यूहन्ना 5
5
अठ्तीस वर्षसम बेराम परल मनैया चोखैलक
1कुछ समय पाछ यहूदीन्हक एकठो टिहार आइल ओ येशू यरूशलेमम गैल। 2यरूशलेम सहरम भेँरी-गेटक लग्घ एकठो पोखरी बा। यी पोखरीह हिब्रू भाषम बेथस्दा कैजैठा, ओ याकर गिन्यौर पाँचठो पाटी बा। 3उ पाटीम धेर किसिमक बेरम्हेन- आन्धर, नाङ्गर, प्यारालाइस रोग लागल मनै ढनामन रहँट्। [हुँक्र कत्रा ब्याला पानी हिलाजाइ कैक अश्या लग्लरहँट्, 4काकरकि ब्याला-ब्यालाम परमप्रभुक एकठो दूत आक पोखरीक पानी हिलादेहँट्। पानीम लहरी चलल् ब्याला सबसे आघ पानीम पैँस्ना बेरम्ह्या, चाहा जसिन र्वाग लागल रलसे फे, चोखाजाए।]
5उहाँ एकठो असिन बेरम्ह्या रह, कि वाकर बेराम पर्लक अठ्तीस वर्ष होरलहस। 6येशू ओहीह ओठे सुतल देख्ल, ऊ बेराम पर्लक धेर साल होसेक्लक थाहाँ पैल त ओहीह कल, “का टुँ चोखाइ चाहटो?”
7उ बेराम मनैया उहाँह कहल, “हजुर, पानीम लहरी चलल् ब्याला महीह पोखरीम डारदेना म्वार कुई फे नैहुइट। मै जैटी-जैटी महीसे आघ और मनैया पानीम जाजैठा।”
8येशू ओहीह कल, “उठो, आपन बिस्तारा बोको, ओ नेङ्गो।” 9ओत्रा कटीसाइत उ मनैया चोखागैल्, ओ आपन बिस्तारा बोक्क नेङ्गैल्। उ दिन यहूदीन्हक बिसैना दिन रह। 10उहओर्से यहूदी अगुवाहुँक्र उ चोखाइल मनैयह कल, “आज त बिसैना दिन हो, ओ व्यवस्थम बिस्तारा बोक्क नेङ्ग्ना अनुमति नैहो।”#नहे १३:१९; यर १७:२१
11ऊ हुँकन जवाफ देहल, “जे महीह चोखैल, उहाँ जो महीह आपन बिस्तारा बोक्क नेङ्गो कलह।”
12हुँक्र ओहीह पुछ्ल, “टुँहीन आपन बिस्तारा बोक्क नेङ्गो कना मनैया के हो?”
13उ ठाउँम भीड लागलरह ओ येशू भीडम कहोँर बिलागैल। ओ उ चोखाइल मनैयाजुन येशूह चिन्ह्ल नैरह।
14कुछ समय पाछ येशू ओहीह मन्दिरम भेँटैल ओ कल, “हेरो, आब टुँ चोखारलो। फेदोस्र पाप जिन करो। कर्बो कलसे टुँ झन् खराब दशम पर्बो।” 15तबदोस्र उ मनैया यहूदी अगुवन्हकठे गैल्, ओ महीह चोखैना मनैया त येशू हुइट कैक हुँकन जनादेहल।
परमेश्वरक छावाद्वारा जीवन
16येशू यी काम बिसैना दिनम कर्लकओर्से यहूदी अगुवाहुँक्र उहाँह दुःख देहलग्ल। 17तब येशू हुँकन कल, “म्वार बाबा आम्हीसम काम कर्टिबाट, ओ मै फे काम कर्टिबाटुँ।” 18यहूदी अगुवाहुँक्र येशूह बिसैना दिन भङ्ग करल ठह्रैल। अत्र केल नैहोक उहाँ परमेश्वरह बाबा कैक अपन्हेह परमेश्वरक बराबर बनैल। उहओर्से हुँक्र उहाँह मुवाइक लाग झन् धेर दाउ ख्वाज लग्ल।
19येशू हुँकन कल, “जाट्टीसे मै टुँहन कहटुँ, मै छावा आपन तर्फसे कुछु कर नैसेक्टुँ। बाबह ज्या करल देख्ठुँ, मै उह केल कर्ठुं। बाबा ज्या-ज्या कर्ठ, मै छावा फे उह जो कर्ठुं। 20काकरकि बाबा मै छावह प्रेम कर्ठ, ओ उहाँ आपन कर्टिरहल सब काम मै छावह देखैठ। यहीसे महान् काम उहाँ मै छावह देखुइयाबाट, ओ टुह्र छक्क पर्बो। 21बाबा मुवल मनैन फेदोस्र जियाक जीवन देहअस मै छावा फे आपन चाहल मनैन जीवन देहुइयाबाटुँ। 22बाबा केक्रो न्याय नैकर्ट, तर सब न्याय कर्ना काम मै छावह सुम्पदेरख्ल, 23ताकि बाबक आदर करअस सबजन छावक फे आदर करहीँ। छावक आदर नैकर्ना मनैया ओहीह पठैना बाबक फे आदर नैकरट्।
24“जाट्टीसे मै टुँहन कहटुँ, म्वार वचन सुन्ना ओ महीह पठुइयह विश्वास कर्ना मनैयकसँग अनन्त जीवन बा। ओहीह कबु फे दोषी नैठह्राजाई, तर ऊ मृत्युमसे जीवनम पैल्हहेँ गैरहल। 25जाट्टीसे मै टुँहन कहटुँ, समय अइटीबा, वास्तवम आस्याकलबा, जब मुवल मनै मै, परमेश्वरक छावक आवाज सुनहीँ, ओ सुनुइयन जुन जिजैहीँ। 26काकरकि बाबकम जीवन देना शक्ति बाटन, ओ उहाँ उ जीवन देना शक्ति मै छावह फे देरख्ल। 27ओ छावह सबजन्हक न्याय कर्ना अधिकार देरख्ल, काकरकि उहाँ मनैयक छावा हुइट।
28“यी बात सुन्क अचम्म जिन मानो, काकरकि समय अइटीबा, उ समयम गर्यम रहुइयन उहाँक आवाज सुनुइयाबाट,#दान १२:२ 29ओ गर्यमसे निकर्क अउइयाबाट। असल काम करल मनै मुवलमसे फेदोस्र जिक अनन्त जीवन पैहीँ, ओ खराब काम करल मनैजुन मुवलमसे फेदोस्र जिक दण्ड भोगहीँ। 30मै अपन्हे कुछु फे कर नैसेक्टुँ। मै परमेश्वर बाबसे पाइल आज्ञा अनुसार जो न्याय कर्ठुं। असिक म्वार करल न्याय ठीक रठा, काकरकि मै आपन इच्छा अनुसार काम नैकर्टुं, तर महीह पठुइया बाबक इच्छा अनुसार जो कर्ठुं।
येशूक बारेम गवाही देहुइयन
31“यदि मै अपन्हे केल आपन बारेम गवाही देटुँ कलसे, म्वार गवाही सत्य नैहुइनेरह। 32तर म्वार बारेम गवाही देहुइया एकठो और व्यक्ति अर्थात् परमेश्वर बाबा बाट, ओ म्वार बारेम उहाँक देहल गवाही सत्य रठा कना बात म्वार लाग थाहाँ बा।
33“टुह्र बात बुझक लाग आपन मनैन यूहन्नकठे पठैलो ओ ऊ सत्य गवाही देरख्ल।#यूह १:१९-२७; ३:२७-३० 34वास्तवम महीह मनैन्हक गवाही नैचाहट्, तर टुह्र मुक्ति पाइसेको कैक मै यी बात बटोइठुँ। 35यूहन्ना त बर्टिरहल ओ चम्कटीरहल दियाअस रलह, ओ टुह्र हुँकहार अजरारम एक घरिक आनन्दित हुइ चहलो।
36“तर यूहन्नक देहल साक्षीसे वजनदार साक्षी म्वारठे बा, काकरकि म्वार बाबा महीह कर लगैलक काम मै कर्टिबाटुँ, ओ यिह कामले बाबा महीह पठैलह कैक म्वार बारेम साक्षी देठा। 37महीह पठुइया बाबा अपन्हे फे म्वार बारेम साक्षी देरख्ल। टुह्र ना त कबु उहाँक आवाज सुनरख्लो, ना त उहाँह देखरख्लो।#मत्ती ३:१७; मर्क १:११; लूक ३:२२ 38उहाँक वचन टुन्हक मनम नैरहट्। काकरकि टुह्र उहाँक पठाइल मनैयह विश्वास नैकर्टो। 39धर्मशास्त्रम अनन्त जीवन पाजैठा कैक टुह्र उहाँ खोजी कर्ठो। उह धर्मशास्त्र त म्वार बारेम साक्षी देठा। 40तर फे टुह्र जीवन पाइक लाग म्वारठे अइना इन्कार कर्ठो।
41“मनै म्वार आदर कर्लसे फे, या नैकर्लसे फे, उहिँले महीह कुछु फरक नैपारट्। 42तर मै टुँहन चिह्न्ठुँ ओ टुन्हकम परमेश्वरक प्रेम नैहो कना बात मै जन्ठुँ। 43मै आपन बाबक अधिकार लेक आरनु, तर फे टुह्र महीह ग्रहण नैकर्टो। तर यदि कुई आपन अधिकार लेक आइल कलसे, टुह्र ओहीह ग्रहण कर्ठो। 44टुह्र एक-औरजन्हक प्रशंसा खोज्ठो, तर एक्कठो परमेश्वरसे अइना प्रशंसक कुछु मतलब नैकर्टो। असिन अवस्थम टुह्र कसिक विश्वास कर सेक्बो?
45“मै टुँहन बाबक सामुन्नेम दोष लगैम कैक जिन सम्झो। टुह्र मोशकम भरोसा कैरख्लो, वास्तवम टुँहन दोष लगैना उह हुइट। 46यदि टुह्र जाट्टीसे मोशह विश्वास कर्टो कलसे, महीह फे विश्वास कर्नेरलहो, काकरकि ऊ त म्वार बारेम लिख्लह! 47तर यदि टुह्र हुँकहार लिखल बात विश्वास नैकर्टो कलसे, म्वार कहल बात कसिक विश्वास कर्बो?”
Zvasarudzwa nguva ino
यूहन्ना 5: thl
Sarudza vhesi
Sarudza zvinyorwa izvi
Yenzanisa
Pakurirana nevamwe
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© 2020, Wycliffe Bible Translators, Inc. All rights reserved.