Dtiicanĩ cĩg ꞌThooyyiahu 7
7
Thõõth ꞌcĩ aduhaak Tẽẽvẽnõ lokiho
1Baa ajin paadĩrĩ cobbi Tẽẽvẽnõ anneek, “Ĩĩn thooꞌthioha ꞌcĩg abilli eeta cieeg nganiit ko dĩdĩ?”
2Ma ho, ẽdẽc Tẽẽvẽnõ ĩĩnnĩk, “ꞌGotoonoga hĩ nyakangaaꞌnya, ĩthĩktaangu! Baa uppwaannak Nyekuci cĩnaac cĩ bulẽẽttõ baangeet cĩnaac Abũrahaamõ, baa nga aaĩ nẽẽ looccaa cĩ Methopotamia baa nga huluug hũũk ꞌtaaũnaa cĩ Haraanĩ. 3Baa anneek Nyekuci ĩnõõnnõ, ‘Tũngeek looc cunni hĩ eet cugunnig vẽlẽk nẽ uuhu looccaa ꞌcĩ hatĩ hõkõ heterꞌtheekii naana.’#Tigiil ꞌBuuk cĩ ꞌThianaattõ 12:1
4“Nĩngĩtĩ ũũnnĩkĩ Abũrahamĩ looc cĩ eet ꞌcĩg Kaldea nẽ ũũk õlõman Haraana. Ma urutaa cĩ daahĩth cĩ maacõnĩ, ikia ĩꞌthõõa Nyekuci ĩnõõnnõ hikia haau looccaa ꞌcĩ ꞌyioko aattiyyu niig ko. 5Baa hõllõngaa aaꞌnyĩk Nyekuci ĩnõõnnõ nĩngĩmwa ngaati, tananga nẽẽ nĩngĩtĩ ẽllẽẽnnõ hĩ ꞌthooc haaga. Nẽẽthĩ, baa aduhaak Nyekuci Abũrahaamõ hĩ lõhõlĩ cĩg lõhõlĩ cĩgĩnnĩg ꞌcĩg hatĩ au aattiyyi looc icci urutaa cĩnnĩ, tananga baa nga haꞌnyak nẽẽ lõhõlĩ. 6Baa nẽ tarĩ uduhaak Nyekuci Abũrahaamõ ĩĩnnĩk, ‘Au hatĩ õlõman lohollia cugunnig looccaa ꞌcĩ ꞌrĩĩng pir. Adĩman hatĩ eeta cĩg looc tĩho ĩhõõggõ ꞌbuth nẽ aarito hĩĩtõ appahacaaꞌnya irkiꞌnyia ꞌmiiaꞌnya ꞌwec (400). 7Nẽẽthĩ, hõkõ hatĩ huuki naa eet cĩg looc ꞌcĩ aaꞌnyĩk ĩhõõggõ hĩĩtõ appahacaaꞌnya ho. Ma urutaa cĩnnĩ, aluuga hatĩ nẽẽg looccaa ꞌcĩ ꞌrĩĩng hata hiita halayyia nganĩĩt ngaati.’#Tigiil ꞌBuuk cĩ ꞌThianaattõ 15:13-14 8Nĩngĩtĩ aaꞌnyĩkĩ Nyekuci Abũrahaamõ lõhõt ꞌcĩ ẽttẽẽdĩ ẽlẽ cĩ eet ꞌcĩ maacĩ.#7:8 ꞌTeedinit cĩ ẽlẽ cĩ eet ꞌcĩ maacĩ: Baa aduhaak Nyekuci Abũrahaamõ anneek, ꞌtẽẽda rucci cĩg eleeti cĩg eet ꞌcĩg maacĩg lõhõlẽẽnĩĩ ꞌcĩg maacĩg urutaa cĩ waathinniook turkiyyio, ĩnõõ ꞌcĩ ẽttẽẽdĩ nẽẽ eleeti cĩg lõhõlĩ ꞌcĩg maacĩg, hátĩ hiita hĩĩtõ lõhõlĩ cĩg Nyekuci. Tigiil ꞌBuuk cĩ ꞌThianaattõ 17:10-14. Ma ho, ikia ittira nẽẽ Iꞌthaako nẽ aaꞌnyĩk hẽttẽẽdĩ ẽlẽ baa ĩĩtõ waathinniooha turkiyyio. Ma uruta, ikia ittira Iꞌthaako Yakobo nẽ ikia Yakobo ĩĩ maaꞌnyĩ nyahaapanĩt õmmõtõ hĩ ꞌramma, ꞌcĩg hiita hĩĩtõ hĩbaangĩ cĩggaac.
9“Baa alĩĩllĩk hĩbaangĩ cieeg ꞌgõtõnĩ cĩnĩĩng Yothebo,#7:9 Yothebo: Baa ĩĩn nẽẽ ngeertĩ Yakobo ꞌcĩ baa ammĩnan maaꞌnyia gẽrrẽẽt nẽ utuuyyiõõĩ ꞌgotoonoggia hũũk hĩĩ appahaca eetinii cĩg Ijjibi. Tigiil thõõth cĩnnĩ ꞌBuuhaa cĩ ꞌThianaattõ 30-50. nĩngĩtĩ au ũũtẽnĩ ĩnõõnnõ hũũk hĩĩ appahaca Ijjiba. Tõjõhõ baa aaĩ Nyekuci hĩ ĩnõõnnõ, 10nẽ ẽẽla ĩnõõnnõ pĩĩrnattaa cĩnnĩ vẽlẽk. Ma ho, aaꞌnyĩk Nyekuci Yothebo ꞌgẽẽnyĩth nẽ aaꞌnyĩk haccamana habuui cĩ Ijjibi#7:10 Habu cĩ Ijjibi: Baa avvĩ eeta cĩg ꞌJudeei habu cĩ Ijjibi ho anneek Varaõõnẽ. ĩnõõnnõ. Nĩngĩtĩ aarĩkĩ habuui Yothebo hĩĩ makayyioohit ꞌcĩ aggam Ijjib hĩ õlõ cĩnnĩ vẽlẽk.
11“Ma ho, ikia ĩꞌthaan nyarõnĩ Ijjib hĩ Kanaan hĩccĩnĩt pĩĩrnanĩt, hiittiõõ hĩbaangĩ cĩggaac hõllõngaa ammũda ꞌgẽẽn ũdũt. 12Ma baa ma athĩhĩ Yakobo ngaatĩ aattiyyi haala Ijjiba ho, ĩꞌthõ hĩbaangĩ cĩggaac hõõt hutuuyyia haal nẽ baa ĩĩn kõr ꞌcĩ oou ꞌcĩ õõyyĩ nẽẽg ko niccia. 13Ma weet ꞌcĩ ĩĩn ꞌramma ꞌcĩ õõyyĩ nẽẽg Ijjiba, uppulanaak Yothebo ꞌgõtõõnõgĩ ẽlẽ cĩnnĩ, nĩngĩtĩ aku agaĩ habuui halang cĩ Yothebo. 14Nẽ ikia ĩꞌthooĩk Yothebo maaꞌnyĩ Yakobo hĩ halang cĩnnĩ nyeemuut hiita. Baa ĩĩn eeta cĩg halang cĩnnĩ ho vẽlẽk hẽẽn tũkĩramma hĩ ꞌtur. 15Nĩngĩtĩ õkõõĩ Yakobo Ijjiba ĩĩ baa õkõ adaaknĩ nẽẽ nga baa õõ adaaknĩ hĩbaangĩ cĩggaac. 16Baa ocooddiaa eleeti cĩggĩĩng hiita hadayyi ꞌThẽkẽma waanyaa baa ũũta Abũrahamĩ hĩ lõhõlẽẽtĩg Hamõrĩ ꞌrabbẽẽtĩ.
17“Ma baa õbõhĩ kõrra ꞌcĩ ẽdẽẽnyanĩ Nyekuci thooꞌthiok baag aduhaak nẽẽ Abũrahaamõ, iita ittoorri eeta cĩggaac Ijjiba hĩĩtõ mẽẽlĩg gẽrrẽẽt. 18Ma ho, ikia aggam habuui umwaa Ijjib. Baa aitiõõ habuui tĩho hõllõngaa aga Yothebo. 19Baa adĩman habuui ciee hĩbaangĩ cĩggaac ꞌbuth, ẽhẽc ĩhõõggõ nẽ ĩttĩnganeek hĩbaangĩ cĩggaac, hudhukteek ĩdõlẽẽt ꞌcĩg nga arrittiaa thõng tuu, hátĩ hadaahito.
20“Baa arrittiaa Mũũꞌtha kõr niccia, nẽ baa ĩĩn nẽẽ loholeec ꞌcĩ anyũttĩĩ, nĩngĩtĩ aguꞌthi maaꞌnyia hĩ aattĩnnĩ ĩnõõnnõ ꞌcieetõõ cĩnĩĩng nyĩlõhĩ iyyio. 21Ma baa aarĩhoothĩk Mũũꞌtha battaala, ikia ũũhĩ tĩnaatĩ habuuo hũũk hitiroha hĩĩ ngeerĩnĩ. 22Baa aaꞌnyĩhoothĩk Mũũꞌtha ꞌlimmanĩ ꞌcĩ abũnnaa gẽrrẽẽt Ijjiba. Baa ĩĩn nẽẽ eet ꞌcĩ attiran dtiica hĩ thõõtha.
23“Ma baa aꞌnyak Mũũꞌtha irkiꞌnyia hẽẽn ꞌwec, ikia eheronoothĩk ꞌgõõnõgĩ ꞌcĩg ĩĩn Ĩꞌthĩraẽl. 24Ma kõr umwa, adtuuha hinnia eet cĩ Ijjibi ngaatĩ adĩmanĩ eet cĩ Ĩꞌthĩraẽlĩ ꞌbuth. Nĩngĩtĩ ẽẽlanĩ nẽẽ ꞌgõõnĩ nẽ uruk Ijjibeenit hadaak. 25Baa hinnia ammuk Mũũꞌtha aĩ agaacõ oho eeta cĩgĩnnĩg vẽlẽk ngaatĩ ĩꞌthõõĩ Nyekuci ĩnõõnnõ hũũk hẽẽla eet cĩg Ĩꞌthĩraẽlĩ, ĩko hinnia nga hagaacõ buúk. 26Ma kõr ꞌcĩ ꞌrĩĩng, ikia udtuuha Mũũꞌtha eet cĩg Ĩꞌthĩraẽlĩ ꞌramma ꞌcĩg aruhõõ ẽmmẽn. Nĩngĩtĩ attĩmanĩ ngaatĩ aganĩthĩ ĩhõõggõ annẽẽkĩ, ‘Lõggõõ, iiginnu niig vẽlẽk eet cĩg Ĩꞌthĩraẽlĩ. Aruhoonnu occa gõõng ẽmmẽn inni?’
27“Ĩꞌngõtha hinnia ẽẽtĩ ꞌcĩ hatĩ iꞌthianaanĩ jore ĩĩcĩ oou, hikia heggerenyeek Mũũꞌtha hĩĩnnĩk, ‘Nganĩ ꞌcĩ aaꞌnyi nganiit makaaꞌthĩt ꞌcĩ etteedĩkeet ngagĩĩt thõõth ko? 28Adiimi nii aruka nganĩĩt hĩ baa aruhi Ijjibeenit baalõ?’#Tigiil ꞌBuuk cĩ Luugithõõ 2:14 29Nganĩngĩtĩ athĩknĩ Mũũꞌtha thõõth icci ho, ikia ukul ũũk ĩĩcĩ Midianĩ, ngaatĩ baa õkõ ĩĩnnĩ eet cĩ looc cĩrrĩĩng nẽ ũũk ũꞌthũwanõõ haꞌnyak buul ꞌramma.
30“Ma baa allacattĩ irkiꞌnyia hẽẽn ꞌwec, uppwaannak aajĩlõ Mũũꞌtha ꞌgwoyyiaa ꞌcĩ aaĩ hĩcĩ atũũth tumuth horrwatõõ ꞌcĩ õdõhõhĩĩ kak, ngaatĩ õbõhõõ hĩ Muur cĩ ꞌThĩnaĩ. 31Baa abulan Mũũꞌtha ꞌgii ꞌcĩ acĩn ko gẽrrẽẽt. Ma baa eejehoothĩk aĩ hũũk hĩcĩn ojoonu ho, athĩhĩ hinnia molook cĩ Makayyiookto ngaatĩ aĩnnĩ, 32‘Nganĩĩt Nyekuc cĩ hĩbaangĩ cugunnig, Nyekuc cĩ Abũrahamĩ hĩ cĩ Iꞌthaako hĩ cĩ Yakobo.’#Tigiil ꞌBuuk cĩ Luugithõõ 3:6 Ikia abarrit Mũũꞌtha gẽrrẽẽt, nĩngĩtĩ abũrrĩ ngaatĩ acĩnĩ tumuth tĩho. 33Ma ho, ĩĩnnĩk Makayyioohiti ĩnõõnnõ, ‘Pũrũca caawa cugunnig. Ĩĩn nĩngĩtĩ abĩllĩ nii ho, nĩngĩtĩ aꞌngirannii. 34Hĩcĩna naa pĩĩrnanĩt ꞌcĩ accananiini eeta cĩgannĩg Ijjiba. Hĩthĩha ulwa cĩnĩĩng nẽ ꞌyioko hikia loota hikia hõõga ĩhõõggõ. Nẽẽthĩ ꞌyioko, ijjia hĩꞌthooii bodooth Ijjiba.’#Tigiil ꞌBuuk cĩ Luugithõõ 3:5-10
35“Baa ĩĩn ciee Mũũꞌtha baa ꞌthẽk abũrĩ eeta ngaatĩ annẽẽkĩ, ‘Nganĩ ꞌcĩ aaꞌnyi nganiit makaaꞌthĩt ꞌcĩ etteedĩkeet ngagĩĩt thõõth ko?’ Baa ĩꞌthõõa Nyekuci Mũũꞌtha hikia hĩĩ makayyioohit ꞌcĩ õõga ĩhõõggõ aajĩlõõaa baa uppwaannak ĩnõõnnõ tumuthaa baa atũũthĩ. 36Nĩngĩtĩ õõganĩ nẽẽ ĩhõõggõ Ijjiba ngaatĩ adticanĩ hẽlẽggĩ ꞌcĩg ĩnaat eeta Ijjiba hĩ Bũlũcaa ꞌcĩ Marihi, hĩ irkiꞌnyiaannĩĩ ꞌcĩg baag ĩĩn hẽẽn ꞌwec horrwaa ꞌcĩ õdõhõhĩĩ kak.
37“Mũũꞌtha ꞌcĩ aduhaak eet cĩg Ĩꞌthĩraẽlĩ anneek, ‘Ĩꞌthõõakuung hatĩ Nyekuci ngagiit põrõvẽtaac ꞌcĩ haduhoonna hĩ nganĩĩt eetinii cugguung.’#Tigiil ꞌBuuk cĩ Ditoronomi 18:15 38Nĩngĩtĩ aꞌnyahaanĩ Mũũꞌtha eet cĩggaac ngaatĩ hõdẽẽthõng horrwatõõ ꞌcĩ õdõhõhĩĩ kak nẽ õthõõthak aajĩlõ ĩnõõnnõ Muuraa cĩ ꞌThĩnaĩ. Ma nĩngaata, iita aanytĩhoothĩk Mũũꞌtha thooꞌthioha cĩg rũgẽtaak, hũtũngeekeet ngagĩĩta.
39“Nẽẽthĩ hinnia, baa abũrĩ hĩbaangĩ cĩggaac ngaatĩ athĩknĩ Mũũꞌtha. Ma ho, ũtũbũrĩt ĩnõõnnõ nẽ idiimito oboddioothĩ Ijjiba. 40Ma nĩngaata, uduktaak nẽẽg Arõõnẽ ĩĩttĩk, ‘Dĩmanaaheet hẽlẽggĩ ꞌcĩg aar eeta hĩĩtõ nyekuꞌnya hetereꞌthieeheet ngagĩĩt ꞌgõõl ꞌcĩ hooyyia. Baa aꞌnyahaanneet Mũũꞌtha Ijjiba, nẽẽthĩ ꞌyioko, erekeet ꞌgii ꞌcĩ adak ĩnõõnnõ hiꞌnginõõthĩ ho!’#Tigiil ꞌBuuk cĩ Luugithõõ 32:1 41Nĩngĩtĩ ẽhẽnytaanĩ nyekuc ꞌcĩ aaĩ hĩ mõõlĩtĩ. Ma ho, ĩbboorĩk ꞌgaarriẽẽn nyekuc tĩho nẽ accamattoothĩk tẽẽlꞌthĩta, hĩnĩngĩtĩ dtiic cĩ athĩn cĩggĩĩng. 42Nẽẽthĩ, baa ũtũbũr Nyekuci ĩhõõggõ nẽ aaꞌnyĩk halaacõ mũnyũny cĩg hẽẽtkujjieen hĩ baa aduha ꞌbuuhi cĩ põrõvẽtaaꞌnyanu aĩ,
“ ‘Niig eeta cĩg Ĩꞌthĩraẽlĩ, baa hõllõngaa ĩbboorĩkaangu nganĩĩt ꞌgaarriẽẽn nẽ hõllõngaa aaꞌnyaangu ꞌbaaninit
irkiꞌnyiaannĩĩ baag ĩĩn hẽẽn ꞌwec aattiyyu horrwaa ꞌcĩ õdõhõhĩĩ kak.
43Baa hinnia irriongannu niig Molek nyekuc ꞌcĩ hõllõngaa ĩĩn dĩdĩ,
hĩ ꞌRẽvan mũꞌnyaac ꞌcĩ ĩĩn nyekuc cunuung.
Baa ẽhẽnytaannu niig hẽlẽggĩ nicciag hĩĩtõ nyekuꞌnya nẽ alayyu ĩhõõggõ.
Nẽẽthĩ ꞌyioko, hĩꞌthooikuung hatĩ naa õõt looccaa ꞌcĩ cĩrrĩĩng ĩĩcĩ ꞌrẽẽnĩ hĩ Babiloonnia.#7:43 Babiloonnia: Urutaa cĩ korriook baag Nõõa, baa ẽhẽnyĩt eeta ꞌcieeth ꞌcĩ uuni Babela, ꞌcĩ baa hiita hakattieek eeta ꞌthaar hĩĩttĩk Babiloonnia. Ma baa urutaa cĩ irkiꞌnyia ꞌcĩg mẽẽlĩg, ikia ũũhĩ habuui Nabukadaneetharĩ eet cĩg Ĩꞌthĩraẽlĩ ũgĩ, ĩĩcĩ ꞌtaaũn cĩ Babiloonnia, baa ĩꞌthaan nẽẽ ꞌJeruꞌthalẽm, irkiꞌnyiaannĩĩ ĩbaag ĩĩn ꞌmiiaꞌnya ꞌtur hĩ hẽẽn tũkĩramma (570), baa nga hittirria Yeesu. Tigiil thõõth cĩnnĩ ꞌBuuhaa cĩ ꞌThianaattõ 11; 2 Habuẽẽt 24-25; Danieele 1:1-7.’#Tigiil ꞌBuuk cĩ Aamothĩ 5:25
44“Baa aꞌthũũnnĩ hĩbaangĩ cĩggaac ꞌCieeth cĩ Nyekuci horrwaa ꞌcĩ õdõhõhĩĩ kak.#7:44 ꞌCieeth cĩ Nyekuci horrwaa ꞌcĩ õdõhõhĩĩ kak: Baa ẽhẽnytaa ꞌCieeth ciee ceremwaanĩ haaga korrioohĩĩ baag aluuganĩ eet cĩg Ĩꞌthĩraẽlĩ Ijjiba, hátĩ hõõlõl hatĩ irriongan eeta, nẽ baa ĩthakꞌthoothĩk ꞌCieeth cĩ Nyekuci ꞌcĩ abuli ꞌJeruꞌthalẽma. Tigiil ꞌBuuk cĩ Luugithõõ 25:40; Dtiicanĩ cĩg ꞌThooyyiahu 7:44-45; Ebereei 8:5. Baa ẽhẽnytaa ꞌCieeth ciee ꞌgõõlaa baa aduhaak Nyekuci Mũũꞌtha hĩdĩmana hudukto hĩ baa adtuuha nẽẽ thõng. 45Ma urutaa cĩ irkiꞌnyia ũgĩ, baa õkõõĩ ꞌJooꞌthua#7:45 ꞌJooꞌthua: Baa ẽbẽra Nyekuci ꞌJooꞌthua hĩĩ makayyioohit hũtũhaõõthĩ eet cĩg Ĩꞌthĩraẽlĩ hũũhĩ ĩĩcĩ looc cĩ Kanaanĩ, urutaa cĩ daahĩth cĩ Mũũꞌtha. Tigiil thõõth cĩnnĩ ꞌBuuhaa cĩ Luugithõõ 17-24 hĩ ꞌBuuhaa cĩ ꞌJooꞌthua 1-24. hĩbaangĩ cĩggaac joraa baa iiggiaẽẽkĩ Nyekuci eet cĩg loonyinu looccaa cĩ battaala, baa aꞌnyak nẽẽg Tuggu cĩ Nyekuci õõĩ looccaa ꞌcĩ ĩĩn ngeju. Nẽ aala ꞌCieeth cĩ Nyekuci horrwaa ꞌcĩ õdõhõhĩĩ kak nĩngaata, ĩꞌthõng hikia hĩĩ Daavide habu. 46Baa accamana Daavide Nyekuc gẽrrẽẽt nĩngĩtĩ ajini ĩnõõnnõ, hatĩ má occa ẽlẽmaakĩ hẽtẽhẽny ꞌCieeth cĩ Nyekuci halayyiõõĩ eeta cĩg Ĩꞌthĩraẽlĩ. 47Nẽẽthĩ hinnia, baa ꞌThõlõmõõnẽ ꞌcĩ aku ehenyteek Nyekuc ꞌCieeth.
48“ꞌGõõlaa umwaanĩ, aitiõõ Nyekuci ꞌcĩ ĩllõõan vẽlẽk, hõllõngaa õlõman ꞌcieethinii ꞌcĩg ẽhẽnyĩt eeta. Hĩ baa aduha põrõvẽtaacĩ aĩ,
49“ ‘Baa aduha Makayyioohit aĩ,
ĩĩn hẽẽtkujjieen dtaaba caannĩ nẽ ĩĩ lõõcĩ nĩngĩtĩ hataadĩkĩĩ ꞌthoo cĩgannĩg.
ꞌCieeth hinnia ꞌcĩ aaĩ hutuno, ꞌcĩ occa ehenyteekaangu niig nganĩĩt ko?
Ningina hinnia hatĩ ꞌcĩ hiyyiomanĩĩ naa?
50Baa hẽtẽhẽnyaa naa hẽlẽggĩ vẽlẽk.’#Tigiil ꞌBuuk cĩ Iꞌthaia 66:1-2
51“Niig eeta ꞌcĩg adĩĩtennuung ooti pĩd ko! Aburru niig hõdõõkõthĩ Lori ꞌcĩ Ẽllẽẽmĩth, haau hĩ baa abũrĩ maajihu cugguung. 52Aaĩ nooyyia baa põrõvẽtaacĩ umwaa ꞌcĩ nga huruhit hĩbaangĩ cugguung? Ucuddia nõõ nẽẽg põrõvẽtaaꞌnya baag aduha thõõth ꞌcĩ akuuni Ẽẽtĩ cĩ Abũnnaa. Nẽ ꞌyioko õhõppõõcattu niig ĩnõõnnõ nĩngĩtĩ aruku. 53Baa ngagiit ꞌcĩg aaꞌnyĩhoothĩkuung nyattalĩ cĩ Nyekuci baa aꞌnyaha aajĩlẽẽta, nẽẽthĩ hinnia, hõllõngaa anuyyu ũdũt.”
Ohoddia Tẽẽvẽnõ hadaak
54Ma baa athĩhĩ makayyiooha cĩg lokihooak thõõth cĩ Tẽẽvẽnõ ho, iita ĩlĩĩllẽẽcõ gẽrrẽẽt. 55Nẽẽthĩ hinnia, baa aaĩ Lorii ꞌcĩ Ẽllẽẽmĩth hĩ Tẽẽvẽnõ, nĩngĩtĩ acĩnõõꞌthĩ hẽẽtkujjieen hudtuuha bulẽẽnĩt cĩ Nyekuci nẽ ĩcĩnõõthĩ Yeesu ngaatĩ abĩllĩ attiaa cobbi ĩĩcĩ Nyekuci. 56Nĩngĩtĩ aĩnnĩ Tẽẽvẽnõ, “Ĩcĩnĩt nõõ, hadtuuha abbuuhi hẽẽtkujjieen nẽ abĩlĩ Ngeertĩ Eeto#7:56 Ngeertĩ Eeto: Avvĩ Yeesu ẽlẽ cĩnnĩ anneek Ngeertĩ Eeto, hĩnĩngĩtĩ ẽtẽrꞌtha nẽẽ aĩ, ĩĩn nẽẽ Krĩstõ nẽ ĩĩ habu cĩ habuccieet ꞌcĩ aalla ũdũt. Tigiil ꞌBuuk cĩ Danieele 7:13-14. attiaa cobbi ĩcĩ Nyekuci!”
57Ma athĩhĩ makayyiooha cĩg lokihooak thõõth icci ho, iita awacahit gẽrrẽẽt hĩdĩĩtĩ lõõcĩ pĩd. Ma ho, ulubtoothĩk nẽẽg vẽlẽk Tẽẽvẽnõ, 58nĩngĩtĩ agurrẽẽkĩ ĩnõõnnõ ꞌtaaũna battaala nẽ iꞌthiattaaĩ ohoddia ĩnõõnnõ thõng. Baa aarĩk hinnia eeta ꞌcĩg addangaak ĩnõõnnõ ho ceremwa cĩggĩĩng haggam nyahaappanĩ umwaa ꞌcĩ haĩ ꞌthaar ꞌThaaulo.#7:58 ꞌThaaulo: Baa ikia ĩĩ ꞌThaaulo nuyyioohit cĩ Yeesu, iita ẽgẽẽrattĩ ꞌthaara cĩgĩnnĩg hĩĩtõ Paaulo. Tigiil ꞌBuuk cĩ Dtiicanĩ cĩg ꞌThooyyiahu 13:9.
59Ma baa nga õhõda nẽẽg Tẽẽvẽnõ, alayyi hinnia Tẽẽvẽnõ aĩ, “Makayyioohit Yeesu, bĩtĩ lori caannĩ.” 60Nĩngĩtĩ akannĩ huruꞌnyia nẽ urruuo ĩĩ, “Makayyioohit, ma haaꞌnyihi ĩhõõggõ heteheelito ꞌthẽccan icci.” Baa aduha nẽẽ thõõth icci noho, nĩngĩtĩ adaaknĩ.
Zvasarudzwa nguva ino
Dtiicanĩ cĩg ꞌThooyyiahu 7: did
Sarudza vhesi
Sarudza zvinyorwa izvi
Yenzanisa
Pakurirana nevamwe
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© 2017, Wycliffe Bible Translators, Inc., All rights reserved.