Mavhesi emuBhaibheri Ane Mukurumbira kubva kuna ROMA 12

Pakurirana nevamwe

Aja' muwaccowériwi peraturang-peraturang linoéwé. Leppessanni Allataala mébbui paribadimmu mancaji mabaru, kuwammengngi mutappinra. Rimakkuwannanaro mulléi missengngi élona Allataala – iyanaritu aga iya makessingngé sibawa iya sennangiyéngngi atin-Na sibawa iya sukkué.

Saudara-saudara! Makessing senna'i Allataala lao ri idi. Iyanaro saba'na uwéllauwi sibawa masero kuwammengngi muwakkasuwiyangengngi aléna selaku séddi akkalarapangeng tuwo iya ripallaingngé untu' Allataala sibawa pésennangiwi atin-Na. Assompako lao ri Allataala harusu'i makkuwaro.

Sitinajai Saudara mamménasa lao ri Puwangngé sibawa marennu, sabbara'no ri laleng asussangngé, sibawa mattinetto massempajang.

Aja' muleppessangngi alému ricau ri majaé, iyakiya sitinajai Saudara caui jaé sibawa adécéngeng.

Sitinajai Saudara-saudara siyamaséi séddié lao ri laingngé sibawa siyélori pada-pada tau iya massilessurengngé ri laleng séddié kaluwarga, sibawa sitinajako sipoddiyoloi sipakaraja.

Mamaséno sibawa matinulu. Benciwi iya majaé, sibawa akkatenninno lao ri aga iya makessingngé.

Polé ri iko, akkuragano siullé-ullému untu' tuwo sidamé sibawa sininna tauwé.

Saudara-saudaraku! Aja' sises-siseng muwakkabale, leppessangngi Allataala pahukkung. Saba' ri laleng Kitta'é tarokii, “Iyya ritu makkabale'. Iyya maélo hukkungngi, adanna Puwangngé.”

Ajjamano sibawa mapato. Aja' mumakuttu. Ajjamano untu' Puwangngé sibawa sumange' polé ri Rohna Allataala.

Allataala pura mabbéré pammasé lao ri iyya. Iyanaro saba'na upangajari manengngi Saudara-saudara: Aja' muwasengngi alému lebbi matanré naiya sitongennaé. Sitinajako mangke'i keadaammu sibawa ati mariyawa; tungke'-tungke' mangke'i aléna situru pakkulléng iya nabbéréyangngé Allataala lao ri aléna nasaba mateppe'i lao ri Yésus.

Rékko pogau'i ja tauwé lao ri iko, aja' muwale'i sibawa ja. Pogau'i aga iya nangga' makessingngé sininna tauwé.

Tuwono sipammasé-masé séddié lao ri laingngé. Aja' mumatanré ati, iyakiya pappada-padai alému sibawa tau iya mariyawaé. Aja' muwangga'i alému lebbi acca naiya sitongennaé.

Sibalé'na, rékko malupui balimmu, panréi, sibawa rékko madekkai, paénungngi. Nasaba ri laleng mupogau'na makkuwaéro, mupakasirii matu.

Ellauwi ri Allataala kuwammengngi nabarakkakiwi sining tau iya mapéddaraé lao ri iko. Ellauwi Allataala barakkakiwi mennang, aja' mutanroiwi. Accowéno marennu silaong sining tau iya marennué, sibawa terino silaong mennang iya teriyé.

Tulungngi paggenne'i apparelluwanna sining tau Kristéng laingngé enrengngé tarimai Saudara-saudara siatepperengngé iya dé'é muwissengngi, sibawa ati masennang ri lalempolamu.

Watakkaléta mappunnaiwi maéga anggota. Tungke' anggota mappunnaiwi jamang. Makkuwatoro sibawa idi. Namuni idi manengngé maégaki, iyakiya sinrupaki séddié watakkalé nasaba idi masséddiki ri Kristus. Sibawa tungke'-tungke'ki sisumpung séddié sibawa laingngé selaku anggota-anggota polé riséddié watakkalé.