1 Korinthia 5
5
Itiggiaac ꞌgotonu ꞌcĩ ĩĩn ꞌthẽccannioohit!
1Baa hathihi naa aĩ, aattĩg eeta ũgẽẽgĩ ꞌcĩg adĩman thooꞌthiok ꞌcĩg ĩĩn ꞌriiring hõrggẽẽnaa cunuung. Nẽ dĩdĩ, abaꞌthioothu niig ĩllõõattu eet ꞌcĩg hõllõngaa aga Nyekuc. Aĩ oogin aattĩ ẽẽtĩ hĩ ngamaacõnĩ. 2Irriannu hinnia niig hĩĩ nĩngĩtĩ ꞌcĩ occa aluyyu thõng nẽ itiggiayyu eet ꞌcĩ adtican thõõth ꞌcĩ aaĩ noho ho laiittaa cunuung battaala! 3Tananga nga haitiõõ naa dẽẽdẽ tõõ, aaĩ ꞌthĩnĩt caannĩ hĩ ngagiita. Nẽ hetteedĩha eet ꞌcĩ baa adĩman thõõth icci thõõth ẽlẽk, haau hĩcĩ haaĩ naa nĩĩca. 4Ma alũteennu niig ꞌthaarĩĩ cĩg Makayyioohit cĩnaac Yeesu nẽ haau naa hĩ ngagiit loriia nẽ aau ꞌtirriani cĩ Makayyioohit cĩnaac Yeesu, 5aanytĩk eet nicci ꞌThĩttaan, hátĩ horoong huduhoothĩk thõõth ꞌcĩ abũraneek ẽlẽ cĩnnĩ ho nẽ eellia lorii cĩnnĩ kõr ꞌcĩ hatĩ õbõdaanĩ Makayyioohiti.
6Aitiõõ ꞌrianĩĩthĩ cunuung ko hõllõngaa abũnnaa. Hõllõngaa nooyyia agayyu niig ngaatĩ ĩꞌthanõthõõthĩkĩ abũũlana ꞌcĩg abadtẽc haaga tũkan ꞌcĩ oꞌngoꞌnyi hũtũrũũr? 7Udduutit abũũla ꞌcĩg ũnũũhĩtõ! Nẽẽthĩ hatĩ aauttu niig hĩ ũbũnẽẽta ꞌcĩg nga ĩĩn ngeju ꞌcĩg aitiõõ abũũlana tõõ, nẽẽthĩ, aattiyyu niig buúk hĩ ũbũnẽẽta tĩko. Hĩnĩngĩtĩ ĩĩ Krĩstõ mĩꞌnyõõn cĩnaac ꞌcĩ Haangittõõ,#5:7 Kõr cĩ Haangittõõ: Ĩĩn ciee kõr ꞌcĩ ammuhaanĩ eeta cĩg ꞌJudeei kõr baa urwacanĩ nẽẽg hõdẽĩ hõdẽĩ, ngadihẽẽt cĩg hattũũgetu biyyiẽẽtĩĩ cĩg mĩꞌnyoonnu. Ĩnõõ baa aku ahaangĩ Makayyioohiti olooyyiok cĩggĩĩng looccaa cĩ Ijjibi baarkit nẽ tarĩ, ummukta kõr baa aduhi nẽẽg ũbũnẽẽt ꞌcĩg aitiõõ abũũlana tõõ. Tigiil ꞌBuuk cĩ Luugithõõ 12:17-28; Maarko 14:12; ꞌLuuka 22:7; Yõaannẽ 1:29-36; 1 Korinto 5:7; 1 Pẽẽtũrũ 1:19. baa ĩbbõõrĩ ĩĩ ꞌgaarrieenit ẽlẽk. 8Nẽẽthĩ hoti ho, huꞌthuutti karrama,#5:8 Karrama cĩ Ũbũnẽẽt ꞌcĩg aitiõõ Abũũlana tõõ: Baa adak eeta cĩg ꞌJudeei Karrama cĩ Ũbũnẽẽt ꞌcĩg aitiõõ Abũũlana tõõ, hummuktaaĩ kõr baa õõganĩ Nyekuci hĩbaangĩ cĩggĩĩng baag ĩĩn appahacaaꞌnya Ijjiba. Baa aꞌnyak karrama ciee waathinniook tũkĩramma. Waathinnioohĩĩ ꞌcĩg ĩĩn tũrkĩramma ho, aꞌngirannii hĩ eet cĩg ꞌJudeei ngaatĩ aduhi ũbũnẽẽt ꞌcĩg aarĩhoothĩk abũũlana. Tigiil ꞌBuuk cĩ Luugithõõ 13:1-10. hõllõngaa abũũlanĩĩ ꞌcĩg ũnũũhĩtõ ĩcĩg thõõth ꞌcĩ abathĩ, hode ĩcĩ ꞌthẽccaanõ, adahit karrama ũbũnẽẽtĩĩ ꞌcĩg aitiõõ abũũlana tõõ, ũbũnẽẽt cĩg thõõth ꞌcĩ ĩĩn dĩdĩ.
9Baa hẽtẽhẽẽdahuung naa ngagiit waragaawaa caannĩ hĩĩnnĩhuung, ma hookorru hĩ eet ꞌcĩg adĩman thooꞌthiok ꞌcĩg ĩĩn ꞌriiring. 10Nẽẽthĩ, baa aitiõõ naa hõllõngaa hothoothi eet cĩg looc nicci. Adiim occa uunniku niig looc nicci, hátĩ iliittia eet ꞌcĩg ĩĩn ꞌthẽccanniook hode lobolobbiaak hode eet ꞌcĩg ĩggõõl ꞌgõõnõgĩ hode eet ꞌcĩg ala hẽlẽggĩ ꞌcĩg aar eeta hĩĩtõ nyekuꞌnya. 11Nẽẽthĩ ꞌyioko, hẽhẽẽdakuung naa ngagiit waraga icci, hátĩ hiittiõõ hõllõngaa ookorru hĩ eet umwa ꞌcĩ aũ ẽlẽ cĩnnĩ anneek lemmioohit, ĩko nẽẽ ĩĩn eet ꞌcĩ adĩman thooꞌthiok ꞌcĩg ĩĩn ꞌriiring, ĩĩn lobolobbiaahit nẽ ĩĩ eet ꞌcĩ ala hẽlẽggĩ ꞌcĩg aar eeta hĩĩtõ nyekuꞌnya hode ĩĩn oloꞌngiaahit hode ĩĩn duuttiahit hode ĩĩn eet ꞌcĩg ĩggõõl ꞌgõõnõgĩ. Nẽẽthĩ, ma haduheennu hĩ eet ꞌcĩ aaĩ noho.
12Inni hetteedĩk naa eet ꞌcĩg hõllõngaa ĩĩn lemmiook thõõth ko? Hõllõngaa nooyyia occa etteediku niig eet ꞌcĩg ĩĩn lemmiook dioo thõõth? 13Ẽttẽẽd Nyekuci thõõth cĩ eet vẽlẽk. Nẽ aĩ ꞌBuuhi cĩ Nyekuci nẽẽ, “Itiggiayyieek eet cugguung ꞌcĩg ĩĩn ꞌthẽccanniook hõrggẽẽnaa cunuung battaala.”#Tigiil ꞌBuuk cĩ Ditoronomi 17:7; 19:19; 21:21; 22:21-24; 24:7
Zvasarudzwa nguva ino
1 Korinthia 5: did
Sarudza vhesi
Sarudza zvinyorwa izvi
Yenzanisa
Pakurirana nevamwe
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© 2017, Wycliffe Bible Translators, Inc., All rights reserved.