Olóma 1
1
Mbédíígí
1Yɔmɔ́ɔ Póolo, uyogóní bá Yésu Kilítu, Asaŋa a mba tɔ́ŋɛ́nɔ́ go go ɛ́ya Apótɛlɛ, a báá ŋgiyídé go go dúmenye Gɛnɔ́gɔ́ gá Cɔ́mɔ gɛ́hɛ́, yɔmɔ́ɔ mɔ́ɔ ŋgɔ́ŋɔmɔ́ kálata yɛ́ɛyɛ. 2Asaŋa a mba dáná Gɛnɔ́gɔ́ gá Cɔ́mɔ moánɛ fueké go eŋgúdé yá mbúsí sɛ́hɛ́ naá Ŋgɔ́ŋɛ́#1.2 Go ɛ́na Iseyíi 52.7; 61.1.. 3Gɛnɔ́gɔ́ gá Cɔ́mɔ moánɛ gɛ́ núune Moɔnɔ́ bɛhɛ́ mɔ́ɔnyɔ a mbaá bébíéné naá boayá bá mɔtɔ naá nogɔgɔ́ ná Défidi. 4Naá boayá bá Gimmúmpúu gá Giliíli, bá mba mo dílímínyée Moɔnɔ́ ba Asaŋa na bogaaga buimée, go go fúfúgé gɛ́hɛ́ naá kadɛ́gadɛ́ɛ ya begúe. A lɔ́mɔ́ Yésu Kilítu Daadáa bɛcɔ́. 5Go busío bɛ́hɛ́, Asaŋa a mba ŋgíyíe Apótɛlɛ naá busi bɛ́hɛ́, goŋaá ŋgindenye batɔ bá bɛdɔŋɔ biimée, bá mo olimonyo, bá gɔnɔ mo ɔ́bɛnɔ. 6Bɛɛnyɔ́ɔ, no lɛ́ naá olɔŋɔ yá báaba Asaŋa a mbaá dɔ́ŋɛ́nɔ́ goŋaá no ɔ́bɛnɔnɔ na Yésu Kilítu. 7Bɛɛnyɔ́ɔ biimée báaba naá Olóma, Asaŋa a nyó maamana, gɔ́ɔ a mbaá nyó dɔ́ŋɛ́nɔ́ goŋaá no bɛ́ɛmba bɛ́hɛ́. Ŋgáa Asaŋa Baaba bɛcɔ́, na Daadáa Yésu Kilítu bá nyó boogo, bá gɔnɔ nyó fáa buumbénú.
Póolo a lɛ́galɛga go ɛ́da go ɛ́na boolímínyí báaba naá Olóma
8Go go bayɛga, mbéhiigi Asaŋa bamɛ gá Yésu Kilítu, go busío bɛ́nyɔ́ biimée, goakɛ́ batɔ bá cí iŋkimée bó oya bá amɔ́ no lɛ́ odɛ́má naá Asaŋa. 9Asaŋa mɔ́ɔnyɔ mmo yɔgɔnɛnɔmɔ́ na odɛ́má yámɛ uŋkimée, go go dúmenye Gɛnɔ́gɔ́ gá Cɔ́mɔ gɛ́ɛgɛ gɛ́ núunemú Moɔnɔ́ bɛhɛ́, i íyimene goŋaá ŋgoya mammana; i íyimene goŋaá nnyó béeniŋenye kanɛ tɔmbɛ́nɔ́ɔ, 10bɛcamɛna biimée bɛ́ɛbɛ mbósógolonyomú. Ŋgúhene Asaŋa goŋaá aáŋa a lɛ́galɛga, a mbuunene pɛ́ ya go úle naá bɛɛnyɔ́ɔ, goakɛ́ mmba lɛ́ na ncaná ya go úle naá bɛɛnyɔ́ɔ fueké. 11Ndɛ́ na ncaná ya go nyó ɛ́na goŋaá nnyó bɛɛna bɔ́ɔbɔ Giliíli a á ná páá go go gíndie gioliminyo gɛ́nyɔ́. 12Ndɛ́galɛga dómbá dómbáa goŋaá mbɛ́ɛmba olɔŋɔ nɛnyɔ́, dɛ gíndeninye: yɔmɔ́ɔ, naá gioliminyo gɛ́nyɔ́, bɛɛnyɔ́ɔ, naá gɛ́ɛgɛ gámɛ. 13Bolimóní, ndɛ́galɛga caá no lɛnca goŋaá ɛŋɛndɔ gɛca, mmba lɛ́ mbéeniŋenye go úle naá bɛɛnyɔ́ɔ#1.13 Go ɛ́na naá Meŋ 19.21., kanɛ́ ndɛ́ kanɛ go bɛa pɛ́ gó nco húme godɔ́ɔdɔ. Mmba lɛ́ ndɛ́galɛga go úle naá bɛɛnyɔ́ɔ go go ŋa buelí bá go úme boóma naá bɛɛnyɔ́ɔ, aŋa gɔ́ɔgɔ ŋŋananamɔ́ naá mɛɛ́nɔ máama móncodío. 14Bó háanana goŋaá túmenye Gɛnɔ́gɔ́ gá Cɔ́mɔ go batɔ biimée, naá Bágɛlɛ́gɛ, na naá báaba bá lɔ́mɔ́ biinyí; naá benciŋínciŋi, na naá báaba bá lɔ́mɔ́ kanɛ nciŋí. 15Go busío moánɛ gɔ́ɔ, ndɛ́galɛgamɔ́ go nco dúmenye Gɛnɔ́gɔ́ gá cɔ́mɔ naá bɛɛnyɔ́ɔ tɔ́nɔ, batɔ bá Olóma.
Asaŋa i íyenye batɔ bɛtɛ́nɛ́ɛ
16Odóɛ gonóa yó do báá namɛ go go dúmenye Gɛnɔ́gɔ́ gá Cɔ́mɔ. Gɛ́ lɛ́ na bogaaga bɔ́ɔbɔ Asaŋa a bɛananamɔ́ go go sódio biimée báaba bá lɔ́mɔ́ odɛ́má naá mɔ́ɔ; gó bayɛga Beyúdene, gó ɛ́da go éme naá báaba bá lɔ́mɔ́ bá dɛ bɛ́ɛ́mbá Beyúdene. 17Mammana, Gɛnɔ́gɔ́ gá Cɔ́mɔ gɛ́ lincienye aŋa Asaŋa i íyienyemú batɔ bɛtɛ́nɛ́ɛ naá busío bɛ́hɛ́. Bó lɔ́mɔ́ goana go gioliminyo, pɛ́ intió ɛ dɛ báá, moatɛ́ Ŋgɔ́ŋɛ́ yɛ oya yɛ amɔ́: «Mɔ́ɔnyɔ a lɔ́mɔ́ gɛtɛ́nɛ́ɛ go go ágana gɛ́hɛ́ gá odɛ́má naá Asaŋa a ŋgɔ ɔyɔ́ɔ.»
Mɔtɔ uŋkimée a lɛ́ ulogílógí
18Mammana, Asaŋa a dúfenye mpímí yɛhɛ́ naá mmoɛná go batɔ biimée báaba bá lɔ́mɔ́ bá dɛ hálámánánáa moóma mɛ́hɛ́, bá dɛ ɛndáa naá botɛ́nɛ́ɛ. Bá legene basɔ́gɔ́ɔ go go íyime mammana na bɛbɛ́ bábɔ́ bá moóma bɛ́ɛbɛ bá ŋananamɔ́. 19Asaŋa a bó dúfenye mpímí yɛhɛ́, goakɛ́ pɛ́ ya goŋaá bá mo íyime ɛ lɛ́ naá gise; mɔ́ɔ moatɛ́ moatɛ a mbaá bó yɛ dúfíe daŋɛ́daŋɛ. 20Mammana, naá mabayɛga má cí, Asaŋa a mbaá gedíe cí, moóma mɔ́ɔmɔ a mbaá gedégédíe mó dúfenye batɔ nɛɛ́nɛ a lɔ́mɔ́, akɛ́ aŋa bá lɔ́mɔ́ bá dɛ mo ɛ́nánáa. Bó lɛ́ mammana goŋaá a bɛanana bogaaga bá kanɛ mmanɛ́náa, gɔnɔ́, mɔ́ɔ mokáa a lɔ́mɔ́ Asaŋa. Gɔ́ɔ batɔ bá lɔ́mɔ́ bá dɛ bɛanánáa bihéehinye naá busío bɛ́hɛ́. 21Bí íyimene Asaŋa, kanɛ́ bá dɛ mo búlúgényée, bá dɛ mo béhiigíi aŋa gó sɛmɛgananamɔ́. Mbééníŋínyí sábɔ́ sɛ́ lɔ́mɔ́ goana go moóma má dugúnú, bá gɛ́ga naá mbíno, ɛdɛ́má yabɔ́ goana bɛlalaga. 22Bó oya bá amɔ́ bá lɛ́ na nciŋí, asáa gɔgɔ́ bá lɛ́ biegu. 23Gá goŋaá bá búlugenye Asaŋa ba nigúmi mɔ́ɔnyɔ a lɔ́mɔ́ a dɛ gúénénée, bɔ́ɔ bá búlugenye bieninye; bieninye bá mɔtɔ mɔ́ɔnyɔ a gúenenemú, bieninye bá munoní, bá nnyama na bá nnyɔ́gɔ#1.23 O bana, go eninye na bɔ́ɔbɔ naá Bicele 4.16-18..
24Go busío moánɛ gɔ́ɔ Asaŋa a mbaá bó dɛ́ɛ́ná go go ŋanana bɛbɛ́ bá moóma bɛ́ɛbɛ bá lɛ́galɛgamɔ́. Nɔ́ɔnɔ, bá ŋanana sábɔ́ moóma má odóɛ gonóa na nnyɔ́dɔ, bɔ́ɔ na bɔ́ɔ. 25Bá báá dɛ́ɛ́ná mammana yɛ́ɛyɛ ɛ núunemú Asaŋa, bá báá biené mbele. Bá búlugenye, bá yɔgɔnɛnɔ moóma mɔ́ɔmɔ Asaŋa a mbaá gedíe, naá undukí yá Mɔ́ɔ mɔ́ɔnyɔ a mbaá gedíe buimée. Mɔ́ɔ mɔ́ɔnyɔ a háananamɔ́ na mbúlugie bɛcamɛna biimée. Aamɛnɛ. 26Go busío moánɛ gɔ́ɔ Asaŋa a mbaá bó dɛ́ɛ́ná go go ŋanana moóma má odóɛ gonóa mɔ́ɔmɔ bá lɛ́galɛgamɔ́. Bakɔ́dɔ bá dɛ gɔnɔ́ bɛ́dɛmɛna na banɔ́mɔtɔ́, bá bɛ́dɛmana na basɔ́gɔ́ɔ bakɔ́dɔ. Mbɔ́dɔ ya go ŋanana moánɛ ɛ dɛ báá aŋa Asaŋa a mbaá gedíe. 27Caŋa mmue na banɔ́mɔtɔ́, bá dɛ́ɛna ombɛ́dɛ́ na bakɔ́dɔ, bá lola odɛ́má go go bɛ́dɛmana na basɔ́gɔ́ banɔ́mɔtɔ́. Banɔ́mɔtɔ́ bɔ́ɔ naabɔ́, bá ŋanana moóma má odóɛ gonóa; bá bɔ́gɔ́gɔnɔ noséésényée nɔ́ɔnɔ bá háananamɔ́ na nɔ́ɔ go busío bá gɛlɔgɔ gɛ́ɛgɛ bá ŋananamɔ́. 28Aŋa batɔ bɔ́ɔbɔ bá lɔ́mɔ́ bá dɛ lɛ́gálɛ́gáa go lɛnca Asaŋa, a mba bó dɛ́ɛ́ná go go bienene bɛbɛ́ bábɔ́ bá mbééníŋínyí, bá ŋanana moóma mɔ́ɔmɔ bá lɔ́mɔ́ bá dɛ sɛmɛ́gánánáa go ŋanana. 29Ɛdɛ́má yabɔ́ ɛ lɛ́ dácɛ na moóma mɔ́ɔmɔ mó lɔ́mɔ́ mó do bá tɛ́nɛ́ɛ; bá lɛ́ na gɛdɛ́mádɛ́má, na hɛagá, bó óna batɔ, bá lɛ́ begélí cáŋɔ́, bebelíbélí, bá ŋanana bɛbɛ́ bá moóma, bá díeŋedieŋe ifíno ya basɔ́gɔ́ɔ. 30Bá gálagala dobɛ́ naá nnyimé ya basɔ́gɔ́ɔ, bá lɛ́ babɛlɔ́bɛlɔ bá Asaŋa, bá fúmbe bɛsɛnɛ, bá bébúlugenye, bá béségisegi, bá béeniŋenye gɔgɔ́ bɛbɛ́ bá moóma, bá dɛ ɔ́bɛ́nɔ́nɔ́ɔ bebíéní bábɔ́. 31Bá dɛ gɔnɔ́ go íyimene bɔ́ɔbɔ bó lɔ́mɔ́ bese, bá dɛ hóógónyóo bɔ́ɔbɔ bá báá ná dáná, bá lɛ́ kanɛ odɛ́má, bá dɛ gɔ́lɔ́nɔ́ɔ basɔ́gɔ́ɔ mahana. 32Akɛ́ aŋa bí íyimenemú gosómba gá Asaŋa gá bɛsɛnɛ gɔ́ɔgɔ gó oyamɔ́ gó amɔ́, báaba bá ŋananamɔ́ mbɔ́dɔ sá moóma sɛ́ɛsɔ, bá háanana na nigúe, bɔ́ɔ, bɛ́ ɛ́dana naá busío na go mó ŋanana; bá gɔnɔ go ɔ́bɔnɔ bese na bóncodío báaba bá mó ŋananamɔ́ tɔ́nɔ.
Zvasarudzwa nguva ino
Olóma 1: YAS
Sarudza vhesi
Sarudza zvinyorwa izvi
Yenzanisa
Pakurirana nevamwe
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda