Roma 16
16
Izza Pa̱u̱lo̱ olli Romi
1Ka̱du̱wa̱kku̱ng zin olli Romi warage cu zoz ci abunna obod ki ngoonet tu̱we̱nta̱ ci een zara Poibe, wa a̱li̱ngli̱ng ke̱le̱ci̱e̱#16:1 Ke̱le̱ci̱a̱: Een ke̱le̱ci̱a̱ ol cik a̱tu̱ Ye̱su̱ Ki̱ri̱sto̱ kar ku̱lu̱te̱ nga̱to̱de̱ ngati alawe Manyi. ci Cenchrea. 2Ming okko enne arawanung, a̱gga̱mtta̱ nonno ju̱rru̱m kiwagon ming a̱gga̱m ol wak a̱tu̱we̱ e̱re̱nno̱i̱t cinne̱ng zare cik Manyi. Eelta nonno kaale cik orong enne, eci enne gon eela ol cik meelek giir, rok annit bu̱k.
3Izayeang Priscilla ki mac cinne Akuila balik ka̱li̱ngli̱ngnya̱ ki nogo nga̱to̱de̱ zo̱ze̱ ci Ye̱su̱ Ki̱ri̱sto̱ bu̱k ke̱. 4Abazai ba̱li̱ye̱ baizi cinne̱ng zo̱ze̱ cinanni. Iróng een annit do̱ ci kanyike nogo zany eci eeltawang, anyike olli ke̱le̱ci̱a̱k ki ol cik iróng een Ya̱u̱d bu̱k nogo zany.
5Izzac goona ci een Epenetus, bali elema Ki̱ri̱sto̱ lo̱o̱ce̱ ci een Asia ko̱.
Izayeang goona Epenetus, wa bali elema Ta̱mu̱ta̱dde̱n oowa lo̱o̱ce̱ ci een Asia.
6Izayeang Ma̱ri̱ya̱ wa bali a̱li̱ngli̱nge̱kku̱ng oroot ko̱.
7Izayeang e̱e̱t ci een Andronikas ki ngaa cinne Junias, ol wak Ya̱u̱do̱ balik kecebina bu̱k lagama. A̱gga̱ye̱ nege li̱ngli̱ngo̱nte̱ ci Ki̱ri̱sto̱ oroot orgene ci to̱ni̱a̱u̱, elemtta nege ba̱li̱ye̱ Ki̱ri̱sto̱ tu̱we̱nta̱ oowa ngatinanni.
8Izayeang goona Ampliatus wa kirezi anna tu̱we̱nte̱ ci anyak enne ngati Manyi.
9Izayeang Urbanos wa ka̱li̱ngli̱ngnya̱ ki nonno nga̱to̱de̱ zoz ci Manyi Ki̱ri̱sto̱. Izayeang bo̱do̱k goona ci zinino Stachys.
10Izayeang Apelles wa anyak genyiz tu̱we̱nta̱ anime no̱ngi̱tto̱n zo̱ze̱ ci Ki̱ri̱sto̱.
Izayeang ol cik ce̱e̱z ci Aristobulos, kiza anna nogo do̱o̱k.
11Izayeang Herodion wa een boorit cinanni ko̱.
Izayeang bo̱do̱k ol wak a̱tu̱ Manyi ce̱e̱ze̱ ci Narcissusi.
12Izayeang Tryphena ki Tryphosa, ngaai wak gon a̱li̱ngli̱ng oroot zo̱ze̱ ci Ta̱mu̱ta̱dde̱no̱ ko̱.
Izayeang goona ci zinino, Persis, ngaa bali a̱li̱ngli̱ng oroot zo̱ze̱ ci Manyi.
13Izayeang Ruvos, e̱e̱t ci atahala Manyi, izayeang yaatinne bu̱k wa bali u̱tu̱gu̱ ki yaatanni.
14Izayeang bu̱k Asyncritus, Phlegon, Hermes, Patrobas, Hermas ki bo̱do̱k ol wak a̱tu̱we̱ arume ki nogo do̱o̱k.
15Izzac Philologus, Julia, Nereus ki ngooni, ki Olyampas ki ol do̱o̱k wak a̱tu̱we̱ arume ki nogo ko̱.
16Izzac e̱le̱tti̱ zi̱nze̱tti̱nne̱ wak a̱li̱le̱ voorik.
I̱tto̱na̱kku̱ng zin ol wak ke̱le̱ci̱a̱nya̱i̱ cik Ki̱ri̱sto̱ ko̱ do̱o̱k zawinet cinne̱ng i̱ge̱ta̱.
I̱lo̱t Pa̱u̱lo̱ ol wak a̱tu̱we̱
17Gotonogga ki ngonogga tu̱we̱nta̱, kilalekkung kar icinnet ju̱rru̱m ol wak adiryung zoza baiza, anyaha ngero orgene cunno̱ng, kar bo̱do̱k ki̱ti̱tu̱ng tu̱ go̱o̱le̱ ci de̱mzi̱ne̱t ci tu̱we̱nto̱. A̱vvu̱t reena ngatinne̱ng. 18Iróng ol ne̱k ogon niko ko̱ a̱li̱ngli̱nge̱k Manyitinna Ki̱ri̱sto̱, abarik a̱li̱ngli̱ng gi̱i̱ ci orong zi̱nze̱tti̱ cigge̱k. A̱lu̱t ol zo̱ze̱ ci a̱ru̱we̱ nege muluk lo̱o̱c kar ku̱lu̱te̱t ol wak iróng a̱gga̱ zoz. 19Iziyyet ol wak a̱tu̱we̱ do̱o̱k zoz ci azunnu niga zoz ci Ta̱mu̱ta̱dde̱no̱, katalne zin anna oroot ngatinno̱ng zo̱ze̱ necu; abarik korongnyung abunna ming egenyyu zo̱ze̱ ci een de̱de̱, abunna bo̱do̱k ming edewannu e̱le̱tti̱ zo̱ze̱ ci gerze.
20A̱du̱l atin Ta̱mu̱ta̱dde̱n wa anyak gano ko̱ Sitan#16:20 Sitan: Awu ol nonno azi ne, lo̱rye̱ni̱t wa een alaan ci anjilonyau wak bali abure Ta̱mu̱ta̱dde̱n ta̱mu̱-kenga, kar Ta̱mu̱ta̱dde̱n kottowak nogo lo̱o̱c. I̱vi̱ta̱ zin anjilonya ne̱ko̱ izeto kuulo lo̱o̱ta̱ ngatu. IkebO̱no̱zzo̱k 12:7-9. kar korocek nonno lo̱o̱c zone cigunnek.
Anyik deten ci Manyitinna Ye̱su̱ ka̱vvu̱ ngatinno̱ng.
21Izayung Ti̱mo̱te̱yo̱ wa ka̱li̱ngli̱ngnya̱ bu̱k ko̱. Izayung bo̱do̱k ol wagannik een Ya̱u̱d, Lucius ki Jason ki Sosipater.
22I̱tto̱na̱ zin bo̱do̱k Tertiyas zawinet cinne bu̱k zare cik Manyi, nonno ci bali eelanna annit te̱he̱ri̱nta̱ waraga cu.
23I̱tto̱na̱kku̱ng e̱e̱ti̱ ci een Gaius zawinet cinne, een enne e̱e̱t ci abunna, kabai ba̱li̱ye̱ ce̱e̱ze̱ cinne, aanyet enne da̱i̱ne̱t ki olli ke̱le̱ci̱o̱. Okko e̱e̱ti̱ ci een Erastus wa a̱ddi̱ki̱rne̱ li̱ngli̱ngo̱n ci o̱rgu̱, i̱tto̱na̱ zin enne zawinet cinne. Izayung bo̱do̱k oroot gotoneti wa tu̱we̱nto̱ een zara Guartus. 24Anyik deten ci Manyi Ye̱su̱ Ki̱ri̱sto̱ ka̱vvu̱ ngatinno̱ng do̱o̱k. Amen.
Unyug Pa̱u̱lo̱ zoz lawinta
25Abunna kinnat Ta̱mu̱ta̱dde̱n kanyike zany, eci anyak enne komiz ci anyike zi̱nze̱tti̱ cuggo̱k kodoit tu̱we̱nte̱ ci kaviyak cik abunna, obod ki Ye̱su̱ Ki̱ri̱sto̱, zo̱ze̱ wa een de̱de̱ bali a̱lu̱gnye̱, ngen e̱e̱ti̱ imma ka̱gga̱ ngati bali akanane looci bu̱u̱llo̱we̱ balik reentik abak udut ke̱. 26Ma̱i̱je̱ i̱yo̱ko̱ zin, i̱ye̱la̱i̱ zoz bali eher a̱ri̱tto̱wa̱ balik reentik ke̱ zo̱ze̱ bali u̱du̱wa̱ Ta̱mu̱ta̱dde̱n udut ke̱. Kar ol do̱o̱k lo̱o̱ta̱ ngatu ku̱tu̱we̱t zo̱zzo̱k ne̱ke̱ kar ko̱to̱ngo̱o̱ltte̱ nonno. 27Abunna kinnat Ta̱mu̱ta̱dde̱n wa o̱de̱ ṯok niko, a̱gga̱ kaal do̱o̱k, ki̱di̱ngdi̱nga̱ni̱t nonno udut zo̱ze̱ ci Ye̱su̱ Ki̱ri̱sto̱. Nonno nenen.
Zvasarudzwa nguva ino
Roma 16: tex
Sarudza vhesi
Sarudza zvinyorwa izvi
Yenzanisa
Pakurirana nevamwe
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© 2018, Wycliffe Bible Translators, Inc. All rights reserved.