1 Ko̱ri̱nto̱ 1
1
Zawinet ki lawinet ci Pa̱u̱lo̱
1Annita Pa̱u̱lo̱ wa bali atahala Ta̱mu̱ta̱dde̱n zo̱ze̱ cinne kize to̱ni̱a̱t#1:1 To̱ni̱a̱k: E̱e̱ggi̱n ol ne̱ko̱ cik i̱tto̱n Ye̱su̱ doize cinne kar koot ke̱de̱me̱zi̱t ol zoz cinne kar bo̱do̱k kanyik nogo doiz ci otowe nege kuulo cik lo̱rye̱nta̱k kar kangaruc ol mo̱ri̱zo̱we̱ bu̱k. ci Ye̱su̱ Ki̱ri̱sto̱#1:1 Ye̱su̱ Ki̱ri̱sto̱: Azi keng cik zar cik een Ye̱su̱ ko̱ ne i̱ti̱ri̱zze̱t Ta̱mu̱ta̱dde̱n agita. Utuge ci Gi̱ri̱yo̱ azi keng ci zar cik een Ki̱ri̱sto̱ ko̱ ne, wa o̱de̱ atahala Ta̱mu̱ta̱dde̱n kize Alaan. Utuge ci I̱bu̱ru̱ azi keng ci zar cik een Ki̱ri̱sto̱ ko̱ ne Missaya. ki gotonet tu̱we̱nta̱ wa een zara Sosthenes ci keherakkung waraga necu i̱ge̱t olli Ta̱mu̱ta̱dde̱no̱.
2Keherakkung i̱ge̱t waraga cu olli ke̱le̱ci̱a̱k#1:2 Ke̱le̱ci̱a̱: Een ke̱le̱ci̱a̱ ol cik a̱tu̱ Ye̱su̱ Ki̱ri̱sto̱ kar ku̱lu̱te̱ nga̱to̱de̱ ngati alawe Manyi. Ta̱mu̱ta̱dde̱no̱ wak abak lo̱o̱ce̱ ci een Ko̱ri̱nto̱. Atahalaung Ta̱mu̱ta̱dde̱n i̱ge̱t izet ol ciginnek a̱li̱le̱ zo̱ze̱ ci oromtoziu niga Ye̱su̱ Ki̱ri̱sto̱. Ki bo̱do̱k ol wak lo̱o̱tu̱ do̱o̱k balik atahala Manyi, kar nege bu̱k ki̱di̱ngdi̱nga̱ni̱t zar cik Manyitinna Ye̱su̱ Ki̱ri̱sto̱ wa een Manyi cinne̱ng ki agit bu̱k.
3Abunna bai Ta̱mu̱ta̱dde̱n wa een Be̱e̱ti̱nna̱ ki Manyi Ye̱su̱ Ki̱ri̱sto̱ ming a̱a̱nyu̱ng deten ki gano.
Aanyik Pa̱u̱lo̱ Ta̱mu̱ta̱dde̱n zany
4Kanyik gon anna odohize Ta̱mu̱ta̱dde̱n zany eci enne a̱a̱nyu̱ng deten cinne ngati Ye̱su̱ Ki̱ri̱sto̱. 5Eci ngatinne izetu niga do̱o̱k ol cik a̱gga̱yyu̱ zoz cinne ngati ozozu ki bo̱do̱k ke̱bi̱nta̱, 6eci zoz cinna̱ng wa obod ki Ki̱ri̱sto̱ uzucaung i̱ge̱ta̱. 7I̱yo̱ko̱ zin, i̱llo̱i̱ ma̱yu̱we̱ne̱t imma ci iróng niga anyakku ngati e̱re̱yyu̱ niga de̱de̱ Manyi Ye̱su̱ Ki̱ri̱sto̱ kar kobodak lo̱o̱c. 8Azunnung atin enne i̱ge̱t okkomit kak zee ki̱ki̱ya̱ Ye̱su̱ Ki̱ri̱sto̱, kar abait baiz ci a̱li̱le̱ rok i̱i̱te̱ne̱ ci okko Manyi Ye̱su̱ obodak lo̱o̱c. 9Ogonekku̱ng atin Ta̱mu̱ta̱dde̱n zoz necu de̱de̱, ogon gon enne zoz ci u̱du̱wa̱ enne, nonno ci a̱a̱nyu̱ng gool ci owowonu ki Ngerinne Ye̱su̱ Ki̱ri̱sto̱ wa een Manyitinna.
Ngero Ce̱e̱ze̱ wa Ta̱mu̱ta̱dde̱no̱
10Kilalekkung gotonogga ki ngonogga tu̱we̱nta̱, zare cik Manyitinna Ye̱su̱ Ki̱ri̱sto̱, abunna ming owowonu niga do̱o̱k kar ki̱zzi̱ zoz ci anyaha ngero orgen cunno̱ng kar abait baiz ngati arumenu nga̱to̱de̱ ki i̱no̱ni̱ co̱de̱. 11Gotonogga, ka̱du̱wa̱ zoz necu ko̱ eci anyak gotonogget ce̱e̱ze̱ ci Kaleo cik a̱du̱wa̱ka̱ annit ming anyakku niga dango orgene cunno̱ng. 12Kazi ne, azi keng ci zozo ne: Azi e̱e̱ti̱ co̱de̱ ngatinno̱ng ne, “Kanu anna Pa̱u̱lo̱”; okko imma azi ne, “Kanu anna Apollos”; okko imma azi ne, “Kanu anna Cephas#1:12 Cephas: Cephas anyak zar u̱gge̱ cik Si̱mo̱ne̱ Peturu. IkebJon 1:42.”; okko imma azi ne, “Kanu anna Ki̱ri̱sto̱.”
13Imma zin go̱o̱le̱ necu, gerza ming engeryu niga Ki̱ri̱sto̱. Iróng een annit Pa̱u̱lo̱ ci ba̱li̱ye̱ ka̱da̱i̱ keete ci een ta̱la̱ke̱c kar keelaung i̱ge̱ta̱ mu̱nye̱ne̱. Iróng ba̱li̱ye̱ niga a̱gga̱mnyu̱ ba̱ti̱ti̱mo̱ zare cik Pa̱u̱lo̱. 14Kanyike anna Ta̱mu̱ta̱dde̱n zany oroot, eci ngen anna ka̱gga̱me̱k e̱e̱t imma ngatinno̱ng ba̱ti̱ti̱mo̱ udut, ka̱gga̱me̱k ba̱li̱ye̱ anna Crispus ki Gaius ba̱ti̱ti̱mo̱ do̱ niko. 15I̱llo̱i̱ zin e̱e̱t imma ngatinno̱ng ci azi ne a̱gga̱ma̱ enne ba̱ti̱ti̱mo̱ zare cigannik. 16(De̱de̱, ka̱gga̱me̱ya̱ anna olli ce̱e̱z ci Stephanas ba̱ti̱ti̱mo̱; iróng zin anna ka̱gga̱ ming ka̱gga̱me̱ya̱ anna e̱e̱t imma ba̱ti̱ti̱mo̱ ngamani.) 17Eci iróng bali Ki̱ri̱sto̱ i̱tto̱na̱na̱ kar ka̱gga̱me̱k ol ba̱ti̱ti̱mo̱, abarik i̱tto̱na̱na̱ kar kuwahek ol kaviyak cik abunna,#1:17 Kaviyak cik abunna: Een necu zoz ci obod ki Ye̱su̱ Ki̱ri̱sto̱ wa bali utunya mu̱nye̱n cigga̱c ngati a̱da̱kne̱ enne ta̱la̱ke̱ca̱ kar kaanyyet ruget ci abak udut. iróng een zo̱zzo̱k cik e̱e̱t ci diiri genyizak, kar kaanyik ta̱la̱ke̱c#1:17 Ta̱la̱ke̱c: Ododek olli Romi ol ta̱la̱ke̱c ci een keet abunna ming edez u̱ce̱zi̱ e̱e̱t idic idic zee ka̱da̱k e̱e̱ti̱. ci Ki̱ri̱sto̱ kutunga komiz cinne.
Een Ki̱ri̱sto̱ genyiz ki komiz ci Ta̱mu̱ta̱dde̱no̱
18Eci een kaviyaha cik ta̱la̱ke̱ca̱k ko̱ tarbalzet ngati ol wak izeto daizzok, ma̱i̱je̱ ngati ol wak u̱mu̱dda̱ ti̱ri̱ze̱ne̱t, een komiz ci Ta̱mu̱ta̱dde̱no̱. 19Azi Ta̱mu̱ta̱dde̱n warage cinne ne,
“Kegerezani atin anna arizet ci e̱e̱t ci diiri;
kegerezani atin anna genyiz ci ol wak azi ne kegenya ko̱.”#Isaya 29:14
20I̱nno̱ genyiz ci e̱e̱t ci diiri? I̱nno̱ e̱e̱t ci edemez ol waraganya? I̱nno̱ e̱e̱t ci a̱gga̱ waraganya kar gon kadang ol kaale cik lo̱o̱tu̱ ko̱? Aanyik Ta̱mu̱ta̱dde̱n genyiz ci lo̱o̱tu̱ kize tarbal. 21Eci genyizi ci Ta̱mu̱ta̱dde̱no̱ aave lo̱o̱ta̱ ngatu, iróng zin olli lo̱o̱tu̱ a̱gga̱ nonno genyize cinne̱ng. Atalne zin Ta̱mu̱ta̱dde̱n eci ol cik lo̱o̱tu̱ wak a̱tu̱we̱ u̱mu̱dda̱ ti̱ri̱ze̱ne̱t go̱o̱le̱ ci tarbali uwahek ol nogo kaviyak cik abunna.
Abarik zin Ta̱mu̱ta̱dde̱n atahala ol wak a̱tu̱ kaviyak wak uwahek ol nogo ko̱ tarbalun. 22Orong olli Ya̱u̱do̱ kaal cik a̱vu̱la̱, ovvo ol cik e̱e̱ggi̱n Gi̱ri̱k orong genyiz, 23abarik kuwaheka naga ol kaviyak cik ododine Ki̱ri̱sto̱ ta̱la̱ke̱ca̱: Een necu gi̱i̱ ci alam olli Ya̱u̱do̱, okko ngati olli Gi̱ri̱yo̱, een tarbalzet. 24Imma ngati ol wak i̱ti̱ri̱z Ta̱mu̱ta̱dde̱n, ngati olli Ya̱u̱do̱ ki Gi̱ri̱k, een Ki̱ri̱sto̱ komiz ki genyiz ci Ta̱mu̱ta̱dde̱no̱. 25Eci tarbalzet ci Ta̱mu̱ta̱dde̱no̱ ommog genyiz ci e̱e̱t ci diiri, okko zin go̱o̱le̱ ci amuje Ta̱mu̱ta̱dde̱n, ommog doiz ci e̱e̱ti̱ ci diiri.
26Gotonogga ki ngonogga tu̱we̱nta̱, i̱no̱ni̱t baiz bali reeni baling atahalaung Ta̱mu̱ta̱dde̱n. Iróng ol cik meelek ngatinno̱ng anyak genyiz; iróng ol cik meelek ngatinno̱ng anyak li̱ngli̱ngo̱no̱k cik a̱ddi̱ki̱re̱. Iróng bo̱do̱k ol cik meelek ngatinno̱ng a̱rri̱ta̱ ol cik riilik. 27Abarik Ta̱mu̱ta̱dde̱n atahala ol wak tarbalik lo̱o̱tu̱ kar a̱li̱ya̱ni̱ kadak ol wak anyak genyiz; atahala Ta̱mu̱ta̱dde̱n e̱e̱t ci amuje lo̱o̱ta̱ ngatu kar a̱li̱ya̱ni̱ kadait e̱e̱t ci okkomi. 28Atahala Ta̱mu̱ta̱dde̱n kaal wak iróng anyak doiz ki wak ibbez ol lo̱o̱ta̱ ngatu, kar kegerzan kaal cik i̱no̱n olli lo̱o̱tu̱, een gi̱i̱ ci riili oroot, 29kar iróng e̱e̱ti̱ imma odong ele cinne ngatinne.
30E̱e̱ggi̱nnu̱ niga dooli cik Ta̱mu̱ta̱dde̱no̱, urumteu zin niga ki Ye̱su̱ Ki̱ri̱sto̱, wa a̱kku̱ ngati Ta̱mu̱ta̱dde̱no̱ ki̱ki̱ya̱ ki̱ti̱ri̱ze̱t kar enne kanyaha genyiz ci abunna kar bo̱do̱k ki̱li̱li̱. 31Ki i̱yo̱ko̱ ming e̱he̱rye̱ Warage ci Ta̱mu̱ta̱dde̱no̱ ko̱; azi ne, “Ming odong e̱e̱ti̱ ele, anyik kodong ele zo̱ze̱ ci Manyi.”#Jeremiah 9:24
Zvasarudzwa nguva ino
1 Ko̱ri̱nto̱ 1: tex
Sarudza vhesi
Sarudza zvinyorwa izvi
Yenzanisa
Pakurirana nevamwe
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© 2018, Wycliffe Bible Translators, Inc. All rights reserved.