रोमी 4
4
अब्राहामक उदाहरण
1आब हम्र हमार जातिक पुर्खा अब्राहामक बारेम का कही? धर्मी ठह्रना बारेम हुँकहार अनुभव का रलहन? 2यदि हुँकहार करल कौनो कामद्वारा परमेश्वरक सामुन्नेम ऊ धर्मी ठह्रट कलसे हुँकहीन घमण्ड कर्ना ठाउँ हुइनेरलहन। तर परमेश्वरक सामुन्नेम घमण्ड कर्ना हुँकहार ठाउँ नैरलहन। 3धर्मशास्त्रम लिखल बा, “अब्राहाम त परमेश्वरह विश्वास कर्ल। उह विश्वासले करबेर परमेश्वर हुँकहीन धर्मी ठह्रैल।”#उत १५:६; गला ३:६ 4काम कर्ना मनैन ज्याला देजैठा। ज्याला कलक दान नैहो तर कमाइल चिज हो। 5तर कुई धर्मकर्मम नाहीँ तर पापी मनैन क्षमा देना परमेश्वरम विश्वास कर्ठा कलसे उह विश्वासले करबेर परमेश्वर ओहीह धर्मी ठह्रैठ। ओ यी त परमेश्वरक दान हो। 6परमेश्वर धर्मकर्मबिना जो धर्मी ठह्राइल मनैयक बारेम राजा दाऊद फे असिक कठ,
7“हुँक्र कत्रा खुशी मनै,
ज्याकर अधर्म परमेश्वर क्षमा कैदेरख्ल
ओ पाप भँठारदेरख्ल।
8ऊ कत्रा खुशी मनैया,
ज्याकर पापक हिसाब परमप्रभु नैलेट।”#भज ३२:१-२
9दाऊदक कहल यी आशीर्वाद त खतना हुइल् मनैन्हक लाग केल नैहो, खतना नैहुइल् मनैन्हक लाग फे हो। धर्मशास्त्र अनुसार हम्र कली, “परमेश्वर अब्राहामह उहाँकम विश्वास कर्लक कारण धर्मी ठह्रैल।” 10यी काम कैह्या हुइल्? ऊ व्यवस्था अनुसार खतना कैक सेक्क कि बिना कर्ल? खतना कर्नासे आघहेँ परमेश्वर हुँकहीन धर्मी ठह्रैल। 11हुँकहार खतना बिना हुइल ऊ विश्वासद्वारा धर्मी ठह्रागैल, वाकर छापस्वरूप खतनक चिन्ह त पाछ लगागैल्। असिक ऊ खतना नैकर्लरलह तर परमेश्वरम विश्वास कैक धर्मी ठह्रना मनैन्हक आत्मिक पुर्खा हुइल।#उत १७:१० 12असहेँक अब्राहाम त उ खतना कर्ना मनैन्हक फे पुर्खा हुइट, ज्याकर खतना हुइलक केल नैहो तर हुँक्र परमेश्वरम असिन विश्वास फे कर्ठ, जौन विश्वास हमार पुर्खा अब्राहाम खतनक चिन्ह पैनासे आघहेँ कैरख्लह।
प्रतिज्ञा विश्वासद्वारा पागैलक
13अब्राहाम व्यवस्था पालन कर्लकओर्से नाहीँ, तर विश्वासद्वारा धर्मी ठह्रलकओर्से परमेश्वर हुँकहीन ओ हुँकहार सन्तानन संसारक हकवाला बनैना प्रतिज्ञा कर्ल।#उत १७:४-६; २२:१७-१८; गला ३:२९ 14व्यवस्था पालन करुइयन केल हकवाला हुइना हो कलसे विश्वास बेकार हुइनेरह ओ परमेश्वरक प्रतिज्ञा फे बेकार हुइनेरह।#गला ३:१८ 15व्यवस्था पालन नैकरुइयन्हकम परमेश्वरक रिस पर्ठा, ओ जहाँ व्यवस्था नैहो कलसे वाकर पालन नैकर्ना बात कहाँसे आई?
16प्रतिज्ञा त विश्वासद्वारा पाजैना हुइलकओर्से परमेश्वरक अनुग्रहम आधारित बा। यी अनुग्रहले परमेश्वरक देहल प्रतिज्ञह हुँकहार सब सन्तानन्हक लाग पक्का करैठा। यी प्रतिज्ञा त व्यवस्था रहल मनैन्हक लाग केल नाहीँ तर अब्राहामकअस विश्वास कर्ना सबजन्हक लाग हो, काजेकलसे अब्राहाम हमार सबजन्हक पुर्खा हुइट।#गला ३:७ 17धर्मशास्त्रम परमेश्वर अब्राहामह कल, “मै टोहीह धेर जातिन्हक पुर्खा बनारख्नु।” असिक परमेश्वर अब्राहामह हमार सबजन्हक पुर्खा बनैल। अब्राहाम असिन परमेश्वरम विश्वास कर्ल, जे मुवल मनैन जीवन देठ ओ आपन बोलीक शक्तिले अस्तित्वम नैरहल चिजह फे अस्तित्वम अन्ठ।#उत १७:५ 18सन्तानक आश नैरहलब्याला फे “टुँहार सन्तान तोरैँयाअस धेर हुइहीँ” कैक परमेश्वरक देहल प्रतिज्ञम अब्राहाम आशा ओ विश्वास कर्टीरल ओ पाछ धेर जातिन्हक पुर्खा हुइल फे।#उत १५:५ 19ऊ सय वर्षम लागरलह तर आपन बुह्राइल शरीर ओ हुँकहार गोसिन्या सारक बाँझ कोखले हुँकहीन विश्वासमसे कमजोर बनाइ नैस्याकल।#उत १७:१७ 20ऊ परमेश्वरक प्रतिज्ञा करल बातम एक्को फे शङ्का नैकर्ल तर विश्वासम झन् बलगर होक परमेश्वरक महिमा कर्ल। 21काकरकि आपन करल प्रतिज्ञा परमेश्वर अवस्य फे पूरा कर्ठ कना हुँकहीन पक्का थाहाँ रलहन। 22यिह विश्वासले अब्राहाम परमेश्वरक सामुन्नेम धर्मी ठह्रलह। 23“परमेश्वरक सामुन्नेम धर्मी ठह्रलह” कना धर्मशास्त्रम लिखल बात हुँकहार लाग केल लिख्गैल् नैहो, 24तर हमार लाग फे लिख्गैल् हो, जे-जे हमार प्रभु येशूह मुवलमसे फेदोस्र जीवन देना परमेश्वरम विश्वास कैरख्ली। यिह विश्वासले हम्र फे परमेश्वरक सामुन्नेम धर्मी ठह्रल बाटी। 25येशू हमार पापक लाग मुवापैल ओ हमन धर्मी ठह्राइक लाग फेदोस्र जियागैल।#यशै ५३:४-५
Zvasarudzwa nguva ino
रोमी 4: thl
Sarudza vhesi
Sarudza zvinyorwa izvi
Yenzanisa
Pakurirana nevamwe
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© 2020, Wycliffe Bible Translators, Inc. All rights reserved.