Dtiicanĩ cĩg ꞌThooyyiahu 26
26
Paaulo muumaa cĩ Agirippa
1Baa anneek Agirippa Paaulo, “Hẽlẽmaaki naa nganiit tẽõõĩ ẽlẽ cunni ẽmmẽn.” Ma nĩngaata, õdõng Paaulo aꞌthiit cĩnnĩ nẽ ẽtẽõõĩ ẽlẽ cĩnnĩ ĩĩ, 2“Habu Agirippa, hatali gẽrrẽẽt ngaatĩ aaꞌnya hẽtẽõõĩ ẽlẽ caannĩ muumaa cunni kõr icci, thooꞌthiohĩĩ ꞌcĩg haꞌngaanyinii abĩlla eeta cĩg ꞌJudeei ho. 3Aga nii hẽlẽggĩ ꞌcĩg mẽẽlĩg cĩg nyepiteeꞌnya cĩg ꞌJudeei hĩ nyattalliook ꞌcĩg eꞌngerreet ngagĩĩta. Nẽẽthĩ, halayyii nuun thĩhaa nganĩĩt dĩkĩĩm.
4“Aga eeta cĩg ꞌJudeei vẽlẽk ꞌgõõl ꞌcĩ halĩꞌthaanĩ naa ngaanĩngĩtĩ hĩĩnnĩ hĩdĩca. Iꞌthianaanĩ rũgẽtaa caannĩ looccaa caannĩ hĩ ꞌJeruꞌthalẽma. 5Má occa ẽlẽmĩ nẽẽgĩ, aga nẽẽg aĩ, baa hĩĩnĩ naa eet cĩ lothippit cĩ Variꞌtheei, lothippit ꞌcĩ arrĩcana thõõth cĩnaac cĩ Nyekuci gẽrrẽẽt. 6Nẽ ꞌyioko, abĩlla nganĩĩt eeta ngaati, hĩnĩngĩtĩ haꞌnyahi muhẽẽnĩt ꞌcĩ abũnnaa thõõthaa baa aduhaak Nyekuci hĩbaangĩ cĩggaac baarkit. 7Ĩĩn ciee thõõth ꞌcĩ baa adukiaa ꞌcĩ ꞌyioko ẽrẽ habuccieeꞌnya cĩggaac ĩĩn õmmõtõ hĩ ꞌramma ho, baa adiim acĩn nẽẽg hedeeꞌnyia, hĩcĩ arrĩcana nẽẽg ngaatĩ adticanõõthĩkĩ Nyekuc waathĩn hĩ baalin. Habuu, addangaaka nganĩĩt eeta cĩg ꞌJudeei, hĩnĩngĩtĩ muhẽẽnĩt icci abũnnaa ho. 8Inni hõkõm gẽrrẽẽt hĩ ngagiit vẽlẽk ngaatĩ elemmu thõõth ꞌcĩ arũgnaanĩ Nyekuci daakiak ko?
9“Baa hammuhi naa buúk haini, occa ꞌthẽk harrĩcanaa ngaatĩ habũrrĩ ꞌthaar cĩg Yeesu cĩ Naaꞌtharẽtĩ. 10Nẽ thõõth ꞌcĩ baa hadĩmani naa ꞌJeruꞌthalẽma niccia. Hĩnĩngĩtĩ thõõth ꞌcĩ aduhaaka makayyiooha cĩg paadĩrꞌnyaannu, haggam nuyyiook ꞌcĩg mẽẽlĩg cĩg Yeesu nẽ haarĩha baabuuthatõõ. Nẽ baa ꞌthẽk hẽbẽra naa ĩhõõggõ hurukti. 11Baa gõõng hõkõ naa korrioohĩĩ ꞌcĩg mẽẽlĩg ꞌCieethinii cĩg Laiittak, hũũk haaꞌnyĩk ĩhõõggõ huukti, nẽ hĩttĩmana ngaatĩ hattĩnganẽẽkĩ ĩhõõggõ hodoomito Krĩstõ. Nẽ baa haliillihi naa ĩhõõggõ nẽ hũũha ꞌtaaũnnioohĩĩ cĩg loonyin cĩrrĩĩng, hũũk haccanan ĩhõõggõ.
12“Habu Agirippa, kõr umwa baa hõkõ naa ꞌtaaũnaa cĩ Damaathĩko, haꞌnyahi thõõth ꞌcĩ aduhaaka makayyiooha cĩg paadĩrꞌnyaannu. 13Ma baa aau kõrra lokora, baa nga hõvvõ ꞌgõõla habuu, hadtuuha hinnia lanyit ꞌcĩ aku hẽẽtahujjieen ꞌcĩ attaalĩth hĩllõõan kõr, attũhũllaa nganĩĩt hĩ eet ꞌcĩg baag hõõkõrra vẽlẽk. 14Hetteeddia naag vẽlẽk looc nẽ hĩthĩha naa molook umwa ꞌcĩ anneeka nganĩĩt Aramaayyi, ‘ꞌThaaulo! ꞌThaaulo! Arukaa nii nganĩĩt inni? Ĩĩn ꞌgiithẽnĩt ngaatĩ occa haruhõõnĩ hĩ nganĩĩta!’
15“Nĩngĩtĩ hajini hannẽẽkĩ, ‘Nganiit nganĩ Makayyioohit?’
“Ẽdẽcĩ Makayyioohiti anneeka, ‘Nganĩĩt Yeesu Makayyioohit ꞌcĩ aruhi nii ho. 16Tĩnga ꞌyioko bĩĩl ꞌjieena. Huppwanakii naa nganiit nẽ hẽbẽraaii ĩĩ dticciannioohit nẽ iinu hebereec cĩ thõõth caannĩ ꞌcĩ acini nii ho, hĩ ꞌgii ꞌcĩ hatĩ heterꞌtheekii naa nganiita. 17Hẽẽlannii hatĩ naa nganiit eetinii cugunnig dẽẽdẽ, hĩ eetinii ꞌcĩg hõllõngaa ĩĩn ꞌJudeei. Hĩꞌthooikii naa nganiit ĩhõõggõ, 18hadiimmii naa nganiit bĩĩt ꞌbuuk ĩhõõggõ hẽbẽrĩ cĩggĩĩng, hátĩ hũtũngteek muguur, hõõt hĩ lanyit nẽ tarĩ, hũtũngteek ꞌtirrian cĩ ꞌThĩttaanõ, hõõt ꞌtirrianaa cĩ Nyekuci. Hátĩ hũtũngtoothĩk ꞌthẽccanẽẽta cĩggĩĩng nẽ lemiittaa cĩnĩĩng hĩ nganĩĩta, iita ĩĩtõ nẽẽg buúk dhoorit cĩg eet ꞌcĩg ẽllẽẽmĩth cĩg Nyekuci.’
19“Nẽ ꞌyioko habu Agirippa, baa hõllõngaa haburi naa thõõth cĩ molook ꞌcĩ aku hẽẽtahujjieen ko. 20Baa nõõ hirrioonihi eet cĩg Damaathĩko nẽ baa hũũha ꞌJeruꞌthalẽma hĩ looccaa cĩ ꞌJudeea vẽlẽk. Nẽ dtuurnatta, hũũha thĩ hĩ eet ꞌcĩg hõllõngaa ĩĩn ꞌJudeei nẽ huduhaaha hũtũngteek ꞌthẽccan helemit Nyekuc nẽ etereꞌthia lemiinit hẽlẽggẽẽnnĩĩ ꞌcĩg adĩman nẽẽgĩ. 21Ĩnõõ thõõth ꞌcĩ baa aggamma eeta cĩg ꞌJudeei nganĩĩt halaangatõõ cĩ ꞌCieeth cĩ Nyekuci nẽ idiim urukta ho. 22Nẽẽthĩ, hĩĩ kõr hĩ niccieeni, ẽẽlla nganĩĩt Nyekuci, hillimman eet ꞌcĩg kidicig hĩ ꞌcĩg makatĩg. Baa haduhaahi ĩhõõggõ thõõth baa aduha põrõvẽtaaꞌnya hĩ Mũũꞌtha diooni, aĩ aku hatĩ edeeꞌnyia. 23Baa haduhaahi ĩhõõggõ ꞌgõõl baa appĩĩrnanĩ Krĩstõ hikia hũrũga daahĩthaa ĩcĩ oou, hátĩ haꞌnyahaak eet cĩgĩnnĩg lanyit hĩ eet ꞌcĩg hõllõngaa ĩĩn ꞌJudeei.”
24Ma baa nga hẽdẽcaak Paaulo ngaatĩ eteiini ẽlẽ cĩnnĩ, ẽggẽrẽny Vẽẽthtõ ĩĩ, “Paaulo, adaki nganiit maangõnĩ! Aꞌnyahaaki nganiit ꞌgẽẽnyĩthĩ cunni cobbi ho maangõn.”
25Nẽẽthĩ, baa ẽdẽcĩ Paaulo aĩ, “ꞌGaalac Vẽẽthtõ, hõllõngaa adaka nganĩĩt maangõnĩ. Thõõth ꞌcĩ hothoothi naa ho, ĩĩn thõõth ꞌcĩ tẽllĩ nẽ ĩĩ dĩdĩ. 26Aga habuui Agirippa thooꞌthiok iccig vẽlẽk nẽ occa ꞌthẽk haduhaahi ĩnõõnnõ lõꞌngõõc. Haga ngaatĩ nga hataarõthĩ nẽẽ thooꞌthiok iccig, hĩnĩngĩtĩ baa hõllõngaa adĩmanni thooꞌthioha cieeg ĩĩcĩ burki.” 27Nĩngĩtĩ annẽẽkĩ Paaulo, “Habu Agirippa, elemi nii põrõvẽtaaꞌnya? Haga ngaatĩ ẽlẽmmĩ!”
28Ẽdẽcĩ Agirippa Paaulo anneek, “Occa ꞌyioko ammuhi nii ꞌthaawaa ꞌcĩ huturi ho, occa alũllũũmannaa nganĩĩt hikia hĩĩ Kristiaani#26:28 Kristiaani: Ĩĩn Kristiaani eet ꞌcĩ ẽlẽmĩ Krĩstõ, hĩnĩngĩtĩ ĩĩn Krĩstõ Makayyioohit nẽ ĩĩ Ellioohit cĩnnĩ. nĩĩcĩ noho?”
29Ẽdẽcĩ Paaulo anneek, “Hode hutur ꞌthaa hode uun, hala naa Nyekuc nẽ hõllõngaa hĩnĩngĩtĩ ngagiit diooni, nẽẽthĩ, hala hĩnĩngĩtĩ eet ꞌcĩg athĩkna nganĩĩt kõr ꞌcĩ iyyieni, hatĩ nuun hiita haauto hĩ naana, hõllõngaa thĩ hinnia hẽcẽbtĩ nyerikooꞌnyanĩ hĩ naana.”
30Nĩngĩtĩ ĩꞌngaannĩ habuui Agirippa hĩ ꞌgaalac cobbi Vẽẽthtõ hĩ Berenicce hĩ lothippit vẽlẽk ꞌjieena. 31Ma baa nga hõõt nẽẽgĩ, othoothito ĩĩtõ, “Nga hẽꞌthẽcan ẽẽtĩ ciee thõõth umwa. Hõllõngaa occa aruhi hode aarĩhoothĩk baabuuth.”
32Ma ho, ĩĩnnĩk Agirippa Vẽẽthtõ, “Ma hiittiõõ ẽẽtĩ ciee ngaatĩ atabĩ õkõ abĩllĩ muumaa cĩ habu cobbi cĩ ꞌRooma tõõ, occa baa alahanoothĩha.”
Zvasarudzwa nguva ino
Dtiicanĩ cĩg ꞌThooyyiahu 26: did
Sarudza vhesi
Sarudza zvinyorwa izvi
Yenzanisa
Pakurirana nevamwe
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© 2017, Wycliffe Bible Translators, Inc., All rights reserved.