Roma 1
1
Zawinet ci Pa̱u̱lo̱
1Annita Pa̱u̱lo̱ wa ke̱e̱ni̱ du̱ca̱i̱t ci Ye̱su̱ Ki̱ri̱sto̱ ci keheri waraga cu, atahala Ta̱mu̱ta̱dde̱n annit kize to̱ni̱a̱t#1:1 To̱ni̱a̱k: E̱e̱ggi̱n ol ne̱ko̱ cik i̱tto̱n Ye̱su̱ doize cinne kar koot ke̱de̱me̱zi̱t ol zoz cinne kar bo̱do̱k kanyik nogo doiz ci otowe nege kuulo cik lo̱rye̱nta̱k kar kangaruc ol mo̱ri̱zo̱we̱ bu̱k. kar kuwahek ol kaviyak cik abunna.#1:1 Kaviyak cik abunna: Een necu zoz ci obod ki Ye̱su̱ Ki̱ri̱sto̱ wa bali utunya mu̱nye̱n cigga̱c ngati a̱da̱kne̱ enne ta̱la̱ke̱ca̱ kar kaanyyet ruget ci abak udut. 2I̱ye̱la̱ Ta̱mu̱ta̱dde̱n ba̱li̱ye̱ kaviyak ne̱k abunna ke̱, go̱o̱le̱ ci anyike a̱ri̱tto̱k cik zoz cinne keteherttek waraga wainne a̱li̱le̱. 3Een kaviyaha ne̱k a̱li̱le̱ ko̱ zoz ci obod ki Ngerinne wa a̱rri̱ta̱i̱ kize e̱e̱t ci diiri tatuge ci alaan wa een Da̱vi̱de̱#1:3 Da̱vi̱de̱: Atahala Ta̱mu̱ta̱dde̱n nonno kize alaan ci Israilo kar bo̱do̱k a̱kku̱ atin alaani ci riili boore cinne, ci atin abal lo̱o̱c udut. Een alaani neci Ye̱su̱ Ki̱ri̱sto̱. Ikeb Caliwon 132:11-12; To̱na̱i̱t 2:30. Abak bali Da̱vi̱de̱ e̱rki̱nya̱ i̱bbo̱ng co̱de̱ baling ngen Ye̱su̱ ki̱ti̱rra̱i̱. Ikeb 1 Samwel 16-30; 2 Samwel 1-24; 1 Alaat 1-2.. 4I̱ye̱la̱ Vongizi ci Ta̱mu̱ta̱dde̱no̱ een Ye̱su̱ Ki̱ri̱sto̱,#1:4 Ye̱su̱ Ki̱ri̱sto̱: Azi keng cik zar cik een Ye̱su̱ ko̱ ne i̱ti̱ri̱zze̱t Ta̱mu̱ta̱dde̱n agita. Utuge ci Gi̱ri̱yo̱ azi keng ci zar cik een Ki̱ri̱sto̱ ko̱ ne, wa o̱de̱ atahala Ta̱mu̱ta̱dde̱n kize Alaan. Utuge ci I̱bu̱ru̱ azi keng ci zar cik een Ki̱ri̱sto̱ ko̱ ne Missaya. Manyitinna Ngerrti Ta̱mu̱ta̱dde̱no̱ bali itingawe enne nonno daiza. 5Imma zin ngati Ye̱su̱ Manyi bunnat, aanya enne annit deten ci keene to̱ni̱a̱t ci kar kuwahek ol kaviyak waginnek abunna, kar ol wak iróng een Ya̱u̱d do̱o̱k ku̱tu̱we̱t nonno, kar ku̱zu̱tte̱ zoz neci. 6Atahalaung Ta̱mu̱ta̱dde̱n i̱ge̱ta̱ bu̱k ol cik a̱tu̱we̱ abak lo̱o̱ce̱ ci Romi izet ol cik Ye̱su̱ Ki̱ri̱sto̱.
7Keherik anna waraga cu ol cik a̱li̱le̱ irez Ta̱mu̱ta̱dde̱n abak lo̱o̱ce̱ ci Romi, kar bo̱do̱k Ta̱mu̱ta̱dde̱n katahala nogo kizeto ol ciginnek.
Anyik Ta̱mu̱ta̱dde̱n Be̱e̱ti̱nna̱ ki Manyi Ye̱su̱ Ki̱ri̱sto̱ ka̱a̱nyu̱ng i̱ge̱t do̱o̱k gano ki deten.
Innat Pa̱u̱lo̱ Ta̱mu̱ta̱dde̱n
8Arrak oowa, kanyike anna Ta̱mu̱ta̱dde̱n zany zare cik Ye̱su̱ Ki̱ri̱sto̱ zo̱ze̱ cunno̱ng ol wak a̱tu̱we̱ Roma; eci ol do̱o̱k lo̱o̱co̱we̱ ozoz tu̱we̱ne̱t cunno̱ng. 9A̱gga̱ Ta̱mu̱ta̱dde̱n ming kalawekku̱ng anna i̱ge̱t Ta̱mu̱ta̱dde̱n zinine cinanni do̱o̱k odohize, kuwahek ol kaviyak cik abunna obod ki Ngerinne. 10Kala anna Ta̱mu̱ta̱dde̱n odohize kar kaanya gool ci ki̱vo̱nnu̱ng.
11Korongi anna oroot kar ki̱ki̱ya̱ kicinung, kar kedemezung arizet ci riili Vongizo, kar okkomit kak, 12kar anna ki i̱ge̱t do̱o̱k kizocet tu̱we̱ne̱t cinna kokkomit ne kak. 13Gotonogga ki ngonogga tu̱we̱nta̱, korongnyung abunna ming a̱gga̱yyu̱ kodola anna kar ki̱ki̱ya̱ ki̱vo̱nnu̱ng lak cik meelek giir, abarik anyak kaal cik alamnyan. Korongi gon gool ci kokko ka̱li̱ngli̱nge̱ ju̱rru̱m ngatinno̱ng kar ol ki̱vi̱ta̱k Ta̱mu̱ta̱dde̱n ki bali ming ka̱li̱ngli̱nge̱k ol wak iróng een Ya̱u̱d ke̱, kar kelemtta Ye̱su̱ Ki̱ri̱sto̱. 14Aanya Ta̱mu̱ta̱dde̱n kuwahek kaviyak ne̱k abunna ko̱ ol cik een Gi̱ri̱k ki cik iróng een Gi̱ri̱k, kar bo̱do̱k kuwahek ol wak egenyi ki wak tarbalik. 15Korongi zin anna oroot kar ku̱du̱wa̱u̱ng kaviyak cik abunna i̱ge̱t ol cik Romi.
16Iróng anna ko̱ngo̱o̱le̱ kar kuwahek ol kaviyak cik abunna, eci kaviyaha anyak doiz ci Ta̱mu̱ta̱dde̱no̱ anyike ol wak elemi nonno do̱o̱k ti̱ri̱ze̱ne̱t. Kuwahek anna kaviyak ne̱ko̱ arrak Ya̱u̱d, kar zin ol wak iróng een Ya̱u̱d. 17Eci kaviyahe cik abunna Ye̱su̱ i̱ye̱la̱ ming a̱kku̱ bunnati ngati Ta̱mu̱ta̱dde̱no̱, aara zin ol balik u̱tu̱gu̱zzo̱ mu̱nye̱n ke̱ kizeto ol cik abunna, a̱kku̱ bunnati neci tu̱we̱nta̱ arrak oowa okko rok vu̱rru̱t, ki i̱yo̱ko̱ ming e̱he̱rye̱, azi ne, “Abak atin e̱e̱ti̱ ci abunna tu̱we̱nta̱.”#Habakkuk 2:4
Mozinet ci Ta̱mu̱ta̱dde̱no̱
18I̱ye̱la̱i̱ mozinet ci aburne Ta̱mu̱ta̱dde̱n nong ngati ol wak abure zoz wainne een de̱de̱ ta̱mu̱-kenga, okko atin enne edez nogo. Anyike nege zoz ci gerze kize ci ommog zoz ci een de̱de̱. 19Edez atin Ta̱mu̱ta̱dde̱n ol ne̱ke̱, eci nege a̱gga̱ Ta̱mu̱ta̱dde̱n, i̱ye̱la̱i̱ zoz cinne kicinnet ebere do̱o̱k, nonno ele ci adiman ki̱ye̱la̱i̱ ju̱rru̱m. 20Akane kanante ci lo̱o̱tu̱, a̱gga̱ ol komiz ci Ta̱mu̱ta̱dde̱no̱ ngati idimane enne kaal cik aavtte udut, ki doiz cinne. Ming nu̱nu̱n iróng naga kacin komiz cinne zinino eberene, iróng e̱e̱ti̱ imma anyak gool ci amikzene komiz cinne wa aave udut, kacin naga kaale cik eenyca enne ko̱.
21A̱gga̱ ol ne̱ke̱ ming aave Ta̱mu̱ta̱dde̱n to, iróng zin nege a̱di̱ngdi̱nga̱n nonno, icima anyike zany. Abarik anyait i̱no̱ni̱ ci gerze, iditet zi̱nze̱tti̱ cigge̱k ne pit. 22Ming i̱no̱n nege azi ne, kegenya nu̱nu̱n, abarik izeto tarbale oroot. 23Utunget nege iróng ngen ala Ta̱mu̱ta̱dde̱n de̱de̱ wa aruge udut, abarik i̱di̱ngdi̱nga̱nni̱t to̱do̱yyo̱k wak oova ol keene iróng aruge, ki i̱yo̱ko̱, iballi, elegje, ki elegje wak a̱vu̱vu̱t lo̱o̱ta̱, aanyik e̱e̱ti̱ ci diiri kaal ne̱ko̱ kizeto ta̱mu̱ta̱dde̱ne̱t cigge̱k.
24Utungek zin Ta̱mu̱ta̱dde̱n nogo ku̱tu̱gu̱zzo̱ kaal cik gerzek irez zi̱nze̱tti̱ cigge̱k, a̱wu̱l e̱le̱tti̱, ottodo kiwagon elegje. 25Eci utuhuwet nege zoz ci Ta̱mu̱ta̱dde̱no̱ wa een de̱de̱ kize volong, ala kaal wak eenyca Ta̱mu̱ta̱dde̱n, abarik weda nege innat Manyi udut. Nonno nenen.
26Imma zin gi̱i̱ye̱ neci gerze ogon nege ko̱, utung zin Ta̱mu̱ta̱dde̱n nogo ku̱tu̱gu̱zzo̱ kaal cik gerzek amin zi̱nze̱tti̱ cigge̱k. Iróng ngaai ngen orong baiz ki ol cik macik, ottodo abarik ngaai nege e̱le̱tti̱ne̱. 27Ovvo ol cik macik ogon niko bu̱k, iróng ngen oogin ki ngaai, abarik ottodo ol cik macik nege do̱ e̱le̱tti̱ne̱. Ogon kaal cik iróng ol cik diirik acin eberene. Edez Ta̱mu̱ta̱dde̱n nogo kaale cik gerzek ogon nege ko̱.
28Imma go̱o̱le̱ ci iróng ol ne̱ke̱ orong ka̱gga̱c Ta̱mu̱ta̱dde̱n, icinnek zin enne nogo kabalit e̱le̱tti̱ cigge̱k zi̱nze̱tti̱nne̱ cik vangvangik ko̱, zoz zin ci ogon nege kaal cik gerzek ko̱ necu. 29E̱e̱ggi̱n kaala ne̱k gerzek aavtte zi̱nze̱tti̱nne̱ cigge̱k ko̱, gerziten, ki meder, ki zi̱nze̱tti̱ cik a̱ppi̱nte̱k, ki munyenet ol, ki dangonet, ki gool ci alabane ol kaal, ki etteddo ki ol zo̱o̱, omomot ol, 30a̱du̱wa̱k ol zoz ci gerze, amarine Ta̱mu̱ta̱dde̱n. A̱ppi̱k e̱le̱tti̱, ozozik ol gerzet, odong e̱le̱tti̱, i̱no̱n odohize gi̱i̱ imma ci gerze een jor. Iróng ol ne̱ko̱ o̱ngo̱o̱le̱ be̱e̱ti̱gge̱k. 31Aavtte o̱o̱tti̱ pad, iróng anyak tu̱we̱ne̱t, iróng wo̱ye̱ eelannet gi̱i̱ imma, iróng irez icima amanik ol u̱gge̱ cik apirna. 32Ming a̱gga̱ nege nu̱nu̱n ju̱rru̱m edez lo̱ti̱nno̱wa̱ cik abunna Ta̱mu̱ta̱dde̱no̱ ol daiza zo̱zzo̱we̱ cik ogon nege, ma̱i̱je̱ nege ogon oroot kar kelemtta ol cik ogon niko bu̱k.
Zvasarudzwa nguva ino
Roma 1: tex
Sarudza vhesi
Sarudza zvinyorwa izvi
Yenzanisa
Pakurirana nevamwe
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© 2018, Wycliffe Bible Translators, Inc. All rights reserved.