Buk wa To̱ni̱a̱u̱ 17
17
Pa̱u̱lo̱ ki Silas Te̱se̱lo̱ni̱ka̱kte̱
1Eronit zin Pa̱u̱lo̱ ki Silas, iyok o̱rge̱ ci een Amphipolis ki Apollonia ku̱lu̱ce̱ koot o̱rge̱ ci een Te̱se̱lo̱ni̱ka̱ nginti anyak Ce̱e̱z wa Lawinto Ya̱u̱do̱. 2Kiwagon keere cinne la̱du̱n, uk Pa̱u̱lo̱ Ce̱e̱ze̱ wa Lawinto, imma I̱i̱te̱ne̱ wa Yu̱bze̱nto̱ een i̱i̱yo̱, u̱du̱wa̱k enne ol ungec ci zoz wa e̱he̱rye̱ Warage ci Ta̱mu̱ta̱dde̱no̱, 3oobek nogo pirnanet ci Ki̱ri̱sto̱ ki nginti okko enne ingazi daiza. A̱nne̱k nogo ne, “Ye̱su̱ ci ka̱du̱wa̱kku̱ng anna ko̱, een enne Ki̱ri̱sto̱.” 4Elemtta ol uggak cik e̱e̱ggi̱n Ya̱u̱d balik aziye Pa̱u̱lo̱ ki Silas ke̱ zoz ci Ye̱su̱, ki bo̱do̱k koole ci a̱ppwe̱ iróng e̱e̱ggi̱n Ya̱u̱d cik o̱ngo̱o̱le̱ Ta̱mu̱ta̱dde̱n ki ngaai u̱gge̱ wak riilik.
5Anyait zin Ya̱u̱di̱ uggak meder, u̱lu̱tta̱ ol wak gerzek go̱o̱lo̱we̱, kar zin ki̱vi̱ta̱ kize koole, oyok ol orgato cabak. Oot ce̱e̱ze̱ ci Jason eci nege orong kar kanyaktak Pa̱u̱lo̱ ki Silas zu̱we̱. 6Baling iróng nege ngen amuda nogo, u̱tu̱gu̱rre̱t zin Jason ki ol u̱gge̱ wak a̱tu̱we̱ kar ko̱o̱tte̱ ngati ddi̱ki̱ryyo̱k cik o̱rgu̱, egereny azi ne, “Pa̱u̱lo̱ ki Silas wak a̱lu̱t ol lo̱o̱co̱we̱ do̱o̱k ko̱ cik i̱vi̱ta̱ ngintu, 7abarik een Jason ci bali ivata nogo ce̱e̱ze̱ cinne. Ibbez nege lo̱ti̱nno̱k cik alaan ci a̱ddi̱ki̱re̱ Romi#17:7 Alaan ci a̱ddi̱ki̱re̱ Romi: Een enne alaan ci a̱ddi̱ki̱rne̱ alaat cik lo̱o̱cco̱k u̱gge̱ ki bo̱do̱k Ju̱de̱ya̱ ki Ga̱li̱li̱ lo̱o̱ce̱ ci Ya̱u̱do̱. Awu olli Romi alaan ci a̱ddi̱ki̱re̱ kize Kesari. do̱o̱k, azi nege ne, anyak alaan imma ci een zara Ye̱su̱.”
8Baling iziyyet ddi̱ki̱ryo̱wa̱ cik o̱rgu̱ ki ol do̱o̱k zoz neci, utuburet zin nong oroot. 9Aanycik zin Jason ki ol wak a̱tu̱we̱ ko̱ ku̱ru̱we̱t o̱ro̱bi̱ya̱ ming ngen nege koogtai.
Elemtta olli Berea zoz ci Ye̱su̱
10Okko ba̱a̱li̱n neci ele, i̱tto̱ni̱t ol wak a̱tu̱we̱ Pa̱u̱lo̱ ki Silas, koot o̱rge̱ ci een Berea. Baling a̱ra̱yya̱ nege ngin neci, oot Ce̱e̱ze̱ wa Lawinto Ya̱u̱do̱. 11Abunna da̱ ol cik Berea oroot ommog cik Te̱se̱lo̱ni̱ka̱, elemtta nege zoz ci Ta̱mu̱ta̱dde̱no̱ talninta oroot. Ikebit zin nege Waraga ci Ta̱mu̱ta̱dde̱no̱ odohize, acin kaal cik edemez Pa̱u̱lo̱ ko̱ ming een de̱de̱. 12U̱tu̱we̱t zin olli Ya̱u̱di̱ cik meelek zoz ci Ye̱su̱, kar bo̱do̱k ngaai cik riilik iróng e̱e̱ggi̱n Ya̱u̱d ki odot cik iróng e̱e̱ggi̱n Ya̱u̱d.
13Baling iziyyet olli Ya̱u̱do̱ Te̱se̱lo̱ni̱ka̱kte̱ ming uwak Pa̱u̱lo̱ zoz ci Ye̱su̱ Bereakte, oot nege nginati bu̱k, kar zin nege kovolongte Pa̱u̱lo̱ ki Silas zu̱wa̱, utuburet zin nege nong. 14I̱tto̱ni̱t ol wak a̱tu̱we̱ ko̱ Pa̱u̱lo̱ ku̱lu̱ce̱ kunu liil ci a̱ddi̱ki̱re̱ ti̱ti̱m, imma Silas ki Ti̱mo̱te̱yo̱ irahek Bereakte. 15Ma̱i̱je̱ ol balik i̱nya̱ma̱n Pa̱u̱lo̱ ke̱, anyakttak nonno orog ci a̱ddi̱ki̱re̱ een Athens kar zin ki̱mi̱rte̱ ki zoz bali a̱du̱wa̱k nogo Pa̱u̱lo̱, a̱nne̱k ne, aanycik Silas ki Ti̱mo̱te̱yo̱ ki̱vi̱ta̱ ataman ngintu.
Pa̱u̱lo̱ o̱rge̱ ci a̱ddi̱ki̱re̱ een Athens
16Baling ngen Pa̱u̱lo̱ ere Silas ki Ti̱mo̱te̱yo̱ o̱rge̱ ci a̱ddi̱ki̱re̱ een Athens, a̱u̱ce̱ nonno zinin oroot, eci enne icin Athens ming anyak to̱do̱yyo̱k cik meelek ala ol. 17Uk Ce̱e̱ze̱ wa Lawinto, ozozo ki olli Ya̱u̱do̱ ki ol cik iróng e̱e̱ggi̱n Ya̱u̱d cik o̱ngo̱o̱le̱ Ta̱mu̱ta̱dde̱n, ki ngin wa utene ol kaal, ozoz enne odohize ki ol wak aavtte nginati. 18A̱ka̱tte̱ zin koole ci Epicurean ki Stoic wak a̱gga̱ zoz ko̱ adangto ki nonno. I̱jji̱nto̱ uggak ngatinne̱ng, “Orong e̱e̱ti̱ ci ozoz darace ko̱ kize ne?” Ovvo uggak azi ne, “Ogon ki e̱e̱ti̱ ci ozoz ta̱mu̱ta̱dde̱ne̱t cik i̱do̱ngi̱nnu̱.” A̱du̱wa̱ nege zoz necu eci Pa̱u̱lo̱ uwahek ol kaviyak cik abunna obod ki Ye̱su̱ ki ngazi daiza. 19O̱o̱tte̱ nege Pa̱u̱lo̱ kar kanyaktak nyakanganet cik Areopagus, kar kizettek ne, “I̱jja̱ da̱ du̱wa̱kke̱t de̱mzi̱ne̱t ci edemezi i̱nna̱ ko̱? 20Anyahakket i̱nna̱ zo̱zzo̱k cik aavtte do̱, korongnya ka̱gga̱yya̱ ke̱ngti̱ cigge̱k.” 21Eci ol cik abak o̱rge̱ ci a̱ddi̱ki̱re̱ een Athens ki i̱do̱ngi̱ ko̱ do̱o̱k, aavtte gaganiko abarik ozoz kar kiziyet kaviyak cik een jor odohize.
22Itinga zin Pa̱u̱lo̱ je̱e̱na̱ kar kozoz ngu̱me̱ ci lo̱ddi̱ki̱re̱ cik Areopagus, a̱nne̱k nogo ne, “Niga ol cik Athens, kacinni e̱e̱ggi̱nnu̱ ol cik a̱tu̱yyu̱ ta̱mu̱ta̱dde̱ne̱t oroot. 23Baling kowo anna ngintu do̱o̱k ke̱, kacinni ta̱mu̱ta̱dde̱ne̱t cuggo̱k, karuba i̱te̱le̱ ci e̱he̱rye̱ zoz cu: NGATI TA̱MU̱TA̱DDE̱N CI IRÓNG NAGA KA̱GGA̱. I̱yo̱ko̱ zin, korongi ku̱du̱wa̱u̱ng zoz ci Ta̱mu̱ta̱dde̱n cu, ci iróng niga a̱gga̱yyu̱ ko̱.
24“Ta̱mu̱ta̱dde̱n ci eenyca ta̱mu̱-keng ki lo̱o̱c ki kaal cik aavtte ngatu ko̱ een Manyi ci lo̱o̱tu̱ ki ta̱mu̱-keng, iróng zin abak ce̱e̱zi̱nne̱ wak eenyca e̱e̱ti̱ ci diiri azzine. 25Iróng e̱e̱ti̱ ci diiri adimana nonno azzine, iróng enne orong kar keelta ol nonno, eci een nonno ele ci aanyyet ruget ki vongiz do̱o̱k. 26Eteehenya Ta̱mu̱ta̱dde̱n ol do̱o̱k ngati e̱e̱t co̱de̱, kar i̱ki̱ya̱ e̱e̱ti̱ neci ki̱ti̱ra̱ ol cik lo̱o̱tu̱ ko̱ do̱o̱k. Baling ngen Ta̱mu̱ta̱dde̱n eteehenya e̱e̱t, a̱gga̱ ngintik atin abahe ol ki e̱rki̱nya̱ cik ovvo atin nege abahe. 27Ogon Ta̱mu̱ta̱dde̱n zoz necu do̱o̱k, kar naga koronggit nonno kar kurubta. Iróng enne aave reena ngatinna. 28‘Eci ngatinne, kabak naga kar bo̱do̱k kotoz ka̱vvu̱t to, ki i̱yo̱ko̱ ming kaavtte ko̱.’ Azi be̱ni̱nno̱wa̱ ciggo̱k uggak ne, ‘Ke̱e̱ggi̱n naga dooli ciginnek.’
29“Eci ke̱e̱ggi̱n naga dooli cik Ta̱mu̱ta̱dde̱no̱ ko̱, gerza ming ki̱no̱n, kazi ne, ogon enne ki zi̱i̱ti̱ ci ataltali icima dhahab icima bee ci adimanai arizeta. 30Eci ba̱li̱ye̱ Ta̱mu̱ta̱dde̱n ibbez ol kaale cik iróng nege a̱gga̱, abarik zin i̱yo̱ko̱ enne orongnyet agit lo̱o̱co̱we̱ do̱o̱k kuturta mu̱nye̱n cigga̱c do̱o̱k. 31Eci aarik enne i̱i̱te̱n ci okko atin enne ettede lo̱ki̱ko̱ ju̱rru̱m ngati E̱e̱t wa atahala enne. Okko atin E̱e̱ti̱ bali atahala enne ke̱ etted lo̱ki̱ko̱ neci, kar zin Ta̱mu̱ta̱dde̱n ki̱ye̱le̱k ol do̱o̱k ming een zoz neci de̱de̱, ngati ingane enne E̱e̱t neci daiza.”
32Baling ovvo aziye Pa̱u̱lo̱ ming ozoz tingawinet daiza, atararit ol uggak, ma̱i̱je̱ uggak azi ne, “Korongnya kizikta zoz necu atidic dee.” 33Imma nginati, utungek Pa̱u̱lo̱ ol lo̱ki̱ka̱ lo̱o̱c. 34U̱tu̱we̱t ol cikidik zoz ci Pa̱u̱lo̱. Imma olle ne̱k elemtta zoz ci Ye̱su̱ ko̱, anyak e̱e̱t ci een zara Dionysius ci een ddi̱ki̱ryo̱i̱t co̱de̱ lo̱ddi̱ki̱re̱i̱ cik Areopagus ki bo̱do̱k ngaa ci een zara Damaris ki ol u̱gge̱.
Zvasarudzwa nguva ino
Buk wa To̱ni̱a̱u̱ 17: tex
Sarudza vhesi
Sarudza zvinyorwa izvi
Yenzanisa
Pakurirana nevamwe
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© 2018, Wycliffe Bible Translators, Inc. All rights reserved.