Buk wa To̱ni̱a̱u̱ 5
5
Ananiyas ki Savira
1Anyak da̱ e̱e̱t imma ci een zara Ananiyas ki ngaa cinne een zara Savira, utuyyoi nege bu̱k lo̱o̱c ci da̱ anyak nege. 2Azi ngaa cinne ne, kegenyi u̱lu̱gu̱ny o̱ro̱bi̱ya̱ u̱gge̱ kize ciginnek, kar kanyaha u̱gge̱ karik to̱ni̱a̱k zo̱o̱ lo̱o̱ta̱.
3Ize zin Peturu ne, “Ananiyas, nyaa ming anyik i̱nna̱ Sitan#5:3 Sitan: Awu ol nonno azi ne, lo̱rye̱ni̱t wa een alaan ci anjilonyau wak bali abure Ta̱mu̱ta̱dde̱no̱ ta̱mu̱-kenga, kar Ta̱mu̱ta̱dde̱n kottowak nogo lo̱o̱c. I̱vi̱ta̱ zin anjilonya ne̱ko̱ izeto kuulo lo̱o̱ta̱ ngatu. IkebO̱no̱zzo̱k 12:7-9. kuwe zinin cunne do̱o̱k ngati ovolonge Vongiz ci A̱li̱le̱ a̱lu̱gnye̱ o̱ro̱bi̱ya̱ u̱gge̱ cik utene i̱nna̱ lo̱o̱c cunne ko̱? 4Ma baling ngen i̱nna̱ tuwek lo̱o̱c, iróng ba̱li̱ye̱ een lo̱o̱c cunne? Ma baling utuwoi i̱nna̱ ke̱, iróng o̱ro̱bi̱ya̱na̱ aavtte azzine cigunnek? Nyaa ci aanyi tu̱gu̱ gi̱i̱ ci ogon niko ko̱? Iróng zin i̱nna̱ a̱lu̱ti̱ ol cik diirik, abarik a̱lu̱ti̱ i̱nna̱ Ta̱mu̱ta̱dde̱n.”
5Baling izik Ananiyasi zoz necu, u̱yu̱we̱ zin enne niko kar zin ka̱da̱k. Kar zin dalanzet ci a̱ppwe̱ kiddera ol do̱o̱k wak aziye zoz neci. 6I̱vi̱ta̱ zin logoz, umudmudanit ele cinne, kar zin ko̱o̱tte̱ nonno reena kar ka̱da̱c.
7Baling edeca e̱e̱ti̱ cinne sanya i̱i̱yo̱, i̱ki̱ya̱ ngaa cinne, iróng enne a̱gga̱ nyaa ci i̱i̱na̱k ol. 8I̱jji̱n zin Peturu nonno, “Du̱wa̱ka̱ da̱, e̱e̱ggi̱n ne̱ko̱ o̱ro̱bi̱ya̱ wak utennu i̱nna̱ ki Ananiyas lo̱o̱c ko̱?”
O̱bo̱de̱k zin ngaa cinne azi ne, “I̱i̱ny, o̱ro̱bi̱ya̱ ne̱ke̱ do̱o̱k ne̱ko̱.”
9Izek zin Peturu nonno ne, “Nyaa niga ming atimanu Vongiz ci Manyi ko̱? Cinno, zo̱o̱ cik ol wak a̱da̱ mac cunne ke̱ izeto ojone tatuga, ovvo atidic nege odongi i̱nne̱ta̱ bu̱k.”
10Okko i̱i̱ neci ele u̱yu̱we̱ enne zoone cik Peturu kar ka̱da̱k. I̱vi̱ta̱ zin logoz odongit nonno kar zin koot ka̱da̱c ngati mac cinne abanyca. 11Iddera dalanzet ol cik ke̱le̱ci̱a̱k#5:11 Ke̱le̱ci̱a̱: Een ke̱le̱ci̱a̱ ol cik a̱tu̱ Ye̱su̱ Ki̱ri̱sto̱ kar ku̱lu̱te̱ nga̱to̱de̱ ngati alawe Manyi. do̱o̱k ki ol do̱o̱k wak iziyyet zoz necu.
Angaru to̱ni̱a̱ha̱ ol cik meelek
12U̱tu̱gu̱zzo̱ to̱ni̱a̱ha̱ kaal cik a̱vu̱la̱ meelek ki kaal cik aanyik ol ka̱ma̱li̱ltte̱ o̱o̱tti̱. Kar ol wak a̱tu̱we̱ do̱o̱k kurumto baale ci Solomoni ci aave reene ci Ce̱e̱z wa Ta̱mu̱ta̱dde̱no̱. 13I̱llo̱i̱ e̱e̱t imma ci orong kar kurumte ki nogo, ming nu̱nu̱n irez ol nogo oroot. 14Ngen zin, u̱tu̱we̱t zin ol cik macik ki ngaai cik meelek Manyi kar bali kurumtozik nogo. 15Imma zin zo̱ze̱ necu, anyakttak ol cik omori go̱o̱llo̱k kar abunna ri̱ri̱to̱ni̱ ci Peturu i̱i̱na̱k u̱gge̱ ming owo enne goola. 16I̱vi̱ta̱ zin koole cik meelek aburuk Jerusalem, anyahak ol wak omori ki wak anyak kuulo cik lo̱rye̱nta̱k kar zin nege do̱o̱k kangaruye.
A̱gi̱d alaata cik Ya̱u̱da̱k to̱ni̱a̱k
17Kar zin alaani ci a̱ddi̱ki̱re̱ wawaco Ce̱e̱ze̱ wa Ta̱mu̱ta̱dde̱no̱ ki ol wak orkor ki nonno do̱o̱k e̱e̱ggi̱n Saddocis ko̱, anyait meder zo̱ze̱ ci to̱ni̱a̱u̱. 18A̱gga̱mi̱t zin nege to̱ni̱a̱k kar zin kartik lagam ci ollu. 19Imma bali ba̱a̱l i̱ki̱ya̱ anjilo ci Manyi kar koo tatug ci lagamo kar zin to̱ni̱a̱ha̱ kiyokta. 20A̱nne̱k enne ne, “Oot, ibilet reene ci Ce̱e̱z wa Ta̱mu̱ta̱dde̱no̱ kar du̱wa̱k ol kaviyak cik ruget cik een jor ko̱.”
21Baling nge̱rre̱t ri̱ri̱wo̱na̱ i̱to̱zzo̱ re̱e̱nu̱n ci Ce̱e̱z wa Ta̱mu̱ta̱dde̱no̱, ki baling u̱du̱wa̱k anjilo nogo ke̱, kar zin ke̱de̱me̱zi̱t ol.
Baling u̱zu̱cca̱ alaani ci a̱ddi̱ki̱re̱ wawaco ki ol wak e̱e̱ggi̱n Saddocis orkor ki nonno kar ki̱vi̱ta̱k lo̱ki̱ko̱, kar ku̱tu̱yya̱ lo̱ddi̱ki̱re̱ cik olli Israilo. Kar ki̱tto̱nni̱t aciir rok lagam koot kanyakta to̱ni̱a̱k. 22Imma baling ovvo aciiri a̱ru̱m lagam, aruba to̱ni̱a̱k ming a̱zze̱ to. I̱mi̱rrte̱ zin nege oot u̱du̱kta̱k ol, 23a̱nne̱k ne, “Kurubta tatug ci lagamo ming anyuge, ki ol wak ebekce ming abile tatuga; ma̱i̱je̱ ming kovvo naga kooya, i̱llo̱i̱ e̱e̱t imma ecito.” 24Baling okko ddi̱ki̱ryo̱i̱ti̱ ci ol wak ebek Ce̱e̱z wa Ta̱mu̱ta̱dde̱no̱ ki alaat cik olli wawaco aziye zoz necu, u̱ku̱lte̱k je̱e̱n, a̱ma̱li̱ltte̱ o̱o̱tti̱ azi ne, “Oot ucca to̱ni̱a̱ha̱ ki i̱ni̱n?”
25I̱ki̱ya̱k zin e̱e̱ti̱ imma nogo kar zin kizek ne, “Izikto di̱! Aavtte ol balik arikku lagam ke̱ reene ci Ce̱e̱z wa Ta̱mu̱ta̱dde̱no̱, edemez nege ol.” 26Itinga ddi̱ki̱ryo̱i̱ti̱ ki ol ciginnek, ovvo anyaha to̱ni̱a̱k. Iróng nege anyaha nogo i̱ba̱ti̱ne̱, eci nege o̱ngo̱o̱le̱ ovvo ol ovoc nogo biyene.
27Baling anyakttak nege to̱ni̱a̱k lo̱ki̱ko̱, kar zin kaanycik nogo kibilet lo̱ki̱ka̱ orgena kar zin alaani ci a̱ddi̱ki̱re̱ wawaco ki̱jji̱n nogo. 28Izek ne, “Ka̱du̱wa̱kku̱ng ka̱nne̱kku̱ng ne, ma bo̱do̱k edemezu ol zoz ci obod ki Ye̱su̱, icinnet da̱ niga u̱tu̱gu̱zzu̱ nya! Azzanteu de̱mzi̱ne̱t cinno̱ng ko̱ Jerusalem veelek, kar zin bo̱do̱k orongit ming aanyettu kizetta ol cik ka̱ru̱ka̱ e̱e̱t neci ka̱da̱k!”
29O̱bo̱dde̱k Peturu ki to̱ni̱a̱k u̱gge̱, “Abunna la̱du̱n ming ko̱ngo̱o̱le̱ Ta̱mu̱ta̱dde̱n kommog e̱e̱t ci diiri. 30Itingawe Ta̱mu̱ta̱dde̱n wa ji̱ji̱ti̱gga̱c Ye̱su̱ daiza, bali a̱ru̱kku̱ niga nonno ka̱da̱k keete ci een ta̱la̱ke̱c. 31Odong zin Ta̱mu̱ta̱dde̱n nonno kar kuk karik ka̱vvu̱ a̱tte̱ cinne a̱zzo̱ kize Alaan ki Ti̱ri̱zo̱i̱t, kar wo̱ye̱ enne kaanyik olli Israilo ko̱bo̱dda̱i̱ zi̱nze̱tti̱ ba̱ci̱no̱we̱ kar kalalek nogo. 32Ke̱e̱ggi̱nna̱ zin bbacak kaale ne̱ko̱,#5:32 Ke̱e̱ggi̱nna̱ zin bbacak kaale ne̱ko̱: Acin to̱ni̱a̱ha̱ Ye̱su̱ ming a̱da̱i̱, kar kitinga daiza, kar ki̱mi̱re̱ kuk ta̱mu̱-kenga. kar zin bo̱do̱k Vongizi ci A̱li̱le̱ bali aanyik Ta̱mu̱ta̱dde̱n ol wak o̱ngo̱o̱le̱ nonno.”
33Baling ovvo nege aziye zoz necu niko, avaracit nege oroot, orong abarik ku̱ru̱we̱t nogo ka̱da̱i̱to̱. 34Ma̱i̱je̱ da̱ Varacisoc#5:34 Varacisoc: E̱e̱ggi̱n Varacisi de̱me̱zzo̱k wak edemez ol lo̱ti̱nno̱k wak Musesi, a̱tu̱ nege vongiz, ki anjilo ci Ta̱mu̱ta̱dde̱no̱, ki bo̱do̱k zoz ci azi ne ingazi atin ol daiza. IkebBuk wa To̱ni̱a̱u̱ 23:8. ci een zara Gamaliel, ci een de̱me̱zo̱i̱t ci lo̱ti̱nno̱u̱, o̱ngo̱o̱le̱ gon ol nonno do̱o̱k, ingazi gon je̱e̱na̱ lo̱ki̱ka̱, kar kaanyik arrak to̱ni̱a̱k kiyoit koot reena do̱yo̱i̱t. 35Izek zin enne ol lo̱ki̱ka̱ ne, “Olli Israilo, i̱no̱ni̱t di̱ arrak gi̱i̱ ci kar orongnyu u̱tu̱gu̱zze̱k ol ne̱ko̱ ju̱rru̱m. 36Imma e̱rki̱nya̱ balik ke̱, i̱ye̱la̱ bali e̱e̱ti̱ ci een zara Theudos ele, azi ne een enne e̱e̱t ci riili bu̱k, kar ol cik e̱e̱ggi̱n obet we̱c kunuwet nonno. U̱ru̱we̱ zin enne, kar ol ciginnek do̱o̱k kazante ki̱zzi̱ gi̱i̱ imma to. 37Ma bali vu̱rrta̱, i̱ki̱ya̱ e̱e̱ti̱ imma ci een zara Judas wa Ga̱li̱li̱ i̱i̱nya̱we̱ wak a̱gi̱le̱ gaala olli o̱ro̱gjo̱we̱. A̱gga̱mi̱t bo̱do̱k ol cik meelek de̱mzi̱ne̱t cinne. Kar vu̱rrta̱ u̱ru̱we̱t bo̱do̱k ol nonno ka̱da̱k, kar ol balik orkor ki nonno ke̱ azzante do̱o̱k. 38Ka̱nne̱kku̱ng zin zo̱ze̱ necu ne, utungtek ol ne̱ko̱ do̱, aanycik koot, ming een li̱ngli̱ngo̱n icima de̱mzi̱ne̱t cinne̱ng ci e̱e̱t ci diiri, ngen atin a̱zze̱ dakdak. 39Ma̱i̱je̱ ming een ngati Ta̱mu̱ta̱dde̱no̱, i̱llo̱i̱ gool ci kar ibilizte nogo udut, abarik amudannu e̱le̱tti̱ ming oyohonnu ki Ta̱mu̱ta̱dde̱n.”
40I̱ta̱k zoz cinne zi̱nze̱tti̱ cigge̱k. U̱tu̱yya̱ zin nege to̱ni̱a̱k ecito kar ki̱bi̱cce̱t nogo a̱lle̱ne̱. U̱du̱kta̱k nogo a̱nne̱k ne, ma ozozu zoz ci obod ki Ye̱su̱ dee, kar kanycik nogo koot.
41Iyokta zin to̱ni̱a̱ha̱ lo̱ki̱ka̱ talninta eci nege a̱gga̱ ming apirna nege zare cik Ye̱su̱. 42Kar zin gon odohize ovvo reene ci Ce̱e̱z wa Ta̱mu̱ta̱dde̱no̱ ki ce̱e̱zi̱nne̱, ci iróng nege abiliz de̱mzi̱ne̱t ki uwai kaviyak cik abunna#5:42 Kaviyak cik abunna: Een necu zoz ci obod ki Ye̱su̱ Ki̱ri̱sto̱ wa bali utunya mu̱nye̱n cigga̱c ngati a̱da̱kne̱ enne ta̱la̱ke̱ca̱ kar kanyyet ruget ci abak udut. Ye̱su̱ ci een Ki̱ri̱sto̱.
Zvasarudzwa nguva ino
Buk wa To̱ni̱a̱u̱ 5: tex
Sarudza vhesi
Sarudza zvinyorwa izvi
Yenzanisa
Pakurirana nevamwe
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© 2018, Wycliffe Bible Translators, Inc. All rights reserved.