuh Idi Bua'neh
(Mat 7.16–20; 12.33–35)
43“Ngaceku na luk idi lawa kayuh luk do', luk ngeruat bua' luk dat, idi lawa kayuh luk dat, luk ngeruat bu'a luk do'. 44#Mat 12.33 Anid-anid lawa kayuh miak uen ngiti ratnan bua'deh sebuleng, ngaceku ratnan lawa tabpa' na miak lemulun mureg bua' gita', idi ratnan apet tabpa' na lemulun mureg bua' anggur. 45#Mat 12.34 Lemulun luk do' ngeruat anun-anun luk do' ratnan binaweh niat luk do', idi lemulun luk dat ngeruat luk dat ratnan binaweh luk dat, ngaceku ela ratnan niat lemaba bibir tangneh.”
Dueh Burur Lemulun Luk Mudut Ruma'
(Mat 7.24–27)
46“Ngudehké muyuh nawar Negku, ‘Tuhan, Tuhan,’ iamo' na muyuh maya' luk bilaKu? 47Anid-anid lemulun luk macing Negku, luk ninger balaKu idi maya' ineh, Ui sikal mada' kuan muyuh kudeng apeh ayuneh. 48Ieh ineh mepad kudeng seburur lemulun luk mudut ruma' idi nengukat macing medalem, idi ieh nenganau'diri luun batu. Kareb abpa' temubu' idi awer abpa' nengeduyung ruma' ineh, na ieh miak megio, ngaceku kekamen ineh meraben. 49Iamo' lemulun luk pangeh neninger dengan na maya', ieh ineh mepad kudeng seburur lemulun luk mudut ruma'neh luun tana' dengan na tapin; idi awer abpa' pana' nengeduyung ruma' ineh, idi petacu ieh neluka', idi luka'neh pelaba bura'.”
Zvasarudzwa nguva ino
LUKAS 6: BLD
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
BALA LUK DO' Lun Bawang Bible © The Bible Society of Malaysia 1982, Second Edition 1998.
LUKAS 6
6
Itun Ratnan Aco Luk Inan Mudeng
(Mat 12.1–8; Mrk 2.23–28)
1 #
Bad 23.25
Kareb Aco luk inan Mudeng idi Yésus nenalan lemaba lati'-lati', idi anak-anak sekola'Neh pana' nengalap runguh padé, idi nengugut ineh idi nekuman. 2Iamo' kebala tuda'-tuda' burur lun Parisi, “Ngudehké muyuh nganau' luk bibpeng kareb Aco luk inan Mudeng?”
3 #
1 Sem 21.1–6
Kebala Yésus nedeh, “Naké muyuh nemaca' luk inau' Daud kareb ieh melau idi amung lun denganneh pana'? 4#Uk 24.9 Ieh numak bang ruma' Allah, idi nengalap ruti luk biré kuan Allah. Idi ieh nekuman, idi nemaré nelun denganneh teh, luk bibpeng na miak kenen, iamo' luk miak kenen lun imam mo'?”
5Idi Yésus nepebala nedeh, “Anak-Lemulun ineh Tuhan pa luun Aco luk inan Mudeng ineh.”
Seburur Lun Luk Naté Ticu' Selipa
(Mat 12.9–14; Mrk 3.1–6)
6Idi kareb Aco luk inan Mudeng luk baken, Yésus numak bang ruma' sembayang idi nemada'; idi déi' inan selemulun luk naté ticu'neh pa tinueh. 7Idi guru-guru Ukum idi lun Parisi pana' nenier kudeng Ieh ngedo' lemulun ineh bang Aco luk inan Mudeng, pad ideh miak kali' dalan ngadu' Neneh. 8Iamo' Ieh sebuleng nekali' terawédeh, idi Ieh nepebala kuan lemulun luk naté ticu' ineh, “Mudur iko idi tuped pa atun.” Idi ieh nudur idi netuped déi'. 9Idi kebala Yésus nedeh, “Ui ngitun nemuyuh: Maya' ukum tau, anunké luk miak ruen bang Aco luk inan Mudeng? Ngedengan kian ngurat? Ngulun kian ngaté?” 10Idi Yésus nenier amung-amungdeh, kebalaNeh, “Natang ticu'mu!” Idi ieh nenganau' kudeng ineh, idi ticu'neh nedo'.
11Idi amungdeh ineh pelaba gateh. Idi ideh nepegayam arangdeh sebuleng, ratnan anun luk miak ruendeh kuan Yésus.
Yésus Mili' Pulu' Dueh Anak Sekola'Neh
(Mat 10.1–4; Mrk 3.13–19)
12Kareb ineh teh Yésus neremuat iné' luun pegkung sikal sembayang; idi kedangan-kedangan ineh Ieh sembayang inan Allah. 13Kareb aco pangeh macang Ieh nenawar anak-anak sekola'Neh, idi Ieh nemili' rat arangdeh pulu' dueh burur, luk titenNeh rasul-rasul, 14ieh ineh Simun luk titenNeh Pétrus idi kinanakneh Andrias; Yakub, Yahya, Pilipus, Bartolomius, 15Matius, Tomas, Yakub Alpius, Simun, lun Selot,#6.15 Selot, ieh ineh aceh pati luk sikul metueh ratnan imet Rum. 16Yudas Yakub, idi Yudas Iskariot luk mangun ku lemulun luk masui Neneh.
Yésus Mada' Idi Ngedo' Lemulun Luk Mét
(Mat 4.23–25)
17Yésus netemurun maya' nedeh, idi Ieh netuped su luk meraked, dengan tuda'-tuda' ula' anak sekola'Neh. Idi lun mula' nacing rat Yudia, Yerusalim, idi rat tangeb abpa' rayeh luk muneng ku Sur idi Sidon. Ideh nacing sikal ninger bala Yésus pad ideh uen ngedo' ratnan étdeh. 18Idi lemulun luk sinuet ada' pana' dino'Neh. 19Amung lemulun pian ngakem Neneh, ngaceku inan lalud luk neremuat rat Neneh, pad amungdeh nedo' inau'Neh.
Awang Idi Susa'
(Mat 5.1–12)
20Yésus nenier anak-anak sekola'Neh idi nepebala,
“Samal kuan muyuh luk masi';
ngaceku muyuh luk kuan Imet Allah.
21“Samal kuan muyuh luk melau nekini;
ngaceku muyuh miak uen ngebor.
“Samal kuan muyuh luk nangi' nekini;
ngaceku muyuh miak meriruh.
22 #
1 Pét 4.14
“Samal kuan muyuh kareb lemulun megateh nemuyuh, idi ngatad nemuyuh rat arangdeh, idi ngedat nemuyuh idi ngesala' nemuyuh, ngaceku ratnan Anak-Lemulun. 23#2 In 36.16; Kek 7.52 Do' muyuh mawang niat idi sikau'-sikau' ku awang niat muyuh kareb aco ineh; ngaceku rayeh tabpar muyuh déi' surga. Ngaceku kudeng ineh teh luk inau' tepundeh.
24“Iamo' mesusa' kuan muyuh luk lun do' nekini;
ngaceku muyuh do' udeng bang tana' ini!
25“Mesusa' kuan muyuh luk mebor nekini;
ngaceku muyuh melau muci!
“Mesusa' kuan muyuh luk meriruh nekini;
ngaceku muyuh temido idi nangi' muci!
26“Mesusa' kuan muyuh kareb muyuh buren amung-amung lemulun, ngaceku kudeng ineh teh luk inau' tepundeh kuan nabi-nabi luk mebalih.”
Mawa Inan Bunu'
(Mat 5.38–48; 7.12a)
27“Iamo' Ui pebala kuan muyuh ini luk ninger balaKu: Mawa inan bunu' muyuh, idi nganau' luk do' kuan amung lemulun luk megateh nemuyuh, 28mutuh peruan kuan lemulun luk ngediman nemuyuh, idi sembayang kuan lemulun luk ngedat nemuyuh. 29Kudeng lemulun mepag pingitmu selipa, maré teh kuanneh pingitmu selipa. Idi lemulun luk sikal ngalap kuyu'mu, aleg ngibpeng neneh ngalap kuyu' boyormu teh. 30Maré kuan anid-anid lemulun luk mutuh namu; idi kudeng lemulun ngalap anun-anun luk rat namu pana', aleg mutuh lemubed teh. 31#Mat 7.12 Idi mepad kudeng muyuh sikal ruen lun baken kuan muyuh, do' muyuh nganau' kudeng ineh kuandeh teh.
32“Kudeng muyuh mawa inan lemulun luk mawa nemuyuh, anunké tabpar muyuh? Lun mesala' pana' mawa kuan lemulun luk mawa nedeh! 33Kudeng muyuh nganau' luk do' kuan lemulun luk nganau' luk do' kuan muyuh mo', anunké tabpar muyuh teh? Lun mesala' pana' nganau' kudeng ineh teh. 34Kudeng muyuh maré luk kebiten lemulun, merapet miak ngalap lemubed rat neneh, anunké tabpar muyuh teh? Lun mesala' pana' maré luk kebiten kuan lun mesala', merapet miak ngalap lemubed mepad kinula'neh. 35Na! Do' muyuh mawa inan bunu' muyuh idi nganau' luk do' kuandeh, idi maré luk kebiten dengan na merapet miak ngalap lemubed. Idi muyuh miak ngalap tabpar luk rayeh, pad muyuh mangun ku anak-anak Allah luk Meluun Dita'. Ngaceku Ieh mawa kuan lemulun na maré ubur idi luk dat pana'. 36Do' muyuh méi' nelun mepad kudeng Taman muyuh pana' méi nemuyuh.
Ratnan Ngesala' Nelun
(Mat 7.1–5)
37“Aleg muyuh ngesala' nelun, pad muyuh na miak uen Allah ngesala; idi aleg ngukum seburur lemulun, pad muyuh na miak kumin Allah; do' muyuh maré do', pad Allah maré do' nemuyuh. 38Do' muyuh maré kuan lun baken, idi muyuh miak inan Allah maré teh, maya' aceh uad luk matu. Muyuh ngalap luk uen netel, idi uen ngat-ngat pad macing mela, idi luk barén bang paladmu. Ngaceku dengan uad luk muyuh nguad, miak uen nguad kuan muyuh teh.”
39 #
Mat 15.14
Idi Yésus nemada' kuandeh aceh luk pinginud teh, kebalaNeh, “Miakké lun mebuser nguyut lun mebuser? Naké didueh ineh mebpeh bang lubang? 40#Mat 10.24–25; Yah 13.16; 15.20 Seburur anak sekola' na meluun rayeh ratnan guruneh; iamo' anid-anid anak sekola' luk pangeh petap sibada' ineh miak mangun mepad kudeng guruneh teh.
41“Ngudehké iko nier mumuk kayuh luk bang mateh kinanakmu ineh, iamo' na kali' mu batang luk bang matehmu sebuleng? 42Kudeng apehké iko miak mala kuan kinanakmu ineh, ‘O kinanak, nima' negku ngeruat mumuk kayuh rat bang matehmu,’ ngaceku iko na nier batang luk bang matehmu sebuleng? O lun luk siayu, ngeruat batang rat bang matehmu sebuleng atun, idi muci iko miak nier megala' pad miak ngeruat mumuk kayuh luk bang mateh kinanakmu ineh.”
Aceh Lawa Kayuh Idi Bua'neh
(Mat 7.16–20; 12.33–35)
43“Ngaceku na luk idi lawa kayuh luk do', luk ngeruat bua' luk dat, idi lawa kayuh luk dat, luk ngeruat bu'a luk do'. 44#Mat 12.33 Anid-anid lawa kayuh miak uen ngiti ratnan bua'deh sebuleng, ngaceku ratnan lawa tabpa' na miak lemulun mureg bua' gita', idi ratnan apet tabpa' na lemulun mureg bua' anggur. 45#Mat 12.34 Lemulun luk do' ngeruat anun-anun luk do' ratnan binaweh niat luk do', idi lemulun luk dat ngeruat luk dat ratnan binaweh luk dat, ngaceku ela ratnan niat lemaba bibir tangneh.”
Dueh Burur Lemulun Luk Mudut Ruma'
(Mat 7.24–27)
46“Ngudehké muyuh nawar Negku, ‘Tuhan, Tuhan,’ iamo' na muyuh maya' luk bilaKu? 47Anid-anid lemulun luk macing Negku, luk ninger balaKu idi maya' ineh, Ui sikal mada' kuan muyuh kudeng apeh ayuneh. 48Ieh ineh mepad kudeng seburur lemulun luk mudut ruma' idi nengukat macing medalem, idi ieh nenganau'diri luun batu. Kareb abpa' temubu' idi awer abpa' nengeduyung ruma' ineh, na ieh miak megio, ngaceku kekamen ineh meraben. 49Iamo' lemulun luk pangeh neninger dengan na maya', ieh ineh mepad kudeng seburur lemulun luk mudut ruma'neh luun tana' dengan na tapin; idi awer abpa' pana' nengeduyung ruma' ineh, idi petacu ieh neluka', idi luka'neh pelaba bura'.”
Zvasarudzwa nguva ino
:
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
BALA LUK DO' Lun Bawang Bible © The Bible Society of Malaysia 1982, Second Edition 1998.