1 Korinthia 1
1
ꞌThaainit hĩ laiinit cĩ Paaulo
1Nganĩĩt Paaulo baa ẽbẽraanna Nyekuci hĩĩ ꞌthooyyiahit cĩ Yeesu Krĩstõ tabiittaa cĩnnĩ, hõdẽĩ hĩ ꞌgotooneet Thõõthẽnẽ.
2Hẽhẽẽdakuung naa ngagiit waraga, lothippit cĩ lemmiook cĩg Nyekuci ꞌtaaũnaa cĩ Korinthia. Baa ẽbẽraauung Yeesu Krĩstõ ngagiit ĩĩtõ eet cĩgĩnnĩg dẽẽdẽ nẽ alayyioou ꞌthaarĩĩ cĩgĩnnĩg, haau hĩcĩ ꞌyioko hala naag hĩ eet ũgĩ vẽlẽk ꞌcĩg aũ ĩnõõnnõ anneek Makayyioohit.
3Aꞌnyĩĩk bũnnai hĩ ganõn ꞌcĩ aku hĩ Nyekuc Bangeet cĩnaac hĩ Makayyioohit Yeesu Krĩstõ haau hĩ ngagiita.
Ĩlaallẽ hĩ Nyekuc
4Hanneehi naa Nyekuc hõdõõkõthĩ ĩlaallẽ, hĩnĩngĩtĩ ngagiit ngaatĩ aaꞌnyuung bũnnai cĩnnĩ ꞌthaarĩĩ cĩg Yeesu Krĩstõ. 5Hĩnĩngĩtĩ ĩnõõnnõ, iita aballioou niig ꞌgoolliohĩ vẽlẽk, ꞌgõõlaa ꞌcĩ othooꞌthu hĩ ꞌgẽẽnyĩthaa cunuung vẽlẽk. 6Nẽẽthĩ ꞌyioko, iita agayyu niig ngaatĩ ĩĩnnĩ thõõth baa haduhaakuung naag ngagiit vẽlẽk dĩdĩ, hĩnĩngĩtĩ Makayyioohit cĩnaac Yeesu Krĩstõ. 7Nẽẽthĩ hoti ho, aꞌnyaku niig ꞌbaaninit cĩ Loriio nga ereeinnu taliitta, huppwaanna Makayyioohiti cĩnaac Yeesu Krĩstõ. 8Aaꞌnyuung hatĩ nẽẽ ngagiit ittiranit ĩꞌthõng kõr ꞌcĩ hatĩ õbõdaanĩ nẽẽnĩ, hátĩ ĩmmĩrĩt niig kõrraa cĩ Makayyioohit cĩnaac Yeesu Krĩstõ. 9Nyekuci ꞌcĩ aũyyuung ngagiit iita ũrũmtĩ hĩ Ngeerĩnĩ Yeesu Krĩstõ Makayyioohit cĩnaac ko, ĩĩn Nyekuc ꞌcĩ aꞌthũũnnĩ thooꞌthiok.
Ngẽrõõnĩt hõrggẽẽnaa cĩ lemmioohu
10Hammaannikuung naa ngagiit ꞌgotoonoga hĩ ngoonoga, ꞌthaarĩĩ cĩg Makayyioohit cĩnaac Yeesu Krĩstõ, ũrũmtĩ baaĩ nuun niig vẽlẽk, hátĩ hiittiõõ ngẽrõõnĩtĩ hõrggẽẽnaa cunuung tõõ, hátĩ horoong ũrũmtĩ jurrung muhẽẽtta hĩ ꞌthinneetinii cugguung. 11ꞌGotoonoga hĩ ngoonoga, baa aduhaaka eeta ũgẽẽgĩ ꞌcĩg au halangatõõ cĩ Keloe anneeka, eggerꞌnyoonnu baa niiga. 12Thõõth ꞌcĩ haini naa ho cieeni, aĩ eet umwaa hõrggẽẽnaa cunuung nẽẽ, “Hanũ naa Paaulo,” nẽ ĩĩ umwaa, “Hanũ naa Appoolo,” nẽ tarĩ ĩĩ umwaa, “Hanũ naa ꞌCeeva,” nẽ tarĩ nga aĩ umwaa, “Hanũ naa Krĩstõ.”
13Eꞌngerri nooyyia baa Krĩstõ thõng? Õdõõddĩ baa Paaulo hurucceea, hĩnĩngĩtĩ ngagiita? Aggammu baa niig baattithimo ꞌthaarĩĩ cĩg Paaulo? 14Hanneehi naa Nyekuc ĩlaallẽ, hĩnĩngĩtĩ baa nga haggameehuung naa ngagiit baattithimo. Baa Kirithpo dioo hĩ ꞌGaio, ꞌcĩg baag haggameehi naa baattithimo. 15Nẽẽthĩ, occa aitiõõ eet umwaa ꞌcĩ õthõõth aĩ, baa aggammu niig baattithimo ꞌthaarĩĩ cĩgannĩg tõõ. 16Dĩdĩ, baa haggameeha naa halang cĩ Tẽẽvana buúk baattithimo, hĩllõõan thõõth niccia, hõllõngaa hammuhunoothi hatĩ baa haggameeha eet umwa baattithimo. 17Hĩnĩngĩtĩ baa hõllõngaa ĩꞌthõõannaa nganĩĩt Krĩstõ hikia haggameek eet baattithimo, baa anneeka nẽẽ nganĩĩt ꞌlimmaneek eet nyeemuut ꞌcĩ abũnnaa, hõllõngaa thĩ hinnia ꞌgẽẽnyĩthaa cĩ eet ꞌcĩ holli õõ haaga, hátĩ hiittiõõ ꞌtirriani cĩ hurucce cĩ Krĩstõ hõllõngaa aꞌnginoothi.
ꞌGẽẽnyĩth cĩ Nyekuci
18Hĩnĩngĩtĩ ĩĩn nyeemuut cĩ hurucceeo ꞌgiithẽnĩt hĩ eet ꞌcĩg hatĩ adaahĩ, nẽẽthĩ, hĩ ngagĩĩt ꞌcĩg heelliaa ho, ĩĩn ꞌtirrian cĩ Nyekuci. 19Hĩnĩngĩtĩ eheeddi aĩ,
“Hĩꞌthaani hatĩ naa ꞌgẽẽnyĩth cĩ ꞌgeeꞌnyiahu,
nẽ hẽꞌthẽcana ꞌgẽẽnyĩth cĩ eet ꞌcĩg ẽggẽẽnyĩthĩ.”#Tigiil ꞌBuuk cĩ Iꞌthaia 29:14
20Aaĩ ẽẽtĩ ꞌcĩ ẽggẽẽnyĩth ko ĩĩna? Aaĩ ẽẽtĩ ꞌcĩ aga thõõth gẽrrẽẽt ĩĩna? Aaĩ ẽẽtĩ ꞌcĩ aga thõõth cĩ looc vẽlẽk hĩ rũgẽt cĩ eeto ĩĩna? Nga nooyyia baa higgiith Nyekuci ꞌgẽẽnyĩth cĩ lootu? 21Baa ẽggẽẽnyĩth Nyekuci ngaatĩ hõllõngaa aaꞌnyĩkĩ eet cĩg looc nicci hidticattõõĩ ꞌgẽẽnyĩth cĩnĩĩng hagayyi ĩnõõnnõ. Nẽẽthĩ hinnianĩ, baa ẽbẽra Nyekuci ngaatĩ ẽẽlĩ eet ꞌcĩg ẽlẽmĩ nyeemuut ꞌcĩ aggiithi ꞌcĩ hallimanna naag ko diooni. 22Adiim eeta cĩg ꞌJudeei thooꞌthiok ꞌcĩg ĩnaat eeta nẽ idiimito eeta cĩg ꞌGirihi ꞌgẽẽnyĩth, 23nẽẽthĩ, hallimaneeka naag eet thõõth ꞌcĩ odooddini Krĩstõ hurucceea. Õkõmĩ hĩ eet cĩg ꞌJudeei thõõth cieeni nẽ ummuhit eeta ꞌcĩg mẽẽlĩg ꞌcĩg hõllõngaa ĩĩn ꞌJudeei ĩĩtõ, ĩĩn thõõth ciee ꞌgiithẽnĩt. 24Nẽẽthĩ, hĩ eet ꞌcĩg aũ Nyekuci, ꞌJudeei hĩ ꞌGirik vẽlẽk, ĩĩn Krĩstõ ꞌtirrian cĩ Nyekuci nẽ ĩĩ ꞌgẽẽnyĩth cĩ Nyekuci. 25Tananga higgiithi Nyekuci, ẽggẽẽnyĩth nẽẽ ĩllõõan eet vẽlẽk, tananga aaĩ nẽ hĩcĩ hõllõngaa attiranĩ, ĩko nẽẽ attiran ĩllõõan eet vẽlẽk.
26ꞌGotoonoga hĩ ngoonoga, ummuhuttooth da nõõ aattiyyu baa niig hutuno, baa ẽbẽraannuung ngagiit Nyekuci. Baa hõllõngaa ammuk eeta cĩg looc nicci aĩ, mẽẽlĩg eeta ꞌcĩg ẽggẽẽnyĩth hõrggẽẽnaa cunuung. Baa hĩdĩcĩg hõrggẽẽnaa cunuung eeta ꞌcĩg aꞌnyak makaaꞌthĩt nẽ baa hĩdĩcĩg hõrggẽẽnaa cunuung eeta ꞌcĩg au halaꞌngiõõhĩĩ ꞌcĩg aballi. 27Nẽẽthĩ, baa ẽbẽra Nyekuci thooꞌthiok cĩg ꞌgiithẽttaak cĩg looc nicci, hátĩ haaꞌnyĩk ngaaoni eet ꞌcĩg ẽggẽẽnyĩthĩ nẽ ẽbẽra thooꞌthiok ꞌcĩg hõllõngaa attiran cĩg lootu, hátĩ haaꞌnyĩk eet ꞌcĩg attiran ngaaoni. 28Adticaniini Nyekuci eet ꞌcĩg arannĩ eeta cĩg looc nicci aĩ, hõllõngaa aaddi hode aĩ ĩĩn eet ũgĩ haaga, hĩꞌthaanĩ thooꞌthiok ꞌcĩg ammuk eeta ꞌcĩg looc nicci aĩ aaddi. 29Adĩman Nyekuci thooꞌthiok iccig vẽlẽk, hátĩ hiittiõõ ẽẽtĩ ꞌcĩ athĩngõõnyan muumaa cĩnnĩ tõõ. 30Iiginnu niig lõhõlĩ cĩg Nyekuci, hĩnĩngĩtĩ baa ĩꞌthõõa nẽẽ Yeesu Krĩstõ hikia hẽẽlaeet ngagĩĩta nẽ aaꞌnyeet Nyekuci ngagĩĩt heggeenyit. Ĩnõõ ꞌcĩ elemmeet nẽẽ ngagĩĩt hĩĩtõ eet cĩgĩnnĩg ꞌcĩg hẽllẽẽmĩth ko. 31Nẽẽthĩ hoti ho, hĩcĩ eheeddi ꞌBuuhaa cĩ Nyekuci aĩ, “Má adiim ẽẽtĩ umwaa irrianĩ, aꞌnyĩĩk hirrianĩ Makayyioohit.”#Tigiil ꞌBuuk cĩ ꞌJeremia 9:24
Zvasarudzwa nguva ino
1 Korinthia 1: did
Sarudza vhesi
Sarudza zvinyorwa izvi
Yenzanisa
Pakurirana nevamwe
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© 2017, Wycliffe Bible Translators, Inc., All rights reserved.