Matiu 12
12
1Ba Vuusum Daaŋa#12:1 Piilimka 2:2-3; Nyinika 20:8-11 po dinyi Yeezu ale wa ŋaaŋviirɔma yaa jam cheŋ va nuru talim po. Ba la cheŋ la, kom yaa ta wa ŋaaŋviirɔma ate ba yaa wie ŋanbie ayen ba ŋɔbi. 2Alege Farisiima ale nya la, ba yaa weeni wa ayen, <<Nya, fi ŋaaŋviirɔma a nye ka dii ale kan magsi ba nye Vuusum Danni la.>> 3Yeezu yaa bek ba ayen, <<Nama an diem karim Deevid wie diipo ate kom a jam ta wa ale wa doama ate wa nye dii la? 4Wa le jo Wen yenni po a pai boroboroku a wɛ a ŋɔbi ale ge a wie a te wa doama ate ba mɛ a ŋɔbi la. Ba kan te nuru yoŋ a ŋɔbi boroboroku de ka Wen yenni kaabteerɔma nyiini ale a ŋɔbi ku.#12:4 1 Samuel 21:1-6 5Nama an karim dii ate Moosis a ŋmarisi Wen gbaŋka po ayen Wen yenni po kaabteerɔma a kaasi ti Vuusum Danni kisiku kama, alege nuru waai a kan nya ba kaasuŋku? 6Ni basi ate m weeni ni ayen nuru a bo dela a zuak gaam Wen yenni kama. 7Ba ŋmarisi Wen gbaŋka po ayen wa weeni kama ayen, <Nama ale ta jiirim ale chaab diila a peenti mi sui a gaam nama ale a ko duŋsa a kaabi a te mi la kama.>#12:7 Yosea 6:6 Ni dan seba wieŋa de kiri, ku an magsi ayen nama a bo baai ale kan nye a kaasi la buusa.
8<<Dila nyiŋ la, Mi Saalɔbiika ale soa Vuusum Danni.>>
9Yeezu a yaa basi dula jigini ale ge a cheŋ ga jo ba tuka dɔkku po. 10Nuru wanyi ale jam bo dula ate wa nisa a kpi. Nuru baai ale jam bo dula la, a jam a limisi kama ayen ba nya se Yeezu le tebi nuruwa nisaŋa Vuusum Danni po yaase wa kan tebi ate ba nya suik a ŋma wa. 11Yeezu yaa weeni ba ayen, <<A se nama waai posuk a dan lo vili po Vuusum Danni ni kan yeeri ku? 12Nurubiik a be gaam posuk kama nna yegayega. Ka dila ale soa ate nuru a dan maari wa suok Vuusum Danni po, wa kan kaasi Vuusum Danni kisiku.>> 13Wa yaa weeni nuru waai nisaŋa ale kpi la ayen wa teeri si. Wa yaa teeri si ate si ŋman nye si nyeka ase nsila la. 14Farisiima yaa yiti dula jigini a nyini a yaa gisi suik ayen ba ko Yeezu.
15Yeezu ale wom dii ate ba a yaali ayen ba nye wa la, wa yaa basi dula jigini ale ge cheŋ. Nuruba yegayega a jam va wa ate wa tebi ba tuetaŋa meena. 16Wa ale tebi ba la, wa yaa weeni ba ayen ba kan weeni a sak nuru wa ale nye diila. 17Wa weeni ba nya kude kama ayen dii ate Wen biisiteerɔwa Azaya a ŋmarisi dipo la a chim wensie. Wa ŋmarisi kama ayen, 18<<Nya, mi tomteerɔwa waai ate mi lueri la, waai ate mi a yaali la, m sui a peenti ale wa kama, m le pai m Chiika a nyo wa po, ate wa mooli nyemagsika a te baai ale kan daa Juuba la. 19Wa kan nye kpaliŋŋa yaase wa kaari ate ku jueli yaase waai a wom wa lueluk suik duataŋa po. 20Wa kan kaasi wobi dii ale koani la yaase wa kan kpimsi boom buui ale kan nya a paari la ate ku ga paari diipo ate wa le ta nyemagsika a jam tɛŋzuk ale nakdeka la. 21Ate wa nyiŋ baai ale kan daa Juuba la yiila ale bo wa jigi.>> (Azaya 42:1-4)
22Ba yaa ta waai ale ka gauŋ ale yi mɛ la a jam wa jigi, dii nyiŋla chichirik biok ale jam ta wa. Yeezu yaa tebi wa ate wa ŋman baga a biisi ale a nya. 23Ku yaa cha nuru boanni ate ba yaa bek chaab ayen, <<Nuruwa de ka Deevid Nidoabinni yaa?>> 24Farisiima ale wom dii ate nuruma a biisi ale chaab la, ba yaa weeni ba ayen, <<Chichirik baataŋa meena kpagni ate ba a wi ayen Beelzebu la ale a te wa pagrim ate wa baga a yiak chichirik baata nuruba po a basi.>>
25Yeezu a jam seba dii ate Farisiima a poli la kama a yaa weeni ba ayen, <<A se tɛŋ kaai dem a dan poori badek ta chaab, ba dachaasa a kan va dila nyiŋ a ko ba? Ase yeri yeŋ po dem a dan tulim a ta chaab yeri dila a waaŋ kama. 26Ase Sitaana ale wa tuimtomdɔma a dan ta chaab, wa naamu a kan beni ale ge a lo. 27Be dan ka Beelzebu pagrim ate mi baga a nye dila, nama dek nuruma abe nya ba pagrimu mɛ ka bɛ a baga a nye wa ŋala chaama? Bala abe le ba bo ni buusa ale ni le tulisi diila. 28Ku be dan ka Wen Chiika nyiŋ ate mi baga a yiak chichirik baata nuruba zuima po a basi, ku be a sak kama ayen Wen naamu jam ni jigi kama. 29Nuru karo a baga a jo pagrɔ yeri po a zu wa ŋanta ka wa nin liŋ a yik wa a bobi alege pai ŋantaŋa.
30<<Waai ale kan bo ale mi la a ta ka chaab ale mi, ate waai ale kaa tigsi ale mi la a kati a waaŋ.
31<<Wensie ate mi a weeni ni, Wen baga kama a vɔŋ a te nuruba ba wabaata meena ale ba ale a lɛ wa diila me. Alege nuruba a daa lɛ Wen Chiika, Wen a kan vɔŋ a te ba. 32Nuruba a daa lɛ Mi Saalɔbiika, Wen ale vɔŋ a te ba. Nuruba abe daa lɛ Wen Chiika, Wen a kan vɔŋ a te ba diipo diipo.
33<<Nye ate tiimu a chim ti maŋ, ate bu yɔnaŋa a chim yɔn maŋsa yaase bu chim ti biok, ate bu yɔnaŋa a chim yɔn baata, diila ba a seba tiib a nyini ka bu yɔnaŋa jigi. 34Nama a nye se ka wiiga la. Ase nama a daa tom wabaata ni le nye ka sɛ a biisi wamaŋsa? Wie ŋaai ate nama a biisi la a nyini ka nidek puusa po. 35Nuru suinum a bo ka wa ŋanta zaanika jigi. Wamaŋsa a dan bo dula, wa a yeeri ŋa kama a biisi. Wabaata mɛ a dan bo du, wa a yeeri ŋa me kama a biisi. 36Wensie ate mi a weeni ni, Wen a dan jam ayen wa bo tɛŋzuk meena demma buusa, wa le bek waai meena wa ka ya tii ate ba biisi la. 37Wen le pai ka wie ŋaai ate ni biisi la a bo ni buusa. Nama ale biisi ŋaai meena ate wa wom la le basi ate wa weeni ayen ni kaasi kama yaase ni zɛ ku po.>>
38Da ŋala po Sinsak sagrɔma ale Farisiima gela yaa jam Yeezu jigi a weeni wa ayen, <<Ti sagrɔ, tama a yaali kama ayen fi tom wakperikaliik ate ti nya.>> 39Yeezu yaa weeni ba ayen, <<Nama jinla demma a zɛri Wen ka nna yegayega ale a tom tuimbaata. Mi a kan siak a tom wakperikaliik a te nama yɔgyɔgla de. Wakperikaliik sii ate nama le nya dai yeŋ po la ale dii ate Wen a tom a te wa Biisiteerɔwa Jona la. 40Wen a jam tom jum kpiem ate bu ga ne Jona. Wa jam a bo bu poni po ka daa ŋata. Suik kula po mɛ ba dan jam ko Mi Saalɔbiika, nuruba le gu mu. Ba dan gu mu, daa ŋata danni m le yiti kum po.#12:40 Jona 1:17 41Buusa boka danni mɛ a dan paari, Niineve demma mɛ le yiri zaani kama a toariŋ ni dii nyiŋla, ba ale wom Jona sinsaŋŋa la, ba basi ba tuimbaataŋa tomka kama. Ni be basi ate m ŋman weeni a sak ni ayen wa dii ale bo dela la, a gaam Jona kama. 42Yeseoku Nipok Naawa ale yiti kama buusa boka vaaŋa po ale gaŋka de nuruma a bo mini ba, wa jam nyini ka tɛŋka kpeglimka a jam wa wom Solomon yammu wie, ni abe nya wari dii ale zuak a gaam Solomon la a bo dela.#12:42 1 Nalima 10:1-13
43Yeezu a yaa ŋman weeni Farisiima ayen, <<Chichirik biok a dan nyini nuru po a nyini, ku a cheŋ ka sagni po a ga nyiem a gisi vuusum jigi. Ku dan kan baga a nya jigi ya. 44Ku a weeni ka ku dek ayen, <Basi ate m ŋman a ga jo nuru waai po ate m poom boro la.> Ku dan ŋmani a ga jo dula jigini, ku yaa ale nya ayen ku jigini a gomsi magsi kama. 45Ku yaa ŋman nyini dula jigini a ga gisi a nya ku chichirik baata ti chaab tiyopɔi a ta ga jo nuruwa po. Nuruwa la ale poom ka diila a gaam wa daamwa kama. Ku le ku nye dii ale jinla demma baai ale a tom wabaata la ale la.>>
46Yeezu ale diem boro a biisi a te nuruma la, wa mawa ale wa suataŋa a yaa jam za peelim a tom nuru ayen wa jo a wi wa. 47Wa yaa jam Yeezu jigi a weeni wa ayen, <<Fi mawa ale fi suataŋa a za peelim a yaali fu.>> 48Alege wa tulisi nuru waai ale weeni wa la ayen, <<Ka wana ale mi ma? Be ka bana ale mi suata?>> 49Wa yaa dak ayen ba nya wa ŋaaŋviirɔma, ale weeni ba ayen, <<Mi ma ale mi suataŋa ale la. 50Waai meena ale a tom dii ate mi Kowa waai ale bo wenŋmazuk a yaali la, wala ale mi suok, ale mi toa, ale mi ma.>>
Zvasarudzwa nguva ino
Matiu 12: BWU
Sarudza vhesi
Sarudza zvinyorwa izvi
Yenzanisa
Pakurirana nevamwe
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© 2023, Ghana Institute of Linguistics, Literacy and Bible Translation
Matiu 12
12
1Ba Vuusum Daaŋa#12:1 Piilimka 2:2-3; Nyinika 20:8-11 po dinyi Yeezu ale wa ŋaaŋviirɔma yaa jam cheŋ va nuru talim po. Ba la cheŋ la, kom yaa ta wa ŋaaŋviirɔma ate ba yaa wie ŋanbie ayen ba ŋɔbi. 2Alege Farisiima ale nya la, ba yaa weeni wa ayen, <<Nya, fi ŋaaŋviirɔma a nye ka dii ale kan magsi ba nye Vuusum Danni la.>> 3Yeezu yaa bek ba ayen, <<Nama an diem karim Deevid wie diipo ate kom a jam ta wa ale wa doama ate wa nye dii la? 4Wa le jo Wen yenni po a pai boroboroku a wɛ a ŋɔbi ale ge a wie a te wa doama ate ba mɛ a ŋɔbi la. Ba kan te nuru yoŋ a ŋɔbi boroboroku de ka Wen yenni kaabteerɔma nyiini ale a ŋɔbi ku.#12:4 1 Samuel 21:1-6 5Nama an karim dii ate Moosis a ŋmarisi Wen gbaŋka po ayen Wen yenni po kaabteerɔma a kaasi ti Vuusum Danni kisiku kama, alege nuru waai a kan nya ba kaasuŋku? 6Ni basi ate m weeni ni ayen nuru a bo dela a zuak gaam Wen yenni kama. 7Ba ŋmarisi Wen gbaŋka po ayen wa weeni kama ayen, <Nama ale ta jiirim ale chaab diila a peenti mi sui a gaam nama ale a ko duŋsa a kaabi a te mi la kama.>#12:7 Yosea 6:6 Ni dan seba wieŋa de kiri, ku an magsi ayen nama a bo baai ale kan nye a kaasi la buusa.
8<<Dila nyiŋ la, Mi Saalɔbiika ale soa Vuusum Danni.>>
9Yeezu a yaa basi dula jigini ale ge a cheŋ ga jo ba tuka dɔkku po. 10Nuru wanyi ale jam bo dula ate wa nisa a kpi. Nuru baai ale jam bo dula la, a jam a limisi kama ayen ba nya se Yeezu le tebi nuruwa nisaŋa Vuusum Danni po yaase wa kan tebi ate ba nya suik a ŋma wa. 11Yeezu yaa weeni ba ayen, <<A se nama waai posuk a dan lo vili po Vuusum Danni ni kan yeeri ku? 12Nurubiik a be gaam posuk kama nna yegayega. Ka dila ale soa ate nuru a dan maari wa suok Vuusum Danni po, wa kan kaasi Vuusum Danni kisiku.>> 13Wa yaa weeni nuru waai nisaŋa ale kpi la ayen wa teeri si. Wa yaa teeri si ate si ŋman nye si nyeka ase nsila la. 14Farisiima yaa yiti dula jigini a nyini a yaa gisi suik ayen ba ko Yeezu.
15Yeezu ale wom dii ate ba a yaali ayen ba nye wa la, wa yaa basi dula jigini ale ge cheŋ. Nuruba yegayega a jam va wa ate wa tebi ba tuetaŋa meena. 16Wa ale tebi ba la, wa yaa weeni ba ayen ba kan weeni a sak nuru wa ale nye diila. 17Wa weeni ba nya kude kama ayen dii ate Wen biisiteerɔwa Azaya a ŋmarisi dipo la a chim wensie. Wa ŋmarisi kama ayen, 18<<Nya, mi tomteerɔwa waai ate mi lueri la, waai ate mi a yaali la, m sui a peenti ale wa kama, m le pai m Chiika a nyo wa po, ate wa mooli nyemagsika a te baai ale kan daa Juuba la. 19Wa kan nye kpaliŋŋa yaase wa kaari ate ku jueli yaase waai a wom wa lueluk suik duataŋa po. 20Wa kan kaasi wobi dii ale koani la yaase wa kan kpimsi boom buui ale kan nya a paari la ate ku ga paari diipo ate wa le ta nyemagsika a jam tɛŋzuk ale nakdeka la. 21Ate wa nyiŋ baai ale kan daa Juuba la yiila ale bo wa jigi.>> (Azaya 42:1-4)
22Ba yaa ta waai ale ka gauŋ ale yi mɛ la a jam wa jigi, dii nyiŋla chichirik biok ale jam ta wa. Yeezu yaa tebi wa ate wa ŋman baga a biisi ale a nya. 23Ku yaa cha nuru boanni ate ba yaa bek chaab ayen, <<Nuruwa de ka Deevid Nidoabinni yaa?>> 24Farisiima ale wom dii ate nuruma a biisi ale chaab la, ba yaa weeni ba ayen, <<Chichirik baataŋa meena kpagni ate ba a wi ayen Beelzebu la ale a te wa pagrim ate wa baga a yiak chichirik baata nuruba po a basi.>>
25Yeezu a jam seba dii ate Farisiima a poli la kama a yaa weeni ba ayen, <<A se tɛŋ kaai dem a dan poori badek ta chaab, ba dachaasa a kan va dila nyiŋ a ko ba? Ase yeri yeŋ po dem a dan tulim a ta chaab yeri dila a waaŋ kama. 26Ase Sitaana ale wa tuimtomdɔma a dan ta chaab, wa naamu a kan beni ale ge a lo. 27Be dan ka Beelzebu pagrim ate mi baga a nye dila, nama dek nuruma abe nya ba pagrimu mɛ ka bɛ a baga a nye wa ŋala chaama? Bala abe le ba bo ni buusa ale ni le tulisi diila. 28Ku be dan ka Wen Chiika nyiŋ ate mi baga a yiak chichirik baata nuruba zuima po a basi, ku be a sak kama ayen Wen naamu jam ni jigi kama. 29Nuru karo a baga a jo pagrɔ yeri po a zu wa ŋanta ka wa nin liŋ a yik wa a bobi alege pai ŋantaŋa.
30<<Waai ale kan bo ale mi la a ta ka chaab ale mi, ate waai ale kaa tigsi ale mi la a kati a waaŋ.
31<<Wensie ate mi a weeni ni, Wen baga kama a vɔŋ a te nuruba ba wabaata meena ale ba ale a lɛ wa diila me. Alege nuruba a daa lɛ Wen Chiika, Wen a kan vɔŋ a te ba. 32Nuruba a daa lɛ Mi Saalɔbiika, Wen ale vɔŋ a te ba. Nuruba abe daa lɛ Wen Chiika, Wen a kan vɔŋ a te ba diipo diipo.
33<<Nye ate tiimu a chim ti maŋ, ate bu yɔnaŋa a chim yɔn maŋsa yaase bu chim ti biok, ate bu yɔnaŋa a chim yɔn baata, diila ba a seba tiib a nyini ka bu yɔnaŋa jigi. 34Nama a nye se ka wiiga la. Ase nama a daa tom wabaata ni le nye ka sɛ a biisi wamaŋsa? Wie ŋaai ate nama a biisi la a nyini ka nidek puusa po. 35Nuru suinum a bo ka wa ŋanta zaanika jigi. Wamaŋsa a dan bo dula, wa a yeeri ŋa kama a biisi. Wabaata mɛ a dan bo du, wa a yeeri ŋa me kama a biisi. 36Wensie ate mi a weeni ni, Wen a dan jam ayen wa bo tɛŋzuk meena demma buusa, wa le bek waai meena wa ka ya tii ate ba biisi la. 37Wen le pai ka wie ŋaai ate ni biisi la a bo ni buusa. Nama ale biisi ŋaai meena ate wa wom la le basi ate wa weeni ayen ni kaasi kama yaase ni zɛ ku po.>>
38Da ŋala po Sinsak sagrɔma ale Farisiima gela yaa jam Yeezu jigi a weeni wa ayen, <<Ti sagrɔ, tama a yaali kama ayen fi tom wakperikaliik ate ti nya.>> 39Yeezu yaa weeni ba ayen, <<Nama jinla demma a zɛri Wen ka nna yegayega ale a tom tuimbaata. Mi a kan siak a tom wakperikaliik a te nama yɔgyɔgla de. Wakperikaliik sii ate nama le nya dai yeŋ po la ale dii ate Wen a tom a te wa Biisiteerɔwa Jona la. 40Wen a jam tom jum kpiem ate bu ga ne Jona. Wa jam a bo bu poni po ka daa ŋata. Suik kula po mɛ ba dan jam ko Mi Saalɔbiika, nuruba le gu mu. Ba dan gu mu, daa ŋata danni m le yiti kum po.#12:40 Jona 1:17 41Buusa boka danni mɛ a dan paari, Niineve demma mɛ le yiri zaani kama a toariŋ ni dii nyiŋla, ba ale wom Jona sinsaŋŋa la, ba basi ba tuimbaataŋa tomka kama. Ni be basi ate m ŋman weeni a sak ni ayen wa dii ale bo dela la, a gaam Jona kama. 42Yeseoku Nipok Naawa ale yiti kama buusa boka vaaŋa po ale gaŋka de nuruma a bo mini ba, wa jam nyini ka tɛŋka kpeglimka a jam wa wom Solomon yammu wie, ni abe nya wari dii ale zuak a gaam Solomon la a bo dela.#12:42 1 Nalima 10:1-13
43Yeezu a yaa ŋman weeni Farisiima ayen, <<Chichirik biok a dan nyini nuru po a nyini, ku a cheŋ ka sagni po a ga nyiem a gisi vuusum jigi. Ku dan kan baga a nya jigi ya. 44Ku a weeni ka ku dek ayen, <Basi ate m ŋman a ga jo nuru waai po ate m poom boro la.> Ku dan ŋmani a ga jo dula jigini, ku yaa ale nya ayen ku jigini a gomsi magsi kama. 45Ku yaa ŋman nyini dula jigini a ga gisi a nya ku chichirik baata ti chaab tiyopɔi a ta ga jo nuruwa po. Nuruwa la ale poom ka diila a gaam wa daamwa kama. Ku le ku nye dii ale jinla demma baai ale a tom wabaata la ale la.>>
46Yeezu ale diem boro a biisi a te nuruma la, wa mawa ale wa suataŋa a yaa jam za peelim a tom nuru ayen wa jo a wi wa. 47Wa yaa jam Yeezu jigi a weeni wa ayen, <<Fi mawa ale fi suataŋa a za peelim a yaali fu.>> 48Alege wa tulisi nuru waai ale weeni wa la ayen, <<Ka wana ale mi ma? Be ka bana ale mi suata?>> 49Wa yaa dak ayen ba nya wa ŋaaŋviirɔma, ale weeni ba ayen, <<Mi ma ale mi suataŋa ale la. 50Waai meena ale a tom dii ate mi Kowa waai ale bo wenŋmazuk a yaali la, wala ale mi suok, ale mi toa, ale mi ma.>>
Zvasarudzwa nguva ino
:
Sarudza vhesi
Sarudza zvinyorwa izvi
Yenzanisa
Pakurirana nevamwe
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© 2023, Ghana Institute of Linguistics, Literacy and Bible Translation