Roma 15
15
U̱tu̱gu̱z kaal cik atali ol uggak
1Imma naga ol wak ka̱tu̱we̱ ju̱rru̱m ko̱, abunna bu̱k ka̱ti̱ri̱z ol wak ngen tu̱we̱ne̱t cinne̱ng idica. Gerza ming kogon kaal cik katalne naga do̱. 2Abunna naga ol cik okkomit tu̱we̱nta̱ ko̱ ming kogon kaal cik abunna anyike locari katalo tu̱we̱nta̱, kar keela nonno kanyak tu̱we̱ne̱t ci okkomi kak. 3Eci Ki̱ri̱sto̱ eliya ngen ku̱tu̱gu̱ kaal cik anyike nonno katalo do̱, ki i̱yo̱ko̱ ming e̱he̱rye̱ Warage ci Ta̱mu̱ta̱dde̱no̱, azi ne, “Eeh Ta̱mu̱ta̱dde̱n, dominet ci odomnyi ol i̱nne̱ta̱, i̱ta̱ha̱ annita bu̱k.”#Caliwon 69:9 4Eci kaala ne̱k e̱he̱rye̱ Warage ci Ta̱mu̱ta̱dde̱no̱ do̱o̱k ko̱, e̱he̱rye̱ kar kedemezet agit zoz wa een de̱de̱, kar naga go̱o̱le̱ ci kanime no̱ngi̱tto̱n ki zoz ci a̱du̱wa̱kke̱t zoz ci Ta̱mu̱ta̱dde̱no̱, kar atin kartik zi̱nze̱tti̱ zoz ci atin a̱kku̱ ke̱.
5Abunna bai ming aanyi Ta̱mu̱ta̱dde̱n zinin ci alali ki tu̱we̱ne̱t ci okkomi, kar bo̱do̱k niga o̱do̱ye̱ do̱o̱k ngati annuyu Ye̱su̱ Ki̱ri̱sto̱, 6kar zin zinine co̱de̱ inatit Ta̱mu̱ta̱dde̱n wa een be̱e̱ti̱ Manyitinna Ye̱su̱ Ki̱ri̱sto̱.
7Abunna kelemi e̱le̱tti̱ cigga̱c, ki bali ming elemnyi i̱nne̱t Ki̱ri̱sto̱ ke̱, kar ol do̱o̱k kinnatit Ta̱mu̱ta̱dde̱n. 8Ka̱du̱wa̱kku̱ng a̱kku̱ bali Ki̱ri̱sto̱ kar ki̱ki̱ya̱ kize du̱ca̱i̱t ci a̱li̱ngli̱nge̱k olli Ya̱u̱do̱, go̱o̱le̱ ci i̱ye̱le̱ke̱ nogo zoz ci een de̱de̱ Ta̱mu̱ta̱dde̱no̱ bali u̱du̱wa̱k enne ji̱ji̱ti̱gge̱k#15:8 Ji̱ji̱ti̱gge̱k: E̱e̱ggi̱n nege ciko Aburaham, I̱sa̱ko̱ ki Ya̱ko̱bo̱. ke̱, 9kar zin ol cik iróng een Ya̱u̱d ki̱di̱ngdi̱nga̱ni̱t Ta̱mu̱ta̱dde̱n zo̱ze̱ ci anyahak enne deten ol. E̱he̱rye̱ Warage ci Ta̱mu̱ta̱dde̱no̱ zoz ci azi ne,
“Kinnati atin zar cigunnek orgene ci ol cik iróng een Ya̱u̱d;
ke̱be̱ni̱k atin be̱ni̱nno̱k zare cigunnek.”#2 Samwel 22:50; Caliwon 18:49
10Azi bo̱do̱k Warage ci Ta̱mu̱ta̱dde̱no̱ ne,
“Ataltto niga ol cik iróng een Ya̱u̱d, ki ol ciginnek.”#Deuteronomy 32:43
11Azi bo̱do̱k waraga neci dee ne,
“Inatit Manyi, niga ol wak iróng een Ya̱u̱d,
e̱be̱nte̱k nonno be̱ni̱nno̱k, niga olli lo̱o̱tu̱ do̱o̱k.”#Caliwon 117:1
12Eher bo̱do̱k a̱ri̱to̱i̱ti̱ ci zoz ci Ta̱mu̱ta̱dde̱no̱ een zara Isaya, azi ne,
“Ingazi atin Egeroci ci e̱e̱t ci een Jesse,
kar ki̱ki̱ya̱ kize alaan ci abal lo̱o̱cco̱k do̱o̱k;
kar atin ol cik iróng een Ya̱u̱d do̱o̱k kartik zi̱nze̱tti̱ nonno.”#Isaya 11:10
13Anyik bai Ta̱mu̱ta̱dde̱n wa karike naga zi̱nze̱tti̱ ko̱ ka̱a̱nyu̱ng talninet ki gano gi̱i̱ye̱ ci a̱tu̱yyu̱ niga nonno ko̱, kar zin niga aartik zi̱nze̱tti̱ cuggo̱k nonno komize ci Vongiz ci A̱li̱le̱.
Uwahek Pa̱u̱lo̱ ol cik iróng e̱e̱ggi̱n Ya̱u̱d kaviyak cik abunna
14Gotonogga ki ngonogga tu̱we̱nta̱, ka̱gga̱yyu̱ng abunnanu niga go̱o̱lo̱we̱ do̱o̱k, eci a̱gga̱yyu̱ zoz ci Ta̱mu̱ta̱dde̱n wa een de̱de̱ ju̱rru̱m, anyakku arizet ci edemezu e̱le̱tti̱ cuggo̱k. 15Imma zin warage necu, anyak zo̱zzo̱k u̱gge̱ cik keherakkung anna i̱ge̱t mozinta, abunna kobodekku̱ng bo̱do̱k, eci aanya Ta̱mu̱ta̱dde̱n deten cinne. 16Ahalana Ta̱mu̱ta̱dde̱n kar abunna ka̱li̱ngli̱nge̱k Ye̱su̱ Ki̱ri̱sto̱ kize tuwayoit orgene ci ol wak iróng een Ya̱u̱d, kar ki̱ye̱le̱k nogo kaviyak cik abunna. Ogon Ta̱mu̱ta̱dde̱n niko kar ol wak iróng een Ya̱u̱d kumucet Ta̱mu̱ta̱dde̱n, bak elemi enne muci ci aanyik nogo Vongizi ci A̱li̱le̱.
17Imma zo̱ze̱ ci Ye̱su̱ Ki̱ri̱sto̱, ka̱di̱ngdi̱nga̱ni̱ anna Ta̱mu̱ta̱dde̱n li̱ngli̱ngo̱nte̱ cinne. 18Iróng atin anna kozozi zoz imma, kozozi zoz ci kaal cik ogon Ki̱ri̱sto̱ li̱ngli̱ngo̱nte̱ cinanni, kanyahak ol wak iróng een Ya̱u̱d ki̱vi̱ta̱ ko̱to̱ngo̱o̱ltte̱ Ta̱mu̱ta̱dde̱n, gi̱i̱ye̱ ci kogonni anna icima kozozi utuga. 19Ku̱tu̱gu̱ra̱ anna nogo kaale cik a̱vu̱la̱ ogon Ye̱su̱ Vongize ci A̱li̱le̱. Kuwaheya nogo kaviyak cik abunna Ki̱ri̱sto̱, kakane Jerusalema kuk rok lo̱o̱c ci een zara Illyricum. 20Korongi gon la̱du̱n kuwahek ol kaviyak cik abunna ngati ngen kaviyaha cik Ki̱ri̱sto̱ kuzuca. Iróng anna korongi keteehenyek ce̱e̱z ngati adawek e̱e̱ti̱ lolanya ciginnek. 21Ogon ki i̱yo̱ko̱ ming e̱he̱rye̱ Warage ci Ta̱mu̱ta̱dde̱no̱, azi ne,
“Ovvo ol wak ngen kiziyet nonno ovvo atin acinni,
kar ol wak ngen kiziyet zoz cinne, ovvo atin a̱gga̱.”#Isaya 52:15
22Korongi gon la̱du̱n kar ki̱vo̱nnu̱ng ngati een Roma, alamnya li̱ngli̱ngo̱ne̱ cinanni ko̱.
Orong Pa̱u̱lo̱ keronnak Roma
23I̱yo̱ko̱ zin, kedeca anna li̱ngli̱ngo̱n ci Ye̱su̱ lo̱o̱co̱we̱ balik kotowe anna ke̱ do̱o̱k, korongi ba̱li̱ye̱ ki̱vo̱nnu̱ng izeto e̱rki̱nya̱ meele. 24Korongi anna ku̱tu̱gu̱ zoz cu ming kokko anna lo̱o̱ce̱ ci een Spain. Aave zin zoz ci kokko anna kadiranung zinine cinanni, kar eeltawang eronta, ngati arrak anna ka̱vvu̱to̱ ki i̱ge̱t do̱yo̱i̱t. 25I̱yo̱ko̱, ngen anna kokko Jerusalema, kokkoye kaal cik eelanne ol cik a̱tu̱we̱ gonoggi nginati. 26Oowa ol cik a̱tu̱we̱ lo̱o̱co̱we̱ cik Macedonia ki Achaia kaal cik i̱tto̱ni̱k ol wak a̱tu̱we̱ amati Jerusalema. 27Ogon nege zoz necu do̱ zi̱nze̱tti̱nne̱ cik voorik. Agano nege ming ogon zoz necu. Ming ozol olli Ya̱u̱do̱ ki ol wak iróng een Ya̱u̱d ma̱yu̱we̱ne̱t ci Vongizo, ozol nege bu̱k ki olli Ya̱u̱do̱ kaal cik a̱ma̱yu̱we̱ Ta̱mu̱ta̱dde̱n nogo. 28Ming kuzuca Jerusalem kanyiha ol ne̱ke̱ kaal labak, kokko atin anna kadiranung goola ming kokko lo̱o̱ce̱ ci een Spain. 29Ka̱gga̱ ming kokko ki̱vo̱nnu̱ng, a̱ma̱yu̱kke̱t atin Ki̱ri̱sto̱ agit do̱o̱k.
30Gotonogga ki ngonogga tu̱we̱nta̱, kilalekkung zare cik Manyitinna Ye̱su̱ Ki̱ri̱sto̱ ki bo̱do̱k rezinte wa a̱kku̱ Vongize ci A̱li̱le̱, abunna ming kozol piryanzet cinanni ki i̱ge̱ta̱, ngati gon alawekkang Ta̱mu̱ta̱dde̱n. 31Alayeang Ta̱mu̱ta̱dde̱n abunna ming eelanna azzine cik ol wak iróng a̱tu̱we̱ lo̱o̱ce̱ ci Ju̱de̱ya̱, kar ol cigannik Jerusalema katalit li̱ngli̱ngo̱n ci kogonni anna ko̱. 32Alayeang Ta̱mu̱ta̱dde̱n keelawan kar anna ki̱vo̱nnu̱ng ngati katalnine kar niga bu̱k atalit. 33Kala Ta̱mu̱ta̱dde̱n wa aanyyet gano, anyik bai gano ka̱vvu̱ ngatinno̱ng do̱o̱k. Nonno nenen.
Zvasarudzwa nguva ino
Roma 15: tex
Sarudza vhesi
Sarudza zvinyorwa izvi
Yenzanisa
Pakurirana nevamwe
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© 2018, Wycliffe Bible Translators, Inc. All rights reserved.