Meŋiigíe 28
28
Póolo naá gɛyɛŋɛ gá cí gá Málɛtɛ
1Aŋa dɛ mbaá pambá nɔ́ɔnɔ, gɛ́cɔ́ go ɔ́bɔ goŋaá gɛyɛŋɛ gá cí gɛ́ɛgɛ naá tɛ́mádɛ́má ya miimpo anáa dɛ mbaá lɔmɔ́ hɔ́ɔ bá mbaá lɛ bá gɛ́ dɔ́ŋɔnɔ bá amɔ́ Málɛtɛ. 2Batɔ báaba hɔ́ɔ go có gɔ́lɔ besé makɔ́nɔ́ Aŋa nobólá nó mbaá bayɛ́gá go naanana, isió hɛ́ báá bɛ́ɛ́mbá makɔ́nɔ́, gáábɔ́ go có fóanɛna gɛgɔnyɛgɔnyɛ gá íyuke go go ɔ́sɔbɔ hɔ́ɔ biimée. 3Kɔ́ɔ Póolo a gósɛdamɔ́ kelegelíe go go nɔɔ naá íyuke, nnyɔ́gɔ go nyuunuguge na gofɛ́ɔ gá íyuke, ɛ báá lámpɛ́mɛ́ná Póolo go ombɔ́gɔ. 4Aŋa batɔ báaba naá hoóma hɔ́ɔhɔ bá mbɛɛ́ ɛ́ná nnyɔ́gɔ ɛ soɛlasoɛla naá ombɔ́gɔ yá Póolo, gáábɔ́ go ɛ́da go bágálɛnagalɛna bá amɔ́: «Kanɛ cuŋíi, mɔtɔ mɔ́ɔnyɔ a lɛ́ uŋgúní batɔ. Kanɛ́ akɛ́ aŋa a á ná pambá naá máŋɛ́, botɛ́nɛ́ɛ bá Asaŋa bó do olímónyóo goŋaá a sɔ́dɔ háalá.» 5Kɔ́ɔ Póolo a mihidemú nnyɔ́gɔ naá íyuke, kanɛ go ɔ́bɔ akɛ́ gokánya naá mɔ́ nnyɔ́dɔ. 6Batɔ bɔ́ɔbɔ bá mba lɛ́ bá béeniŋenye goŋaá ombɔ́gɔ yá Póolo yó gɛɛ́ ɛ́dá go fodoga, ɛ́na lí o oba a dómba go gúe. Kanɛ́ aŋa bá mbaá gɛ́gánáa gɛntaálala gá gɛcamɛna bá dɛ ɛ́ná goŋaá gɛgáda gá boóma gɛ́ á mo ŋaáa, gáábɔ́ go núgie nyuudé, go ɛ́da go gálagala bá amɔ́ mɔtɔ mɔ́ɔnyɔ a lɛ́ asaŋa ummue.
7Ogɔ́nɔ́ɔ ba Málɛtɛ, bá mo dɔ́ŋɔnɔ bá amɔ́ Púbiliusu, a mba lɛ́ a bɛanana bigísi bá cí mekúígíi na hoóma hɔ́ɔhɔ. Mɔ́ɔ go có gɔ́lɔ bese bese naá mɔ́ nnyaŋá, dɛ báá dúmbíe medúgú mádadɔ́ hɔ́ɔ. 8Isée a mba lɛ́ mbɛ́dɛ́ɛ naá ncíbo a nóma na nnyɔ́dɔ ya go bólɛgana na gadɛ́ɛ gá sabala. Kɔ́ɔ Póolo ɛ ɛ́damɔ́ anáa a mbaá lɔmɔ́ mbɛ́dɛ́ɛ, a báá bósógólídío Asaŋa a báá mo dálá ɛmbɔ́gɔ, go mo éŋugie. 9Naá nnyimé hɔ́ɔlɔ́, bɔgɔnɔ́gɔnɔ biimée báaba naá gɛyɛŋɛ gáábɔ́ go ɛ́da go úlene naá Póolo, a bó éŋugenye tɔ́nɔ. 10Batɔ bɔ́ɔbɔ go ɛ́da go có gɔ́lɔnɔ na mbúlugie iŋkimée, gɔnɔ́ naá gɛcamɛna gɛ́ɛgɛ dɛ mbaá lɔmɔ́ goŋaá dɛ dúmbenye na oŋɛndɔ yɛ́cɔ́ naá máŋɛ́, bá báá có fáánánáa buimée bɔ́ɔbɔ bó mbaá lɔmɔ́ bá go có oyo.
Bú ú úlúkíe naá Málɛtɛ go go ɛ́da naá Olóma
11Naá nnyimé ya ɛfɛ́ ɛdadɔ́, gɛ́cɔ́ go gɔ́lɔ sitíme ya Alɛsandalɛ́ɛ, bá yɛ dɔ́ŋɔnɔ bá amɔ́ «baasaŋa bá ɛbáása», ɛ mba lɛ́ dúmbíelú gɛcamɛna gá isió naá gɛyɛŋɛ anáa dɛ mbaá lɔmɔ́. 12Dɛ ɛ́ ɛ́dá bola naá tɛ́sɔnɔ ya Silékusu, dɛ báá ŋaáa hɔ́ɔ medúgú mádadɔ́. 13Dɛ ú úlúkíe hɔ́ɔlɔ́, gɛ́cɔ́ go biene boayá boayá bá gɛyɛŋɛ gɛ́ɛgɔ dɛ bɛ́ɛ́ ɛ́dá bola naá tɛ́sɔnɔ ya Légio. Naá gobélie, ufufu yá gɛmbádáa go ɛ́da go fufe, gɛ́cɔ́ go ŋa medúgú máandɛ́ dɛ́ bɛ́ɛ́ ɛ́dá bola naá tɛ́sɔnɔ ya Púsole. 14Hɔ́ɔ gɔ́ɔ dɛ mbaá gídé bolimóní bɛ́cɔ́ bá gioliminyo báaba bá mbaá có úhúné goŋaá dɛ dúmbie gɛanyɛ nabɔ́. Náana gɔ́ɔ dɛ mbɛɛ́ ɛndáa dɛ bɛ́ɛ́ ɛ́dá bola naá Olóma. 15Aŋa bolimóní bɛ́cɔ́ báaba naá Olóma bá mbɔɔ́ ɔ́bɔ́ goŋaá dɛ á bolá, gáábɔ́ go ɛ́da fadɛgɛna go go nco có gólio naá Nyonyí ná Epiusu na naá Nnyaŋá Ɛ́dadɔ́ sá Biinyí. Póolo u úle a bó ɛ́nana, gɛ́hɛ́ go béhiigi Asaŋa, odɛ́má yɛ́hɛ́ yó bóó obá.
Póolo naá Olóma
16Aŋa dɛ mbaá bolá naá Olóma, bá báá lɛ gó fáa Póolo bogaaga bá go gɛ́ga naá nnyaŋá mmue mɔ́ɔ mokáa, na gisimbi gá go mo beŋebeŋe.
17Medúgú má á dómbá mádadɔ́, Póolo go dɔ́ŋɔnɔ mefuŋe má Beyúdene máama naá Olóma goŋaá má nco mo gíde anáa a mbaá lɔmɔ́. Aŋa má mbaá bábándɛ́gɛ́ná, gɛ́hɛ́ go ɛ́da go mó oyanɛna a amɔ́: «Boɔmɛ, akɛ́ gɔ́ɔgɔ gó lɔ́mɔ́ goŋaá ndɛ́ kanɛ go ŋa boɛ́nɔ bɛ́cɔ́ gɛbɛ́ gá boóma, ɛ́na lí go fánɛna caŋa sá biisée bɛ́cɔ́, bá lɛ́ kumbénéelú naá Yolósalɛmɛ, bá báá túé go batɔ bá Olóma. 18Báaba bá lɛ́ mbidé mbidé bá báá fúúmbé pɛ́ ya go tɛ́ɛna; goŋaá bá lɛ́ kanɛ go ɛ́na goakɛ́ káananamɔ́ go bɛa noséésényée ná nigúe. 19Kanɛ́ Beyúdene bá lɛ́ bábɛndɛ́gáalú, boóma moánɛ bɔ́ ndɔ́mɔ́ úhúnéelú goŋaá gɛsɛnɛ gámɛ gɛ́ úle naá ufuŋe Sɛsáalɛ. Kanɛ́ caá goŋaá cɔ́mɔnɔ gɛdɔŋɔ gámɛ. 20Boóma moánɛ bɔ́ɔ ŋgaá ná lɔmɔ́ ndɛ́galɛga go nyó ɛ́na, ŋgoya ŋkanɔ́ nɛnyɔ́, goakɛ́ naá mammana, bó lɔ́mɔ́ go busío bá mɔ́ɔnyɔ a lɔ́mɔ́ toodo odɛ́máa ya boɛ́nɔ bá Ɛ́sɛlahɛ́ɛlɛ gɔ́ɔ ndɔ́mɔ́ na iŋgolí ya magala yɛ́ɛyɛ.» 21Gáábɔ́ go mo oyana bá amɔ́: «Bɛɛcɔ́ɔ dɛ lɛ́ kanɛ go bɛa akɛ́ kálata mmue ya go ɛ́da go úle naá Yudée ɛ buŋe gɛsɛnɛ gáhɔ, gó gɔnɔ gunde, akɛ́ mɔtɔ ummue bɛcɔ́ ba go ɛ́da go úle hɔ́ɔ a lɛ́ kanɛ go nco có oyana boóma bá búmmue bá gɛbɛ́ bó go báláfa. 22Gɔ́ɔ dɛ fúmbemú goŋaá o có oyana maamɔ́ɔ moatɛ́ moatɛ boóma bɔ́ɔbɔ bó lɔ́mɔ́, goakɛ́ dɛ íyimene dɛ amɔ́ bá bábɛnda bɛnda giimbó gɛ́ɛgɛ o lɔ́mɔ́ kɔ́ɔ gɛ́ɛgɛ hoóma hiimée.»
23Aŋa bá mbaá sísígé buisí bá go gɔnɔ lumene na Póolo, gáábɔ́ go suguge makɔ́nɔ́ anáa a mbaá lɔmɔ́ a gɛ́ga. Gó bayɛga na gɛyɛ́nɛ́ gó ɛ́da go éme hɛɔbɔ́bɔ́ɔ, Póolo a mba lɛ́ a bííŋenene go go bó dúfenye: a bó oyanɛna masɔ́mɔ má Bufuŋe bá Asaŋa, a fúmbe go ŋa goŋaá bó oliminyo Yésusu go dogálɔ dɔ́ɔdɔ dó lɔ́mɔ́ naá gicele gá Mɔ́sɛsɛ na naá kálata sá mbúsí sá Asaŋa. 24Batɔ bóncodío bá mba lɛ́ bó olimonyo bɔ́ɔbɔ a mbaá lɔmɔ́ o oya, kanɛ́ bóncodío bá dɛ olímínyóo. 25Aŋa bá mbaá ádógáná kanɛ go ɔ́bɔnɛnɔ bɔ́ɔ na bɔ́ɔ, Póolo go bó oyana goana a amɔ́: «Gimmúmpúu gá Giliíli a mba lɛ́ o oya mammana gɔ́ɔgɔ a mbaá lɛ a gálagala biisée bɛ́nyɔ́ naá nyuudé ná mbúsí ya Asaŋa Iseyíi.
26A mba lɛ́ o oya a amɔ́: “Ɛ́dá go ɛ́na boɛ́nɔ bɔ́ɔbɔ o bó oyana go amɔ́:
Akɛ́ no bódólonyo nɛɛ́nɛ, no do ná bóso go ɔ́bɔ;
akɛ́ no núune nɛɛ́nɛ, no do ná bóso go ɛ́na.
27Mammana odɛ́má yá boɛ́nɔ bɔ́ɔbɔ yó lala;
bá á bácóá edúu,
bá báá buyíményée oŋgíso,
go goŋaá bá dɛ ɛ́ná boóma na oŋgíso yábɔ́,
bá dɛ olímínyóo boóma na edúu yábɔ́,
odɛ́má yábɔ́ yó do dígímídé,
náana goŋaá bá dɛ núgíe gɛɔyɔ gábɔ́. Yɔmɔ́ɔ Asaŋa mbó éŋugie#28.27 Iseyíi 6.9-10..”»
28Póolo go gɔnɔ gídene a amɔ́: «Íyíme nɔnɔ kanɛ́ goŋaá: Cɔ́mɔ ya gisódio gá Asaŋa ɛ mbu úlé go busío bá báaba bá lɔ́mɔ́ bá dɛ bɛ́ɛ́mbá Beyúdene. Akɛ́ bɔ́ɔ bá ná yɛ ɔ́bɔnɔ.» [29Aŋa Póolo a mbaá gálɛ́dá dogálɔ dɔ́ɔdɔ, Beyúdene go gúlugene bɛ́ ɛ́da bá ŋanana mpálɔ́ makɔ́nɔ́ bɔ́ɔ na bɔ́ɔ.]
30Kɔ́ɔ Póolo a ŋamɔ́ nnyómá ɛ́handɛ́ a soanana nnyaŋá yɛ́ɛyɛ a mbaá lɔmɔ́ a gɛ́ga hɔ́ɔ. A kúle na batɔ báaba bá mbaá lɔmɔ́ bá nco mo ɛ́nana hɔ́ɔ. 31O oya masɔ́mɔ má gɛdɔŋɔ gá Asaŋa, a húunenye buimée bɔ́ɔbɔ bó núunemú Daadáa Yésu Kilítu. A mba lɛ́ a ŋanana nɔ́ɔnɔ na bogaaga buimée kanɛ mɔtɔ ba go mo lege.
Zvasarudzwa nguva ino
Meŋiigíe 28: YAS
Sarudza vhesi
Sarudza zvinyorwa izvi
Yenzanisa
Pakurirana nevamwe
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda