Olóma 2
2
Asaŋa a sómba bɛsɛnɛ naá botɛ́nɛ́ɛ
1Kanɛ́, maamɔ́ɔ mɔ́ɔnyɔ o sómbanamɔ́ basɔ́gɔ́ɔ bɛsɛnɛ, akɛ́ o lɛ́ ánɛ́ɛ, o do háánánáa na bihéehinye#2.1 O bana, go eninye na Mot 7.1; Lók 6.37.. Gɔ́ɔgɔ o sómbanamɔ́ basɔ́gɔ́ɔ bɛsɛnɛ, maamɔ́ɔ moatɛ́ o ŋanana aŋa bɔ́ɔ, nyuudé náhɔ nɛ́ go ágana naá ncíbo ya gɛaŋɔ́. 2Dɛ íyimene goŋaá Asaŋa a sómba bɛsɛnɛ bá báaba bá ŋananamɔ́ moóma aŋa mɔ́ɔmɔ nɔ́ɔnɔ aŋa mammana yɛ oyamɔ́. 3Maamɔ́ɔ mɔ́ɔnyɔ o sómbanamɔ́ basɔ́gɔ́ɔ bɛsɛnɛ go moóma mɔ́ɔmɔ bá ŋananamɔ́, asáa gɔgɔ́ maamɔ́ɔ moatɛ́ o mó ŋanana, o béeniŋenye go amɔ́, o ŋga pambá naá mbɔ́dɔ ya Asaŋa ya gosómba bɛsɛnɛ o? 4Ɛ́na lí o fánɛnafanɛna Asaŋa go gɛantá gá odɛ́má usi gɛ́hɛ́, na gɔ́ɔgɔ a lɔ́mɔ́ a dɛ go gundényée hɔ́ɔ na hɔ́ɔ? O do íyíménée goŋaá busi bá Asaŋa bɔ́ɔbɔ, bɔ́ bó go dómanamɔ́ go go núgie gɛɔyɔ o? 5Aŋa o lɔ́mɔ́ na edúu, o do lɛ́gálɛ́gáa go núgie gɛɔyɔ gáhɔ. Go busío moánɛ, o bɔ́gɔ́gɔnɔ gɛantáanta gá noséésényée naá buisí bɔ́ɔbɔ Asaŋa a ná dúfiemú mpímí yɛ́hɛ́. Buisí moánɛ, a ŋga dúfíe goŋaá a sómbana batɔ bɛsɛnɛ naá botɛ́nɛ́ɛ. 6A ŋga soɛná onyɔ moánɛ go meŋiigíe mɛ́hɛ́#2.6 go gig. 5 go ɛ́na naá Sofoníi 1.14-18; 2.2-3 go gig. 6. O bana, go eninye na bɔ́ɔbɔ naá Ɛsagɔ 62.13; Ncaba 24.12.. 7Báaba bá bágóɛganamɔ́ go go ŋanana besé, bá gɔnɔ fúmbe nigúmi, mbúlugie na gɛɔyɔ gá miisí miimée, Asaŋa a ŋga bó fáá gɛɔyɔ gá kanɛ mesúge. 8Kanɛ́ go báaba bá mo báaŋɛganamɔ́, bí inyene go ɔ́bɔ mammana, bá ŋanana goana bɛbɛ́ bá moóma, Asaŋa a ŋga bó dúfíe gɛantáanta gɛ́hɛ́ gá mpímí. 9Biimée báaba bá ŋananamɔ́ gɛbɛ́, Asaŋa a ŋga bó séésényée makɔ́nɔ́, gó bayɛga Beyúdene gó ɛ́da go éme naá báaba bá lɔ́mɔ́ bá dɛ bɛ́ɛ́mbá Beyúdene. 10Kanɛ́ báaba bá ŋananamɔ́ besé, Asaŋa a ŋga bó fáá nigúmi, mbúlugie na buumbénú gó bayɛga Beyúdene gó ɛ́da go éme naá báaba bá lɔ́mɔ́ bá dɛ bɛ́ɛ́mbá Beyúdene. 11Mammana Asaŋa a dɛ iyée mɔtɔ#2.11 O bana, go eninye na Bicele 10.17.. 12Biimée báaba bá ŋananamɔ́ bɛlɔgɔ kanɛ go íyime gicele, bá ŋga gúé tɔ́nɔ kanɛ gicele. Kanɛ́, báaba ba ŋananamɔ́ bɛlɔgɔ, asáa gɔgɔ́ bɔ́ɔ, bí íyimene gicele, Asaŋa a ŋga sómba bɛsɛnɛ bábɔ́ na gicele gɛ́ɛgɔ. 13Caá akɛ́ báaba bá bódólonyomú gicele go mbódólonyo bɔ́ɔ bá lɔ́mɔ́ bɛtɛ́nɛ́ɛ naá oŋgíso yá Asaŋa. Kanɛ́, báaba bá ŋananamɔ́ aŋa gicele gɛ́ oyamɔ́, bɔ́ɔ Asaŋa a bó íyenyemú bɛtɛ́nɛ́ɛ. 14Gɔ́ɔgɔ báaba bá lɔ́mɔ́ bá dɛ bɛ́ɛ́mbá Beyúdene, bɔ́ɔ kanɛ gicele, aáŋa bá ŋanana aŋa gicele gɛ́ oyamɔ́, bó lɛ́ aŋa bí íyimene gicele, bɔ́ɔ kanɛ gɛ́. 15Gɔ́ɔgɔ bá ŋananamɔ́ nɔ́ɔnɔ, bá dúfenye goŋaá Asaŋa a báá go ága gicele gɛ́hɛ́ naá ɛdɛ́má yabɔ́. Mbééníŋínyí sábɔ́ sɛ́ dúfenye tɔ́nɔ nɔ́ɔnɔ. Gɛ́ɛgɛ gɛcamɛna, bá béeniŋenye bá amɔ́ bá báa ŋa besé, gɛ́ɛgɛ gíntió, bá amɔ́, bá báa ŋa gɛbɛ́. 16Buimée bɔ́ɔbɔ bó ŋga daŋɛ́mɛ́dá, buisí bɔ́ɔbɔ Asaŋa a ŋgaá dómá Yésu Kilítu go go nco sómba bɛsɛnɛ go buimée bɔ́ɔbɔ ɛdɛ́má ya batɔ yɛ ɔsɛgɔnɔmɔ́, gɔgɔ́ aŋa Gɛnɔ́gɔ́ gá Cɔ́mɔ gɛ́ɛgɛ túmenyemú gɛ́ oyamɔ́.
Beyúdene bá dɛ á gá ŋaáa ŋgɔ́bɛnɔ na gicele
17Kɔ́ɔ, maamɔ́ɔ mɔ́ɔnyɔ o béfínenyemú go amɔ́ o lɛ́ Yúdene, o bienene gicele; o béségi go amɔ́ go íyimene Asaŋa. 18Maamɔ́ɔ mɔ́ɔnyɔ go íyimenemú ndɛ́ga ya Asaŋa, o bɛanana pɛ́ ya go lɛnca bɔ́ɔbɔ bó lɔ́mɔ́ besé goŋaá, Asaŋa a go bó dúfenye naá gicele gɛ́hɛ́. 19O béeniŋenye go amɔ́ o lɛ́ mɔ́ɔnyɔ i indenyemú begélígeli, go amɔ́ o lɛ́ gise go báaba bá lɔ́mɔ́ naá mbíno. 20O béeniŋenye go amɔ́, o loodonyo báaba bá lɔ́mɔ́ bá dɛ íyíménée boóma; gɔnɔ́, o lɛ́ iloodio há báaba bá lɔ́mɔ́ bá dɛ íyíménée pɛ́ ya Asaŋa. Buimée goŋaá, go oya go amɔ́, gicele gɛ́ go fáanana goíyime na mammana iŋkimée. 21Maamɔ́ɔ mɔ́ɔnyɔ o húunenyemú kanɛ́ basɔ́gɔ́ɔ, o do béhúúnényée maamɔ́ɔ moatɛ́. Go oyanɛna basɔ́gɔ́ɔ go amɔ́ bá dɛ íbé boóma, maamɔ́ɔ go íbene. 22O legene basɔ́gɔ́ɔ goŋaá bá dɛ ŋaáa gɛdáŋa, maamɔ́ɔ o gɛ́ ŋanana. Go oya go amɔ́ o do lɛ́gálɛ́gáa bɛgɔgɔ́, gɔ́ɔ maamɔ́ɔ go íbene moóma mɔ́ɔmɔ mó lɔ́mɔ́ naá bɛɔ́fɔ bá bɛ́#2.22 O bana, go eninye na bɔ́ɔbɔ naá Bicele 7.25.. 23O béségi go amɔ́ go íyimene gicele, kanɛ́, o do ɛndáa aŋa gɛ́ oyamɔ́, nɔ́ɔnɔ, o sɛga Asaŋa. 24Mammana, bó lɛ́ ɔ́ŋɔ́ɔlú goŋaá: «Batɔ báaba bá lɔ́mɔ́ bá dɛ bɛ́ɛ́mbá Beyúdene, bá sɛga ufíno yá Asaŋa go busío bɛ́nyɔ́#2.24 Iseyíi 52.5..» 25Kanɛ cuŋíi, buencí bó lɛ́ na ndénégé gɔ́ɔgɔ o bienenemú gicele. Kanɛ́, aáŋa o do bienénée gicele, akɛ́ go ancaba, o lɛ́ aŋa usudusúdúu. 26Aáŋa usudusúdúu a bienene gicele, naá oŋgíso yá Asaŋa, a lɛ́ aŋa mɔtɔ ba ancábáalú. 27Mɔtɔ mɔ́ɔnyɔ a ŋananamɔ́ aŋa gicele gɛ́ oyamɔ́, mɔ́ɔ kanɛ go ancaba, a ŋga sómbá gɛsɛnɛ gáhɔ, maamɔ́ɔ mɔ́ɔnyɔ o lɔ́mɔ́ ancábáalú, o do ŋanánáa aŋa gicele gɛ́ oyamɔ́; akɛ́ aŋa o lɔ́mɔ́ na gicele, maamɔ́ɔ gɔnɔ́ ancábáalú. 28Mammana ya Yúdene ɛ dɛ báá mɔ́ɔnyɔ a béfínenyemú a amɔ́ a lɛ́ ba Beyúdene; gɔnɔ́, mammana ya buencí, ɛ dɛ báá yɛ́ɛyɛ ɛ bédúfenyemú naá nnyɔ́dɔ. 29Kanɛ́ mammana ya Yúdene ɛ lɔ́mɔ́ naá odɛ́má. Mammana ya buencí ɛ lɔ́mɔ́ yɛ́ɛyɛ Giliíli a áganamɔ́ naá odɛ́má yá mɔtɔ, gicele gɛ́ɛgɛ bá mbɔɔ́ ɔ́ŋɔ́, gɛ́ dɛ bɛanánáa boóma kɔ́ɔ#2.29 O bana, go eninye na bɔ́ɔbɔ naá Bicele 30.6.. Asaŋa mɔ́ɔ a búlugenyemú mbɔ́dɔ ya mɔtɔ aŋa yɛ́ɛyɔ nɔ́ɔnɔ, caá akɛ́ batɔ.
Zvasarudzwa nguva ino
Olóma 2: YAS
Sarudza vhesi
Sarudza zvinyorwa izvi
Yenzanisa
Pakurirana nevamwe
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda