1 Korinthia 4
4
ꞌThooyyiak cĩg Krĩstõ
1Nẽẽthĩ, ĩcĩttaangu nganĩĩt hĩ Appoolo hĩ dticcianniooha cĩg Krĩstõ, ꞌcĩg baag aaꞌnyĩhoothĩkeet dtiici ꞌcĩ hẽddẽẽbaka eet thooꞌthiok ꞌcĩg Nyekuci ꞌcĩg ĩllõõan ꞌgẽẽnyĩth cĩ eetu. 2Nẽẽthĩ ꞌyioko, adiim eeta baag aaꞌnyĩhoothĩk dtiici hidticanit dtiic cĩnĩĩng jurrung. 3Hõllõngaa haallahi naa hatĩ etteedĩkaangu niig nganĩĩt thõõth lokihooaa cĩ eetu nẽ dĩdĩ, hõllõngaa hetteedihi naa ẽlẽ caannĩ thõõth ẽmmẽn. 4Tẽlla nganĩĩt ꞌthĩnĩt, nẽẽthĩ hinnianĩ, hõllõngaa haini naa hammiri thõng. Makayyioohit ꞌcĩ ẽttẽẽd thõõth caannĩ. 5Nẽẽthĩ hoti ho, ma hetteeddu thõõth umwa, hatĩ nga hũttũbanoothĩk kõrra, ereeyyio ĩꞌthõng hikia Makayyioohiti. Aku hatĩ appulanaak nẽẽ thooꞌthiok ꞌcĩg ammiꞌthi muguuratõõ battaali nẽ aꞌthalana muhẽẽnĩt cĩ ꞌthinneeti cĩg eetuk. Nẽ kõr niccia, ammũda hatĩ eeta hõdẽĩ hõdẽĩ dĩhĩthẽẽnĩt hĩ Nyekuc.
6Nẽ ꞌyioko ꞌgotoonoga hĩ ngoonoga, hidticanõõĩ naa thõõth icci ẽllaa caannĩ hĩ Appoolo, hĩnĩngĩtĩ bũnnai cunuung, hátĩ iita illimatta niig hĩ ngagĩĩt thõõth ꞌcĩ aĩ, “Ma hooyyu allacattĩ thõõth ꞌcĩ eheeddi ꞌBuuhaa cĩ Nyekuci.” Nẽẽthĩ hatĩ iittiõõ hõllõngaa irriannu ainnu, iiginnu mẽẽttĩg ĩllõõannu ꞌgoonogu. 7Ne ꞌcĩ ẽllẽẽmĩth hĩ ngagiit gẽrrẽẽt ko? Ne ꞌcĩ aꞌnyaku niig ꞌcĩ baa nga haaꞌnyĩhoothĩhuung ko? Nẽ má baa aaꞌnyĩhoothĩhuung ngagiit ꞌgii tĩho nẽ occa athĩngõõnyannu niig hutuno?
8Aꞌnyaktu niig hẽlẽggĩ vẽlẽk ꞌcĩg adiimmu niiga! Iittu niig balliook ẽlẽk! Iittu niig habuẽẽt nẽ hõllõngaa ngagĩĩt ꞌcĩg haaꞌnyuung ĩĩtõ habuẽẽt ko! Occa hadiimmuung naa ngagiit ĩĩtõ habuẽẽt dĩdĩ, hátĩ hĩĩtta naag buúk habuẽẽt hõdẽĩ hĩ ngagiita! 9Aaĩ hĩ nganĩĩt hĩcĩ aarĩkeet ngagĩĩt Nyekuci ꞌthooyyiak ngaatĩ abathĩ gẽrrẽẽt. Haattiyyia naag hĩ baabuuthnya ꞌcĩg õõt adaahito thõng. Aranneet aajĩlẽẽta hĩ eet cĩg looc nicci ngagĩĩta. 10Hĩĩgĩnna naag ꞌgiiꞌthiak, hĩnĩngĩtĩ Krĩstõ, nẽẽthĩ hinnia, eggeeꞌnyu niig hĩ Krĩstõ! Hõllõngaa hattiranna naaga, nẽẽthĩ hinnia, attirannu niiga! Iꞌngoliinnuung eeta ngagiita nẽ hõllõngaa iꞌngoliinneet ngagĩĩta! 11Hĩĩ noho, nga aalla adakeet magĩthĩ nẽ aammeet kõrra, hahimteenna ceremwaanĩĩ ꞌcĩg ꞌthaꞌtharĩg, adĩmanneet eeta ꞌbuth nẽ aitioonneet õlõ tõõ. 12Hadticaniinna gẽrrẽẽt athĩnĩĩ cĩggaang ẽmmẽn. Má accĩĩnneet eeta, haggatanna naag thõng, má adĩmanneet eeta ꞌbuth, hẽmmẽẽꞌtha. 13Má othooꞌtheet eeta ꞌbuth, hẽdẽcca tarbalꞌthẽẽta. Acĩnneet eeta cĩg looc nicci hĩ tahaha haaga, hĩĩ kõr hĩ niccieeni.
14Hõllõngaa heheedi naa thooꞌthiok iccig, hátĩ haanytuung ngagiit ngaaoni, nẽẽthĩ, haĩ hitiloouung naa hĩ lohollia cĩgannĩg ꞌcĩg hammĩnani ꞌthĩnĩta. 15Tananga aꞌnyahit bekiook aalibꞌnya õmmõtõ thõõthaa cĩ Krĩstõ, hõllõngaa aꞌnyaku maajihu ꞌcĩg mẽẽlĩg nẽ hĩnĩngĩtĩ Yeesu Krĩstõ, hikia hĩĩna naa maaꞌnyu nyeemuutaa ꞌcĩ abũnnaa. 16Nẽẽthĩ hoti ho, halayyuung naa ngagiit, hátĩ ĩthahĩꞌthiaangu nganĩĩta. 17Hĩnĩngĩtĩ thõõth icci, hĩꞌthõõakuung naa ngagiit Timotteeo, loholeec caannĩ ꞌcĩ hammĩna nẽ aꞌthũũnnĩ thõõth cĩ Makayyiookto. Ammuhaakuung hatĩ nẽẽ ngagiit authet caannĩ ꞌcĩ hanũĩ Yeesu Krĩstõ ꞌcĩ aduhõõ hĩ thõõth ꞌcĩ hallimanĩĩ naa lothippit cĩ lemmioohu ꞌtaaũnnioohĩ vẽlẽk ĩĩcĩg hõkõõĩ naana.
18Aattĩg eeta ũgẽẽgĩ hõrggẽẽnaa cunuung ꞌcĩg athĩngõõnyan, haauto hĩcĩ hatĩ hõllõngaa hakuu naa hĩ ngagiita. 19Nẽẽthĩ, hakuu hatĩ naa hĩ ngagiit hĩdĩĩkoothong, hatĩ ẽlẽmaaka Makayyioohiti nẽ hatĩ hikia hũmmũda, hõllõngaa ꞌgõõl ꞌcĩ õthõõthĩ eeta ꞌcĩg athĩngõõnyan ko diooni, nẽẽthĩ, hakuu hátĩ hikia hũmmũda ꞌtirrian ꞌcĩ aꞌnyak nẽẽgĩ. 20Hĩnĩngĩtĩ hõllõngaa ĩĩn habuccieet cĩ Nyekuci thõõth ꞌcĩ hõthõõth ũtũũga haaga, nẽẽthĩ, ĩĩn thõõth cĩ ꞌtirrianõ. 21Ne ꞌcĩ adiimmu niig hikia hĩdĩmaneehuung naa hatĩ hõdõlanuunga? Adiimmaangu niig nganĩĩt hikia hĩ ngagiit hĩ ẽẽtĩ ꞌcĩ aꞌngaꞌngarĩĩ thõng, hode hĩ ẽẽtĩ ꞌcĩ aꞌnyak mĩnnan hĩ tarbalꞌthẽẽt?
Zvasarudzwa nguva ino
1 Korinthia 4: did
Sarudza vhesi
Sarudza zvinyorwa izvi
Yenzanisa
Pakurirana nevamwe
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© 2017, Wycliffe Bible Translators, Inc., All rights reserved.