ဇဝ်ဖြာ ဟဲ့ ဟွတ့် ကာလာင် ပါယ် တီ အန် ဝီ တဝ်း၊ “ခဲင် မှိုဝ် နီ အုဝ် ဒီ လိုပ် ခဲင် ကာင် ဒွန် ကာင် ခဲင် မိူင် အဲဂိုပ် ဘော မိူင်။ အုဝ် ဒီ ငဝ်း ယမ် ဂွန် အီမာယ် ဒွန် အီ အီ မုး ဂွန် ဂိန့်။ ဘော ဒူအီ ဘော ဒုဝ် ဆတ်ဒါဝါ အီ ကွယ် ဒွန် မာန် ဒွန် မိူင်၊ ဂေ ဂွန် ဂိန့် ဒီ ဘော ယမ်။ အုဝ် မုး ဇဝ်ဖြာ အာခါခ်ု။ ခုဝ်၊ အုဝ် ဒီ ဘူင် တဲး ဂေ ဒူအီ အဲဂိုပ် ကော နပ်၊ ဇဝ် ပီ ကြိုပ် ဂေ ဘဲန် မျုဝ် ဘဲန် မျုဝ်၊ ဂေ ဟဲ့ စှိုမ်၊ အာဝ် မိုဝ်း ပွုန်။ နှာမ် မာဘူ ပီ ဖဝ်း ဘေ ဒီ ကာင် ဘေ၊ န့ ဒီ ဘဲန် လက်ဆာနာ ဒီ အုဝ်။ ဒေါ ငဝ်း အုဝ် ဂေ ဒူအီ အဲဂိုပ်၊ ဆေ အုဝ် ယိုဝ် နှာမ် ဒီ မာလုဝ်း ကာင်၊ အုဝ် ဒီ ကာလုဝ်း ကာင် တီ။ ပါယ် တီ န့ ဒီ ဘဲန် ဒုက် တာင် ဒီ ဂေ ဒူအီ အဲဂိုပ်။ ဘေ ယီ တူ ကာဒုး ဒုက် မာဆေ။
