रोमी 12
12
जिटीह बलि
1प्रिय दादुभैयहुँक्र, परमेश्वर महान कृपा टुँहन कर्लकओर्से आपन शरीर पवित्र, परमेश्वरह मनपर्ना, जिटीह बलिक रूपम समर्पण करो कैक मै टुँहन बिन्ती करटुँ। टुन्हक आत्मले करपर्ना सत्य आराधना फे यिह हो। 2यी संसारक मनैन्हकअस देखासिकी जिन करो, बेनसे परमेश्वरह टुन्हक सोचविचार लौव बनाइदेओ ओ असिक टुह्र पूरा परिवर्तन हुइसेक्बो। ओसिक कर्बो कलसे टुह्र परमेश्वरक इच्छा का बाटन कैक पत्ता लगाइ सेक्बो, अर्थात् कौन बात मजा बा, कौन बातले परमेश्वर खुशी हुइठ, ओ कौन बात उत्तम हो, यी सब टुँहन छर्लङ्ग थाहाँ हुइनेबा।
3परमेश्वर महीह कृपा कैक देलक वरदानक अधिकार अनुसार मै टुँहन सबजहन कहटुँ, अपन्हेह वास्तविकसे बरा जिन सम्झो तर परमेश्वरक देहल विश्वासक मात्राअनुसार अप्न जस्त बाटो, ओस्त सम्झो। 4हमार शरीरम धेर अङ्ग रलसे फे शरीर एक्कठो हो ओ उ अङ्गक छुट्ट-छुट्ट काम रठस।#१ कोर १२:१२ 5ओसहँक हम्र धेर जन रलसे फे ख्रीष्टम एक शरीर हुइटी ओ हम्र सबजन एक-औरजन्हक अङ्ग हुइटी। 6उहओर्से परमेश्वरक अनुग्रहले हमन देहल छुट्ट-छुट्ट दानअनुसार उहाँक काम करी। परमेश्वरक तर्फसे बोल्ना दान पाइल मनै आपन विश्वास अनुसार उहाँक तर्फसे बोलहीँ। 7सेवा कर्ना मनै मजासे सेवा करहीँ, परमेश्वरक शिक्षा देना वरदान पाइल मनै शिक्षा देना काम करहीँ। 8अर्ती देना मनै अर्ती देना काम करहीँ। खाँचोम परल मनैन देना मनै खुल्ला मनले देहीँ। अगुवाइ कर्ना मनै मन लगाक करहीँ ओ दया देखैना मनै खुशीले दया देखहीँ।#१ कोर १२:४-११
प्रेम सम्बन्धी
9टुन्हक प्रेम देखावटी नाही तर सत्य ह्वाए। खराब बात छोर्क असल बातम लग्लरहो। 10औरजहन आपन भैया-बहिनेनअस प्रेम करो। आपनसे धेर औरजन्हक आदरसम्मान करो। 11करपर्ना कामम अल्छी जिन करो। आत्मम जोशिलो होक दिलोज्यानले प्रभुक काम करो। 12टुन्हक पाइल आशम खुशी रहो। कष्टम धीरज करो ओ सड्ड प्रार्थनम लग्लरहो। 13प्रभु ख्रीष्टक पवित्र जनहुँकन अभाव हुइल् ब्याला सहायता करो, पहुनन्हक मानमर्जाट् करो।
14टुँहन सँतैना मनैन श्राप नाही बेनसे आशीर्वाद देओ।#मत्ती ५:४४; लूक ६:२८ 15आनन्द मनैना मनैनसे आनन्द मनाओ। रुइनाहुँकनसे रोओ। 16सबजहनसे मिल्क बैसो। घमण्ड जिन करो, तर सर्वसाधारण मनैनसे मिलजुलक रहो ओ अपन्हेह धेर जन्ना जिन ठानो।#हितो ३:७
17कौनोजन टुँहन नैमजा करल कलसे वाकर सटाहा नैमजा जिन करो। सबजन्क नजरम जौन बात असल ठहराइल बा उह बातम केल ध्यान देओ। 18स्याकलसम सबजहनसे मेलमिलापम रहो। 19प्रिय दादुभैयहुँक्र कबु फे कौनोजहनसे बद्ला जिन लेहो। तर परमेश्वरक रीसम छोरदेहो। काकरकि धर्मशास्त्रम परमप्रभुक कहल बात लिखल बा, “बद्ला लेना काम म्वार हो, मै बद्ला लेहुइयाबाटुँ।”#व्य ३२:३५ 20बेनसे, “टुँहार शत्रु भुँखाइल बा कलसे खवाओ, पियासल बा कलसे पानी देओ। शत्रु होक फे असिन वास्ता करल व्यवहार देख्क ऊ लज्जित हुइनेबा।”#हितो २५:२१-२२ 21खराबी टुँहीन जित जिन स्याक, बेनसे भलाइक काम कैक खराबीम विजयी होओ।
Zvasarudzwa nguva ino
रोमी 12: thl
Sarudza vhesi
Sarudza zvinyorwa izvi
Yenzanisa
Pakurirana nevamwe
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© 2020, Wycliffe Bible Translators, Inc. All rights reserved.