Gar lar tiq liq 1
1
Awg chawd teq pa haq duhd nuhd che tawd
1-2Ngag cuh yad phehq che Pawd loq#1:1-2 Pawd loq Awg yand u ve haq teq co haq ve chaw liq buhq daq che te yand, i hehd ve awg meh haq awg kawd maq tanr buhq che awg lid cawg che yaog. he lehq ngag geh chehd che a vix a nax teq pa awr lehr, Gar lar tiq muhd mig awg khuhn cawg che Khreq yad awg mor teq pa haq liq buhq fea che yaog. Ngag cuh yad#1:1-2 cuh yad Kanx ted ceng cear te tug lez yug lehq fir teh lar che chaw haq koz che. te che awr lehr, chaw yad geh lo gha che ma hez. Chaw yad haq te lehq phehq lag che liz ma hez. Yer suq Khreq he lehq yawd haq suh kig lo kawq teq tuag vid sehr phad Awr pa Ghig sa haq te lehq te lag che yaog.
3A nig ved Awr pa Ghig sa he lehq Jawd mawd Yer suq Khreq ve awg bon awg sinx he lehq duhd sa gad sa che nig hehd geh cawg vid-oq. 4Jawd mawd Yer suq Khreq awr lehr, a nig ved Awr pa Ghig sa ve a lor cawd che heh, haeg che che teq co#1:4 haeg che che teq co Mig gig che haq haeg che awg sehr phad uq penr chehd che yaog, lehz Yud daq chaw teq pa yonr che yaog. awg khuhn a nig haq pong ax tug, a nig ved vend bax awg pun yawd awg ton chid aq vid che yaog. 5Awr pa Ghig sa haq co co taer taer chid ir chid muh vid-oq. A meng.
Awg kag awr ve ha lehg che bon khuhd mad cawg
6Khreq ve awg bon awg sinx haq cud lehq nig hehd haq kug yug lar che Ghig sa haq har naq chid bag lar haz lehq awg kag awr ve ha lehg che bon khuhd#1:6 awg kag awr ve ha lehg che bon khuhd Ma hez hez che bon khuhd haq koz che yaog. haq nig hehd haq yug che haq te lehq, ngag and jad che yaog. 7Awg kag awr ve ha lehg che bon khuhd cawg cehg mag che ma hez. Kheh ma khuhd, nig hehd haq soq saq tug tea lehq Khreq ve ha lehg che bon khuhd haq yug phuhz gad che chaw#1:7 yug phuhz gad che chaw Ma hez hez che Sar lar teq pa haq koz che yaog. 2Ti 4:3-4 ted pehg pehar cawg che yaog. 8Kheh liz, ngag hehd nig hehd haq mar lar peg che ha lehg che bon khuhd haq ma caz daq che awg kag awr ve bon khuhd haq ngag hehd lehd ma koz, muhd nuh maq lo lag che muhd nuh maq cuh yad lehd ma koz, nig hehd haq mar ver, khen che haq gha khanr vid-oq. 9Pong lag thad ngag hehd koz lar che heh, ngag te pawz kawq koz ax sar. Nig hehd haq yug peg che ha lehg che bon khuhd haq ma caz daq che awg kag awr ve bon khuhd haq chaw te ghad ghad nig hehd haq mar ver, muhd naz hoq khuhn khen che haq gha khanr vid-oq.
10Ngag che kheh koz che awr lehr, chaw yad ni ma cawd tug#1:10 chaw yad ni ma cawd tug Chaw yad chid muh ax che haq koz che yaog. ngag te che la. Ma hez ver, Ghig sa ni ma cawd tug ngag te che la. Chaw yad teq pa ni ma cawd tug ngag ca che la. Chaw yad teq pa ni ma cawd tug ngag ca chehd ser che ver, ngag awr lehr Khreq ve awg ceg te che ma hez hawg.
Pawd loq ha lehg che bon khuhd mar che awg lawn
11A vix a nax teq paog, ngag mar vid lar che ha lehg che bon khuhd awr lehr, chaw yad geh tuhaz che ma hez lehz, ngag nig hehd haq kha nehax sir cuha gad che#1:11 sir cuha gad che Chaw ted pehg pehar Pawd loq awr lehr Yer suq lez yug lar che ma hez lehd koz che haq te lehq, yawd liz Yer suq lez yug lar ax che chaw yaog lehd koz gad che yaog. yaog. 12Awg lawn ghod ver, chaw yad geh lo ngag gha che ma hez. Su ngag haq mar ax che liz ma hez. Yer suq Khreq ngag haq pheq mar ax che haq te lehq gha che yaog.
13Yud daq chaw ve awg lid#1:13 Yud daq chaw ve awg lid Ghig sa Mod ser haq pid lar haz che a kor pi che awg lid haq koz che yaog. awg khuhn ngag chehd ser che te yand, ngag khawd-ehg kheh te che awg lawn haq nig hehd kad jaw che yaog. Awg yand u ve haq, Ghig sa ve Khreq yad awg mor#1:13 Khreq yad awg mor Liq phu awg suhx coaq thad heh cawg tuhaz che awg mor haq koz che yaog. Cy 11:26 haq ngag hax ceh nux du deh lehq lug vehr tug te che yaog. 14Ngag ved a pux a pi teq pa teh lar haz ax che awg lid#1:14 a pux a pi teq pa teh lar haz ax che awg lid Yud daq chaw teq pa ve awg lid haq koz che yaog. Mt 15:2 teq pa haq te tug ngag ni ma puhd jad che haq te lehq, ngag ved chaw ceng awg khuhn a saq ngag kheh tawa ve chaw mad-awr ve haq keh Yud daq ve awg lid haq ngag hax ceh te che yaog.
15Kheh ma khuhd, ngag maq pawag ser liz ngag haq lez yug lehq, yawd ved awg bon haq te lehq ngag haq kug yug lar che Ghig sa awr lehr, 16yawd ved Yad phu awg lawn ha lehg che bon khuhd bid saz a naz chaw#1:16 bid saz a naz chaw Yud daq chaw ma hez che chaw teq pa haq koz che yaog. teq pa haq mar vid tug, yawd a lor cawd che heh, yawd ved Yad phu ngag haq yawd pheq mar ax che yaog. Che kheh te pheq mar ax peg khaz nuhr, chaw yad geh ngag teq pear lehax ca jehg daq che ma hez. 17Kheh te lehq, ngag cuh yad mad phehq lag ser huh cuh yad te chehd che Yer ruq sar lehnr med khuhn lo chehd che chaw teq pa geh ngag maq kae. Ar raq muhd mig#1:17 Ar raq muhd mig Dar mar sehq med haq te lehq Ed jid tuq muhd mig kha gag ve muhd mig haq koz che yaog. lo teq pear lehax ngag kae lehq, awg khaz nuhr Dar mar sehq#1:17 Dar mar sehq A mig thad Sud riq muhd mig ve med nux te lehq, awg yand u ve haq te coaq Ar ranr lehd koz meh che yaog. med lo kawq lag che yaog.
18U ve khaz nuhr, seh khuhq gag che te yand, Ker phaq#1:18 Ker phaq Per troq haq koz che yaog. Che awr lehr Ar rar miq khuhd te lehq “Huhx meh” lehd koz gad che yaog. geh ngag ca gid-eg tug Yer ruq sar lehnr med lo kae lehq, yawd geh teq chi ngad ni kha gag chehd lar haz che yaog. 19Jawd mawd Yer suq ve awg nax var Yar koq#1:19 Yar koq Yer suq ve awg nax var te lehq, Yer ruq sar lehnr med awg khuhn ced caor Sar lar te che yaog. Mt 13:55 haq ma hez ver, awg kag awr ve cuh yad te ghad-eg haq liz ngag mad mawg. 20(Ngag nig hehd haq liq che kheh te buhq ax che awr lehr, ngag her ka che ma hez lehz, Ghig sa mehz khuhd suhr ngag koz che yaog.) 21U ve khaz nuhr, Sud riq he lehq Kid lid kiq#1:21 Sud riq he lehq Kid lid kiq Ar siq muhd mig khuhn cawg che muhd mig nehax ni pez yaog. Cy 9:30 muhd mig lo ngag kae che yaog. 22Awg yand u ve haq, Khreq khuhn chehd che Yud daq muhd mig awg khuhn cawg che Khreq yad awg mor teq pa ngag haq mad mawg jaw ser. 23Pong lag thad ngag hehd haq du deh jaw che#1:23 du deh jaw che Pawd loq Khreq yad teq pa haq du deh vid jaw che haq koz che yaog. Cy 9:1-2 te ghad awr lehr, yawd lug vehr tug te vid jaw che yonr che ted ceng haq a meha bon mar chehd che yaog lehd, koz che awg khuhd haq lehax i hehd gha kad che yaog. 24Ngag haq te lehq i hehd Ghig sa haq chid ir chid muh che yaog.
Zvasarudzwa nguva ino
Gar lar tiq liq 1: lhiNT
Sarudza vhesi
Sarudza zvinyorwa izvi
Yenzanisa
Pakurirana nevamwe
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© 2015, Wycliffe Bible Translators, Inc. All rights reserved.